ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> འཕྲུལ་གྱི་རྒྱང་ཤེལ། >> བྱུང་རབས
  གསར་འགྱུར་ཀློག་པ།

བི་ཀྲ་མ་ཤཱི་ལ།

[རྩོམ་པ་པོ:སྐྱོ་བྲག་དགའ་དབང་།  ཡོང་ཁུངས:དྲ་ཐོག  དུས་ཚོད:2016/4/8 15:44:09  བཀླགས་ཐེངས:15174][ཡིག་གཟུགས:ཡིག་གཟུགས་མདོག]


                   བི་ཀྲ་མ་ཤཱི་ལ།

                                                   སྐྱོ་བྲག་དགའ་དབང་།


གནའ་བོའི་དུས་ན་འཕགས་ཡུལ་གྱི་ཆོས་གཞི་གྲགས་ཅན་ཡིན་པ་བི་ཀྲ་མ་ཤཱི་ལའམ་རྣམ་གནོན་ངང་ཚུལ་ཞེས་པ་དེ། ཐོག་མའི་བཞེངས་པ་པོ་ནི། པ་ཚབ་ལོ་ཙཱས་རྒྱལ་པོ་དེ་བ་པཱ་ལ་ཡིན་པར་གསུངས་ཤིང་། ཏཱ་ར་ནཱ་ཐས། རྒྱལ་པོ་དྷརྨ་པཱ་ལ་ཡིན་པར་གསུངས་པ་ལྟར་ན། དེ་བ་པཱ་ལས་གཞི་བཏིངས། དྷརྨ་པཱ་ལས་རྒྱ་སྐྱེད་པར་མངོན་ནོ། །
ཆོས་གཞི་འདིའི་བཀོད་པའི་ཁྱད་པར་ནི། རྒྱ་གར་ཆོས་བྱུང་ལས། དཔལ་བི་ཀྲ་མ་ལ་ཤཱི་ལའི་གཙུག་ལག་ཁང་བཞེངས་ཏེ། དེ་ཡང་མ་ག་དྷཱའི་བྱང་ངོས་ཆུ་བོ་གངྒའི་འགྲམ་རི་དེའུ་ཞིག་གི་རྩེ་ལ་དབུས་སུ་བྱང་ཆུབ་ཆེན་པོའི་སྐུ་ཚད་ཀྱི་ལྷ་ཁང༌། མཐའ་སྐོར་དུ་གསང་སྔགས་ནང་གི་ལྷ་ཁང་ཆུང་ངུ་ལྔ་བཅུ་ང་གསུམ། ལྷ་ཁང་དཀྱུས་མ་ལྔ་བཅུ་ང་བཞི་སྟེ་ལྷ་ཁང་བརྒྱ་རྩ་བརྒྱད་ཡོད་པ་ཕྱི་ལྕགས་རིས་བསྐོར་བ་བཞེངས། ཞེས་བྱུང་བས་ན་ཧ་ཅང་གི་གཞི་རྒྱ་ཆེ་བ་ཞིག་ཡིན་ཚོད་འདུག །

unnamed-19

བོད་ཡུལ་དུ་གྲགས་པའི་མཁས་པ་མང་པོ་ཞིག་ཀྱང་ཆོས་གཞི་འདི་ན་བཞུགས་པ་སྟེ། མཁས་པ་སྒོ་དྲུག་ཅེས་པ་ཡང་འདི་ནས་ཡིན་ལ། མཻ་ཏྲྀ་པས་ཕག་མོ་མཆོད་པའི་ཆང་བསྣམས་པ། ཇོ་བོ་རྗེ་དགེ་བསྐོས་ཡིན་པས་གཟིགས་ཏེ་གནས་ནས་ཕྱུང་བ་ན། ཉམས་པ་སྒོ་ནས་འགྲོར་མི་རུང་ཞེས་རྩིག་པ་ལ་ཐལ་གྱིས་བཞུད་ཅིང་། མདུན་གྱི་ཆུ་བོ་གངྒཱ་ལ་གདིང་བ་བཏིང་སྟེ་ཕེབས་པ་ཡང་འདི་ནས་ཡིན། ཇོ་བོ་རྗེ་དཔལ་ལྡན་ཨ་ཏི་ཤ་དང་། ཁ་ཆེ་པཎ་ཆེན་ཤཱཀྱ་ཤྲཱི་ཡང་འདི་ནས་བོད་དུ་བྱོན་པ་ཡིན། འབྲོག་མི་ལོ་ཙཱ་བ་ཤཱཀྱ་ཡེ་ཤེས་ཀྱིས་འདི་ནས་སྦྱངས་བརྩོན་གནང་ཞིང་། སྒྲ་སྒྱུར་གྱི་རྒྱལ་པོ་མར་པ་ལོ་ཙཱ་ཡང་ཐོག་མར་འདི་ན་བྱོན་པ་སྟེ། རྒྱབ་ཚབ་གྲགས་པ་དོན་གྲུབ་ཀྱི་མར་པའི་རྣམ་ཐར་ལས། བླ་མ་མར་པས་ལམ་དུ་ཞུགས་ནས་གངྒཱ་བརྒལ་ཏེ་བི་ཀྲ་མ་ལ་ཤཱི་ལར་བྱོན་ནས་རྟེན་རྣམས་ལ་ཕྱག་དང་མཆོད་པ་མཛད། ཅེས་དང་། པད་དཀར་ཆོས་བྱུང་ལས། དེར་བི་ཀྲ་མ་ཤཱི་ལར་སླེབས། དགེ་ཚུལ་ཤེས་རབ་སེངྒེ་དང་མཇལ། ཞེས་བྱུང་ངོ་། །

ཆོས་གཞི་འདི་ཉིད་ཡུལ་ཕྱོགས་གང་ན་ཡོད་པ་ནི། དངོས་སུ་ཞབས་ཀྱིས་བཅགས་པའི་པ་ཚབ་ལོ་ཙཱ་བ་ཚུལ་ཁྲིམས་རྒྱལ་མཚན་གྱིས། མདོ་དྲན་པ་ཉེར་བཞག་གི་འགྱུར་བྱང་དུ། ཡུལ་དབུས་མ་ག་དྷཱ་ཞེས་བྱ་བ་དེ་བཞིན་གཤེགས་པའི་རྟེན་མང་དུ་བཞུགས་ཤིང་སངས་རྒྱས་པའི་སྐྱེ་བོ་དཀོན་མཆོག་གསུམ་ལ་དད་པས་ཡུལ་གང་བའི་མ་གའི་ཡུལ་སྨད་ན། རྒྱལ་པོ་བྱང་ཆུབ་སེམས་དཔའ་དེ་བ་པཱ་ལས་མཛད་པའི་གཙུག་ལག་ཁང་ཆེན་པོ་བསྟན་པའི་མིག་ཏུ་གྱུར་པ་བི་ཀྲ་མ་ཤཱི་ལ་ན་ཡང་མཁས་པའི་སྐྱེ་བོ་མང་དུ་ཟིན་ཀྱང་། ཞེས་གསུངས་པ་དང་། འཇམ་མགོན་བློ་གྲོས་མཐའ་ཡས་ཀྱིས། ཤེས་བྱ་ཀུན་ཁྱབ་ཏུ། རྒྱལ་པོ་དྷརྨ་པཱ་ལ་ཞེས་མངའ་ཐང་ཤིན་ཏུ་ཆེ་བ་དེས། མ་ག་དྷཱའི་བྱང་ངོས་གངྒཱའི་འགྲམ་དུ་རི་དེའུ་ཞིག་གི་རྩེར་བཞེངས་པ་བི་ཀྲ་མ་ཤཱི་ལ་སྟེ་རྣམ་གནོན་ངང་ཚུལ་ཞེས་པའི་མཚན་གྱིས་བསྔགས་པའི་གཙུག་ལག་ཁང་ཆེན་པོ། ཞེས་གསུངས་པ་ཇི་ལྟ་བ་བཞིན། མ་ག་དྷཱའི་བྱང་ངོས་ཀྱི་ཡུལ་སྨད། ཆུ་བོ་གངྒཱའི་ལྷོ་འགྲམ་གྱི་རི་འབུར་ཞིག་ན་ཡོད།

འདི་དང་ཁད་ཉེ་བ་གངྒཱའི་བྱང་འགྲམ་ན་བྷ་གལ་པུར་ཟེར་བའི་གྲོང་ཁྱེར་ཞིག་འདུག་པ་ནི། སྔོན་མ་བྷཾ་ག་ལའི་རྒྱལ་ས་སྟེ། ཇོ་བོའི་སྐུ་བསྟོད་དུ་བྱུང་བ། ཕུན་སུམ་ཚོགས་པ་བྷཾ་ག་ལ་ཡི་ཡུལ། །ཆོ་རིགས་བཙུན་པ་ཟ་ཧོར་རྒྱལ་པོའི་རིགས། །བྱང་ཆུབ་སེམས་དཔའ་ཞི་འཚོ་འཁྲུངས་པའི་རྒྱུད། །མར་མེ་མཛད་པའི་ཞབས་ལ་གསོལ་བ་འདེབས། །ཞེས་པའི་འཁྲུངས་ཡུལ་དག་ཡིན་པར་གྲགས།
བི་ཀྲ་མ་ཤཱི་ལར་པཱ་ལའི་རྒྱལ་རྒྱུད་རྣམས་ཀྱི་བདག་རྐྱེན་དང་། སློབ་དཔོན་སངས་རྒྱས་ཡེ་ཤེས་ཞབས་ལ་སོགས་པ་མཁས་ཤིང་གྲུབ་པ་བརྙེས་པའི་གང་ཟག་བར་མ་ཆད་པ་བྱུང་བ་རྣམས་ཀྱི་མཛད་ཕྲིན་ལ་བརྟེན་ནས་མདོ་སྔགས་གཉི་གའི་བསྟན་པ་ཡུན་རིང་བར་དར་རྒྱས་ཆེ་ནའང་། ཁ་ཆེ་པཎ་ཆེན་ཤཱཀྱ་ཤྲཱིས་གདན་རབས་མཛད་པའི་སྐབས་ནས་ཁ་ཆེའི་དམག་གིས་བསྟོར་ཏེ་ཤུལ་ཙམ་དུ་བསྒྱུར་བ་རེད།

ཕྱིས་རྒྱ་གར་གཞུང་གིས་བསྔོགས་ནས་སྲུང་སྐྱོབ་བྱས་པའི་གནའ་ཤུལ་ཕྲན་བུ་དང་། རྡོ་སྐུ་ཆག་གྲུམ་སོགས་ཉར་བའི་འགྲེམ་སྟོན་ཁང་ཆུང་ངུ་ཞིག་བཅས་མཇལ་དུ་ཡོད། སྤྱིར་རྡོ་རྗེ་གདན་ལ་སོགས་པ་འཕགས་ཡུལ་གྱི་ཆོས་གཞི་ཡོད་དོ་ཅོག་རྣམས་སྔ་མོ་ཞིག་ནས་ཉམས་ཆག་ཏུ་སོང་མོད། དིང་སང་གནས་ཤུལ་ཕལ་མོ་ཆེ་རུ་ཐེག་པ་ཆེ་ཆུང་གི་རྟེན་བཞེངས་མི་ཉུང་བ་ཡོད་ནའང་། འདི་ནི་ད་བར་སྟོང་སང་དུ་ལོས་གདའ།
ང་ཚོ་མཆེད་གྲོགས་བཅུ་གྲངས་ཤིག་རླངས་འཁོར་གྱིས་གནས་མཇལ་ཆེད་སོང་བ་ན། སྤྱི་ལོ་ ༢༠༡༦ ཟླ་ ༣ ཚེས་ ༢༦ ཉིན་གྱི་དགོང་མོར་བསླེབས། གནའ་བོའི་ཆོས་ཀྱི་ཞིང་ཁམས་ཡིད་ལ་བཅགས་ཏེ། མཇལ་སྐོར་དང་སྨོན་ལམ་ཙམ་གྱི་སྐལ་བཟང་བྱུང་ངོ་། །

·གསར་འགྱུར་གོང་མ:མདོ་ཁམས་ས་ཡི་ཐིག་ལེ་བྲག་གཡབ་ལྗོངས་ཀྱི་གནས་ལུགས་མདོ་ཙམ་བརྗོད་པ།
·གསར་འགྱུར་འོག་མ:༼སྨོན་ལམ་ཚིག་མཛོད་ཆེན་མོ།༽རྒྱ་ཡིག་ཏུ་བསྒྱུར་རྒྱུ་ཡིན་པ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
·བོད་ཀྱི་ཆ་འཕྲིན་ལག་རྩལ་གྱི་ཆེད་མཁས་དགེན་བཀྲ་ཤིས་རྒྱལ་ལ་མྱ་ངན་ཞུ། 2016/11/6 15:52:45
·མདོ་ཁམས་ས་ཡི་ཐིག་ལེ་བྲག་གཡབ་ལྗོངས་ཀྱི་གནས་ལུགས་མདོ་ཙམ་བརྗོད་པ། 2016/3/7 18:22:43
·ཨ་དཀོན་རིན་པོ་ཆེའི་གཞན་ཕན་དགེ་ལས་མུ་མཐུད་ནས་མཇུག་སྐྱོང་གནང་རྒྱུ་ཡིན་པ། 2016/2/24 23:13:06
·གཅེས་ཕྲུག་ཤེས་རབ་ཟླ་བ་ལ་སྤྲིངས་པ། 2015/10/28 12:35:46
·ཐར་ལོ་ལ་རྒྱལ་སྤྱིའི་གློག་བརྙན་དུས་སྟོན་གྱི་རྩེ་གྲའི་འོས་མིང་ཐོབ་པ། 2015/10/25 20:04:28
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
 评论者:Jenn
Most help articles on the web are inaccurate or inhenorect. Not this! http://nprgmepjyx.com [url=http://vuovif.com]vuovif[/url] [link=http://nprlchczqsg.com]nprlchczqsg[/link]
发表时间:2016/10/26 13:45:15 [来自: 188.143.232.27]

 评论者:Johannah
This is a neat <a href="http://wktsnsi.com">surymma.</a> Thanks for sharing!
发表时间:2016/10/24 23:45:30 [来自: 188.143.232.32]

 评论者:Gert
Was totally stuck until I read this, now back up and rugnnni. http://sjlyiqqm.com [url=http://plddmvzq.com]plddmvzq[/url] [link=http://uczwucv.com]uczwucv[/link]
发表时间:2016/10/22 8:14:44 [来自: 188.143.234.155]

འབྲེལ་ཡོད་དཔྱད་བརྗོད 5 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS