ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> གཏེར་གྱི་བུམ་བཟང་། >> སློབ་གསོ
  གསར་འགྱུར་ཀློག་པ།

སློབ་གསོའི་སྐོར་གྱི་བཅར་འདྲི་ཞིག

[རྩོམ་པ་པོ:འབའ་སྨད།  ཡོང་ཁུངས:དྲ་ཐོག  དུས་ཚོད:2015/12/1 14:18:32  བཀླགས་ཐེངས:1544][ཡིག་གཟུགས:ཡིག་གཟུགས་མདོག]

 

                                                          དོལ་རྒྱ་བསོད་ནམས་ཚེ་རིང་ལ་སློབ་གསོའི་སྐོར་བཅར་འདྲི་བྱས་པ།

                                                                               སློབ་གསོའི་ལྟ་ཚུལ་ལྷུག་བརྗོད།


                                               —འཕྲིན་གྱི་གྲོགས་པོ་རྒྱལ་ལོ་ཚེ་རིང་གི་བཅར་འདྲི་དང་ལེན་བྱས་པ།


                                                                            འབའ་སྨད་རྒྱལ་ལོ་ཚེ་རིང་།

འབའ་སྨད་རྒྱལ་ལོ་ཚེ་རིང༌། རྒན་ལགས་ཀྱིས་བསྐྱར་དུ་བདག་གི་བཅར་འདྲི་དང་ལེན་བྱས་པར་ཐུགས་རྗེ་ཆེ་ཞུ།


དོ་རྒྱ་བསོད་ནམས་ཚེ་རིང༌། ལན། སྐྱོན་མི་འདུག


འབའ་སྨད་རྒྱལ་ལོ་ཚེ་རིང༌། ཁྱེད་ཀྱིས་ལོ་མང་པོ་སློབ་གསོའི་ཞིབ་འཇུག་གི་གོ་རིམ་མང་པོ་བརྒྱུད།བོད་ཀྱི་ད་ལྟའི་སློབ་གསོའི་གནས་སྟངས་དང༌།ལེགས་སྐྱོན་བཅས་ཀྱི་ཐད་དུ་རང་གིས་དགོངས་འཆར་བཏོན་ན་ག་འདྲ།


དོ་རྒྱ་བསོད་ནམས་ཚེ་རིང་། བོད་ཀྱི་ད་ལྟའི་སློབ་གསོ་ཟེར་ན་ཤིན་ཏུ་རྒྱ་ཆེ་ལ་གཏིང་ཟབ་པ་ཞིག་སྟེ། སློབ་གསོ་མྱོང་ཡུལ་གྱི་ཆ་ནས་དབྱེ་ནའང་སེམས་ཅན་གྱི་སློབ་གསོ་དང་།འབངས་མིའི་སློབ་གསོ།མི་རིགས་ཀྱི་སློབ་གསོ། ཡུལ་མིའི་སློབ་གསོ།སྡེ་མིའི་སློབ་གསོ། ཚོ་མིའི་སློབ་གསོ། ཁྱིམ་མིའི་སློབ་གསོ། སློབ་མའི་སློབ་གསོ། གྲྭ་བའི་སློབ་གསོ། ཇོ་མོའི་སློབ་གསོ་སོགས་མང་དུ་འདུག་ན། ཁོ་བོས་དེ་དག་གི་གནས་སྟངས་འཆད་པ་ནི་བྱ་ཕོའི་ཁ་ནང་ལ་སྲན་མ་ཀ་གདེང་བཞག་པ་དང་ཀུན་ནས་མཚུངས་སོ། ཡིན་ཡང་ཞིབ་ཏུ་བསམ་བློ་རེ་བཏང་ན་གཏན་ནས་འཆད་རྒྱུ་མེད་པའང་མ་ཡིན་ཏེ། ཁྱེད་ཀྱི་དྲི་བ་ཆེ་ཆེ་མོ་དེ་ཆུང་ཆུང་ཞིག་ལ་བཏང་སྟེ་སློབ་གྲྭའི་སློབ་གསོ་ཁོ་ན་ལ་ཟེར་ཆོག་པར་སྙམ། དེ་ལྟར་ཡང་ལན་གདབ་རྒྱུ་དཀའ་ལས་ཁག་པོ་ཡོད་དེ། བོད་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་གཉུག་གཤིས་དང་ཁ་འཕྲོད་པ་ཞིག་ངེས་པ་དོན་གྱིས་བདག་གིས་མི་ཐོན་ཡང་སློབ་དཔོན་ཆེན་མོ་དག་མི་འཇུག་ཅིང་གཞི་རིམ་དགེ་རྒན་གྱིས་མི་ཡོང་བའི་ལས་འདི་འཆད་ཁུལ་འདྲ་བྱས་ན། སྤྱིར་འཇིག་རྟེན་གྱི་བྱ་དངོས་གང་ལ་ཡང་བཀྲ་ཤིས་པའི་ཕྱོགས་ཤིག་དང་སྣ་ནག་པའི་ཕྱོགས་རེ་ཡོད་ངེས་པས་བོད་ཀྱི་ད་ལྟའི་སློབ་གསོའི་གནས་སྟངས་ཀྱང་དེ་མ་འདས་སོ།། དེ་ཡང་བཀྲ་ཤིས་པའི་ཕྱོགས་ནས་རོང་ཕྱོགས་ཀྱིས་སྣ་དྲངས་པའི་སློབ་ཆུང་དང་དམའ་འབྲིང་གི་སློབ་མ་སློབ་གྲྭར་ཞུགས་ཚད་མཐོ་བ་དང་།ད་དུང་མཐོ་འབྲིང་དང་སློབ་ཆེན་ཞེས་པའི་འགྲོ་ས་ཞིག་ཀྱང་ཡོད་པས་དགའོ།། ལྡོག་ཕྱོགས་ནས་མཐོ་འབྲིང་མན་ཆད་རྒྱུགས་ཀྱིས་བཙིར་དྲགས་པ་དང་། སློབ་གྲྭ་ཆེན་མོ་གསོབ་ཀྱིས་འགྱིངས་རིང་བ་དག་གོ། དེའི་ཁར་དགེ་རྒན་དག་གི་ངན་རེ་བཤད་ན། དགེ་རྒན་ཚེ་ན་དང་། དགེ་རྒན་འབུ་རྐོ། དགེ་རྒན་ཤོ་རྒྱག དགེ་རྒན་ལོ་པན། དགེ་རྒན་ཆང་འཐུང་། དགེ་རྒན་དུ་འཐེན། དགེ་རྒན་ཡོག་ལི། དགེ་རྒན་འགྱོ་མ། དགེ་རྒན་ལས་གཞི་ཅན། དགེ་རྒན་ཡང་མོ། དགེ་རྒན་ཚོང་བ་རྣམས་ནི་སློབ་གསོའིཞིང་བཅུཚང་བའི་བསྟན་དགྲ་ཁོ་ནའོ། འོ་ད་དུང་གཙོ་བོ་གཙོ་བོ་ཞིག་བརྗེད་འདུག་སྟེ། དེ་ནི་སློབ་གྲྭའི་མིང་གི་མངོན་བརྗོད་དུ་གྲགས་པའི་སློབ་གཙོའོ། སློབ་གཙོ་དགེ་བཤེས་ནི་སློབ་གྲྭ་དགེ་བཤེས། སློབ་གཙོ་བརྟན་འཇགས་ནི་སློབ་གྲྭ་བརྟན་འཇགས། སློབ་གཙོ་ལོ་པན་ནི་སློབ་གྲྭ་ལོ་པན་ནམ། ཡང་ན་སློབ་གཙོ་འདོད་ཆགས་ཅན་གྱིས་སློབ་གྲྭ་གཞིབ། ཞེ་སྡང་ཅན་གྱིས་སློབ་གྲྭ་གཏོར། གཏི་མུག་ཅན་གྱིས་སློབ་གྲྭ་ལྷུང་བར་བྱེད་དོ་ཞེས་ཀྱང་སྨྲ་བར་བྱའོ། གཞན་བོད་ཀྱི་སློབ་གསོའི་གནས་སྟངས་ཀྱི་ཆ་ནས། བོད་ཀྱི་སློབ་གྲྭའི་སློབ་གསོ་ནི་ནང་ལོགས་ཀྱི་སློབ་གསོ་ལ་ལྟོས་ཏེ་ཡིག་རྨོངས་སེལ་བ་ཙམ་དང་།སྤྱི་ཚོགས་རྙིང་བ་ལ་ལྟོས་ཏེ་ཁྱབ་ཆེ་བ། དགོན་པའི་སློབ་གསོ་ལ་ལྟོས་ཏེ་ཟབ་ཚད་མེད་པ་ཞིག་ཏུ་མཐོང་ངོ་།

འབའ་སྨད་རྒྱལ་ལོ་ཚེ་རིང༌། ད་ལྟའི་བོད་ཀྱི་སློབ་གྲྭ་ཆུང་འབྲིང་གི་སློབ་གསོའི་ཁྲོད་དུ་སློབ་ཁྲིད་དང༌།དོ་དམ།དགེ་རྒན་གྱི་དཔུང་ཁག་ཐད་ལེགས་བཅོས་གང་དག་བྱེད་དགོས་ཤིང༌། ཁ་ཕྱོགས་ཇི་ལྟ་བུ་ཞིག་བཟུང་ན་འགྲིག

དོ་རྒྱལ་བསོད་ནམས་ཚེ་རིང་། དེ་དེ་བཞིན་ཏེ།དགེ་རྒན་བཟང་པོའི་དཔུང་ཁག་ཅིག་ལ་དོ་དམ་བཟང་པོ་ཞིག་ཡོད་ན་སློབ་ཁྲིད་བཟང་པོ་བྱེད་པ་ནི་ཐག་གིས་ཆོད་པའོ། སློབ་གཙོ་བཟང་པོས་དགེ་སློབ་ཀུན་གྱི་སེམས་ཀྱི་སྣ།སྲིད་ཀྱི་མགོ།ཤེས་བྱའི་ཁ་གསུམ་པོ་རེ་རེ་ནས་ལེགས་ལམ་དུ་ངེས་པར་དུ་ཁྲིད་ཐུབ་པ་ཞིག་ཅིས་ཀྱང་དགོས་སོ།། དགེ་རྒན་བཟང་པོས་སློབ་མའི་ལེགས་ཕྱོགས་མཐོང་བ་མ་ཟད་མཐོང་ནས་ཀྱང་ལེགས་ཕྱོགས་ཇེ་མང་དང་ཇེ་ཆེ།ཇེ་རྒྱས་སུ་གཏོང་ཐུབ་པ་ཞིག་ལ་འདོད།དེ་ཡང་གལ་ཆེན་ནང་གི་དོན་ཆེན་ནི་སློབ་གཙོ་དང་དགེ་རྒན་གཉིས་ཀའི་བཟང་པོ་རྒྱུན་འཁྱོངས་བྱ་རྒྱུ་ཉག་ཅིག་ཡིན་པས་དེ་ལ་ཁོ་བོས་ནི་རང་རང་མ་འགུལ་ན་ཁ་ལ་བཟའ་རྒྱུ་མི་ཡོང་བའི་འགན་གཙང་ལེན་ལས་ཐབས་གཞན་ཞིག་མི་རྙེད་དོ།།འགན་གཙང་ལེན་འདིས་སློབ་མའི་བདེན་པ་མཐོང་བའི་སྙིང་སྟོབས་དང་།དགེ་བ་བསྒྲུབ་པའི་ཆོད་སེམས།མཛེས་པར་ཕྱོགས་པའི་བསམ་བློ་གསུམ་པོའི་དཔངས་བསྟོད་རྒྱུ་སྙིང་བོར་འཛིན་དགོས་པར་འདོད་དོ།


འབའ་སྨད་རྒྱལ་ལོ་ཚེ་རིང༌། སྣང་ཚུལ་ཞིག་ལ།དེང་གི་དགེ་རྒན་རྣམས་ཀྱིས་སློབ་མར་བསླབ་དེབ་རྐྱང་བ་གནད་དུ་འཛིན་པ་ལས་བསླབ་ཕྱིའི་དཔེ་ཆ་ལག་ཏུ་ཡོད་པར་མཐོང་ན།དེ་ནི་དུས་ཚོད་ཆུད་ཟོས་དང༌།ཡང་སློབ་མ་ཚོས་རྩོམ་འབྲིའི་ལས་སུ་ཞུགས་ན།དེ་ཡང་ཤོག་བུ་བརླག་བྱེད་ཅིག་ཏུ་ངོས་བཟུང་ནས་སློབ་མའི་མཐོང་སྒོ་མང་པོ་ཞིག་འགོག་ཀྱིན་འདུག་པས་ཁྱེད་ལ་ལྟ་ཚུལ་ག་འདྲ་འདུག

དོ་རྒྱ་བསོད་ནམས་ཚེ་རིང༌། ལན།དེ་ཡང་སློབ་མའི་ལག་ཏུ་བསླབ་ཕྱིའི་དཔེ་ཆ་མེད་པ་ནི་ཁོ་ཚོར་དེ་ལས་ལྷག་པའི་འགན་ཁུར་ཞིག་སྟེ་རྒྱུགས་ཟེར་བ་ཞིག་ཡོད་པས་ཡིན་རྒྱུ་རེད། རྒྱུགས་འཕྲོད་པ་ནི་དགེ་རྒན་དང་ཁྱིམ་བདག་སློབ་མ་གསུམ་གྱིས་གྲོས་བྱས་ནས‘‘གན་རྒྱ’’བཞག་ཡོད་པ་རེད།‘‘གན་རྒྱ’’འི་ལས་འགན་ཡོངས་འགྲུབ་བྱས་ཡོད་མེད་སྲིད་གཞུང་དང་སློབ་གཙོ་ཁྱིམ་བདག་ཚོས་ཤོར་གི་འཇུག་ནི་མ་རེད།གལ་ཏེ་སློབ་མས་རྒྱུགས་འཕྲོད་ན་ལག་ལ་དཔེ་ཆ་ཅི་ཞིག་བཟུང་རུང་དགེ་རྒན་བླུན་པོ་ཞིག་མིན་ན་དགའ་བས་མི་ཚད་ད་དུང་སྐུལ་ལྕག་གཏོང་ངེས་སུ་ཟད་དོ།།རྩོམ་འབྲི་བ་ནི་སློབ་མའི་ཤེས་བྱ་ཁོ་ན་མ་ཟད་ཡོན་ཏན་ཡོད་མེད་ལའང་ལྟ་ཐུབ་པའི‘‘གཤིན་རྗེའི་མེ་ལོང’’ཞིག་ཡིན་མོད།སློབ་མས་རྩོམ་ཏག་ཏག་བྲིས་ནས་རྒྱུགས་མི་འཕྲོད་ན་རྩིས་ཚན་དགེ་རྒན་ཕར་ཟད་སྐད་ཡིག་དགེ་རྒན་ཡང་ཇི་ལྟར་དགའ།།ནམ་ཞིག་རྒྱུགས་དང་རྩོམ་གཉིས་ཀྱིས་ཀྱང་སློབ་མའི་རྒྱུ་སྤུས་ལ་ཕན་འདོགས་ཐུབ་པའི་དུས་ཤིག་ཤར་བ་ན་འགལ་བ་དེ་ཡང་རང་བཞིན་གྱིས་ཞི་ནས་མེད་འགྲོ་བར་གདོན་མི་ཟའོ།



འབའ་སྨད་རྒྱལ་ལོ་ཚེ་རིང༌། ད་ལྟའི་དུས་འདིར།སློབ་གསོའི་གཞུང་ལུགས་དང་ལག་ལེན་གཉིས་ཁ་མི་འཕྲོད་པའི་ཚུལ་དུ་གནས།རྒྱུ་མཚན། གཞུང་ལུགས་སྟེང་ནས་སློབ་གཉེར་བ་དག་ལ་སློབ་གསོ་བཏང་སྟེ་དཔེ་ཀློག་ལ་སྤྲོ་བར་འཇུག་པར་བསྟན་འདུག་ལ། ཡིན་ནའང་། བོད་ཀྱི་སློབ་མ་དག་ལ་སློབ་གསོ་ག་འདྲ་བཏང་ཡང་ཕན་ཆེན་མི་ཐོགས་པར།ལྡོག་སྟེ་གཅར་རྡུང་སྣ་ཚོགས་བྱེད་དགོས་ཚོད་འདུག གནད་འདི་ལྟ་བུ་མཚོན་ན་གཞུང་ལུགས་གཙོ་བོར་འཛིན་དགོས་སམ། ཡང་ན་གཅར་རྡུངགི་ལས་ལ་འཇུག་དགོས། ཇི་ལྟར་ཐག་གཅད་ན་འོས།

དོ་རྒྱ་བསོད་ནམས་ཚེ་རིང༌། ཐོག་མར་གཅར་རྡུང་ནི་འགྲོ་བ་མིའི་ཆེས་གདོད་མར་གྱུར་བའི་མྱི་བཟང་ལམ་དུ་འཇུག་པའི་ཐབས་ལམ་མོ་ཞེས་ལན་གདབ་རྒྱུ་ཡིན།དེ་ཡང་མི་རྣམས་ཀྱིས་ལག་ལེན་ལས་ར་སྤྲད་པ་ནི་བསྟོད་པས་མི་མགུ་སུ་ཡང་མེད་པས་སློབ་མར་བསྟད་ནས་ཡར་ལ་བསྐོར་པ་ཡང་ཆེས་མཆོག་ཏུ་གྱུར་བའི་སློབ་གསོ་ཞིག་ཏུ་མཐོང་ངོ་།། ལྷག་པར་དུ་ནུབ་གླིང་གི་མང་གཙོ་དང་རང་དབང་འདྲ་མཉམ་གྱི་ཆུ་མིག་གང་སར་བརྡོལ་བ་དང་རྒྱལ་ཁབ་ཀྱི་ཁྲིམས་ལུགས་ཁྲིམས་སྲོལ་གྱི་བསྟན་པ་རྒྱས་པའི་དུས་ལ་དགེ་རྒན་གྱིས་སློབ་མར་གཅར་ཞིང་རྡུང་བ་ན་རང་གི་ལྕགས་ཀྱི་ཅ་ནེ་ནམ་ཚོད་བོར་བ་ཡང་མི་ཤེས་སོ། ཡིན་ནའང་འགྲོ་བ་མིའི་ཆོས་ཉིད་ལྟར་ན་གཅར་རྡུང་འདིས་ཀྱང་སློབ་གསོ་གཏོང་མཁན་དག་ཐབས་ཟད་འུ་ཐུག་ཏུ་གྱུར་པའི་ཚེ་སློབ་མ‘‘ཐ་ཤལ་འགའ་ཞིག་ལེགས་ལམ་དུ་འཇུག་པ་ལ་ནི་གོ་ཆོད་ཆོད་དུ་སྣང་ངོ་།།དེའི་དོན་ནི་བཙོན་མའི་དཔེ་གསོན་པོས་ཀྱང་གསལ་བར་བྱེད་དོ།།ལོ་འགའི་སྔོན་ལ་སི་ཁྲོན་ཁྲུང་ཆིན་ནས་རུས་ཝན་ཅན་གྱི་བུད་མེད་ཅིག་གིས་གཅར་ན་ཆོག་པའི་སློབ་གྲྭ་ཞིག་བཙུགས་ཏེ་ལེགས་འགྲུབ་བྱུང་བ་མ་ཟད་གཞན་ལའང་བརྙན་འཕྲིན་ལས་སྒྲོག་ཏུ་བཅུག་གོ། དེ་ཤེད་ཅིག་ལ་ཁོ་བོས་ཀྱང་ཁོ་མོར་ཁ་པར་བཏང་སྟེ་རྗེས་སུ་ཡི་རངས་ཕུལ་ཏོ།

འབའ་སྨད་རྒྱལ་ལོ་ཚེ་རིང༌། ད་ལྟའི་དུས་འདིར།བོད་ཀྱི་སློབ་གྲྭ་ཁག་ཏུ་ཇི་ལྟ་བུའི་དགེ་རྒན་དགོས། དགེ་རྒན་གྱི་དཔུང་སྡེ་ག་འདྲ་ཞིག་ཡིན་ན་འགྲིག

དོ་རྒྱ་བསོད་ནམས་ཚེ་རིང༌། དེ་ཡང་དགེ་རྒན་ལུས་ཀྱིས་ཁྲིད་ཐུབ་པ་དང་།ངག་གིས་ཕྲོལ་ཐུབ་པ།ལག་གིས་འབྲི་ཐུབ་པ་སྟེ་ཐུབ་པ་རྣམ་གསུམ་ཅན་ཞིག་དགོས།དེའི་གཞུང་ཤིང་ནི་རང་གི་ལས་ཀ་ཡིན་པ་ལས་གཞན་གྱི་ལས་ཀ་མ་ཡིན་ནོ།

འབའ་སྨད་རྒྱལ་ལོ་ཚེ་རིང༌། ཁྱེད་ཀྱིས་བལྟས་ན།དགེ་རྒན་ཞིག་གིས་འགན་ག་ཚོད་ཅིག་བསྒྲུབས་ཏེ་ལེགས་འགྲུབ་བྱུང་ན་ད་གཟོད་དགེ་རྒན་ཕུལ་དུ་བྱུང་བ་ཞིག་ཡིན།


དོ་རྒྱ་བསོད་ནམས་ཚེ་རིང༌། ལན།ཀུན་སློང་མང་པོའི་ནང་ནས་གཅིག་ཡར་བསླངས་ནས་ཕྱིར་ལུས་ངག་ཏུ་མ་མངོན་པ་ལ་ཀུན་སློང་དང་ཕྱིར་མངོན་པ་ལ་ཀུན་སྤྱོད་ཅེས་མིང་དུ་གདགས་སོ།།སློབ་མར་ཤེས་བྱ་ཁྲིད་ཞོར་དུ་ཀུན་སྤྱོད་ཀྱི་ཆ་ནས་བུས་ཕྲུག་ཡ་རབས་ཤིག་དང་། སློབ་མ་བཟང་པོ་ཞིགསྡེ་མི་དགའ་བོ་ཞིགའབངས་མི་ཚད་ལྡན་ཞིག་སྐྱེད་སྲིང་མཁན་ནི་དགེ་རྒན་མཆོག་ཅེས་བྱའོ།



འབའ་སྨད་རྒྱལ་ལོ་ཚེ་རིང༌། ཉིད་ཀྱིས་བལྟས་ན་དེང་སྐབས་བོད་ཀྱི་སློབ་གསོ་ཁྲོད་གནས་པའི་སློབ་གྲྭ་ཆུང་འབྲིང་གི་དགེ་རྒན་རྣམས་ཀྱི་གནད་དོན་ཚབས་ཆེ་བ་དེ་གང་རེད་འདོད། ཇི་ལྟར་སྙོམས་སྒྲིགས་བྱེད་དགོས་སམ།

དོ་རྒྱ་བསོད་ནམས་ཚེ་རིང༌། དེ་ཚིག་གཅིག་གིས་བཤད་ན་དགེ་རྒན་ལ་བྱང་སེམས་མེད་པའོ།།སྐྱ་བོའི་སྐད་ལྟར་ན་གཞན་ཕན་གྱི་ལྷག་བསམ་མེད་པ་དེ་རེད།དེ་ཡང་ཡིན་ཏེ་ད་ལྟ་དགེ་རྒན་དག་ནི་སློབ་ཆེན་ལས་མཐར་ཕྱིན་པ་ཁོ་ན་ཡིན་རུང་།སྔོན་མའི་དགེ་རྒན་དགེ་ཐོན་པ་ལྟར་སློབ་མ་ལ་ཕན་མི་ཐོགས་པ་ནི་གང་གིས་ལན་ནམ།དེ་ལ་བོད་ཀྱི་སེམས་དཔའ་ཆེན་པོ་རྫ་དཔལ་སྤྲུལ་གྱིས།བླ་མ་བརྟག་པར་བྱ་བ་དེ་ཡང་སྤྱིར་མདོ་རྒྱུད་ནས་གང་བཤད་པའི་ཡོན་ཏན་ཚང་པ་ཞིག་དགོས་པ་ཡིན་ཀྱང་།ཁྱད་པར་ཐུགས་རྒྱུད་བྱང་ཆུབ་ཀྱི་སེམས་དང་ལྡན་པ་ཞིག་ནི་ངེས་པར་དགོས་པ་ཡིན་པས།མདོར་བསྡུ་ན་བརྟག་པ་གཅིག་པོ་བྱང་ཆུབ་ཀྱི་སེམས་དང་ལྡན་མི་ལྡན་འདི་ལ་འདུས།ཐུགས་རྒྱུད་བྱང་ཆུབ་ཀྱི་སེམས་དང་ལྡན་པ་ཞིག་ཡིན་ཕྱིན་ཆད་སློབ་མ་ལ་ཡང་འདི་དང་ཕྱི་མར་གང་ཕན་པ་དེ་ལྟར་དེ་ལྟར་བྱེད་པས་དོན་དུ་མི་འགྱུར་བ་མི་འོང་ཞིང་།བླ་མ་དེས་བསྟན་པའི་ཆོས་ཀྱང་ཐེག་པ་ཆེན་པོའི་ལམ་དང་འབྲེལ་བས་ཅིས་ཀྱང་ཡང་དག་པའི་ལམ་དུ་འགྲོ་བ་ཡིན།བྱང་ཆུབ་ཀྱི་སེམས་དང་མི་ལྔན་ཕྱིན་ཆད་བླ་མ་ལ་རང་འདོད་ཀྱི་འཁྲིས་ཡོད་པས་སློབ་མའི་རྒྱུད་ཀྱང་ལེགས་པར་མི་ཐུལ་ཞིང་།ཆོས་བསྟན་པ་ཡང་ཅི་ཙམ་ཟབ་ཟབ་མོ་དང་མཚར་བ་ལྟར་འདུག་ཀྱང་མཐར་འཇིག་རྟེན་ཚེ་འདི་འབའ་ཞིག་གི་ཆེད་དུ་འཆོར་བ་ཡིན།དེས་ན་བླ་མ་བརྟག་པའི་གནད་ཐམས་ཅད་འདིར་འདུ་བས་ཐུགས་རྒྱུད་བྱང་ཆུབ་སེམས་ཀྱིས་གང་བ་ཞིག་འདུག་ན་ཆ་ལུགས་སོགས་ཇི་ལྟར་འདུག་ཀྱང་བསྟེན་པར་བྱ།རྒྱུད་བྱང་ཆུབ་ཀྱི་སེམས་དང་བྲལ་བ་ནི།འཕྲལ་དུ་ངེས་འབྱུང་དང་སྐྱོ་ཤས་སྒྲུབ་ཚུགས་དང་ཀུན་སྤྱོད་སོགས་ཅི་ཙམ་བཟང་བ་ལྟར་སྣང་ཡང་བསྟེན་བྱ་མིན་ནོ།། ཞེས་གསུངས་པ་ལྟར།ཁོ་བོས་དགེ་རྒན་དག་གིས་ཀྱང་མཐའ་གཅིག་ཏུ་འདི་ལྟར་བྱེད་དགོས་པའི་དོན་མ་ཡིན་གྱི།རང་རང་གིས་ལས་ཀ་དང་འཚམས་པའི་ཆོས་རེ་ཟ་དང་ཟུར་ནས་ལེན་ཤེས་དགོས་པར་བསྟན་པ་ཡིན་ནོ།།དེ་ལྟར་ཡང་ཡིན་ཏེ།འགའ་ཞིག་ལྟར།བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་ལ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཞེས་པ་འདི་ཐེག་པ་ཆེན་པོའི་ཆོས་སྒོར་འདྲེན་པའི་བླ་མ་ཞིག་གི་ཚད་གཞི་ཡིན་པ་མ་ཤེས་པར་དེང་རབས་ཀྱི་སློབ་གྲྭའི་དགེ་རྒན་དག་ལ་སྦྱོར་ཅི་ཐུབ་བྱེད་པ་ནི་ཆོས་པ་དག་དགོད་ཁ་འཆོར་བའི་གནས་སུ་ཟད་དོ།།ཡིན་ནའང་མདོ་རྒྱུད་དག་ལས་དགེ་བའི་བཤེས་གཉེན་བསྟེན་ཚུལ་དང་སློབ་མ་སྐྱོང་ཚུལ།སེམས་བསྐྱེད་ཚུལ་སོགས་རང་གི་ལས་སྐལ་དང་མཐུན་པར་ལེན་ཤེས་ན་ཕྱེ་ལེན་ལེན་བྱས་ཆོག་པ་ནི་འུ་ཅག་གི་བསོད་ནམས་སུ་འདོད་དོ།

འབའ་སྨད་རྒྱལ་ལོ་ཚེ་རིང༌། གཞི་རིམ་དགེ་རྒན་མང་ཤོས་ལ་དཔེ་ཀློག་གི་འདུ་ཤེས་དང་གོམས་སྲོལ་མེད་པར་མ་ཟད།དགེ་རྒན་རེ་གཉིས་ཀྱིས་དཔེ་ཀློག་དང་སློབ་མའི་སློབ་སྦྱོང་གི་ཐད་དུ་ཤི་འཐམ་རོ་འཐམ་བྱས་ཀྱང་དགེ་རྒན་གཞན་རྣམས་ཀྱིས་མཐོང་ཆུང་དང༌།ཕྲག་དོག་གི་ཨ་འཐས་འཛིན་མཁན་རྣམས་ལ་ལྟ་ཚུལ་ཅི།

དོ་རྒྱ་བསོད་ནམས་ཚེ་རིང༌། ལན།གཞི་རིམ་དགེ་རྒན་མང་ཤོས་ལ་དཔེ་ཀློག་གི་འདུ་ཤེས་དང་གོམས་སྲོལ་མེད་པར་མ་ཟད།དགེ་རྒན་རེ་གཉིས་ཀྱིས་དཔེ་ཀློག་དང་སློབ་མའི་སློབ་སྦྱོང་གི་ཐད་དུ་ཤི་འཐམ་རོ་འཐམ་བྱས་ཀྱང་དགེ་རྒན་གཞན་རྣམས་ཀྱིས་མཐོང་ཆུང་དང་ཕྲག་དོག་བྱེད་པ་དེ་སྒྲ་ཞིག་ཡིན་ན་བྲག་ཅ་རུ་སྒོམས།མི་ཞིག་ཡིན་ན་གྲོགས་སུ་ལྟོས།ལས་ཤིག་ཡིན་ན་མཐུན་རྐྱེན་དུ་སྒྲུབས་དང་དེ་ནི་ཆོས་སྲིད་གང་གིའང་གདམས་པ་ཡིན་ནོ།། ཀུན་མཁྱེན་ཆོས་ཀྱི་རྒྱལ་པོ་ཡང་ཁམས་པའི་མི་འགས་བརྙས་པའི་གནས་ཚུལ་དེ་འདྲ་ལ་འཕྲད་ནས།མི་སོགས་སྡང་བས་ཆོས་དང་འཕྲད་པ་དེ།།ཕན་བདེ་རྙེད་པས་སྡང་བྱེད་བཀའ་དྲིན་ཆེ།། ཞེས་ཉམས་སུ་བླངས་ཏེ་བསླབ་བྱ་མཛད་འདུག་གོ


འབའ་སྨད་རྒྱལ་ལོ་ཚེ་རིང༌། གཞན།ད་ལྟའི་སྙིགས་མའི་དུས་འདི་ལ་ཡོན་ཏན་མེད་པའི་མི་སྐོར་ཞིག་རང་ལ་རིག་པའི་སྣོད་ཡང་མོ་ཡིན་བཞིན་དུ་སློབ་གསོའི་ལས་གནས་སྟེང་འཚང་རྒྱག་བཞིན་པའི་སྣང་ཚུལ་བོད་ཡུལ་དུ་དར་ཁྱབ་ཆེ་བས།མི་འདིའི་རིགས་སློབགསོའི་ལས་གནས་སྟེང་དུ་འཚང་ན་འོས་སམ་མི་འོས།

དོ་རྒྱ་བསོད་ནམས་ཚེ་རིང༌། ཐོག་མར་འདི་ནས་སྙིགས་མའི་དུས་ཞེས་པ་འདི་རགས་རིམ་ཞིག་བཤད་འདོད། དེ་ཡང་སྙིགས་མ་ཞེས་པ་ཧ་ཅང་བཙོག་པའམ་མི་ལེགས་པའི་དོན་ཏེ། དབྱེ་བ་ཕྱེ་ན།སྲོག་རྒུད་པ་ཚེ་ཡི་སྙིགས་མ།ཁྱིམ་པའི་དགེ་ཕྱོགས་རྒུད་པ་ཉོན་མོངས་པའི་སྙིགས་མ།རབ་བྱུང་གི་དགེ་ཕྱོགས་རྒུད་པ་ལྟ་བའི་སྙིགས་མ།ལོངས་སྤྱོད་རྒུད་པ་དུས་ཀྱི་སྙིགས་མ། བསོད་ནམས་དམན་པ་སེམས་ཅན་གྱི་སྙིགས་མ་བཅས་ལྔའོ།།དེ་ཡང་དེང་སང་གི་སྤྱི་ཚོགས་དང་སྦྱར་ན།
1.
ནད་གདོན་ཅ་ལག་རླངས་འཁོར་སོགས་འཆི་རྐྱེན་གྱི་ཁ་དར་བ།
2.
སྡེ་བ་དང་ལས་ཁུངས་ན་རང་འདོད་ཅན་དང་ཁོང་ཁྲོ་ཅན་རྨོངས་པ་དག་གིས་བཀང་བ། 3.གྲྭ་བའི་ནང་ན་ཆོས་ཤེས་མཁན་ཉུང་བ། 3.ས་ཆུ་མེ་རླུང་ནམ་མཁའི་སྤུས་ཀ་ཇེ་ཞན་དུ་སོང་བ། 4.བླ་མ་གྲྭ་བ་ལོག་པ་དང་དཔོན་པོ་ལས་བྱེད་ལྷུང་བ་ཡོད་པོ་འཛོམས་པོ་སྤྲང་བ་སོགས་ཆེས་རྒྱུན་ལྡན་དུ་གྱུར་བའོ།ཡང་རང་གི་མྱོང་བ་ལྟར་བཤད་ན།ང་རང་སློབ་གཙོ་ལ་ལོ་ངོ་བཅུ་བདུན་བསྡད་པའི་རིང་ནི་དགེ་རྒན་གྱི་གྲངས་ཀ་འདང་གིས་འཇུག་མ་ཐུབ་པའི་སློབ་གཙོ་ནུས་མེད་ཀྱི་ལོ་བཅུ་བདུན་ཡིན་ན།རྒྱུ་སྤུས་ཀྱིས་འདང་གིས་འཇུག་པ་ན་ནི་སློབ་གཙོ་གྱུམ་པོ་ཞིག་དང་།ཅུའུ་ཀྲང་ངར་བ་ཞིགརྫོང་དཔོན་བཙན་པོ་ཞིགཧྲུའུ་ཅི་སེམས་དཔའ་དག་གི་འཇུག་སེམས་ཁོ་ན་ལས་ཡོང་རྒྱུ་ཞིག་ཡིན་ལས་ཆེའོ།།དེ་ལྟར་མ་ཡིན་པར་ཧྲུའུ་ཅི་བརྣབ་སེམས་ཅན་ཞིག་དང་། རྫོང་དཔོན་སྟོང་བཤད་རྒྱག་མཁན་ཞིག ཅུའུ་ཀྲང་རང་འདོད་ཅན་ཞིག སློབ་གཙོ་བརྟན་ལྷིང་དམ་ལྡན་ཞིག་གིས་ནམ་ཡང་བབ་ས་མ་རེད་ལགས།། དེ་སྔོན་ཡུལ་ཚོ་ཞིག་ནས་སློབ་མའི་མིང་ཡང་འབྲི་མི་ཤེས་པའི་དགེ་རྒན་ཞིག‘‘འཐུས་མི’’དག་གིས་ཞང་ཀྲང་ལ་འདེམས། སྡེ་བའི་ཀྲི་པུའུ་ཧྲུའུ་ཅི་ཞིག་གིས་ཚུལ་དེ་མཐོང་ནས། འོ། མ་གཞི་ཞང་ཀྲང་ལ་ཡོན་ཏན་དགོས་ས་མི་འདུག་ཟེར་ནས་བརྩད་བརྩད་ནས་དེ་ཡང་ཞང་ཀྲང་ལ་བསྡད་ནས་རྒྱུན་ལྡན་ཞིག་ཏུ་གྱུར་པ་མ་ཟད།རྫ, ོང་དཔོན་ཞིག་གིས་དེ་བློར་བབས་ནས་བལྡག་ལ་ཁད་བྱས་སོ།།དེ་ལྟ་ན།མཁས་པ་ཉིད་ནི་མེད་ན་བློ་གྲོས་རྣམས་ཉམས་མི་རྣམས་འཚོ་བ་དོན་ཡོད་མིན། ཞེས་པའི་ལེགས་བཤད་འདི་ལ་ངེས་ཤེས་མི་འདྲོངས་ཀ་མེད་དོ།



འབའ་སྨད་རྒྱལ་ལོ་ཚེ་རིང༌། སློབ་གྲྭ་ཆུང་འབྲིང་གི་སློབ་མ་རྣམས་ཀྱི་མི་གཤིས་དང་བསམ་བློ།བྱ་བ་བྱེད་སྟངས།དཔེ་ཀློག་གི་གོམས་གཤིས་བཅས་སུ་སློབ་མ་རང་ཉིད་ཀྱིས་ནུས་པ་ཇི་ལྟར་སྒྲིབ་དགོས་ཚུལ་དང༌།གཞན་དགེ་རྒན་གྱིས་རྩལ་ནུས་གང་དག་བཏོན་ན་འོས་པར་མཐོང༌།

དོ་རྒྱ་བསོད་ནམས་ཚེ་རིང༌། སྔོན་དགེ་བཤེས་པོ་ཏོ་བའི་དྲུང་དུ་མི་རེ་འོང་ཙ་ན་མི་གཞི་ཅི་འདྲ་གསུངས།དེ་མི་གཞན་གྱིས་མི་གཞི་རང་འབྲིང་ངེ་བ་ཞིག་གདའ།ཤེས་རབ་ནི་ཆེ་བ་ཞིག་གདའ་བྱས་ཙ་ན།ཁོ་བོ་སློབ་མས་དམྱལ་བར་བསྐྱུར་བའི་གཉེར་མ་མཆིས།ད་ལྟ་ནས་ཁྲེས་པོ་ཁུར་ལ་རྒྱུག་གསུངས།མི་གཞི་ནི་གྲོས་སུ་བཏུབ་པ་ཞིག་གདའ།དད་པ་དང་ཤེས་རབ་ཆུང་ངུ་གདའ་བྱས་ཙ་ན།དད་པ་འདུས་བྱས་ཡིན་པས་སྐྱེས་འཚལ།ཤེས་རབ་ཆུང་ཡང་མ་ཤེས་ན་ངས་ལན། མི་བྱེད་ན་ཁོས་ལན་གསུངས་སྐད། དེས་ན་ཡོན་ཏན་གཞན་མ་ཚང་ན་ཡང་། མི་གཞི་བཟང་པོ་ལྷ་འདྲ་བ་ཞིག་གལ་ཆེ།ཞེས་གསུངས་སོ།།མདོ་ལས།སེམས་དག་པས་ནི་ལུས་དག་པར་འགྱུར་གྱི།།ལུས་འཆའ་བས་ནི་སེམས་མ་ཡིན་ནོ།།ཞེས་དང་།ཡང་།ཡིད་གཙོ་ཡིད་ནི་ཀུན་ཏུ་འགྲོ། ཞེས་དང་། སེམས་རྒྱལ་པོར་བསྡད་ན་ལུས་ངག་གཉིས་བྲན་དུ་འཁོལ། ཞེས་གསུངས་པ་ལྟར་འགྲོ་བ་མིའི་སེམས་འདི་གཙོ།སེམས་འདི་ཐམས་ཅད་མཁྱེན་པར་འགྲོ་དགོས།སེམས་ཀྱི་རྣམ་དཔྱོད་ཡོད་མེད་ཀྱིས་དུད་འགྲོ་དང་མིའི་དབྱེ་བ་བྱུང་།ཞེས་གསུངས་པ་ལྟར་ནང་བསམ་བློ་སྨིན་རྒྱུ་ནི་ཐོག་མཐའ་བར་གསུམ་གྱི་དོན་པོ་ཉག་ཅིག་ཡིན་ནོ།། བཀྲ་ཤིས་བརྩེགས་པ་ལས།གང་ཡང་མ་འགགས་ཐབས་ཀྱི་ཕ་རོལ་ཕྱིན།།ཞེས་པ་ནི་ཐབས་ཀྱི་གདམས་པ་ཡིན།དགེ་རྒན་གྱིས།སློབ་མའི་ན་ཚོད་དང་མཐུན་པའི་ཤེས་བྱ་ཁྲིད་པའི་ཞོར་ལ་དཔེ་ཆ་རེ་ཡང་ངོ་སྤྲོད།རྒྱུད་དང་རན་པའི་རྟོགས་པ་སྤོས་ཞོར་ལ་ཀུན་སྤྱོད་གནད་དུ་ཟུངས། དུས་དང་འཚམས་པའི་སྙིང་སྟོབས་བསྐྱེད་ཞོར་ལ་ནུས་པ་ལག་ཏུ་ལེན་པར་བྱའོ།། མདོར་ན་བརྩོན་འགྲུས་ནི་དགེ་བ་དང་སྤྲོ་བ་དང་རྒྱུན་འཁྱོངས་ཀྱི་ཐོབ་གྲངས་སུ་ཤེས་པ་འདི་གལ་ཆེའོ།

འབའ་སྨད་རྒྱལ་ལོ་ཚེ་རིང༌། ཁྱེད་ཀྱིས་སློབ་གྲྭ་ཆུང་འབྲིང་གི་དགེ་རྒན་རྣམས་ཀྱིས་དཔེ་ཀློག་བྱེད་དགོས་པའི་གལ་ཆེན་དང་ཚད་ལྡན་གྱི་དཔེ་ཆ་སྐོར་ཞིག་འཚམས་སྦྱོར་དང་བཅས་བཅར་འདྲི་མཇུག་རྫོགས་ན་ཅི་འདྲ།

དོ་རྒྱ་བསོད་ནམས་ཚེ་རིང༌། ལན།དགེ་རྒན་གྱིས་དཔེ་ཆ་མི་ཀློག་པ་ནི་ཨ་མས་ཟ་མ་མ་ཟས་པར་ནུ་མ་ན་འོ་མ་མེད་པ་དང་ཀུན་ནས་མཚུངས་སོ།།དེ་ཡང་དཔེ་ཆ་གང་ཞིག་ལ་བལྟ་ཟེར་ན་ཐོག་མར་རང་རང་གི་རིག་ཚན་དེའི་ལོ་རྒྱུས་ལ་ཅིས་ཀྱང་བལྟ་བར་བྱ་སྟེ།དཔེར་ན། བོད་ཡིག་འཕེལ་བའི་ལོ་རྒྱུས་དང།རྒྱ་ཡིག་འཕེལ་བའི་ལོ་རྒྱུས།དབྱིན་ཡིག་འཕེལ་བའི་ལོ་རྒྱུས།རྩིས་རིག་འཕེལ་བའི་ལོ་རྒྱུས།རྫས་འགྱུར་འཕེལ་བའི་ལོ་རྒྱུས།དངོས་ལུགས་འཕེལ་བའི་ལོ་རྒྱུས་སོགས་སོ།།དེའི་འཕྲོ་ནས་སྐད་ཡིག་ལ་མཚོན་ན་རྒྱ་ཡིག་གི་སྐད་ཡིག་སྣ་བརྒྱ་མའི་དཔེ་ཚོགས་དང་།ཉེ་རབས་ཀྱི་ཝུན་ཡུའུ་ཏའོ་དང་།ཐའོ་ཞིན་ཀྲི།ཚའེ་ཡོན་ཕེ།དེང་རབས་ཀྱི་སུང་ཧྲའོ་ཀྲིན།ཝའེ་ཧྲུའུ་ཧྲིན།ཆན་ལི་ཆུང་སོགས་མཁས་པ་ཆེན་པོ་དག་གི་གསུང་རྩོམ།ད་དུང་ཧྲང་ཧེའི་སྐད་ཡིག་སློབ་སྦྱོང་སོགས་དུས་དེབ་ཉོས་དང་གཏེར་ཁ་རྙེད་པ་དང་འདྲ་བར་གང་ཞིག་ལ་བལྟ་དགོས་པ་གཅིག་འཕྲོ་གཅིག་ལ་ཤེས་ནས་འོངས།རིག་ཚན་གཞན་དག་ཀྱང་དེ་བཞིན་ནོ།། ཁོ་བོས་ནི་རང་ལོ་ཉེར་བདུན་ནས་བཟུང་རྒྱ་ཡིག་གི་སློབ་གྲྭ་ཆུང་འབྲིང་གི་དོ་དམ་དང་། སློབ་གཙོའི་དོ་དམ་སྒྱུ་རྩལ། ཀྲུང་གོའི་ཁྱིམ་གྱི་སློབ་གསོ་སོགས་དུས་དེབ་སྣ་ཚོགས་དང་། འཛམ་གླིང་གི་སློབ་གསོ་འཕེལ་བའི་ལོ་རྒྱུས།ནུབ་གླིང་གི་སློབ་གསོའི་གྲགས་རྩོམ།ནུབ་གླིང་གི་སློབ་གསོའི་བསམ་བློ་འཕེལ་བའི་ལོ་རྒྱུས།ཕྱི་གླིང་གི་སློབ་གསོ་འཕེལ་བའི་ལོ་རྒྱུས།རྒྱ་ནག་གི་སློབ་གསོ་འཕེལ་བའི་ལོ་རྒྱུས་སོགས་ལ་བལྟས་ནས་སློབ་གྲྭར་ལག་ལེན་དུ་བཏབ་ནས་ཀྱང་ཉམས་སུ་བླངས་ཤིང་ཕྱོགས་སུ་བསྡམས་པ་ཡིན་ནོ།། དེ་བཞིན་དུ་རང་གི་སྲོག་འཚོ་བ་ལ་མེད་དུ་མི་རུང་བའི་གསོ་རླུང་ལྟར་གྱུར་བའི་བོད་ཡིག་གི་དཔེ་ཆ་དག་ལ་བལྟས་པ་ནི་ལྟ་ཅི་སྟེ་གྲངས་ཀ་མ་བླངས་སོ།། དེ་ལས་རྩོད་པ་དགའ་ན་རྩོད་པ་ཤེས།དེ་ཉིད་ལ་དགའ་ན་དེ་ཉིད་རྟོགས།སློབ་གསོ་ལ་དགའ་ན་སློབ་གསོ་ཐོབ་པས།དགེ་རྒན་དག་གིས་རང་རང་གི་ལས་སྐལ་དུ་གྱུར་བའི་རིག་ཚན་གང་གི་ཁ་འཕྲོ་ལྟར་བལྟ་བར་བྱ་སྟེ།བལྟ་ཤེས་ན་བལྟས་མི་ཆོག་པ་དང་གོ་མི་ཆོད་པའི་དཔེ་ཆ་ཞིག་འཇིག་རྟེན་ན་མེད་ཚོད་དུ་སྣང་ངོ་།། ཡིན་ནའང་མི་ཡི་ཚེ་དང་མིག་ལ་ཚད་ཡོད་པས་ངང་པས་ཆུ་ལས་འོ་མ་ཕྱེས་པ་བཞིན་དཔེ་ཆའང་དེ་བཞིན་བཀླག་པར་བྱའོ།

འབའ་སྨད་རྒྱལ་ལོ་ཚེ་རིང༌། མཐར་དགེ་རྒན་ཁྱེད་ཀྱིས་རླབས་ཆེ་བའི་བསམ་དོན་དག་ལ་བར་ཆད་མེད་པ་དང་བཅས་རྗེས་མར་ཡང་བདག་གི་བཅར་འདྲི་དང་ལེན་བྱེད་པར་རེ་བ་བཏོན་པ་ཡིན། བཀའ་དྲིན་ཆེ།

དོ་རྒྱ་བསོད་ནམས་ཚེ་རིང༌། ལན། བཀའ་དྲིན་ཆེ།



རྒྱལ་ལོ་ཚེ་རིང་། ཚེ་རིང་ལོ་བརྒྱ། སླར་ཡང་མཇལ།

བཅར་འདྲི་འདི་ཉིད་མཚོ་སྔོན་བོད་རིག་པའི་དུས་དེབ་ཏུ་བཀོད།

2013
ལོའི་ཟླ3པའི་ཚེས31ཉིན།

·གསར་འགྱུར་གོང་མ:མི་ཆོས་ལས་འཕྲོས་པའི་བསླབ་བྱ་
·གསར་འགྱུར་འོག་མ:མ་བུའི་ཁ་བརྡ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
མིག་སྔར་གསར་མི་འདུག
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
 评论者:pfxonmdnvhx
jSwSTu  <a href="http://quisctpcrwla.com/">quisctpcrwla</a>, [url=http://ifquiymkahij.com/]ifquiymkahij[/url], [link=http://ixujvlrcbgqa.com/]ixujvlrcbgqa[/link], http://kmprleswbupk.com/
发表时间:2016/5/12 22:58:06 [来自: 46.161.9.32]

འབྲེལ་ཡོད་དཔྱད་བརྗོད 1 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།27.34MS