ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> འཕྲུལ་གྱི་རྒྱང་ཤེལ། >> འབྱུང་ཁཾས
  གསར་འགྱུར་ཀློག་པ།

སྣོད་བཅུད་ཁོར་ཡུག་སྐོར་གྱི་གདམས་ངག།

[རྩོམ་པ་པོ:ངེས་དོན་ཉི་མ།  ཡོང་ཁུངས:དྲ་ཐོག  དུས་ཚོད:2015/3/17 11:24:51  བཀླགས་ཐེངས:1144][ཡིག་གཟུགས:ཡིག་གཟུགས་མདོག]
ཁོར་ཡུག་སྐོར་གྱི་གསུང་བཤད།
 
༄༅། །དེང་སང་འཛམ་གླིང་ཐོག་སྲོག་ལྡན་ཀུན་གྱི་འཚོ་བའི་རྟེན་གཞིར་གྱུར་བའི་ཁོར་ཡུག་གི་གནས་སྟངས་ཉམས་རྒུད་ཇེ་ཆེར་འགྲོ་བཞིན་པའི་སྐབས་འདིར།  རང་ཅག་སྐྱེ་འགྲོ་ཚང་མས་རང་ནུས་ལ་དཔག་པའི་སྣོད་བཅུད་ཉམས་པ་སོར་ཆུད་དང༌། མི་ཉམས་གོང་འཕེལ་ཡོང་བའི་ཐབས་ཚུལ་ལ་དུས་དང་རྣམ་པ་ཀུན་ཏུ་འབད་བརྩོན་བྱེད་གལ་ཤིན་ཏུ་ཆེ་བ་ཡིན།  ཁོར་ཡུག་སྐྱོན་མེད་གཙང་མར་གནས་པའི་དགེ་མཚན་ནི། དཔེར་ན། ཆུང་ས་ནས་བཤད་ན། ལྗོན་ཤིང་བཟང་པོས་རླུང་ཁམས་གཙང་མར་གནས་པར་བྱེད་ཅིང༌། དེས་སྐྱེ་བོའི་སྲོག་རླུང་གཏོང་ལེན་ལ་རམ་འདེགས་བྱས་ཏེ་འབྱུང་ཁམས་ཆ་སྙོམས་ལ་གནས་པ་དང་ཚེ་བསྲེངས་བར་བྱེད་པ་ཡིན།  དེ་བཞིན་གྲིབ་བསིལ་སྣུམ་པོ་ངལ་གསོ་བའི་གནས་སུ་གྱུར་པ་དང༌།  ལྷག་པར་རྩི་ཤིང་བསྐྱེད་བསྲིང་ལེགས་པོ་བྱུང་ན་ཆར་ཆུ་དུས་སུ་འབེབས་ཤིང༌།  ལོ་ཕྱུགས་ལེགས་པ་དང༌། ཚ་གྲང་སྙོམ་པ། ཡུལ་ཁམས་བལྟ་ན་སྡུག་པའི་མཛེས་ཉམས་ལྡན་པ། ཉམས་དགའ་བའི་གནས་དེར་ཕྱིའི་ལྗོངས་རྒྱུ་བ་དག་ཀྱང་རྒྱུན་མི་འཆད་དུ་ཡོང་ནས་བདེ་སྐྱིད་ཀྱི་ཚོར་བ་སྤྲོད་པ་དང་ཤེས་རིག་འཕེལ་རྒྱས། དཔལ་འབྱོར་འདུ་འགོད་སོགས་ངང་གིས་འཕེལ་རྒྱས་ཡོང་བ་ཡིན།
    ལྷག་དོན་འབྲས་བུ་ཅན་གྱི་ཤིང་སྣང་འགྲོ་བ་མིའི་རིགས་གཙོ་བོར་གྱུར་པའི་སེམས་ཅན་མང་པོ་ལ་འཚོ་བཅུད་སྦྱིན་ཞིང༌། དེ་ལ་བརྟེན་ནས་ལུས་སྟོབས་རྒྱས་པ། ཟས་ཀྱི་དང་ག་འབྱེད་པ་སོགས་ཕན་ནུས་ཆེན་པོ་ཡོད།  
   མེ་ཏོག་ལ་ཆ་མཚོན་ན་ཡང༌།  རང་ཉིད་གང་དུ་གནས་པའི་ཁོར་ཡུག་ཏུ་ཁ་དོག་རྣམ་པར་བཀྲ་བའི་མེ་ཏོག་སྣ་ཚོགས་བཞད་དེ་ཡོད་ན་ཡིད་བག་ཕེབས་ཤིང་བདེ་བའི་འཚོ་བ་སྟེར་བ་དང༌། ལྷག་པར་རླུང་ནད་ཅན་དང༌། སེམས་ཁམས་མི་བདེ་བའི་རིགས་ལྡུམ་རིའི་ནང་དུ་འཆམ་འཆམ་དུ་བསྐྱོད་དེ་རེ་ཞིག་བག་ཡངས་ཀྱིས་བསྡད་ན། སེམས་ངལ་གསོས་ཤིང་ཡིད་ལ་བདེ་བ་སྟེར་བའི་ཁྱད་ནུས་ཡོད། ཆོས་པ་ཞིག་ཡིན་ན་ཡིད་འོང་རང་བྱུང་གི་དངོས་ཁམས་རྣམས་མཐོང་བ་ན་དམིགས་པ་དང་བཅས་ཏེ་མཆོག་གསུམ་ལ་མཆོད་པའི་ཚུལ་དུ་ཕུལ་བ་ཡིན། དེས་བསོད་ནམས་ཀྱི་ཚོགས་རླབས་ཆེ་བདེ་བླག་ཏུ་གསོག་ཐུབ་པའི་ཕན་ཡོན་ཡོད།
    ཆོས་ཕྱོགས་ནས་བཤད་ན། སྟོན་པ་བཅོམ་ལྡན་འདས་ལྗོན་པའི་དྲུང་དུ་སྐུ་བལྟམས་པ་དང༌། ལྗོན་པའི་དྲུང་དུ་བྱུང་ཆུབ་བརྙེས་པ། མཐར་ལྗོན་པའི་དྲུང་དུ་སྐུ་མྱ་ངན་ལས་འདས་པ་བཅས་ཀྱི་གནས་ཚུལ་ཡོད་པ་དང༌། ལྷག་པར་དམ་ཆོས་འདུལ་བའི་ནང་དགེ་སློང་རྣམས་ལ་ལྗོན་ཤིང་འདེབས་བསྲིང་གི་ཚུལ་གདམས་པ་སོགས་ལ་ལྗོན་ཤིང་འདེབས་ལས་ནི་དགེ་བའི་ལས་སུ་འཁྱེར་ནུས་པའི་ཆ་རྐྱེན་ལྡན་ཡོད་པ་རྟོགས་ནུས།
   ཁོར་ཡུག་སྦག་བཙོག་གི་ཉེས་པ་ནི།  མཚོ་དང་མཚེའུ་ཡི་དྭགས་བསིལ་གྱི་ཡོན་ཏན་ཉམས་ཤིང༌།  དེ་དག་ལ་གནས་པའི་སྲོག་ཆགས་བར་དུ་གཅོད་པ། རྩི་ཤིང་ནགས་ཚལ་སྟོངས་པས་ས་ཡི་བཅུད་ཉམས་པ། ཆར་ཆུ་དུས་སུ་མི་བབ་པ། སྔོན་མེད་ཀྱི་རླུང་འཚུབ་དྲག་པོ་ལྡང་བ། ཆུ་ལོག་རྒྱས་པ། ནད་རིགས་སྣ་ཚོགས་ཁྱབ་གདལ་འགྲོ་བ་སོགས་ཀྱི་འགལ་རྐྱེན་མཐའ་ཡས་པ་ཞིག་ཡོང་གི་ཡོད་པ་དེང་གི་མཐོས་ཆོས་ནས་གསལ་པོ་ཡོད།
   དེས་ན།  ཆེ་ས་ནས་ནགས་ཚལ་དང་གཅན་གཟན་རི་དྭགས་བཅས་སྲུང་སྐྱོབ་དང༌། རྡུལ་ཕྲན་གྱི་དུག་རྫས་སྙིགས་རོ་ས་སྦས་ཕུང་གསོག་བཀའ་འགོག ཆུང་ས་ནས་ཤིང་འབྲས་ཀྱི་པགས་པ་དང༌། ཤོག་བུ། འགྱིག་ཤོག  ཤེལ་དམ། གོས་རྙིང༌།  ཟས་ཀྱི་ལྷག་མ་སོགས་གད་སྙིགས་ཀྱི་རིགས་གང་བྱུང་གཡུག་པ་དང༌། བཙོག་གཅིན་གང་སར་གཏོང་བ་བཅས་ནི་ཡུལ་གྱི་མཛེས་སྡུག་དང༌། གཙང་སྦྲ་འཕྲོད་བསྟེན་གཉིས་ཀར་གནོད་ཀྱི་ཡོད་པས་སྤོང་ཐབས་བྱེད་དགོས།
   དེ་ལྟ་བུའི་ཁོར་ཡུག་ལ་དོ་སྣང་དང་སེམས་ཁུར་མེད་པའི་བྱ་སྤྱོད་ཀྱིས་རང་བྱུང་དངོས་ཁམས་ཉིན་ཚབས་ཀྱི་གནས་སུ་བསྒྱུར་སྲིད་ཅིང༌། དེས་ད་ལྟ་འཚོ་བཞིན་པའི་མི་རབས་འདི་སྨོས་ཅི།  འབྱུང་འགྱུར་གྱི་མི་རབས་རྣམས་ལ་ཡང་གནོད་ཚབས་དང་འཇིག་ཉེན་ཤིན་ཏུ་ཆེ་བའི་གནོད་འཚེ་ཡོང་རྒྱུ་ཡིན་པའི་གནས་ཚུལ་རྣམས་ངོས་འཛིན་ཐུབ་པ་བྱ་རྒྱུ་གལ་ཆེན་པོ་ཡིན།
༄༅། །སྣོད་བཅུད་རྟེན་འབྱུང་དང་འབྲེལ་བའི་གདམས་ངག་ཉུང་ངུའི་
ཚིགས་བཅད་དུ་བསྡེབས་པ་དགེ །
 
 
ཇི་སྙེད་སྣོད་བཅུད་འཁོར་འདས་བརྟན་གཡོའི་ཆོས།།ཀུན་ཁྱབ་རྟེན་འབྱུང་གནས་ལུགས་ལེགས་གཟིགས་ནས།།
བརྩེ་ཆེན་ཐུགས་རྗེས་འགྲོ་ལ་འདོམས་མཁས་པ།།མཉམ་མེད་བུ་རམ་ཤིང་པས་དགེ་ལེགས་སྩོལ།།
རྒྱལ་ཀུན་བརྩེ་ཆེན་ཕུང་པོའི་རང་གཟུགས་ལ།།སྤྱན་རས་གཟིགས་ཞེས་མཚན་དུ་གསོལ་བའི་ལྷས།།
བདག་སོགས་འགྲོ་བའི་ཤེས་རྒྱུད་སྨིན་པ་དང༌།།ཡང་དག་གནས་ཚུལ་མཐོང་བར་བྱིན་གྱིས་རློབས།།
ཐོག་མ་མེད་ནས་རྟག་ཏུ་གོམས་པ་ཡི།།རང་ཉིད་གཅེས་འཛིན་བློ་ཡི་མཐུ་བརྟས་པས།།
སྤྱི་མཐུན་ལས་ཀྱིས་བསྐྱེད་པའི་ཁོར་ཡུག་ཁྱོན།།འབྱུང་བ་སྦགས་བཙོག་མནོལ་བས་བསླད་པར་གྱུར།།
མཚོ་དང་མཚེའུ་དྭངས་བསིལ་ཡོན་ཏན་ཉམས།།མཁའ་རླུང་དུག་ཅན་རྫས་རིགས་དུ་མས་ཁྱབ།།
མཁའ་དབྱིངས་རང་གྲུབ་བླ་བྲེར་བུ་ག་རྡོལ།།སྔོན་མེད་ནད་རིགས་དུ་མས་འགྲོ་མང་མནར།།
སྲིད་པར་ཆགས་པའི་གངས་རི་མཐོ་བརྗིད་རྣམས།།དབུ་འཕང་སྨད་ཅིང་རིམ་གྱིས་ཆུ་རུ་བཞུར།།
འཕེལ་འགྲིབ་བྲལ་བར་གྲགས་པའི་རྒྱ་མཚོ་ཡང༌།།རང་བཞིན་ལས་འདས་གླིང་ཕྲན་དལ་གྱིས་བྱིངས།།
མེ་ཆུ་རླུང་གི་འཇིགས་པ་མཐའ་ཡས་ཏེ།།ཚ་དྲོད་འབར་བས་རྩྭི་ཤིང་ནགས་ཚལ་སྐམ།།
རྒྱ་མཚོ་ཆེན་པོ་བ་ཚྭའི་ནུས་པ་ཉམས།།ནགས་ཚལ་སྟོངས་པས་སྔོན་མེད་རླུང་འཚུབ་ལྡང༌།།
གང་དག་ནོར་གྱི་འབྱོར་པས་མ་ཕོངས་ཀྱང༌།།གཙང་མའི་རླུང་ཙམ་བརྔུབ་པའི་སྐལ་བས་དབེན།།
ཆར་དང་ཆུ་རྒྱུན་རྣམས་ཀྱང་དག་བྱེད་ཀྱི།།ནུས་པ་ཉམས་ཏེ་བརླན་གཤེར་རྫས་སུ་ཟད།།
མི་ཕྱུགས་སྐམ་གཤེར་གནས་པའི་སྲོག་ཆགས་ཀུན།།ལུས་ལ་གདུག་ཅན་ནད་རིགས་དུ་མས་གཟིར།།
སེམས་ལ་བྱིངས་འཐིབ་རྨོངས་པས་རབ་ནོན་ཏེ།།ལུས་སེམས་བདེ་ལ་སྤྱོད་པའི་གོ་སྐབས་ཕྲ།།
གཞན་ཡང་བཅོས་མའི་རྫས་སྦྱོར་ཆེས་སྤྱོད་ཅིང༌།།འདོད་རྔམས་དབང་གིས་འཕྲལ་གྱི་ཁེ་ཕན་སླད།།
རྩྭི་ཤིང་ནགས་ཚལ་གཅོད་བྲེགས་ལ་སོགས་པས།།འབྱུང་བ་ས་ཡི་ཟུངས་བཅུད་བརླག་པར་བྱས།།
གསང་སྔགས་རྒྱུད་དང་སྨན་རྩིས་གཞུང་སོགས་ལས།།ཕྱི་ཡི་སྣོད་དང་སྐྱེ་བོའི་ནང་གི་ཁམས།།
ཕན་ཚུན་ཟུང་དུ་འབྲེལ་བའི་རྟེན་འབྲེལ་གཤིས།།གསུངས་པའི་བདེན་དོན་དེང་སྐབས་མྱོང་བས་གྲུབ།།
ས་འདི་འགྲོ་བ་ཀུན་གྱི་གནས་ཡིན་ཏེ།།རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད།།
ཅེས་སོགས་བདེན་པའི་དབྱངས་ཀྱིས་ས་ཆེན་འདི།།སྟོན་པས་རང་གི་མཆོད་སྦྱིན་དཔང་དུ་མཛད།།
སེམས་ལྡན་ཚེ་འདིའི་སྐྱེས་མ་དྲིན་དྲན་ནས།།དྲིན་གཟོར་བརྩོན་པ་ཡ་རབས་ངང་ཚུལ་བཞིན།།
ཉེ་འཁོན་མེད་པར་ཀུན་སྙོམས་མ་མ་སྟེ།།ས་གཞི་འདི་ཡང་གཅེས་ཤིང་སྐྱོང་བའི་ཡུལ།།
རང་བཞིན་དྭངས་གཙང་འབྱུང་བ་བཞི་ཡི་ཁམས།།དོན་མེད་ཆུད་གསོན་སྦགས་བཙོག་རྙོག་བསླད་སོགས།།
སྐྱེ་འགྲོའི་བདེ་སྐྱིད་གཞི་མ་བརླག་བགྱིད་པའི།།བྱ་བ་སྤངས་ནས་ཀུན་ཕན་ལས་ལ་གཞོལ།།
ཐུབ་པ་མཆོག་ཉིད་ལྗོན་པའི་དྲུང་དུ་བལྟམས།།ལྗོན་པའི་དྲུང་དུ་བདུད་བཅོམ་བྱང་ཆུབ་བརྙེས།།
ལྗོན་པ་ཟུང་གི་དྲུང་དུ་མྱ་ངན་འདས།།འདི་ལྟར་ཐུབ་པས་ལྗོན་པར་གཙིགས་སུ་མཛད།།
གང་དུ་འཇམ་མགོན་བླ་མ་ཙོང་ཁ་པ།།མཚན་དཔེ་བཞད་པའི་ས་ཡི་ཐིག་ལེ་དེར།།
འབུམ་ཕྲག་རྒྱལ་བའི་སྐུ་ཡི་གཟུགས་གསལ་བའི།།ཙན་དན་ལྗོན་པས་མཚན་པར་ཡོངས་སུ་གྲགས།།
འཇིག་རྟེན་ལས་འདས་ཡེ་ཤེས་ལྷ་དང་ནི།།ཡུལ་ཕྱོགས་སྐྱོང་བའི་ལྷ་ཀླུ་མཐུ་བོ་ཆེ།།
དུ་མ་ཞིག་ཀྱང་ལྗོན་པའི་སྡོང་པོ་ལ།།གནས་གཞི་འཆའ་བར་ཡོངས་སུ་མ་གྲགས་སམ།།
ལྗོན་ཤིང་བཟང་པོས་རླུང་ཁམས་གཙང་བར་བྱེད།།ལྗོན་པས་སྲོག་རླུང་གཏོང་ལེན་རམ་འདེགས་བྱེད།།
ལྗོན་པས་མིག་དང་ཡིད་ལ་སིམ་པ་སྟེར།།གྲིབ་བསིལ་སྣུམ་པོ་ཀུན་གྱི་ངལ་གསོའི་གནས།།
ཟླ་མེད་སྟོན་པ་མཆོག་དེས་འདུལ་བ་ལས།།ལྗོན་ཤིང་གཞོན་ནུ་ཇི་ལྟར་སྐྱོང་བའི་ཚུལ།།
དགེ་སློང་རྣམས་ལ་གདམས་པའི་ཚུལ་འདིས་ཀྱང༌།།ལྗོན་ཤིང་འདེབས་སྐྱོང་དགེ་ལས་མཆོག་ཏུ་རྟོགས།།
སྐྱེས་པ་གཅོད་དང་གཅོད་དུ་གཞུག་པ་དང༌།།ས་བོན་འཇོམས་དང་རྩྭ་སྔོན་སྦགས་པ་སོགས།།
དགེ་སློང་རྣམས་ལ་སྟོན་པས་བཀག་པ་ཡང༌།།ཁོར་ཡུག་གཅེས་སྐྱོང་གདམས་པར་བཟུང་བར་འོས།།
སྐབས་གསུམ་གྲོང་དུ་རྒྱལ་བའི་བྱིན་རླབས་ལས།།འདུས་བྱས་མི་རྟག་ལ་སོགས་ཆོས་ཀྱི་སྡོམ།།
བཞི་པོ་སྟོན་པའི་སྒྲ་དབྱངས་ཟབ་མོ་ཡང༌།།ལྗོན་པའི་ཤིང་གི་རྐྱེན་ལས་འབྱུང་བར་གསུངས།།
གཞན་ཡང་ལྗོན་པས་ཆར་ཆུ་འདྲེན་པར་བྱེད།།ལྗོན་པས་ས་ཡི་ཟུངས་ནི་འཛིན་པར་བྱེད།།
དཔག་བསམ་ཤིང་ཞེས་འདོད་པ་ཀུན་སྟེར་བའི།།དགོས་པ་རྣམས་ཀྱང་དོན་གྱིས་བསྒྲུབ་པ་ཡིན།།
ཡ་ཐོག་དུས་ཀྱི་རང་རེའི་མེས་པོ་རྣམས།།ལྗོན་འབྲས་ཟས་དང་ཤུན་པ་གོས་སུ་སྤྱོད།།
སྡོང་དུམ་གཙུབས་ལས་མེ་ཡི་རིག་པ་རྙེད།།གནོད་འཚེ་ལྷགས་ཚེ་ལྗོན་པར་སྐྱབས་སུ་བསྟེན།།
ཚན་འཕྲུལ་བསྐལ་པ་བདོ་བའི་དུས་འདིར་ཡང༌།།གནས་དང་སྤྱོད་ཆས་ཕལ་ཆེར་ལྗོན་པའི་དྲིན།།
འཐབ་རྩོད་ཁོང་ཁྲོའི་མེ་ཡིས་སྙིང་བསྲེག་ཚེ།།འཕྲལ་དུ་ཞི་བསིལ་ཚོར་བ་ལྗོན་པས་སྟེར།།
མདོར་ན་མི་དང་མི་མིན་སྐྱེ་འགྲོ་ཀུན།།འཚོ་བའི་གཞིར་གྱུར་ལྗོན་ཤིང་སྟོངས་གྱུར་ན།།
འཛམ་བུའི་ཤིང་གི་སྒྲ་ཡིས་ཉེར་བསྟན་པའི།།གླིང་འདི་འཇིགས་རུང་མྱ་ངམ་ཐང་དུ་འགྱུར།།
གཞན་ཡང་སྲོག་ལས་གཅེས་པའི་དངོས་པོ་ནི།།འགའ་ཡང་ལུས་ཅན་རྣམས་ལ་ཡོད་མ་ཡིན།།
སྲོག་ཆགས་བཅས་པའི་ཆུ་ལ་སྤྱོད་པ་སོགས།།འདུལ་བའི་ཁྲིམས་སུ་བཅོམ་ལྡན་འདས་ཀྱིས་བཀག།
ཆོས་ལྡན་གངས་ཅན་བོད་ཀྱི་རྒྱལ་ཁམས་དེར།།རི་རྒྱ་ཀླུང་རྒྱ་ཨར་ལས་རྒྱ་སྡོམ་སོགས།།
མགོན་མེད་སྐྱབས་བྲལ་ཉམ་ཆུང་དུད་འགྲོ་ཡི།།ཕངས་པའི་སྲོག་གི་སྲུང་སྐྱོབ་ལུགས་བཟང་བྱུང༌།།
རི་དྭགས་རྔོན་དང་ཉ་རིགས་འཛིན་པ་སོགས།།རྩེད་འཇོ་ཙམ་གྱི་ཕྱིར་དུ་གཞན་སྲོག་ལ།།
བག་ཚ་མེད་པར་འཚེ་བ་རྩོམ་བྱེད་པ།།སྲོག་ལྡན་སྤྱི་ཡི་ཐོབ་ཐང་འཕྲོག་པའི་ལས།།
དེས་ན་སྣོད་བཅུད་རྟེན་ཅིང་འབྲེལ་འབྱུང་ཚུལ།།རྟག་ཏུ་ཡིད་བཅངས་ཀུན་ཕན་དགེ་བློའི་ངང༌།།
རང་བྱུང་ཁམས་ཀྱི་ནུས་པའི་འབྱུང་གནས་རྣམས།།གཅེས་བཟུང་བསྲི་ཚགས་བརྩོན་པ་ལྷོད་མི་བྱ།།
ཁྱད་པར་ནམ་ཟླའི་དུས་ཚིགས་ངེས་བཟུང་སྟེ།།ལྗོན་པ་འདེབས་འཛུགས་ཆོ་ག་སྐྱོང་བྱས་ན།།
རང་བདེ་གཞན་ཕན་འགྲོ་བ་སྤྱིའི་སྲི་ཞུར།།སྨིན་པའི་དོན་ལྡན་ལས་ཀྱི་བགོ་སྐལ་གྲུབ།།
དེ་ལྟར་སྐབས་བབས་བླང་དོར་གནས་དག་ལ།།འཇུག་ལྡོག་མ་ནོར་ཚུལ་བཞིན་འབད་པའི་མཐུས།།
སྣོད་བཅུད་དགེ་མཚན་ཉམས་མེད་སླར་གསོས་ཏེ།།བདེ་དགེའི་ལྗོན་ཚལ་ཕྱོགས་བརྒྱར་རྟག་འཕེལ་ཤོག།
    ཅེས་པ་འདི་ནི་བར་སྐབས་ངེད་རང་འཛམ་གླིང་ཤར་ནུབ་ཡུལ་གྲུ་དུ་མར་བསྐྱོད་འཁོད་ ཀྱིས་སྐྱེ་འགྲོའི་བདེ་སྡུག་གི་སྣང་ཚུལ་ཇི་སྙེད་འདྲེན་བྱེད་ཀྱི་སྤྱོད་ཡུལ་དུ་གྱུར་པ་དང༌། ལྷག་པར་ཚན་འཕྲུལ་གྱི་བསྐལ་པ་དར་བའི་དབང་གིས་ལྷའི་གྲོང་ཁྱེར་ལ་འགྲན་བཟོད་པའི་ཁང་ཁྱིམ་གྱི་བཀོད་པ་སོགས་ཡར་རྒྱས་འཛུགས་བསྐྲུན་གྱི་རྣམ་གྲངས་ཇེ་འཕེལ་དུ་འགྲོ་བཞིན་ཡང༌། དོན་དུ་སྲོག་ལྡན་ཀུན་གྱི་འཚོ་བའི་གཞི་རྟེན་ཁོར་ཡུག་བདེ་སྙོམས་ཀྱི་གནས་སྟངས་ཐོག་དོ་ཕོག་ཚབས་ཆེ་འབྱུང་བཞིན་པ་དང༌། ཕྱོགས་གཅིག་ནས་དེ་སྔ་བོད་ཁ་བ་ཅན་གྱི་ཞིང་དུ་རང་བཞིན་འབྱུང་ཁམས་སྐྱོན་བྲལ་དུ་གནས་པའི་རྐྱེན་གྱིས་ལུས་ཅན་ཀུན་ཀྱང་འཚོ་ཁམས་བདེ་ལྡན་དུ་སྤྱོད་པའི་འདས་པའི་གནས་ཚུལ་བློ་ཡུལ་དུ་ཤར་ཞིང༌། དེང་སྐབས་བོད་ཐེ་བའི་འཛམ་གླིང་ཡོངས་ཁྱབ་ཏུ་ཁོར་ཡུག་གི་གནས་སྟངས་ཉམས་རྒུད་མྱུར་ཚད་ཆེན་པོའི་ཐོག་ནས་འགྲོ་བཞིན་པ་འདི་ཐོག་སྤྱི་བྱེ་ཚང་མས་འཕྲལ་ཡུན་ཁེ་གྱོང་བསམ་ཞིབ་ཀྱིས་འགན་འཁུར་ཐབས་བརྩོན་ཆེ་བསྐྱེད་མ་བྱུང་ཚེ་རིམ་གྱིས་སྣོད་བཅུད་ཡོངས་ལ་ཉམས་ཉེས་བློས་མི་འཆུན་པ་ཡོང་ངེས་ཀྱི་མྱོང་ཚོར་གཏིང་ཟབ་བྱུང་སྟེ་སྐྱེ་བོ་རེ་རེའི་ངོས་ནས་དུས་དང་རྒྱུན་གྱི་སྤྱོད་ལམ་ཀུན་ཏུ་སྣོད་བཅུད་ཉམས་པ་སོར་འཆུད་མི་ཉམས་གོང་འཕེལ་གྱི་ཐབས་ཚུལ་ལ་འབད་གལ་གཞེན་བསྐུལ་གྱི་ཚུལ་དུ། ལྡི་ལི་སངས་རྒྱས་རྗེས་དྲན་སྐྱེད་ཚལ་དུ་ཟངས་ཚ་གསེར་མའི་སྟོན་པ་བཅོམ་ལྡན་འདས་ཀྱི་སྣང་བརྙན་བཞུགས་གསོལ་གྱིས་རྒྱ་གར་གཞུང་མང་ལ་རྟེན་འབུལ་ཞུ་བ་དང་ཆབས་ཅིག་སྣོད་བཅུད་རྟེན་འབྱུང་སྐོར་རྒྱལ་འདུས་ཚོགས་འདུ་བསྡུ་འཚོགས་ཀྱི་སྐབས་དང་བསྟུན། ཤཱཀྱའི་དགེ་སྦྱོང་བསྟན་འཛིན་པས། སྟོན་པ་བདེ་བར་གཤེགས་ལོ་ ༢༥༣༧ ཕྱི་ལོ་ ༡༩༩༣ ཟླ་ ༡༠ ཚེས་ ༢ ལ་བྲིས།།
·གསར་འགྱུར་གོང་མ:མཉམ་དུ་ཟོས་ན་མི་འཕྲོད་པའི་ཟས་རིགས།
·གསར་འགྱུར་འོག་མ:བོད་ཀྱི་སྲོལ་རྒྱུན་གྱི་ཁོར་ཡུག་སྲུང་སྐྱོབ་ཀྱི་ཤེས་བྱ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
·རྒྱལ་ཁམས་བདེ་བའི་ཐུགས་བསྐྱེད་སྨོན་ལམ་ཞེས་བྱ་བ་བཞུགས།། 2015/6/16 17:55:12
·ནགས་ཚལ་སྐོར་གྱི་རྒྱུན་ཤེས། 2015/5/30 14:58:03
·བོད་ཀྱི་སྲོལ་རྒྱུན་གྱི་ཁོར་ཡུག་སྲུང་སྐྱོབ་ཀྱི་ཤེས་བྱ། 2015/3/25 11:52:21
·ཁོར་ཡུག་སྲུང་སྐྱོབ་བྱིས་པའི་རྩེད་མོ་མིན། 2015/1/27 12:14:29
·ཁོར་ཡུག་སྲུང་སྐྱོབ་དང་འགན་འཁྲི། 2014/4/3 10:38:25
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
མིག་སྔར་དཔྱད་བརྗོད་མི་འདུག
འབྲེལ་ཡོད་དཔྱད་བརྗོད 0 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.93MS