འཛམ་གླིང་སྟེང་གི་ཆེས་ལོ་ན་མཐོ་བའི་བོད་ཡིག་གསར་སློབ་པ།

ཁོ་མོའི་མིང་ལ་འཛམ་ལྷ་ཟེར་ཞིང་མོ་ལོ་བརྒྱད་ཅུ་གྱ་ལྔ་སླེབ་འདུག་ཕ་ཡུལ་ཁྱུང་མཆུ་རྫོང་རྨེ་བ་ཡུལ་ཤོག་ནས་རེད།ཕྱི་ལོ་ཉིས་སྟོང་བཅུའི་དགུན་དུས་སུ་ཁྱུང་མྱུག་ཚོགས་པ་ཞེས་པའི་གྲྭ་རྐྱང་ལྷག་བསམ་གྱིས་ཕྱུག་པ་སྐོར་ཞིག་གིས་ས་དེར་བོད་ཡིག་རྨོངས་སེལ་གྱི་འཛིན་གྲྭ་སྒྲུབ་དུས་ལོ་ན་ཆེས་ཆེ་བའི་དབྱངས་གསལ་སྦྱོར་ཀློག་སློབ་མཁན་གྱི་སློབ་མ་རེད།ཕལ་ཆེར་ཟླ་བ་གཅིག་གི་རིང་ལ་ཉི་མ་རེ་རེ་བཞིན་སློབ་སྦྱོང་ལ་མ་ཆད་པར་ཡོང་སྟེ།དབྱངས་གསར་སོ་བཞི་འབྲི་ཀློག་གཉིས་ཀ་ཤེས་པར་གྱུར།ཁོ་མོའི་བཤད་རྒྱུར།ང་ནི་སྐྱེས་ནས་ད་ལ་མ་ཐུག་གི་བར་དུ་ཡི་གེ་སྦྱོང་བའི་གོ་སྐབས་རྙེད་མ་སོང་།ད་ཐེངས་ཁྱེད་རྣམ་པས་དཀའ་མོའི་ཚེགས་དང་དཀོན་མོའི་རྒྱུའི་འགྲོ་སོང་བཏང་སྟེ་སྒོ་ཁར་ཡི་གེ་སློབ་ཏུ་འོངས་བར་དངོས་གནས་བཀའ་དྲིན་ཆེ་སོང་།ང་ཡང་ད་བར་དུ་མ་ཤི་བར་ལུས་པ་འགྲིག་འདུག་ད་རེས་ངས་ཀྱང་ཡི་གེ་སློབ་ན་འདོད་སྔོན་བླ་མ་རྣམས་པས་ཀ་ཁ་སུམ་ཅུ་ཤེས་སོང་ན་དུད་འགྲོའི་སྐྱེ་སྒོ་ཁེགས་གསུངས་པས་ངས་ཀྱང་ཀ་ཁ་སུམ་ཅུ་མ་ཤེས་ཐབས་མེད་ཡིན་ཟེར་ཞིང་།མོ་ལོ་གྱ་ལྔའི་རིང་ལ་ཡིག་རྨོངས་སུ་ལུས་པའི་སྡུག་ཡུས་ཀྱི་མིག་ཆུའང་གདོང་གི་གཉེར་མའི་གསེང་དུ་ག་ལེར་བཞུར་སོང་།སྤུན་ཟླ་ཚོ།ང་དང་ཚོའི་ཁོར་ཡུག་ན་འདི་དང་འདི་འདྲ་བའི་ཡིག་རྨོངས་པ་ག་ཚོད་ཅིག་ཡོད་ལ་དེ་དག་གི་སེམས་ཁོང་ན་སྐྱོ་སྡུག་གི་བྲོ་བ་ཅི་འདྲ་ཞིག་མཆིས།
ཞེས་༢༠༡༡ལོའི་༧ཚེས༢༦ལ་ཁྱུང་མྱུག་ཚོགས་པས་རྒྱུ་ཆ་མཁོ་སྤྲོད་བྱས་པ་བཞིན་མཁས་གྲུབ་རྒྱལ་མཚན་གྱིས་འདི་བྱས་སོ། །