ཨོྃ་ཨཱཿཧཱུྃ་ཧྲཱི༔ །  ། བདེ་ཆེན་འབར་བ་དབང་གི་ཕོ་བྲང་དུ། །བདེ་སྟོང་སོ་སོར་རྟོག་པའི་ཡེ་ཤེས་སྐུ།  །   

མ་ཆགས་བདེ་ལྡན་པད་མའི་རང་བཞིན་ལས།  །རྡོ་རྗེ་ཉི་མ་སྣང་བ་ཆེན་པོའི་དཔལ། །    

ཆོས་སྐུ་སྣང་བ་མཐའ་ཡས་རྡོ་རྗེ་ཆོས།  །འཇིག་རྟེན་དབང་ཕྱུག་ཐུགས་རྗེས་རྗེས་ཆགས་གཟུགས། །

པད་མ་རྒྱལ་པོས་འཁོར་འདས་མངའ་དབང་བསྒྱུར།  །སྣང་སྲིད་ཟིལ་གནོན་དབང་ཆེན་ཧེ་རུ་ཀ ། །

གསང་བ་ཡེ་ཤེས་བཛྲ་ཝ་ར་ཧི།  །བདེ་མཆོག་འདོད་པའི་རྒྱལ་པོ་བདེ་ཆེན་གཏེར། །

མ་ལུས་སྐྱེ་རྒུའི་ཡིད་འཕྲོག་རིག་བྱེད་མ།  །མཆོག་ཐུན་ཕྱག་རྒྱའི་དབང་ཕྱུག་བདེ་སྟོང་གར། །

དབང་མཛད་རྡོ་རྗེ་དཔའ་བོ་ཌཱ་ཀིའི་ཚོགས།  །སྣང་སྟོང་མཉམ་པ་ཆེན་པོའི་ངང་ཉིད་དུ། ། 

རྡོ་རྗེ་སྐུ་ཡི་གར་གྱིས་སྲིད་གསུམ་གཡོ།  ། འགག་མེད་གསུང་གི་བཞད་སྒྲས་ཁམས་གསུམ་འགུགས། །

འོད་ཟེར་དམར་པོས་འཁོར་འདས་ཡོངས་ལ་ཁྱབ།  །སྲིད་ཞིའི་དྭངས་བཅུད་གཡོ་ཞིང་སྡུད་པར་བྱེད། །

རྡོ་རྗེ་ཆགས་པ་ཆེན་པོའི་ཐུགས་ཀྱིས་ནི།  །རྣམ་གཉིས་དངོས་གྲུབ་འདོད་རྒུའི་མཆོག་སྩོལ་ཞིང༌། །

རྡོ་རྗེ་ལྕགས་ཀྱུ་ཞགས་པ་ཆེན་པོ་ཡིས།  །སྣང་སྲིད་བདེ་བ་ཆེན་པོར་སྡོམ་བྱེད་པ།།

མཐའ་ཡས་སྒྱུ་འཕྲུལ་དྲ་བའི་རོལ་གར་ཅན།  །ཏིལ་གྱི་གོང་བུ་ཕྱེ་བ་བཞིན་བཞུགས་པའི། །

རབ་འབྱམས་རྩ་གསུམ་དབང་གི་ལྷ་ཚོགས་ལ།  །གུས་པས་གསོལ་བ་འདེབས་སོ་བྱིན་གྱིས་རློབས། །

མཆོག་མཐུན་དངོས་གྲུབ་འདོད་རྒུའི་དཔལ་མཐའ་དག  །ཐོགས་མེད་དབང་དུ་བྱེད་པའི་དངོས་གྲུབ་སྩོལ།  །  ཅེས་པའང་རབ་ཚེས་ས་ཡོས་ལོར་ཟླ་༧པའི་ཚེས་༡ ལ་དྷཱི་མིང་པས་སྤེལ་བ། གསོལ་བ་བཏབ་ན་གང་ཟག་སུ་ཡང་རུང་སྟེ།  དབང་གི་ལས་ཀུན་ཇི་ལྟར་བསམ་པ་བཞིན་དུ་འགྲུབ་པར་གདོན་མི་ཟའོ།  དར་དམར་ལ་བྲིས་ཏེ་འཕྱར་བའམ་མེ་རླུང་ལ་འཁོར་ལོ་བྱས་ཀྱང་འགྲུབ་བོ།  

དེ་ལྟར་ལམ་བཟང་བསྟན་པའི་བཤེས་གཉེན་དང་།  ། ཚུལ་བཞིན་སྒྲུབ་པའི་གྲོགས་རྣམས་ཞབས་བརྟན་ཅིང་།  །ཕྱི་དང་ནང་གི་བར་དུ་གཅོད་པའི་ཚོགས།  །ཉེ་བར་ཞི་བར་བྱིས་གྱིས་བརླབ་ཏུ་གསོལ།  །