ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> འཕྲུལ་གྱི་རྒྱང་ཤེལ། >> གསར་མེ
  གསར་འགྱུར་ཀློག་པ།

འཕགས་པ་བཀྲ་ཤིས་བརྩེགས་པའི་མདོ་བཞུགས་སོ། །

[རྩོམ་པ་པོ:དཔལ་རྒྱལ་བ།  ཡོང་ཁུངས:ངེད་དྲ་བ།  དུས་ཚོད:2015/2/19 9:21:50  བཀླགས་ཐེངས:3440][ཡིག་གཟུགས:ཡིག་གཟུགས་མདོག]

༄༅། །བོད་ཤིང་ལུག་ལོའི་ལོ་གསར་ལ་བཀྲ་ཤིས་བདེ་ལེགས་ཞུ།
སྤྱིར་རྟེན་འབྲེལ་གྱི་བྱེད་སྒོ་སྣ་ཚོགས་སྤེལ་བ་དང་། ཁང་ཁྱིམ་རྒྱན་སྤྲོས་དང་དར་ལྕོག་འཛུགས་པ་བསང་ཁ་གསོལ་བ་སོགས་ལ་བཀྲ་ཤིས་བརྩེགས་པ་འདོན་པར་མཛད་པ་ཡིན་ནོ།།
       ༄༅། །འཕགས་པ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ་བཞུགས་སོ།
   ༄༅། །རྒྱ་གར་སྐད་དུ། ཨཱརྻ་མངྒ་ལ་ཀུ་ཊ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ་འཕགས་པ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་བོ་མཆོག་གི་གནས། བཀྲ་ཤིས་བརྩེགས་བའི་ཕོ་བྲང༌། མེ་ཏོག་བརྩེགས་པའི་ཚལ། རྡོ་རྗེ་བརྩེགས་འི་གུར་ཁང༌། རིན་ཆེན་སྤུངས་པའི་ཁྲི། གེ་སར་པདྨའི་གདན་ལ་བཞུགས་ཏེ། བཀྲ་ཤིས་པའི་འཁོར་མང་པོ་དང་ལྡན་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་རྩ་བརྒྱད་ཀྱིས་བསྐོར་བ་ནི་འདི་ལྟ་སྟེ། བྱང་ཆུབ་སེམས་དཔའ་བཀྲ་ཤིས་མཆོག་དང༌། བྱང་ཆུབ་སེམས་དཔའ་བཀྲ་ཤིས་སྡུད་དང༌། བྱང་ཆུབ་སེམས་དཔའ་བཀྲ་ཤིས་རྒྱན་དང༌། བྱང་ཆུབ་སེམས་དཔའ་བཀྲ་ཤིས་ཀུན་ཏུ་གཟིགས་དང༌། བྱང་ཆུབ་སེམས་དཔའ་བཀྲ་ཤིས་ཡོངས་སུ་ཁྱབ་དང༌། བཀྲ་ཤིས་བྱང་ཆུབ་སེམས་དཔའ་ནམ་མཁའི་སྙིང་པོ་དང༌། བཀྲ་ཤིས་བྱང་ཆུབ་སེམས་དཔའ་སའི་སྙིང་པོ་དང༌། བཀྲ་ཤིས་བྱང་ཆུབ་སེམས་དཔའ་རླུང་གི་སྙིང་པོ་དང༌། བཀྲ་ཤིས་བྱང་ཆུབ་སེམས་དཔའ་མེའི་སྙིང་པོ་དང༌། བཀྲ་ཤིས་བྱང་ཆུབ་སེམས་དཔའ་ཆུའི་སྙིང་པོ་དང༌། བཀྲ་ཤིས་བྱང་ཆུབ་སེམས་དཔའ་རྡོའི་སྙིང་པོ་དང༌། བཀྲ་ཤིས་བྱང་ཆུབ་སེམས་དཔའ་རིན་པོ་ཆེའི་སྙིང་པོ་དང༌། བཀྲ་ཤིས་བྱང་ཆུབ་སེམས་དཔའ་བཀོད་པ་མཐའ་ཡས་དང༌། དེ་བཞིན་དུ་རྣམ་པར་གཟིགས་དང༌། བློ་གྲོས་མཆོག་དང༌། འོད་དཔག་མེད་དང༌། ཚེ་དཔག་མེད་དང༌། སངས་རྒྱས་འོད་སྲུང་དང༌། བཀྲ་ཤིས་དམ་པའི་ཏོག་ཅན་དང༌། བཀྲ་ཤིས་མཐུ་སྟོབས་དང་ལྡན་པ་ལག་ན་རྡོ་རྗེ་དང༌། བཀྲ་ཤིས་མཁྱེན་པ་དང་ལྡན་པ་འཇམ་དཔལ་དང༌། བཀྲ་ཤིས་ཐུགས་རྗེ་དང་ལྡན་པ་སྤྱན་རས་གཟིགས་དབང་ཕྱུག་དང༌། ཤཱ་རིའི་བུ་དང༌། རབ་འབྱོར་ལ་སོགས་པ་བཀྲ་ཤིས་པའི་འཁོར་སྟོང་རྩ་བརྒྱད་དང༌། གཞན་ཡང་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། གྲུལ་བུམ་དང༌། མི་དང་མི་མ་ཡིན་པའི་ཚོགས་རབ་ཏུ་མང་པོ་དང་ཐབས་གཅིག་ཏུ་བཞུགས་ཏེ། དེའི་ཚེ་དེའི་དུས་ན་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བཅོམ་ལྡན་འདས་ལ་བསྐོར་བ་མང་དུ་མཛད་དེ། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཀྲ་ཤིས་དང་ལྡན་པའི་འཁོར་མང་པོ་བཞུགས་པའི་སྐབས་འདིར་ཐོག་མར་བཀྲ་ཤིས་ཤིང་དགེ་བ། བར་དུ་བཀྲ་ཤིས་ཤིང་དགེ་བ། མཐའ་མར་བཀྲ་ཤིས་ཤིང་དགེ་བ། བཀྲ་མི་ཤིས་པ་ཐམས་ཅད་ཞི་བར་བྱེད་པ། བཀྲ་ཤིས་པ་ཐམས་ཅད་ཡོངས་སུ་འདུ་བར་བྱེད་པ། ཉེས་སྐྱོན་སེལ་བ་ལེགས་པའི་ཡོན་ཏན་ཐམས་ཅད་ཡོངས་སུ་འདུ་བར་བྱེད་པ། དཔལ་དང་སྐལ་བ་བཟང་པོར་བྱེད་པའི་མདོ་ཞིག་བསྟན་དུ་གསོལ། ཞེས་ཞུས་པ་དང༌། བཅོམ་ལྡན་འདས་ཀྱིས་ཞལ་འཛུམ་པ་མཛད་ནས། འདི་སྐད་ཅེས་བཀའ་བསྩལ་ཏོ། །འཇམ་དཔལ་གཞན་ཡང་བཀྲ་ཤིས་དང་ལྡན་པའི་འཁོར་རྣམས་ཉོན་ཅིག །ངས་སྔོན་བྲམ་ཟེའི་ལུས་ཀྱིས་མི་མཇེད་ཀྱི་འཇིག་རྟེན་གྱི་ཁམས་འདིར་ཚེ་ལོ་སྟོང་ཐུབ་པའི་ཚེ། ཡང་དག་པར་རྫོགས་པའི་སངས་རྒྱས་བཀྲ་ཤིས་ཐམས་ཅད་འབྱུང་བའི་དཔལ་གཟི་བརྗིད་ཅེས་བྱ་བ་ལ་བཀྲ་ཤིས་བརྩེགས་པ་ཞེས་བྱ་བ་ཐེག་པ་ཆེན་པོའི་མདོ། ཡོན་ཏན་སྟོང་ལྡན་ཞེས་བྱ་བའི་ཆོས་ཀྱི་རྣམ་གྲངས་འདི་ཐོས་ཏེ། བཟུང་ཞིང་བཅངས་ཏེ་བཀླགས་ཤིང་བཤད་དེ། འཇིག་རྟེན་གྱི་ཁམས་འདི་ལ་ལེགས་ཉེས་ཀྱི་དབང་གིས་བཀྲ་མི་ཤིས་པའི་རྟགས་མང་དུ་བྱུང་སྟེ། དུས་ཚོད་ཉེས་པ་དང༌། སྐྱེ་བ་ཉེས་པ་དང༌། ལོ་ཟླ་མི་ཤིས་པ་ལ་སོགས་པ་དང༌། ལས་བྱ་ཉེས་པ་དང༌། ཟས་ཟ་ཉེས་པ་དང༌། གོས་བཙེམ་ཉེས་པ་དང༌། ཁྱིམ་དབུབས་ཉེས་པ་དང༌། གྲོགས་བཙལ་ཉེས་པ་དང༌། ནོར་བསྲེལ་ཉེས་པ་དང༌། རྟ་ཕྱུགས་བསྲེལ་ཉེས་པ་དང༌། ན་ཉེས་པ་དང༌། ཤི་ཉེས་པ་དང༌། ལམ་དུ་འཇུག་པ་ཉེས་པ་དང༌། རོ་དྲངས་ཉེས་པ་དང༌། གཤིད་བྱ་ཉེས་པ་དང༌། དུར་གདབ་པ་ལ་སོགས་ཏེ་བཀྲ་མི་ཤིས་པ་ཐམས་ཅད་རབ་ཏུ་ཞི་བར་བྱེད་པ། བཀྲ་ཤིས་པ་ཐམས་ཅད་རབ་ཏུ་འདུ་བར་བྱེད་པ། ཉེས་སྐྱོན་ཐམས་ཅད་རབ་ཏུ་སེལ་བ། ལེགས་པའི་ཡོན་ཏན་ཐམས་ཅད་ཡོངས་སུ་འདུ་བར་བྱེད་པ། དཔལ་དང་སྐལ་བ་བཟང་པོར་གྱུར་པ། ཐོག་མཐའ་བར་དུ་དགེ་བ། བསོད་ནམས་ཐམས་ཅད་ཡོངས་སུ་སྡུད་པ། བཀྲ་ཤིས་ཀྱི་ཚོགས་ཐམས་ཅད་འཆར་ཞིང་ཤེས་པ། སྡིག་སྒྲིབ་ཐམས་ཅད་མེད་པར་འཕགས་པ། བཀྲ་ཤིས་བརྩེགས་པ་ཆེན་པོའི་མདོ་ངས་ཁྱོད་ལ་བསྟན་གྱིས། འདི་ཐོས་སམ་བརྩམས་ཤིང་བརྗོད་པ་ཙམ་གྱིས། བཀྲ་མི་ཤིས་པ་ཐམས་ཅད་རབ་ཏུ་ཞི་བར་བྱེད་པ། མོ་ངན་པ་དང༌། དམིགས་ལྟས་ངན་པ་དང༌། པྲ་བརྟགས་ངན་པ་དང༌། ལྟས་ངན་པ་ཐམས་ཅད་ཟློག་པར་བྱེད་པའི་མདོ་སྡེ་སེམས་ཅན་ཐམས་ཅད་ལ་ཕན་པ་དང༌། སྨན་པ་དང༌། བདེ་བའི་ཕྱིར་ཁྱོད་ལ་ངས་བསྟན་གྱིས་རབ་ཏུ་ཉོན་ལ་ཡིད་ལ་ཆོངས་ཤིག་ཅེས་བཀའ་བསྩལ་ཏོ། །དེ་ལ་འཇམ་དཔལ་གྱིས་ལེགས་སོ་ལེགས་སོ། །བཅོམ་ལྡན་འདས་སེམས་ཅན་ཐམས་ཅད་ཀྱི་བཀྲ་མི་ཤིས་པ་ཐམས་ཅད་ཟློག་པར་བྱེད་པའི་དོན་དུ། བཀྲ་ཤིས་བརྩེགས་པ་ཞེས་བྱ་བའི་མདོ་སྡེ་ཡོན་ཏན་བཀོད་པའི་རྒྱལ་པོ་ཆོས་ཀྱི་ཕུང་པོ་དེ་བདག་ཅག་རྣམས་ལ་བཤད་དུ་གསོལ་ཞེས་ཞུས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གཞན་ཡང་བཀྲ་ཤིས་དང་ལྡན་པའི་འཁོར་དག་སྐྱེ་འགྲོ་མཐའ་དག་ལ་ལས་དང༌། བསོད་ནམས་འཕེལ་ཤུགས་ཀྱིས་བཀྲ་ཤིས་པ་དང༌། བཀྲ་མི་ཤིས་པ་གཉིས་སུ་བྱུང་སྟེ། སེམས་ཅན་གྱི་ནང་ནས་ཀྱང་མིའི་རིགས་སུ་གྱུར་པ་ལ། བཀྲ་མི་ཤིས་པའི་རྟགས་ནི་ཀློག་ཉེས་པ་དང༌། བྲིས་ཉེས་པ་དང༌། བཤད་ཉེས་པ་དང༌། སྒོམ་ཉེས་པ་དང༌། སྐྱེས་མ་ཐག་ཏུ་འཆི་བ་དང༌། དམུས་ལོང་ཅན་དང༌། ཤ་བཀྲ་ཅན་དང༌། །གླང་ཤ་ཤ་རོ་དང༌། ཤོ་རེ་དྭ་སྒལ་ཞར་སྒུར་དང༌། །གཟི་མིག་དྲུག་ལག་གདོང་སྨེ་ཅན། །ལྦ་བ་ཤ་ལྷག་ཤ་མཚན་དང༌། གཙུག་ངན་པ་དང་ཤ་འཛེར་ཅན། །ཡན་ལག་ཆད་ལྷག་བྱུང་བ་རྣམས། །བཀྲ་མི་ཤིས་པའི་སྐྱོན་ཡིན་ཏེ། །དེ་བཞིན་ཕྱུགས་དང་སྒོ་ཁྱི་དང༌། །ཞིང་ཁང་ནོར་རྫས་ཀུན་ལ་ཡང༌། །བཀྲ་མི་ཤིས་པའི་སྐྱོན་མང་དུ་བྱུང་སྟེ། །དེ་ཡི་མཚན་མ་ངན་པ་དང༌། །རྟགས་སོགས་བཀྲ་མི་ཤིས་པ་ཀུན། །ཐམས་ཅད་ཟློག་ཅིང་བསྒྱུར་བ་སྟེ། །ཉེས་སྐྱོན་མེད་པར་བྱ་བའི་ཕྱིར། །བཀྲ་ཤིས་དོན་གྱི་ལྷ་ལྔ་ལ་ཕྱག་འཚལ་ལོ། །བཀྲ་ཤིས་མཆོག་གི་ལྷ་ཕྱོགས་སྐྱོང་མགོན་པོ་རྣམས་ལ་ཕྱག་འཚལ་ལོ། །བཀྲ་ཤིས་པར་བྱེད་པའི་སྔགས་བརྗོད་པར་བྱའོ། །སྱཱདྱ་ཐེ་དན། བྷི་ཛྙཱཱ་ཡེ་བྷི་ཛྙཱ་ཡེ། ཨུག་གེ་ཨུག་ག, ི་སྭ་སྟི་ཀ, ྲ་པ་ཏི། ཨུ་མུ་ཁ་ཧི་པྲ་སྭ་ར་དྭ། སྭ་སྟི་སྭ་སྟི་བྲུཾ་བྲུཾ་བྲུཾ་པྲ་ཧཀྵེ། མུ་ནེ་མུ་ནེ། གུ་ར་ནེ་གུ་ར་ནེ། ཨ་ཁེ་མུ་ཁེ། མུ་ར་ཀེ་མུ་ར་ཀེ །ཨ་མ་ཏུ་གུ་ར་ན་ཡ། སྭ་སྟི་སྭ་སྟི་སྭ་སྭསྟི། གུ་ལེ་མུ་ལེ། ཀེ་ཤེ་ཀེ་ཤེ། ཙུ་ར་ན་ཙུ་ར་ན། བྷི་ར་མ་ལེ་སྭཱ་ཧཱ། ཞེས་ཚིག་འདི་རབ་ཏུ་བརྗོད་དོ། །སངས་རྒྱས་ཆོས་དང་དགེ་འདུན་ལ། ཕྱག་འཚལ་སྐྱབས་གསོལ་ཤིས་གྱུར་ཅིག །ཕྱི་ནང་གསང་བའི་བཀྲ་ཤིས་རྣམས། །དེང་འདིར་འབྱུང་ཞིང་འབབ་གྱུར་ཅིག །ཕྱི་རུ་བཀྲ་ཤིས་ནམ་མཁའ་དག་པའི་མཁའ། །ནང་དུ་བཀྲ་ཤིས་སེམས་ཉིད་དག་པའི་ཀློང༌། །གསང་བའི་བཀྲ་ཤིས་ཆོས་ཉིད་དག་པའི་དབྱིངས། །མཁའ་ཀློང་དབྱིངས་གསུམ་བཀྲ་ཤིས་གང་ཡིན་པ། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གནམ་ལ་བཀྲ་ཤིས་ཉི་ཟླ་གཉིས། །གཟའ་སྐར་མང་པོའི་ཚོགས་ཀྱིས་བསྐོར། ས་ལ་བཀྲ་ཤིས་འབྱུང་བ་ལྔ། །མེ་ཆུ་ས་རླུང་ཚོགས་ཀྱིས་བསྐོར། །བར་ན་བཀྲ་ཤིས་དཀོན་མཆོག་གསུམ། །ཕྱོགས་བཅུའི་སངས་རྒྱས་ཚོགས་ཀྱིས་བསྐོར། །དཀོན་མཆོག་གསུམ་གྱི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ན་མོ་བུདྡྷ་ཡ། ན་མོ་དྷརྨ་ཡ། ན་མ་སངྒྷ་ཡ། གནམ་ས་བར་གྱི་བཀྲ་ཤིས་གང་ཡིན་པ། །བཀྲ་ཤིས་དེ་ས་ཀྱང་དེང་འདིར་བདེ་ལེགས་ཤོག །དབུས་ན་བཀྲ་ཤིས་དོན་གྱི་ལྷ། །རྣམ་པར་སྣང་མཛད་བཀྲ་ཤིས་དོན་གྱི་ལྷ། །རྣམ་པར་སྣང་མཛད་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཤར་ན་བཀྲ་ཤིས་དོན་གྱི་ལྷ། །རྡོ་རྗེ་སེམས་དཔའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལྷོ་ན་བཀྲ་ཤིས་དོན་གྱི་ལྷ། །རིན་ཆེན་འབྱུང་གནས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ནུབ་ན་བཀྲ་ཤིས་དོན་གྱི་ལྷ། །སྣང་བ་མཐའ་ཡས་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱང་ན་བཀྲ་ཤིས་དོན་གྱི་ལྷ། །དོན་ཡོད་གྲུབ་པའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཨོཾ་བུདྡྷ་ཡ་དྷུ། ཨོཾ་བཛྲ་ཡ་དྷུ། ཨོཾ་རཏྣ་ཡ་དྷུ། ཨོཾ་པདྨ་ཡ་དྷུ། ཨོཾ་ཀརྨཱ་ཡ་དྷུ། བདག་དང་སྐལ་ལྡན་རིགས་ཀྱི་བུ། །དེང་གི་རྒྱུ་སྦྱོར་ཡོན་གྱི་བདག །སངས་རྒྱས་རྣམས་ཀྱིས་བྱིན་བརླབས་ནས། །བཀྲ་ཤིས་དམ་པའི་མདོ་སྡེ་འདི། །ང་ཡིས་བརྗོད་པའི་བསོད་ནམས་ཀྱིས། །ནམ་མཁའ་ལྟ་བུ་ཀུན་ཁྱབ་ཅིང༌། ཉི་ཟླ་ལྟ་བུར་ཀུན་གསལ་ཏེ། །སྐར་ཚོགས་ལྟ་བུར་གྲངས་མང་ཞིང༌། །སྤྲིན་ཚོགས་ལྟ་བུར་ལྷུན་གྲུབ་སྟེ། །འཇའ་ཚོན་ལྟ་བུར་མཛེས་སྡུག་ཅིང༌། །རི་རབ་ལྟ་བུར་བརྟན་བརྗིད་ཆེ། །ས་གཞི་ལྟ་བུར་ཀུན་བསྐྱེད་ཅིང༌། །རྒྱ་མཚོ་ལྟ་བུར་གཏིང་ཟབ་པའི། །ལྗོན་ཤིང་ལྟ་བུར་འདབ་རྒྱས་ཏེ། །ཡིད་བཞིན་ནོར་བུ་རིན་ཆེན་ལྟར། །དགོས་འདོད་བཀྲ་ཤིས་ཆར་ལྟར་འབབ་གྱུར་ཅིག །ཨོཾ་ཨཱཿཧཱུཾ། རཏྣ་བྲུཾ་ནི་ཨ། བཀྲ་ཤིས་པར་གྱུར་ཅིག །དམིགས་པ་མེད་པ་སྦྱིན་པའི་ཕ་རོལ་ཕྱིན། །སྦྱིན་པ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལགས་ཤོག །འཆལ་བ་མེད་པ་ཚུལ་ཁྲིམས་ཕ་རོལ་ཕྱིན། །ཚུལ་ཁྲིམས་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱུང་ཚོར་མེད་པ་བཟོད་པའི་ཕ་རོལ་ཕྱིན། །བཟོད་པ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལེ་ལོ་མེད་པ་བརྩོན་འགྲུས་ཕ་རོལ་ཕྱིན། །བརྩོན་འགྲུས་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འགྱུར་ལྡོག་མེད་པ་བསམ་གཏན་ཕ་རོལ་ཕྱིན། །བསམ་གཏན་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གང་ཡང་མ་འགགས་ཐབས་ཀྱི་ཕ་རོལ་ཕྱིན། །ཐབས་ཆེན་མཆོག་གི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །མ་ཆགས་ཐོགས་མེད་སྟོབས་ཀྱི་ཕ་རོལ་ཕྱིན། །སྟོབས་ཆེན་ཤུགས་ཀྱི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །རེ་དོགས་མེད་པ་སྨོན་ལམ་ཕ་རོལ་ཕྱིན། །སྨོན་ལམ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །འཁྲུལ་པ་མེད་པ་ཤེས་རབ་ཕ་རོལ་ཕྱིན། །ཤེས་རབ་ཆེན་པོའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཕ་རོལ་ཕྱིན་བཅུའི་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བདེ་ལེགས་ཐམས་ཅད་མྱུར་ཐོབ་ཤོག །ཨོཾ་སྭ་སྟི། ཏདྱ་ཐཱ། ག་ཏེ་ག་ཏེ། པཱ་ར་ག་ཏེ། པཱ་ར་སངྒ་ཏེ་བོ་དྷི་སྭཱ་ཧཱ། །མ་ཆགས་ཐོགས་མེད་འཁོར་ལོ་རིན་པོ་ཆེ། །འཁོར་ལོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐེག་ཆེན་སྟོབས་ལྡན་གླང་པོ་ཆེ། །གླང་པོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅང་ཤེས་ཤུགས་ལྡན་རྟ་མཆོག་རིན་པོ་ཆེ། །རྟ་མཆོག་རིན་ཆེན་བཀྲ་ཤིས་གང་ཡིན་པ། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཀུན་ལ་དབང་བསྒྱུར་བློན་པོ་རིན་པོ་ཆེ། །བློན་པོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལོག་རྟོག་དཔུང་འཇོམས་དམག་དཔོན་རིན་པོ་ཆེ། །དམག་དཔོན་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཐམས་ཅད་ཀུན་སྐྱེད་བཙུན་མོ་རིན་པོ་ཆེ། །བཙུན་མོ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །དེ་མ་ཐག་ཏུ་བདག་ཅག་བདེ་ལེགས་ཤོག །བསམ་འཕེལ་དོན་གྲུབ་ནོར་བུ་རིན་པོ་ཆེ། ནོར་བུ་རིན་ཆེན་བཀྲ་ཤིས་གང་ཡིན་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཨོཾ་བྷེ་ཤི་ཏི། རཏྣ་བྷེ་ཤི་ཏི། སཾ་མུད་གཏི་སེ་སྭཱ་ཧཱ། ཨོཾ་བརྻ་སུ་ལེ་བྷ་མ་ཁྲཾ་ཙེ། སྨྲ་ར་ཙྪེ་ད་ནཱཉྫེ་སྭཱ་ཧཱ། ན་མོ་དབུ་ལ་བཀྲ་ཤིས་གདུགས་ལྟར་སྐྱོབས། །སྐུ་ལ་བཀྲ་ཤིས་མི་ནུབ་རྒྱལ་མཚན་མཆོག །གསུང་ལ་བཀྲ་ཤིས་ཆོས་དུང་གཡས་སུ་འཁྱིལ། །ཐུགས་ལ་བཀྲ་ཤིས་དཔལ་གྱི་བེ་འུ་གསལ། །སྤྱན་ལ་བཀྲ་ཤིས་རིན་ཆེན་གསེར་གྱི་ཉ། །ལྗགས་ལ་བཀྲ་ཤིས་པདྨོ་ལོ་འདབ་རྒྱས། །མགུལ་ལ་བཀྲ་ཤིས་རིན་ཆེན་བུམ་པ་འཁྱིལ། །ཕྱག་ལ་བཀྲ་ཤིས་ཡོན་ཏན་ནོར་བུ་མཆོག །ཞབས་ལ་བཀྲ་ཤིས་འཕྲིན་ལས་འཁོར་ལོ་མངའ། །བཀྲ་ཤིས་རྫས་བརྒྱད་དངོས་གྲུབ་དམ་པའི་མཆོག །རྫས་མཆོག་བརྒྱད་ཀྱི་བཀྲ་ཤིས་གང་ཡིན་པ། །དེང་འདིར་བདག་ཅག་རྣམས་ལ་བཀྲ་ཤིས་ཕོབ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཨོཾ་སརྦ་ཨཱ་ཡུརྫྙཱ་ན་རཏྣ་ཧ་མུ་ཀི །བྲུཾ་བྲུཾ་བྲུཾ། ཧཱུཾ་ཧཱུཾ་ཧཱུཾ། སྭ་སྟི། སངས་རྒྱས་ཞལ་ནས་གསུངས་པ་ཡི། །བཀྲ་ཤིས་བརྩེགས་པའི་སྨོན་ལམ་མདོ། །ཚེ་འདིར་བདེ་སྐྱིད་ཚེ་རིང་ཞིང༌། །བཀྲ་ཤིས་དཔལ་དང་ལོངས་སྤྱོད་ཐོབ། །བསོད་ནམས་ཕུན་སུམ་ཚོགས་ལྡན་ཐོབ། །ཕྱི་མ་བླ་མེད་རྫོགས་སངས་རྒྱས། །ཞེས་བཅོམ་ལྡན་འདས་ཀྱིས་བཀའ་བསྩལ་པ་དང༌། བཀྲ་ཤིས་དང་ལྡན་པའི་འཁོར་དེ་དག་དང༌། ལྷ་དང་མི་དང་ལྷ་མ་ཡིན་དུ་བཅས་པ་དེ་དག་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རངས་ནས། དེ་བཞིན་གཤེགས་པ་ལ་མངོན་པར་བསྟོད་དོ། །དེའི་ཚེ་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་གསོལ་པ། བཅོམ་ལྡན་འདས་ཀྱི་མདོ་སྡེ་འདིའི་ཇི་ལྟར་ལས་ཆོ་ག་དང་ལྡན་པར་བགྱི། དེའི་ཆོ་ག་ནི་ཇི་ལྟར་བགྱི་ཞེས་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདིའི་ཆོ་ག་ནི་དཀོན་མཆོག་གི་ཕོ་བྲང་བཞེངས་པ་དང༌། ལྷ་ཁང་བཞེངས་པ་དང༌། གཙུག་ལ་ཁང་བཞེངས་པ་དང༌། མཆོད་རྟེན་བཞེངས་པ་དང༌། བུམ་པ་བཞེངས་པ་དང༌། སྐུ་གདུང་དང༌། གསུང་རབས་དང༌། གླེགས་བམ་ལ་རབ་གནས་བྱེད་པ་དང༌། ཡུལ་མཁར་གང་དུ་རྩིག་པ་དང༌། ཁང་ཁྱིམ་གསར་པ་འབུབས་པ་དང༌། བུ་ཁྱེའུ་བཙས་པ་དང༌། བག་མ་གཏོང་ལེན་བྱེད་པ་དང༌། རོ་འདོན་པ་དང༌། གཤིད་བྱེད་པ་དང༌། དུར་གདབ་པ་དང༌། བཀྲ་མི་ཤིས་པ་དང༌། ལྟས་ངན་པ་དག་ཟློག་པར་བྱེད་པ། སྒྱུར་བར་བྱེད་པ་འདི་ནི་ཁ་ཟས་གཙང་ཞིང་རོ་བྲོ་བར་བྱེད་པའམ། ནས་འབྲས་ཏིལ་ལ་སོགས་པའི་འབྲུ་སྣ་ལྔའམ། ཤིང་ཐོག་གམ། འབྲུ་བཅུད་དམ། སྦྲང་རྩིའམ། འབྲང་རྒྱས་ལྟ་བུ་ལ་བརྗོད་པར་བྱའོ། །དེའི་ཕན་ཡོན་ནི་བཀྲ་མི་ཤིས་པ་ཐམས་ཅད་རབ་ཏུ་ཞི་ནས། ཚེ་འདིར་བཀྲ་ཤིས་ཀུན་ལྡན་ཞིང༌། བླ་མེད་འབྲས་བུ་ཐོབ་ཅེས་བཀའ་བསྩལ་ཏོ། །སྐུ་ཡི་བཀྲ་ཤིས་སྐྱེ་མེད་ཆོས་ཀྱི་སྐུ། །གསུང་གི་བཀྲ་ཤིས་དམ་ཆོས་བདུད་རྩིའི་སྒྲ། །ཐུགས་ཀྱི་བཀྲ་ཤིས་མཉམ་ཉིད་འཁྲུལ་པ་མེད། །ཡོན་ཏན་བཀྲ་ཤིས་འགྲོ་དྲུག་གནས་ནས་འདྲེན། །ཕྲིན་ལས་བཀྲ་ཤིས་རྩོལ་མེད་ལྷུན་གྱིས་གྲུབ། །ཉིན་ཡང་བཀྲ་ཤིས་མཚན་ཡང་བཀྲ་ཤིས་ཤོག །ཉིན་མཚན་རྟག་ཏུ་བཀྲ་ཤིས་བདེ་ལེགས་ཤོག །རྐང་གཉིས་ཁྱེད་ཅག་བདེ་ལེགས་ཤོག །རྐང་བཞི་ཁྱེད་ཅག་བདེ་ལེགས་ཤོག །ད་ལྟར་བྱུང་རྣམས་བདེ་ལེགས་ཤོག །ཀུན་ཀྱང་བདེ་སྐྱིད་མཆོག་ཐོབ་ཤོག །ཨོཾ་སྐམ་ཀ་ར་སྐམ་ཀ་ར་ནིར་གད་ཙ་ཏ། །ཨོཾ་སྭ་སྟི། འཕགས་པ་བཀྲ་ཤིས་བརྩེགས་པ་ཆེན་པོའི་མདོ་ལས་ཆོ་ག་དང་བཅས་པ་རྫོགས་སོ། །།

·གསར་འགྱུར་གོང་མ:ལོ་གསར་སྐབས་ལུག་མགོ་སྒྲིག་སྲོལ་ཡོད་པ་དེས་ཅི་ཞིག་མཚོན་པ་ཡིན་ནམ།
·གསར་འགྱུར་འོག་མ:ལུས་སེམས་ཚོར་བ་གསུམ་གྱི་འབྲེལ་བ།
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
·འཕཊ་པ་བཀྲིས་བརྒྱད་པའི་ཚིཊ་བཅད། 2011/1/6 23:04:11
·དྲ་ཚིཊ་ལེགས་གྲུབ་བྱུང་བར་བཀྲིས་བདེ་ལེཊ་ཞུ། 2009/11/12 9:53:10
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
མིག་སྔར་དཔྱད་བརྗོད་མི་འདུག
འབྲེལ་ཡོད་དཔྱད་བརྗོད 0 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།39.06MS