ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> འཕྲུལ་གྱི་རྒྱང་ཤེལ། >> འབྱུང་ཁཾས
  གསར་འགྱུར་ཀློག་པ།

སྐར་མ་རྀ་ཥིའི་ཁུངས་དང་ཕན་ནུས།

[རྩོམ་པ་པོ:དགེ་དཔལ།  ཡོང་ཁུངས:དྲ་ཐོག  དུས་ཚོད:2015/9/12 22:36:23  བཀླགས་ཐེངས:1357][ཡིག་གཟུགས:ཡིག་གཟུགས་མདོག]
༄༅།།སྐར་མ་རྀ་ཥིའི་ཁུངས་དང་ཕན་ནུས།
 
མདོ་སྡེ་མྱང་འདས་ཆེན་པོ་ལས།བྱང་ཆུབ་སེམས་དཔའ་སྨན་པའི་རྒྱལ་པོ་དེས།  །བྱང་ཆུབ་སེམས་དཔའ་ནམ་མཁའ་མཛོད་དེ་ལ།  །སྨོན་ལམ་མཐུ་ཡིས་འདི་སྐད་ཅེས་སྨྲས་པ། །རིགས་ཀྱི་བུའམ་རིགས་ཀྱི་བུ་མོ་རྣམས། །སེམས་ཅན་ན་བ་གཡོག་རྣམས་མེད་པ་དང་།  །ནད་རྣམས་དུ་མས་རེག་པའི་སེམས་ཅན་ལ། །དེ་དག་དོན་དུ་བདུད་རྩིའི་ཆར་སྐོང་ཞིག  །ཐམས་ཅད་ནད་ལས་ཡོངས་སུ་ཐར་ཕྱིར་དུ།  །སྨན་དང་བདུད་རྩིའི་ཆར་བ་ཕོབ་ཅིག་གོ །ཞེས་དང་། དེ་ནས་དེ་མ་ཐག་ཏུ་བར་སྣང་ནས་བདུད་རྩིའི་ཆར་མངོན་པར་རབ་ཏུ་ཕབ་པས་སྡུག་བསྔལ་ལས་ཐར་ཏེ།དེའི་སྨོན་ལམ་གྱི་མཐུས་དེང་ཡང་བདུད་རྩིའི་ཆར་འབབ་པའི་ཟླ་བ་ཞིག་ཡོད་པ་ཡིན་ནོ།  །ཞེས་གསུངས་པ་དང་། ཀླུ་སྒྲུབ་ཀྱིས་མཛད་པའི་གསོ་དཔྱད་ཡན་ལག་བརྒྱད་པ་ལས།ཉི་མའི་འོད་ཀྱིས་གདུངས་པ་དང་།།ཟླ་བའི་འོད་ཀྱིས་བསིལ་བྱས་ལ། །རྀ་ཥྀ་ཤར་བས་དུག་མེད་པ། །ཉིན་མཚན་གཉིས་ཀར་སྦྱང་ཆུ་བཏུང་།།ཞེས་དང་།དེའི་ཐད་ཀྱི་འགྲེལ་པ་པཎ་ཊི་ཏ་ཟླ་བ་མངོན་དགའི་ཟླ་ཟེར་ལས།སྟོན་ཀའི་དུས་དེའི་ཚེ་ཉིན་མོ་ཉི་མའི་འོད་ཟེར་གྱིས་གདུངས་ཤིང་རྣམ་པ་ཐམས་ཅད་དུ་ཚ་བར་གྱུར་པ་དང་།མཚན་མོ་ཟླ་བའི་འོད་ཟེར་གྱིས་བསིལ་ཞིང་གྲང་བར་བྱས་པ་སྟེ།དེ་ལྟར་དུས་ཀྱི་བཅོས་ཤིང་སྨིན་པར་བྱས་པ་དང་།རྀ་ཥི་ཤར་བས་དུག་མེད་པ་ཞེས་པ་སྐར་མ་རྀ་ཥི་ཞེས་པ་ཤར་བ་ན་དུག་མེད་པ་སྟེ།དེ་ཤར་བས་བར་སྣང་ལ་འབབ་ཅིང་བྱུང་བའི་ཆུ་བོ་དང་།རྫིང་བུ་ལ་སོགས་པར་གནས་པའི་གནོད་པ་རྣམས་སྟོན་གྱི་ཚེ་དུག་མེད་པ་ཉིད་དུ་བྱེད་པས་ན་ཞེས་སོགས་དང་།གཞན་ཡང་རིག་བྱེད་པ་རྣམས་ཀྱིས་སྔོན་དྲང་སྲོང་རྀ་ཥི་བྱ་བ་ཞིག་ལ་ལྷ་ཚངས་པ་སོགས་ཀྱིས་གསོལ་བ་བཏབ་པ་བཞིན་ཆུ་འདིས་ཁྲུམས་ཟླ་ནས་ཐ་སྐར་གྱི་ཟླ་བའི་བར་ཆུ་བོ་ཡན་ལག་བརྒྱད་ལྡན་དུ་གྱུར་ཅིག ཅེས་སྨོན་ལམ་བཏབ་པར་བཞེད་དོ།།སྐར་རྩིས་ཀྱི་གཞུང་ལས་དྲང་སྲོང་ཨ་ག་སྟྱ་དེ་ལྷ་གནས་སུ་བསམ་གཏན་ལ་གནས་ཤིང་ཁྲུམས་ཟླ་ལ་གཟུགས་འཛམ་བུའི་གླིང་དུ་གསལ་བས།དུས་ཡན་ལག་བརྒྱད་ལྡན་གྱུར་པའི་དུས་སུ་དྲང་སྲོང་འདིའི་ཁྱིམ་ནོར་བུ་ཀེ་ཏ་ཀ་ལས་གྲུབ་ཕྱིར་ཆུ་ཀླུང་རྙོག་མ་ཅན་རྣམས་སྐད་ཅིག་ལ་ཡན་ལག་བརྒྱད་ལྡན་དུ་འགྱུར་བར་གསུངས་ཡོད།འདིའི་མིང་གི་རྣམ་གྲངས་ལ།ཁྱད་པར་འཕགས་བསྟོད་ཀྱི་འགྲེལ་པ་དང་།སོ་མ་ར་ཙ་དང་།མངོན་བརྗོད་འཆི་མེད་མཛོད་དང་།དེའི་འགྲེལ་པ་ཨ་མ་ར་ཀོ་ཥས་མཛད་པའི་འདོད་འཇོ་མ་སོགས་ལས།རྀ་ཥི་དང་།བུམ་སྐྱེས་དང་།མཛའ་བོའི་བུ་དང་།ཆུ་ལྷའི་བུ་དང་།ཨ་ག་སྟྱ་དང་།རི་བྱི་དང་།ཟིལ་གནོན་ཕྱག་རྒྱ་དང་།རྒྱ་མཚོའི་ཁྱོར་ཆུ་ཅན་ཞེས་སོགས་དོན་དང་བཅས་བཤད་ཡོད་དོ།།ཞར་བྱུང་ཆུ་ཡན་ལག་བརྒྱད་ལྡན་དང་དེའི་ཕན་ནུས་ནི།འདུལ་བ་ལུང་ལས།བསིལ་དང་ཞིམ་དང་ཡང་དང་འཇམ།།དྭངས་དང་དྲི་མ་མེད་པ་དང་།།འཐུང་ན་ལྟོ་བར་འཇམ་པ་དང་།།མགྲིན་པ་ཡང་དང་བདེ་བ་སྟེ།།ཡན་ལག་བརྒྱད་ལྡན་ཆུར་འདོད་དོ།།ཞེས་དང་མཛོད་རང་འགྲེལ་ལས།ཆུ་དེ་ནི་བསིལ་བ་དང་།ཞིམ་པ་དང་།ཡང་བ་དང་།འཇམ་པ་དང་།དྭངས་པ་དང་།དྲི་ང་བ་མེད་པ་དང་།འཐུང་བ་ན་མགྲིན་པ་ལ་མི་གནོད་པ་དང་།འཐུང་བ་ན་ལྟོ་བ་ལ་མི་གནོད་པའོ།།ཞེས་གསུངས་པ་དང་།སོ་མ་ར་ཙ་ལས།ཆུ་ཡི་མཚན་ཉིད་གཤེར་དང་བསིལ།།འཇམ་དག་རྣོ་དང་སྐད་དང་ཤུན།།ལས་ནི་སྡུད་དང་རླུང་དང་ཞིམ།།ཞེས་དང་།དེའི་ཕན་ནུས་ནི།བཤད་རྒྱུད་ལས།ཆུ་བསིལ་བརྒྱལ་ངལ་ཆང་ནད་མགོ་འཁོར་སྐྱུག །སྐོམ་དད་ལུས་ཚ་ཁྲག་མཁྲས་སེལ་བར་བྱེད།།ཞེས་དང་ཡང་མིས་བཟོས་ཡན་ལག་བརྒྱད་ལྡན་ནི་ཆུ་བསྐོལ་ཡིན་དེ།དུས་འཁོར་འགྲེལ་ཆེན་ལས།ཉི་མ་ཟླ་བས་རེག་པའི་ཆུ་ནི་དྲི་མ་དང་བྲལ་བའི་སླད་དུ་རྐང་པའི་ལྷག་མ་བསྐོལ་བར་བྱ་ཞེས་དང་།ཟླ་ཟེར་ལས།ཡུལ་དུས་ལྕི་དང་ཡང་བ་ལས།།བཞི་ཆ་སུམ་ཆ་ཕྱེད་གདུ་བར།།ལྦུ་བ་མེད་པར་བསྐོལ་བ་ནི།། ཤུགས་མེད་དྲི་མ་མེད་ཅིང་ཕན།། ཞེས་དང་ཡན་ལག་བརྒྱད་པ་ལས། ཆུ་ཚན་དྲོད་སྐྱེད་ཟས་འཇུ་ཞིང་།།མགུལ་བདེ་ལུས་ཡང་གཅིན་ནད་སེལ།།སྐྱུག་བུ་ལྟོ་སྦོས་རླུང་བད་ཀན།།རིམ་གསར་འཕྲལ་དུ་བཟློག་བྱེད་ཅིང་།།ལུད་པ་ཆམ་གསར་དབུགས་མི་བདེ།།རྩིབ་ལོགས་ཟུག་ལ་བསྔགས་པ་ཡིན།།ཞེས་དང་བོད་ཀྱི་གསོ་རིག་བཤད་རྒྱུད་ལས།ཆུ་བསྐོལ་དྲོད་སྐྱེད་ཟས་འཇུ་སྐྱུག་བུ་སེལ།།བད་ཀན་ལྟོ་སྦོས་དབུགས་མི་བདེ་བ་དང་།།ཆམ་པ་རིམ་གསར་འཕྲལ་དུ་བཟློག་པར་བྱེད།། བསྐོལ་གྲང་བད་ཀན་མི་བསྐྱེད་མཁྲས་པ་སེལ།།ཞག་གཅིག་ལོན་ནས་དུག་འདྲ་ཉེས་ཀུན་བསྐྱེད།།ཞེས་སོགས་གསུངས་སོ།།             བོད་རབ་གནས་ཤིང་རྟ་ལོའི་ཟླ་བདུན་པའི་ཚེས་བཅུ་བཞི་སྟེ་སྐར་མ་རི་བྱི་འཆར་ལ་ཉེ་བའི་དུས་སུ་དགེ་དཔལ་གྱིས་བྲིས་སོ།།
·གསར་འགྱུར་གོང་མ:ཚ་བ་མདའ་སྨྱུག་གི་གདོང་གྲོགས།
·གསར་འགྱུར་འོག་མ:གངས་ལྗོངས་ཁྱེའུའི་དྲ་བ་དེ་དངོས་སུ་ཤར་གཏོང་བྱེད་ཐུབ་པ་བྱུང་བ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
·མི་རྒས་སླ་བའི་དོན་རྐྱེན་འདི་རེད། 2014/9/4 19:19:22
·གནམ་ཁབ་རྒྱག་པ་ལ་འཛེམ་དགོས། 2014/7/28 22:52:32
·ཉི་མ་རེ་ལ་ཀུ་ཤུ་རེ། 2014/5/25 20:00:39
·ཆུའི་གསོ་བཅོས་ཀྱི་ཁེ་ཕན། 2014/5/11 22:11:00
·བོད་ཀྱི་སྤྱི་ཚོགས་འཕྲོད་བསྟེན་དྲ་བ་ 2014/5/11 22:07:04
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
 评论者:qsoyxq
QJ46ST  <a href="http://kbnebhdyfbwl.com/">kbnebhdyfbwl</a>, [url=http://ufwcrktynylo.com/]ufwcrktynylo[/url], [link=http://yszavirzmybu.com/]yszavirzmybu[/link], http://mopiigbmqqxw.com/
发表时间:2015/11/24 18:22:22 [来自: 146.185.234.48]

འབྲེལ་ཡོད་དཔྱད་བརྗོད 1 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།70.31MS