ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> གཏེར་གྱི་བུམ་བཟང་། >> སློབ་གསོ
  གསར་འགྱུར་ཀློག་པ།

དགེ་རྒན་བཟང་ངན་གྱི་བསམ་སྤྱོད།

[རྩོམ་པ་པོ:ཆོས་བཟང་།  ཡོང་ཁུངས:འཕགས་ཆེན་འཕྲིན་སྟེགས་ལས།  དུས་ཚོད:2016/1/10 17:13:31  བཀླགས་ཐེངས:14799][ཡིག་གཟུགས:ཡིག་གཟུགས་མདོག]
 

                                           དགེ་རྒན་བཟང་ངན་གྱི་བསམ་སྤྱོད།

 

 

                                                        ཆོས་བཟང་།

 

སྤྱིར་དགེ་རྒན་ཞེས་པ་ནི་དགེ་བ་དང་ལེགས་པའི་ཆ་རྟོགས་ཤིང་རྒྱུད་ལ་མངའ་བའི་རྒན་པ་ལ་ཟེར།དམ་པ་ལྷ་ལུགས་དང་འཇིག་རྟེན་མི་ལུགས་གཉིས་ཀ་ནས་ཆེས་གལ་ཆེན་གྱི་མི་སྣ་ཞིག་ཡིན་པར་བསྟན། གང་ཡིན་ཟེར་ན་བླ་མེད་རྫོགས་སངས་རྒྱས་ཀྱི་གོ་འཕང་བསྒྲུབ་དགོས་ན་བླ་མ་དགེ་བའི་བཤེས་གཉེན་ལ་བསྟེན་ཏེ་སྒྲུབ་དགོས་པ་མ་གཏོགས་ཐབས་གཞན་མེད་པ་དང་། འཇིག་རྟེན་ཚེ་འདིའི་ལེགས་ཉེས་བླང་དོར་ཚུལ་བཞིན་ཤེས་དགོས་ནའང་དགེ་རྒན་དམ་པ་བསྟེན་དགོས་པས་སོ།། དེའི་ཕྱིར་དགེ་རྒན་གྱི་བྱ་བ་ནི་ཆེས་རླབས་ཆེན་དང་གཟི་བརྗིད་ལྡན་པ་ཡིན་ལ། དགེ་རྒན་གྱི་བྱ་བ་གཉེར་བའི་གོ་སྐབས་ལྡན་པ་འདི་ནི་ཤིན་ཏུ་དགའ་བའི་གནས་དང་བསོད་ནམས་ཡིན་པ་ཤེས་དགོས། དགེ་རྒན་གྱི་གོ་ས་འདི་ནས་སྤྱི་ཚོགས་དང་མི་རིགས་ལ་ཁ་ཚ་དགོས་གཏུགས་ཀྱི་ཞབས་འདེབས་དང་ཕན་ཐོགས་ཅན་གྱི་མི་བུ་མང་པོ་གསོ་སྐྱོང་བྱེད་ནུས་ཤིང་། འདི་འདྲ་བའི་རླབས་ཆེན་གྱི་བྱས་རྗེས་གོ་ས་གཞན་ནས་ནམ་ཡང་བསྒྲུབ་མི་ནུས།
དགེ་རྒན་གྱི་བྱེད་ནུས།
རིག་གནས་ཅི་ཡང་མེད་པའི་སློབ་བུ་དག་མཁས་པར་བསྒྱུར་བ་དང་། ལག་ཤེས་མེད་པ་དག་ལག་རྩལ་བ་དང་།ནུས་མེད་ཉམ་ཆུང་དག་སྟོབས་ལྡན་འཇོན་ནུས་ཅན་དང་། བསམ་པ་མ་རུངས་གཏུམ་པ་དག་བསམ་དཀར་བྱམས་སེམས་ཅན་དང་། སྤྱོད་པ་དྲག་ཅིང་རྩུབ་པ་དག་ཞི་དུལ་བག་ཡོད་ཅན་དང་། བློ་ཁོག་དུབ་ཅིང་ཆུང་བ་དག་བློ་ཆེ་ཁོག་ཡངས་ཅན་དང་། མདུན་ལམ་གང་ཡིན་མི་ཤེས་པའི་མི་བུ་དག་ལ་ཡང་མ་འོངས་མདུན་ལམ་དང་ཕུགས་བསམ་གྱི་ས་བོན་བསྐྲུན་ཐུབ། འོན་ཀྱང་དགེ་རྒན་ཡིན་པ་ཙམ་གྱིས་དེ་དག་སྟེར་མི་ནུས་ལ། ངེས་པར་དུ་རང་ཉིད་ལ་གོང་བཤད་ཀྱི་ཡོན་ཏན་དེ་དག་ཚང་དགོས། དེ་ཕྱིར་བླ་མ་ལྔ་བཅུ་པ་ལས་དགེ་རྒན་གྱི་ཡོན་ཏན་ནི།
བརྟན་ཅིང་དུལ་བ་བློ་གྲོས་ལྡན།།
བཟོད་ལྡན་དྲང་ལ་གཡོ་སྒྱུ་མེད།།
སྔགས་དང་རྒྱུད་ཀྱི་སྦྱོར་བ་ཤེས།།
སྙིང་བརྩེ་ལྡན་ཞིང་བསྟན་བཅོས་མཁས།།
ཞེས་གསུངས་པ་ལྟར། རང་ལ་འཚོ་བའི་དཀའ་ངལ་དང་བྱ་བ་གཞན་སྒྲུབ་ན་གནས་སྐབས་དཔལ་འབྱོར་སོགས་ཀྱི་ཁེ་ཕན་ཆེན་པོ་ཐོབ་ཀྱང་དེས་བློ་མི་འགྱུར་ཞིང་དགེ་རྒན་གྱི་བྱ་བ་བསྒྲུབ་ལ་བསམ་པ་བརྟན་པ། ལུས་ངག་གི་སྤྱོད་ངན་ཆང་དང་དུ་བ། འཁྲུག་རྩོད་དང་ངག་འཆལ། མནའ་དང་མཐུ། ཚིག་རྩུབ་སོགས་སྤང་ཞིང་མེད་པས་དུལ་བ། གལ་སྲིད་སྤྱོད་ངན་དེ་དག་སྔར་གོམས་པ་ཡུན་རིང་བས་གཏན་དུ་སྤངས་མ་ནུས་ཀྱང་སློབ་གྲྭ་དང་སློབ་མའི་མདུན་ནས་སྤང་བ། རིག་པའི་གནས་ཀུན་ཇི་བཞིན་ཤེས་པའི་བློ་གྲོས་ལྡན་ཞིང་གཞུང་དོན་འགྲེལ་བ་ལ་མཁས་པ། དེང་སང་རིག་པའི་གནས་ཀུན་ཤེས་པ་དཀོན་ཡང་ཐ་ན་རང་ཉིད་ཀྱི་འཁྲིད་བྱར་གྱུར་པའི་རྒྱ་བོད་དབྱིན་དང་ལག་ཤེས་རིག་རྩལ་སོགས་གང་ཡིན་དཔྱིས་ཕྱིན་པ་རྟོགས་པའི་བློ་གྲོས་དང་ལྡན་པ། སློབ་གྲྭའི་སྒྲིག་ཁྲིམས་དམ་པ་དང་། དཔེ་ཀློག་དང་སློབ་ཁྲིད་ཡུན་རིང་བའི་དཀའ་སྡུགསློབ་མ་བླུན་པ་དག་ལ་བསྐྱར་སློབ་དགོས་པའི་དཀའ་ངལ། སློབ་མ་ངན་པས་དྲིན་ལན་ལོག་འཇལ། ཚིག་ངན་དང་སྡང་མིག ཡིག་ངན་བསྐུར་ཏེ་སྨ་འབེབས་སོགས་ཅི་བྱུང་ཡང་ཁྲོ་ཞིང་སྡང་བ་མེད་པས་བཟོད་པ་དང་ལྡན་པ། སློབ་མ་འབྱོར་ཕྱུག་དང་རྒྱབ་རྩ། གཟུགས་དབྱིབས་བཟང་ངན་དང་འབྲེལ་འདྲིས་ཡོད་མེད་ལ་བརྟེན་ནས་ངོ་ཆེ་ཆུང་མི་བྱེད་པ་འདྲ་མཉམ་དྲང་ལྡན། སློབ་མའི་ཁྱིམ་བདག་དཔོན་པོ་དང་འབྱོར་ཕྱུག་ལྡན་པས་རང་ལ་རྒྱུ་ནོར་ལོངས་སྤྱོད་དང་ངོ་ཆེན།རོགས་རམ་ཡོང་བའི་ཐབས་ལ་བརྩོན་པའི་གཡོ་སྒྱུ་མེད་པ། སློབ་མ་བཟང་ངན་ཅི་ལྟར་རུང་ཐམས་ཅད་ལ་མ་གཅིག་པུའི་བུ་ལྟར་ཁྱད་མེད་ཀྱི་བྱམས་བརྩེ་ལྡན་པ་ཞིག་ཆགས་ན་གཟོད་དགེ་རྒན་བཟང་པོའི་གྲལ་དུ་འགྲོ་ཐུབ། དེ་ཕྱིར་དགེ་རྒན་ཡིན་ནས་བཟུང་དང་པོ་རང་ཉིད་བསམ་བཟང་སྤྱོད་བཟང་དང་ཤེས་རིག་འཇོན་ནུས་ཅན་ཞིག་འགྱུར་བ་ལ་འབད་དགོས། དེ་ལས་བསམ་བཟང་ནི། རང་ཉིད་ལ་རེ་ཞིང་བསྟེན་པའི་སློབ་བུ་ཡོད་དོ་ཅོག་ལ་རིག་གནས་དང་གཤིས་སྤྱོད་གང་ཅི་ཐད་ནས་ཕན་འདོད་ཀྱི་བྱམས་བརྩེ་ལྡན་པ། རང་གིས་ཤེས་ཚད་སེར་སྣ་དང་སྦས་སྐུངས་མེད་པར་སློབ་བུ་རྣམས་ལ་བསླབ་ཅིང་སྟོན་པ། སློབ་མའི་རིག་གནས་དང་ཀུན་སྤྱོད་སོགས་ཡར་རྒྱས་འགྲོ་ཕྱིར། དུས་ཀུན་ཏུ་སེམས་ཁུར་གནང་ཞིང་། ཐ་ན་སློབ་མ་གཅིག་ལ་ཕན་ཐོགས་བྱུང་ན་རང་ལ་དམངས་སྒོར་ཁྲི་ཕྲག་ཐོབ་པ་དང་འདྲ་བའི་དགའ་བ་ལྡན་པ།སློབ་མ་གཅིག་ངན་པར་གྱུར་ན་སྙིང་ལ་གྲི་བསྣུན་པ་ལྟར་སེམས་སྡུག་ཡོད་པ། བྱ་ཉལ་འགྲོ་འདུག་སོགས་སྤྱོད་ལམ་ཀུན་ཏུ་སློབ་མའི་རིག་གནས་དང་བསམ་སྤྱོད། མ་འོངས་མདུན་ལམ་ཁོ་ནར་ཐུགས་ཁུར་གནང་ཞིང་། སློབ་མའི་སློབ་ཁྲིད་ནི་རང་གི་ཟས་གོས་ལས་ཀྱང་གལ་འགངས་ཆེ་བར་འཛིན་པ་ཞིག་དགོས། མདོར་ན་རང་ལ་བསྟེན་པའི་སློབ་མའི་ལང་ཚོ་དང་དུས་ཚོད་སྐར་མ་གཅིག་ཀྱང་རང་རྒྱུ་མཚན་དུ་བྱས་ཏེ་འཕྲོ་བརླག་མི་བྱེད་སྙམ་པའི་ཀུན་སློང་ལྡན་པ་དེ་ཡིན།

སྤྱོད་བཟང་ནི།

སྤྱིར་ཆོས་དང་འཇིག་རྟེན་གཉིས་ཆར་ནས་སེམས་དང་བདེ་ཐང་ལ་གནོད་པའི་རྫས་ངན་ཆང་དང་དུ་བ་སྤང་རྒྱུ། རང་གི་ལས་རོགས་སམ་གཞན་ལས་ཆགས་པས་ནོར་རྫས་མ་བྱིན་པ་མི་ལེན་ཞིང་། སློབ་མ་སོགས་ཀྱི་རྒྱུ་རྫས་བསྡིགས་ཏེ་འཕྲོག་བཅོམ་མི་བྱེད་པ། མི་བདེན་པའི་རྫུན་ཚིག་དང་དཀོན་མཆོག་དཔང་བཙུགས་ཀྱི་མནའ་དང་། ཡིད་དུ་མི་འོང་བའི་ཚིག་མཐུ་དང་ཚིག་ངན་མིསྨྲ་བ། དགེ་སློབ་བར་མི་མཐུན་ཞིང་འཁྲུག་རྩོད་འབྱུང་བའི་གཞི་དབྱེན་འབྱེད་མི་བྱེད་རྒྱུ། སློབ་མ་ལ་དུས་རྒྱུན་གུས་པའི་ཚིག་དང་སྤྱོད་ལམ་གྱིས་བསྐྱངས་ཤིང་གསོ་སྐྱོང་བྱེད་པ་དང་། ཉིན་བཞིན་སློབ་ཁྲིད་ཀྱི་སྔོན་དུ་དཔེ་ཀློག་དུས་ཚོད་གཉིས་ཡར་ལྷག་བྱེད་ཅིང་སློབ་ཁྲིད་འཚོགས་པ་དོན་ཡོད་པར་བྱ་བ་དང་། ཉིན་བཞིན་དཔེ་ཀློག་དང་ཉམས་མྱོང་བསགས་ཏེ་སློབ་ཁྲིད་ཀྱི་ཉམས་མྱོང་དང་རིག་གནས་ཡར་རྒྱས་སུ་བཏང་བ་དང་། ཆོས་དང་འཇིག་རྟེན་གཉིས་ཆར་ནས་ཆེས་ཐ་ཆད་དུ་བརྩི་བའི་སྤྱོད་པ་དགེ་སློབ་བར་ཕོ་མོའི་བྱ་བ་བྱེད་པ་སྤང་ཞིང་སློབ་མ་རྣམས་ལ་མིག་དཔེ་བཟང་པོ་ཡོང་བའི་སྤྱོད་བཟང་ཁོ་ན་བརྟེན་དགོས། དགེ་རྒན་གྱི་བྱ་བ་འདི་ཡང་བྱ་བ་གཞན་དང་མི་འདྲ་བ་ཁེ་ཉེན་ཆེན་པོའི་བྱ་བ་ཡིན།རྒྱལ་ཁབ་དང་མི་རིགས་ཡར་རྒྱས་སྔོན་ཐོན་གྱི་གྲལ་དུ་འགྲོ་དགོས་ན་ངེས་པར་དུ་ཤེས་ཡོན་དང་འཇོན་ནུས། ལྷག་བསམ་ཅན་གྱི་མི་ལ་རག་ལས་པ་དང་། དེ་ལྟ་བུ་མི་བུ་ཞིག་གསོ་སྐྱོང་དགོས་ན་ངེས་པར་དུ་དགེ་རྒན་བཟང་པོ་ལ་རག་ལས།

ཡང་དགེ་རྒན་བསམ་སྤྱོད་ངན་པ་ཞིག་ལ་བརྟེན་ཏེ་མི་རིགས་དང་རྒྱལ་ཁབ་ཡོངས་ཀྱི་སློབ་གསོ་མ་རུངས་པར་གྱུར་ཏེ། དགེ་མེད་སྡིག་ཅན་གྱི་མི་བུ་དག་གསོ་སྐྱོང་བྱེད་དེ། མི་རིགས་གདུག་རྩུབ་བླུན་རྨོངས་ཅན་དང་རྒྱལ་ཁབ་རྗེས་ལུས་སུ་བསྒྱུར་ངེས། དེའི་ཕྱིར་བླ་མ་ལྔ་བཅུ་པ་ལས་དགེ་རྒན་གྱི་སྤང་བྱའི་སྐྱོན་ནི།
སྙིང་རྗེ་མེད་ཅིང་ཁྲོ་ལ་གདུག །
ཁེངས་ཤིང་ཆགས་ལ་མ་སྡོམ་པ། །
སྤྱོམས་དང་བཅས་པ་མི་བྱའོ།།

ཞེས་གསུངས་པ་ལྟར།རང་ཉིད་ཀྱི་འཚོ་བ་དང་དངུལ་ཕོག་ཙམ་ལ་དམིགས་ཏེ་དགེ་རྒན་གྱི་བྱ་བ་བསྒྲུབས་པ་མ་གཏོགས་སློབ་མ་ལ་ཕན་སེམས་དང་སློབ་མའི་མདུན་ལམ་ལ་བསམ་བློ་བཏང་བའི་སྙིང་བརྩེ་མེད་པ། སློབ་མའི་གཟུགས་དབྱིབས་ངན་ངོན་དང་རང་མི་དགའ་བ་རྒྱུ་མཚན་དུ་བྱས་ཏེ་སྡང་ཞིང་བརྙས་པ། སློབ་མ་ལ་ཕན་སེམས་མ་ཡིན་པས་བརྡུང་ཅིང་བསྡིགས་པ། རང་ཉིད་ལ་རིག་གནས་ཅུང་ཙམ་ཡོད་པས་ང་ནི་མཁས་པ་ཡིན་ནོ་སྙམ་ཏེ་ཁེངས་པས་དེ་ནས་བཟུང་སྦྱངས་བརྩོན་མི་བྱེད་པ། ལོག་གཡེམ་གྱི་སྤྱོད་པ་དང་ཆགས་སྡང་ཕྱོགས་རིས་ཀྱི་གཏམ་འཆལ་བཤད་ལ་དགའ་ཞིང་། སློབ་མ་ལས་ངན་ཤེད་དང་གཡོ་སྒྱུས་དཔལ་འབྱོར་ལེན་པའི་ཐབས་ལ་བརྩོན་པ། སློབ་མའི་བར་འབྱོར་བ་དང་ཁྱིམ་བདག་གི་ཐོབ་གོ་ས་ལ་བརྟེན་པས་ངོ་ཆེ་ཆུང་དང་། རང་ཉིད་ལ་གོང་ནས་ཆད་པ་དང་དཀའ་ངལ་མ་བྱུང་ན་སློབ་མའི་རིག་གནས་དང་བསམ་སྤྱོད་ཡར་རྒྱས་མ་སོང་ན་ཡང་སེམས་ཕམ་དང་བག་ཚ་གང་ཡང་མེད་པ། རིག་པའི་གནས་བཅུ་ཤེས་པ་ཕར་ཞོག་རང་གི་ཁྲིད་བྱའི་སློབ་ཚན་ཡང་ཇི་བཞིན་མི་ཤེས། ད་དུང་ལེ་ལོ་དང་ཁྲེལ་མེད་ཀྱིས་དཔེ་ཀློག་བྱེད་དུ་མི་ནུས་ཤིང་། སློབ་མ་རྣམས་ཀྱི་ལས་བྱ་ཡང་དུས་ལྟར་མི་བཅོས། སློབ་མར་མིག་དཔེ་ངན་པར་འགྱུར་བའི་སྤྱོད་པ་ཆང་དུ་དང་རྐུ་རྫུན། ཚིག་རྩུབ་སོགས་མ་རུངས་པའི་སྤྱོད་པ་མི་བརྟེན་ཞིང་སྤངས་དགོས། དེ་ལྟར་མ་སྤངས་ན་སློབ་མས་མིག་ལྟོས་དགེ་རྒན་ལ་བྱེད་ཅིང་ཡིད་ཆེས་པས་ཚང་མ་ནག་པོ་རྒྱུན་འབྱམས་སུ་འགྱུར་ལ། དེ་ལྟ་བུའི་དགེ་རྒན་གྱི་སློབ་མ་ཡིན་ཚད་བསམ་སྤྱོད་ངན་པ་འབའ་ཞིག་ཏུ་འགྱུར་ཏེ་སྤྱི་ཚོགས་ལ་གནོད་ཤུགས་ཆེན་པོ་བསྒྲུབ་ངེས།
དགེ་རྒན་གྱི་བྱ་བ་ནི་གཞན་དང་མི་འདྲ་བར་ཉེན་ཁ་ཆེ་སྟེ། དགེ་རྒན་གྱི་འཛིན་གྲྭ་གཅིག་ནང་སློབ་མ་བཞི་བཅུ་ལྔ་བཅུ་ཡོད། སློབ་ཁྲིད་དང་སློབ་གསོ་ལེགས་པོ་བཏང་མ་ཤེས་ན་དེར་ཡོད་པའི་སློབ་བུ་ཚང་མའི་དུས་ཚོད་ཆུད་གཟན་དང། རང་ཉིད་ཀྱི་སྤྱོད་པ་ངན་པས་སློབ་མ་མང་པོ་ལ་བསམ་སྤྱོད་ངན་པའི་ཤན་ཞུགས་ཏེ་ཉེས་པ་ཚབ་ཆེན་བསགས་འགྲོ། ལྷག་པར་དུ་སློབ་མ་ན་གཞོན་དར་ལ་བབ་སྐབས་དགེ་རྒན་ངན་པས་སློབ་གསོ་ལོག་པ་བཏང་སྟེ་སློབ་མའི་མདུན་ལམ་དང་མི་ཚེ་ཆུད་ཟོས་སུ་བཏང་བས་ན་དེ་ལྟ་བུ་དགེ་རྒན་ནི་སྡིག་པའི་དགེ་རྒན་དང་། མི་རིགས་གཏོར་བརླག་བཟོ་བའི་ཞབས་འདྲེན་ཡིན། དེ་ཕྱིར་དགེ་རྒན་གྱི་གོ་སར་གནས་པའི་མི་བུ་དག་གིས་རྒྱུན་པར་གཟོབ་མཛོད། དེ་ལས་ལྡོག་སྟེ་དགེ་རྒན་བཟང་པོ་ཡིན་ན་མཁས་མཛངས་གཉིས་ལྡན་གྱི་སློབ་བུ་ཤ་སྟག་གསོ་སྐྱོང་བྱེད་དེ་རྒྱལ་ཁབ་དང་མི་རིགས་ལ་ཕན་ཁེ་ཆེན་པོའི་བྱ་བ་བསྒྲུབ་ནུས་པས་ཚང་མས་དེ་ཕྱོགས་ལ་འབད་འཚལ། གནའ་བོའི་གཏམ་དཔེ་ལ། དགེ་རྒན་ལ་ཇི་འདྲ་ཡོད་ན་སློབ་མ་དེ་ལྟར་ཡོད་གསུངས་པ་ལྟར། དགེ་རྒན་ཆང་དང་དུ་བར་དགའ་བ་ལ་སློབ་མ་ཆང་དང་དུ་བར་རོལ་བ། དགེ་རྒན་གདུག་རྩུབ་ཅན་ལ་སློབ་མ་སྤྱོད་པ་རྩིང་པོ། དགེ་རྒན་རྩོད་དགའ་ཅན་ལ་སློབ་མ་འཁྲུག་ལ་དགའ་བ། དགེ་རྒན་གཡོ་སྒྱུ་ཅན་ལ་སློབ་མ་ཁྲམ་པ་དང་རྐུ་མ། དགེ་རྒན་བསམ་སྤྱོད་བཟང་བ་ལ་སློབ་མ་ཡ་རབས་གཤིས་བཟང་། དགེ་རྒན་དཀར་ཟས་རོལ་བ་ལ་སློབ་མ་དམར་ཟས་སྤང་བ། དགེ་རྒན་ལྷག་བསམ་ཅན་ལ་སློབ་མ་བྱས་རྗེས་ཅན། དགེ་རྒན་རིག་གནས་ཅན་ལ་སློབ་མ་མཁས་པ་འབྱུང་བ་སོགས་མཐོང་ཆོས་མྱོང་འགྱུར་ཡིན་པ་ལྟར་རོ།།

དགེ་རྒན་བཟང་ངན་གྱི་དཔེ་འགའ་བཞག་ན།དགེ་རྒན་ངན་པས་སློབ་མ་རྣམས་ལོགས་སུ་ཁྲིད་དེ་ཆང་དང་དུ་བ་རོལ་ན་གཟོད་སྐྱེས་པ་ཕོ་ཡིན་པའི་བསླབ་བྱ་བཏང་བ་དང་།འགའ་ཡིས་རང་གི་ཁ་ནང་དུ་དུ་བ་འཐེན་བཞིན་སློབ་མ་དུ་བ་འཐེན་པ་དག་ལ་རྡུང་རྡེག་གིས་ཆད་པ་གཅོད་རྒྱུ། འགའ་ཡིས་སློབ་མ་བུ་མོ་དག་བཙན་གཡེམ་དང་། སློབ་མའི་ལག་ནས་རྒྱུ་རྫས་ལོན་ཐབས་སོགས་བྱེད། དགེ་རྒན་བཟང་པོ་རྣམས་ཀྱིས་སློབ་མ་རིག་གནས་ཞན་པ་དག་ཟུར་དུ་བསྐྱར་སློབ་བྱེད་ཅིང་། ཀུན་སྤྱོད་དང་གཤིས་ཀ་མི་ལེགས་པ་དག་འཇམ་རྩུབ་ཅི་རིགས་ཀྱིས་ལེགས་ལམ་ལ་བཀོད་པ་དང་། སློབ་མའི་རིག་གནས་དང་ཀུན་སྤྱོད་ཡར་རྒྱས་མ་སོང་ཚེ་སྡུག་གིས་མནར་ཞིང་ངུ་བ། སློབ་མ་ན་བ་དང་སྡུག་བསྔལ་ཡོད་ཚེ་སྨན་བསྟེན་པ་དང་སེམས་གསོ་སོགས་སྒོ་ཀུན་ནས་རོགས་རམ་དང་རྒྱབ་སྐྱོར་བྱེད། མདོར་ན་མི་རིགས་སམ་རྒྱལ་ཁབ་འཕེལ་རྒྱས་དང་སྟོབས་ལྡན་འགྱུར་མིན་ནི། ན་གཞོན་སློབ་མ་འདི་དག་ལ་རག་ལས་ལ། སློབ་མ་བཟང་པོ་འགྱུར་མིན་དགེ་རྒན་ལ་རག་ལས་པས་དགེ་རྒན་གྱི་བྱ་བ་གཉེར་བའི་སྐྱེ་བོ་ཡོངས་ཀྱིས་དུས་རྒྱུན།
བསམ་པ་བཟང་ཞིང་གཡོ་སྒྱུ་ཆུང་བ་དང་། །
གཤིས་རྒྱུད་དྲང་ཞིང་ལྷག་བསམ་ལྡན་པ་དང་།།
སློབ་ལ་དགའ་ཞིང་སློབ་ཁྲིད་བྱེད་ལ་མཁས།།
སློབ་མར་བརྩེ་ཞིང་དཀའ་དུབ་དང་དུ་ལེན།།
ཉིན་བཞིན་དཔེ་ཀློག་བསླབ་ཚུལ་གསར་གཏོད་མང་།།
རང་གི་དོན་ལས་སློབ་མའི་བྱ་བ་གཙོ།།
འཁྲིད་བྱར་ངེས་ཤེས་དུས་ཚོད་ཆུད་མི་གཟན།།
སྤྱོད་ལམ་བཟང་ཞིང་སློབ་མའི་མིག་དཔེ་འོས།།
སེམས་རྒྱུད་དྲང་པས་སློབ་མའི་བློ་སེམས་འགུལ།།
ཤེས་རིག་ལྡན་པས་ཁྲིད་དོན་བློ་མི་རྨོངས། །
ན་གཞོན་རྣམས་ཀྱི་མདུན་ལམ་སྒྲོན་མེ་དགོས།།
དེ་ལྟར་མ་ཡིན་ཕྱོགས་རིས་ཆགས་སྡང་ཆེ།།
བློ་གྲོས་ཞན་ཅིང་ང་རྒྱལ་ཕྲག་དོག་ཆེ།།
བློ་ཁོག་ཆུང་ཞིང་ཀུན་ལ་ཟུར་ཟ་ཆེ།།
བརྩོན་འགྲུས་མེད་ཅིང་ལེ་ལོ་སྒྱིད་ལུག་ཆེ།།
དཔེ་ཀློག་མི་དགའ་སྡུག་གཏམ་མུག་གཏམ་ཆེ།།
བསམ་པ་མི་བརྟན་བསམ་རྒྱུ་དྲན་རྒྱུ་ཆེ།།
འཁྲིད་བྱ་མི་ཤེས་བསྟོད་འདོད་གྲགས་འདོད་ཆེ།།
ལས་བྱ་མི་བཅོས་ཉལ་དང་གཡོ་སྒྱུ་ཆེ།།
འདི་འདྲ་ཆེ་བ་ཚང་བའི་དགེ་རྒན་ནི།།
ན་གཞོན་མདུན་ལམ་བཀག་པའི་ཕུང་འདྲེ་དང་།།
མི་རིགས་རྗེས་ལུས་བསྒྱུར་བའི་ཞབས་འདྲེན་དང་།།
ལམ་ལོག་གནས་སུ་ཁྲིད་མཛད་སྡིག་རྒན་ཡིན།།
དེང་དུས་དགེ་རྒན་རྣམས་ཀྱིས་དུག་བཞིན་སྤོངས།།
ཞེས་པའང་རྨོངས་པ་ཆོས་བཟང་ནས་རང་ལ་གསོས་འདེབས་ཕྱིར་༢༠༡༥ལོའི་ཟླ་༡༡པའི་ཚེས༥ཉིན་བྲིས་པ་དགེའོ།།

·གསར་འགྱུར་གོང་མ:འདི་ཕྱི་གཉིས་ཕུང་གི་ཐ་མག་དང་སྣ་དུད་སྤོངས་བར་བསྐུལ་བ།
·གསར་འགྱུར་འོག་མ:ཨ་དཀོན་རིན་པོ་ཆེའི་གཞན་ཕན་དགེ་ལས་མུ་མཐུད་ནས་མཇུག་སྐྱོང་གནང་རྒྱུ་ཡིན་པ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
·དྲང་བདེན་དང་གནས་ལུགས་སྐྱོང་བ་ནི་སློབ་གསོའི་སྲོག་རྩ་ཡིན། 2016/1/4 14:33:07
·སློབ་གསོའི་སྐོར་གྱི་བཅར་འདྲི་ཞིག 2015/12/1 14:18:32
·འཛམ་གླིང་སློབ་ཆེན་ཨང་དང་པོའི་སློབ་མའི་སློབ་སྦྱོང་བྱེད་སྟངས། 2015/10/28 12:45:21
·མི་རིགས་རང་གི་སྐད་དང་ཡི་གེ་གལ་ཆེ་ཚུལ་ལས་འཕྲོས་པའི་སྙིང་གཏམ། 2015/5/17 21:03:50
·ང་ཚོས་སློབ་སྦྱོང་བྱེད་སྟངས་ཅུད་ཟད་བསྒྱུར་དགོས་པ་འདྲ། 2015/5/17 20:57:54
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
མིག་སྔར་དཔྱད་བརྗོད་མི་འདུག
འབྲེལ་ཡོད་དཔྱད་བརྗོད 0 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།29.30MS