ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> འཕྲུལ་གྱི་རྒྱང་ཤེལ། >> གསར་མེ
  གསར་འགྱུར་ཀློག་པ།

༼སྨོན་ལམ་ཚིག་མཛོད་ཆེན་མོ།༽རྒྱ་ཡིག་ཏུ་བསྒྱུར་རྒྱུ་ཡིན་པ།

[རྩོམ་པ་པོ:ཐའེ་  ཡོང་ཁུངས:དྲ་ཐོག  དུས་ཚོད:2016/5/18 22:39:55  བཀླགས་ཐེངས:15506][ཡིག་གཟུགས:ཡིག་གཟུགས་མདོག]


                 ༼སྨོན་ལམ་ཚིག་མཛོད་ཆེན་མོ།༽རྒྱ་ཡིག་ཏུ་བསྒྱུར་རྒྱུ་ཡིན་པ།

                                          མཁོ་སྤྲོད་པ། ཐའེ་ཝན་ཐེག་ཆེན་ཆོས་གླིང་ཆོས་ཚོགས་ཡིག་ཚང་།
 

ཧ་ཤེན་རིན་པོ་ཆེ་དང་ཁོང་གི་ཆོས་ཚོགས་ཀྱིས་༼སྨོན་ལམ་ཚིག་མཛོད་ཆེན་མོ།༽རྒྱ་ཡིག་ཏུ་བསྒྱུར་རྒྱུ་ཡིན་པ།

༡༽ བརྡ་འཕྲིན་དུས་རབས་ཀྱི་བོད་ཀྱི་རིག་གནས་ཀྱི་འཕེལ་ཕྱོགས།

དེ་ཡང་དེང་གི་དུས་འདིར་རིག་གནས་བརྡ་འཕྲིན་ཅན་དུ་ཕྱོགས་བཞིན་པ་དང་། བོད་ཕྱི་ནང་གི་ལས་རིགས་སོ་སོའི་ཁྱབ་ཁོངས་ནས་ཀྱང་མིང་ཚིག་གསར་བཟོ་དང་ཚིག་མཛོད་བསྡུ་བསྒྲིགས་སོགས་ཀྱི་ལས་དོན་མང་པོ་ཞིག་བརྩམས་དང་རྩོམ་བཞིན་ཡོད། ཁྱད་པར་དགེ་བཤེས་བློ་བཟང་སྨོན་ལམ་ལགས་ཀྱིས་སྨོན་ལམ་བོད་ཡིག་མཉེན་ཆས་གསར་གཏོད་དང་། སྨོན་ལམ་བོད་སྐད་སྒྲ་གདངས་ཀྱི་ཉེན་ཆས། ཁྱད་པར་སྨོན་ལམ་ཚིག་མཛོད་ཆེན་མོའི་ལས་གཞི་བརྩམས་པས་ཁོང་ནི་བོད་ཡིག་བརྡ་འཕྲིན་ཅན་དུ་བསྐྱོད་པར་དམིགས་བསལ་གྱི་ནུས་པ་ཆེན་པོ་ཐོན་མཁན་ཞིག་ཏུ་གྱུར་ཡོད།

unnamed-1

 

༢༽ ལོ་དགུའི་འཆར་གཞི་ཅན་གྱི་སྨོན་ལམ་ཚིག་མཛོད་ཆེན་མོ།

དེ་ཡང་སྨོན་ལམ་ཚིག་མཛོད་འདི་ནི་རྒྱ་གར་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་བསྡུ་སྒྲིག་དང་འགྲེམ་སྤེལ་གནང་བའི་བོད་ཡིག་གི་ཕྱོགས་བསྡུས་རང་བཞིན་ཅན་གྱི་ཚིག་མཛོད་ཆེན་མོ་ཞིག་ཡིན་ཞིང་དེ་ཡང་ཁོང་རྣམ་པས་རྒྱ་ཁྱབ་ཡུན་རིང་གི་འཆར་གཞི་སྟེ། ལོ་གསུམ་རེར་དུམ་བུ་རེའི་ཐོག་ལོ་དགུའི་ནང་ཚང་མ་ལེགས་གྲུབ་བྱ་འཆར་ཡོད་འདུག དེ་ཡང་ཐོག་མར་༢༠༡༢ལོར་འགོ་བརྩམས་ནས་ད་བར་ལོ་གསུམ་ནང་གྲུབ་པའི་ཚིག་མཛོད་འདི་ཁོ་ནར་མཚོན་ན་ཡང་བསྡུ་སྒྲིག་མང་ཤོས་ཀྱི་བོད་ཀྱི་ཆོས་ལུགས་དང་། ལོ་རྒྱུས། རིག་གནས་བཅས་ཀྱི་ཕྱོགས་བསྡུས་ཚིག་མཛོད་ཆེན་མོ་ཞིག་ཡིན།

 

༣༽ སྨོན་ལམ་ཚིག་མཛོད་ཆེན་མོ་རྒྱ་ཡིག་ཏུ་བསྒྱུར་བའི་དགོས་དམིགས།

unnamed-3བོད་ཀྱི་སྐད་ཡིག་དང་ནང་ཆོས་ནི་བོད་མིའི་འཚོ་བའི་ཁྲོད་དུ་གལ་ཆེན་ཡིན་པ་མ་ཟད། དེང་གི་ཆར་འཛམ་གླིང་སྤྱི་དང་ཁྱད་པར་རྒྱ་མི་རིགས་ཀྱི་ཁྲོད་དུ་དད་མོས་དང་དོ་སྣང་བྱེད་མཁན་ཧ་ཅང་མང་དུ་འགྲོ་བཞིན་ཡོད། དེ་ཡང་མང་པོ་ཞིག་ལ་བོད་ཀྱི་ཆོས་དང་རིག་གཞུང་ལ་དོན་གཉེར་དང་འདུན་པ་ཡོད་ན་ཡང་། རྒྱ་ཡིག་གི་ཐོག་ཏུ་ཡོད་པའི་བོད་ཀྱི་ནང་ཆོས་དང་། དེ་ཉིད་ཞིབ་འཇུག་དང་སློབ་སྦྱོང་བྱེད་པར་མེད་དུ་མི་རུང་བའི་ཡན་ལག་ཏུ་གྱུར་པའི་ཚིག་མཛོད་སོགས་ཧ་ཅང་ཉུང་ཉུང་མ་གཏོགས་མེད། དངོས་ཡོད་ཀྱི་གནས་སྟངས་འདི་ལ་གཞིགས་ནས་སེར་སྨད་དགེ་བཤེས་ལྷ་རམས་པ་ཧ་ཤེན་རིན་པོ་ཆེས་འགན་ཁུར་འོག་ཚིག་མཛོད་ཆེན་མོ་འདི་ཉིད་རྒྱ་ཡིག་ཏུ་བསྒྱུར་རྒྱུའི་ལས་འཆར་གཏན་འབེབས་དང་འབྲེལ་ལས་དོན་དངོས་སུ་འགོ་འཛུགས་གནང་ཟིན།

སེར་སྨད་ལྷ་རམས་པ་ཧ་ཤེན་རིན་པོ་ཆེས་གསུངས་དོན།
ཚིག་འཛོད་འདི་རྒྱ་ཡིག་དུ་བསྒྱུར་དགོས་པའི་དམིགས་ཡུལ་གཙོ་བོ་ནི། ལེགས་སྦྱར་ནས་བོད་ཡིག་ཏུ་བསྒྱུར་བ་དང་བོད་ཀྱི་མཁས་པས་མཛད་པའི་ལེགས་བཤད་མང་པོ་ཞིག་བོད་ཡིག་ཐོག་ཡོད་པ་དང་། རྩ་ཆེའི་རིག་གནས་མང་པོ་ཞིག་བོད་ཡིག་ཐོག་ཉམས་མེད་གནས་ཡོད་པ་དང་། རྒྱ་ཡིག་ཐོག་ཏུ་ཡང་ལེགས་སྦྱར་ནས་བསྒྱུར་བའི་བཀའ་བསྟན་དང་རྒྱ་ཡི་མཁས་པས་མཛད་པའི་ལེགས་བཤད་ཀྱང་མི་ཉུང་བ་ཞིག་ཡོད་པ་དང་། དེ་དག་ཕན་ཚུན་གྱི་སྐད་ཡིག་ཐོག་བསྒྱུར་ཐུབ་ན་བསྟན་པ་ཡུན་རིང་དུ་གནས་པ་དང་། སྐལ་ལྡན་གྱི་འགྲོ་བ་གྲངས་ལས་འདས་པ་ཞིག་ལ་ཕན་ཐོགས་ཡོད་པས། དེ་འདྲའི་འགྱུར་ཚད་ལྡན་ཞིག་ཡོང་བ་ལ་གལ་ཆེ་བ་ནི་ཚད་ལྡན་གྱི་ཚིག་འཛོད་ཞིག་ཡོད་དགོས་པ་ནི་མེད་དུ་མི་རུང་བའི་ཆ་རྐྱེན་ཞིག་ཡིན་པར་སོང་། དེ་ལ་བོད་ཕྱི་ནང་གཉིས་ཀ་ནས་ཚད་ལྡན་དུ་བརྩི་བཞིན་པའི་སྨོན་ལམ་བོད་ཀྱི་ཚིག་འཛོད་ཆེན་མོ་འདི་རྒྱ་ཡིག་ཏུ་བསྒྱུར་རྒྱུའི་མགོ་འཛུགས་བྱས་པ་ཡིན་ལ། ལས་གཞི་འདི་ལེགས་འགྲུབ་བྱུང་ན་བོད་རྒྱའི་རིག་གཞུང་བརྗེ་རེས་ཀྱི་ལོ་རྒྱུས་ཁྲོད་དུའང་གལ་ཆེའི་ནུས་པ་འདོན་ཐུབ་པ་བཅས་ཀྱི་དགེ་མཚན་ཡོད་པ་རེད་ཅེས་གསུང་།

 

༤༽ སྨོན་ལམ་ཚིག་མཛོད་ཆེན་མོ་རྒྱ་འགྱུར་གྱི་གན་རྒྱ་དང་ལས་གཞིའི་དམིགས་ཚད།

unnamed-2སྨོན་ལམ་བརྡ་འཕྲིན་ཞིབ་འཇུག་ལྟེ་གནས་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་དབུ་བཞུགས་ཐོག་གྲ་སྒྲིག་ཚོགས་འདུའི་ཐོག་ཞིབ་ཕྲའི་གྲོས་མོལ་བྱུང་བའི་འབྲུ་དོན་ལྟར་ཧ་ཤེན་རིན་པོ་ཆེ་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ཕྱོགས་གཉིས་ཀྱིས་ཚིག་མཛོད་རྒྱ་ཡིག་ཏུ་སྒྱུར་རྒྱུའི་སྐོར་ལ་དངོས་སུ་གན་རྒྱ་གཞག་སྟེ་རྒྱ་བསྒྱུར་གྱི་ལས་འགན་རྩིས་ལེན་བྱས། སྤྱི་ལོ་༢༠༡༧ཟླ༧པའི་གོང་དུ་ཐེངས་དང་པོར་ཚིག་མཛོད་ཀྱི་མ་ཚིག་བསྒྱུར་ཟིན་པ་བྱ་རྒྱུ་དང་། དེ་རྗེས་འགྲེལ་བ་དག་བསྒྱུར་འཆར་ཡོད་ཅིང་སྐབས་དེར་རྒྱ་ཆེའི་ཤེས་ལྡན་པ་དང་མཁས་དབང་མང་དག་ཅིག་གདན་ཞུས་ཀྱིས་ཡིག་བསྒྱུར་བྱས་ཏེ་མཉམ་དུ་དུས་རབས་རང་བཞིན་གྱི་རིན་ཐང་ཅན་ཞིག་ཏུ་འགྲུབ་པ་བྱ་རྒྱུ།

དེ་ཡང་། ཐའེ་ཝེན་ཐེག་ཆེན་ཆོས་ཚོགས་ཀྱིས་གཙོ་འགན་པ་ཧ་ཤེན་རིན་པོ་ཆེ་དང་། ཁོང་གིས་གཙོ་སྐྱོང་འོག་ཆེད་འཛུགས་གནང་བའི་ཡིག་བསྒྱུར་ཚོགས་པས་འགན་འཁུར་ནས་ལས་དོན་འདི་ལག་བསྟར་བྱ་རྒྱུ་དང་། ཐའེ་ཝན་ཧྥ་ཀོ་སློབ་ཆེན་གྱི་དགེ་རྒན་ཆེན་མོ་འབུམ་རམས་པ་བསོད་ནམས་དབང་རྒྱལ་ལགས་ཀྱིས་འགན་འཛིན་གནང་བའི་མི་སྣ་བདུན་ལས་གྲུབ་པའི་ལོ་ཙཱ་བའི་ཚོགས་པ་ཞིག་བཙུགས་ཡོད་པ་དང་། དེའི་ནང་གི་དྲུག་ནི་ཨ་རི་དང་འཇར་མན་ནེ་སོགས་གཙུག་ལག་སློབ་ཆེན་ཁག་ནས་ཐོན་པའི་ནང་བསྟན་དང་བོད་རིག་པའི་སྡེ་ཁག་ནས་ཐོན་པའི་འབུམ་རམས་པའི་ཚད་མཐོའི་ཤེས་ཡོན་ལག་འཁྱེར་ཡོད་པའི་ལོ་ཙཱ་བ་ཡིན་ཞིང་། དུས་རིམ་གཏན་ཁེལ་གྱི་ཁྱབ་ཁོངས་སུ་ཡིག་སྒྱུར་གྲུབ་དོན་ཞིབ་ཕྲའི་ཚོགས་འདུ་དང་དཔྱད་གླེང་། ལོ་ཙཱ་མཁས་པའི་ཚོགས་འདུ་སོགས་འཚོགས་པ་བརྒྱུད་ནས་ཡིག་བསྒྱུར་གྱི་གྲུབ་དོན་གཏན་འབེབས་བྱེད་རྒྱུ་ཡིན་འདུགunnamed-4

འདིའི་ཐད་ཧ་ཤེན་རིན་པོ་ཆེས། ཚིག་མཛོད་ཆེན་མོ་འདིའི་རྩ་བའི་མ་ཚིག་བསྒྱུར་རྒྱུ་ཁོ་ནར་ཡང་ཐའེ་ཝན་སྒོར་མོ་ཁྲི་སུམ་རྒྱ་འགྲོ་ངེས་ཡིན་པ་དང་། དེ་རྗེས་འགྲེལ་བཤད་བསྒྱུར་བ་སོགས་ཀྱི་ལས་གཞིའི་འགྲོ་གྲོན་ནི་དེ་ལས་ལྡབས་མང་པོས་ཆེ་བ་ཞིག་ཡིན་པ་དང་། མ་གཞི་ཡིག་སྒྱུར་ནི་ཧ་ཅང་དཀའ་ཚེགས་ཆེ་ལ་ནན་ཏན་དགོས་པའི་རིག་གནས་ཀྱི་ལས་གཞི་གལ་ཆེན་ཞིག་རེད་ཅེས་འགྲེལ་བརྗོད་གནང་སོང་།

 

༥༽ ཚིག་མཛོད་རྒྱ་འགྱུར་གྱི་ལོ་ཙཱའི་ཚོགས་འདུ་ཐེངས་དང་པོ།

གོང་ཞུས་ལྟར། སྨོན་ལམ་ཚིག་མཛོད་རྒྱ་འགྱུར་གྱི་ལས་གཞི་འདིའི་སྐོར་གྱི་ཆེད་མཁས་པའི་དཔྱད་གླེང་དང་ལས་འཆར་གཏན་འབེབས་ཀྱི་ཚོགས་འདུ་ཐོག་མ་དེ་སྤྱི་ལོ་༢༠༡༦ཟླ་བ་༤པའི་ཚེས་༢༤ལ་ཐའེ་ཝན་དུ་ཐའེ་ཝན་གྱི་ཧ་ཤེན་རིན་པོ་ཆེའི་ཆོས་ཚོགས་སུ་འཚོགས་ཡོད་པ་དང་། གོང་ཞུས་ཚོགས་འདུའི་ཐོག་དམིགས་བསལ་གདན་ཞུས་མི་སྣ་དགེ་བཤེས་བློ་བཟང་སྨོན་ལམ་མཆོག་གིས་སྨོན་ལམ་ཚིག་མཛོད་ཆེན་མོ་དང་དེ་ཉིད་སྐད་ཡིག་གཞན་དུ་བསྒྱུར་ན་དམིགས་བསལ་གྱི་དོན་སྙིང་ལྡན་སྐོར་ངོ་སྤྲོད་གནང་། འདི་གའི་ཆོས་ཚོགས་ཀྱི་གཙོ་འཛིན་ལྷ་རམས་པ་ཧ་ཤེན་རིན་པོ་ཆེ་ནས། ཚིག་འཛོད་འདི་རྒྱ་ཡིག་ཏུ་བསྒྱུར་བའི་དགོས་དམིགས་དང་འབྲེལ་བའི་གསུང་བཤད།

ཆོས་ཚོགས་ཀྱི་ཚོགས་གཙོ་ལྕམ་ཧྲའོ་ཆན་རུ་ཡིས། རྒྱ་ཡིག་ནི་མིག་སྔར་འཛམ་གླིང་ཐོག་མི་མང་ཤོས་ཀྱིས་སྤྱོད་བཞིན་པའི་སྐད་ཡིག་གཅིག་ཡིན་པས་ཚིག་མཛོད་འདི་ཉིད་དེར་ཕབ་ཐུབ་ན་དམིགས་བསལ་གྱི་དགོས་ནུས་ཆེན་པོ་ཡོད་པར་ངོས་འཛིན་དང་འབྲེལ་བའི་གཏམ་བཤད་བྱས།

unnamed-5མཇུག་མཐར། ཡིག་བསྒྱུར་ལས་དོན་འགན་འཛིན་པ་དགེ་རྒན་ཆེན་མོ་བསོད་ནམས་དབང་རྒྱལ་ལགས་ཀྱིས། ལས་གཞི་རྒྱ་ཆེན་འདི་ནི་སློབ་སྦྱོང་དང་། ལྟ་བ་བརྗེས་རེས། ཡིག་སྒྱུར་ཉམས་མྱོང་གི་གོ་སྐབས་གསོག་ས་བཅས་ཀྱི་སྟེགས་བུ་ཡག་པོ་བཅས་ཡིན་པས་འབྱུང་འགྱུར་ལས་གཞི་འདིར་ཤེས་ཡོན་པ་གང་མང་མཉམ་ཞུགས་དང་འབྲེལ་མ་འོངས་ལོ་ཙཱའི་སོན་རྩ་སྐྱེད་སྲིང་ཐུབ་པའི་འཆར་འགོད་ཀྱང་ཡོད་པ་བཅས་རྩ་ཆེའི་ལས་དོན་འདི་ཉིད་བདེ་བླག་ངང་འགྲུབ་པ་བྱ་དགོས་ཞེས་གསུང་རྗེས་ཉིན་དེའི་ཚོགས་འདུ་མཇུག་དྲིལ།
ཚོགས་འདུ་དེའི་ཐོག་ཏུ་མ་འོངས་ལས་གཞིའི་ཁ་ཕྱོགས་དང་ཞིབ་ཕྲའི་ལས་དོན། ལས་འགན་གོ་སྒྲིག་སོགས་གཞི་རྩའི་གྲོས་གཞི་ཁག་ལ་གྲོས་འཆམས་དང་གཏན་འབེབས་བྱུང་ཡོད་པ་རེད་འདུག

ཚིག་འཛོད་ཆེན་མོ་རྒྱ་བསྒྱུར་གྱི་གཙོ་བོའི་འགན་འཁུར་བའི་ཆོས་ཚོགས་ཀྱི་ཁ་བྱང་།

大乘林佛學會 http://mahayanabuddhism.org
གནས་ཡུལ། 地點:新北市林口區文化三路一段39巷116弄9號2樓

ཁ་པར། 專線:0986896866 (02)26009202

གློག་ཕྲིན། 信箱:mahayana628@gmail.com་

·གསར་འགྱུར་གོང་མ:བི་ཀྲ་མ་ཤཱི་ལ།
·གསར་འགྱུར་འོག་མ:ཀློང་ཐང་སྒྲོལ་མ་དང་འབྲེལ་བའི་གཏམ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
མིག་སྔར་གསར་མི་འདུག
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
མིག་སྔར་དཔྱད་བརྗོད་མི་འདུག
འབྲེལ་ཡོད་དཔྱད་བརྗོད 0 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།25.39MS