ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> གསར་འགྱུར། >> འཕྲུལ་གྱི་རྒྱང་ཤེལ། >> དཔྱད་བརྗོད།
  གསར་འགྱུར་ཀློག་པ།

ཨོ་བྷ་མ་ཤེས་རབ་ཀྱི་དོ་བདག་ལས་ཀེ་རིམ་རྩེད་མཁན་ཞིག་ཏུ་ཆགས་སྟངས།

[རྩོམ་པ་པོ:ཨ་བསོད།  ཡོང་ཁུངས:དྲ་ཐོག  དུས་ཚོད:2014/5/24 12:42:57  བཀླགས་ཐེངས:1027][ཡིག་གཟུགས:ཡིག་གཟུགས་མདོག]

ཨོ་བྷ་མ་ཤེས་རབ་ཀྱི་དོ་བདག་ལས་ཀེ་རིམ་རྩེད་མཁན་ཞིག་ཏུ་ཆགས་སྟངས།

ཨ་ནུ་ཐང་བསོད་ནམས།

  ཨོ་བྷ་མ་སྲིད་འཛིན་ལ་དང་པོ་ལངས་སྐབས་ཁོང་ལ་སྲིད་འཛིན་གྱི་རྒྱལ་ཁ་ཐོབ་ཚེ། ཁོས་ཨ་རིའི་དམག་མཚམས་བཞག་ཅིང་། དམག་འཁྲུག་གི་འགྲོ་གྲོན་དེ་དག་ཨ་རིའི་མི་མང་གི་འཚོ་བར་བཏང་ཏེ་དཔལ་འབྱོར་ཉམས་གསོ་བྱེད་རྒྱུ་ཁས་ལེན་བྱས་རྐྱེན། ཁོང་ལ་སྲིད་འཛིན་གྱི་རྒྱལ་ཁ་ཐོབ་ཡོད། སྲིད་འཛིན་ཐོབ་དགོས་དོན་ཡང་ཨེ་རག་དང་ཨབ་རྒན་གྱི་དམག་འཁྲུག་ནང་ཨ་དམག་གིས་ལས་སླ་བོར་རྒྱལ་ཁ་མ་ཐོབ་ཅིང་། རྒྱལ་ཁའི་གྲུབ་འབྲས་སྒུག་བྱེད་ཡུན་རིང་དྲགས་པ་མ་ཟད། ཨ་རི་བ་མང་པོས་དམག་འཁྲུག་ལས་རྒྱལ་ཁ་མེད་པ་ཚོར་ནས་ཨ་ཐང་ཆད་པའི་སྟེང་། ཉིས་སྟོང་བརྒྱད་ལོར་ཨ་རི་ལ་དཔལ་འབྱོར་གྱི་དཀའ་ངལ་འཕྲད། གནས་ཚུལ་དེ་དམག་འཁྲུག་ལ་མི་དགའ་མཁན་གྱི་ཨ་རི་བ་ཚོར་མི་སེམས་འགུག་པའི་རྒྱུ་མཚན་དང་བདེན་དཔང་དུ་གྱུར་ཅིང་། མི་མང་གིས་ཁོང་ཚོར་རྒྱབ་སྐྱོར་ཐོབ་པས་དམག་འཁྲུག་མཚམས་འཇོག་བྱེད་ཆེད། བྱེད་མཁན་གྱི་སྲིད་འཛིན་ཨོ་བྷ་མ་ལ་སྲིད་འཛིན་གྱི་རྒྱལ་ཁ་ཐོབ་པ་རེད།
  ཨོ་བྟ་མ་སྲིད་འཛིན་ལ་བསྡད་པ་དང་མཉམ་དུ་ཨེ་རག་གི་དམག་འཁྲུག་མཇུག་སྒྲིལ་རྒྱུ་ཐག་གཅོད་བྱས་པ་མ་ཟད། ཨབ་རྒན་དམག་འཁྲུག་ཀྱང་༢༠༡༤ ལོའི་ལོ་མཇུག་ཏུ་མཇུག་སྒྲིལ་བྱེད་རྒྱུ་ཁས་ལེན་བྱས། འོན་ཀྱང་། ཨབ་རྒན་གྱི་དམག་འཁྲུག་ནི་ཁོའི་བསམ་པ་བཞིན་མཇུག་སྒྲིལ་ཆོག་ཆོག་ཅིག་མིན་པས་དུས་ཆད་བཞིན་ནུས་པ་ཐོན་དཀའ་ཞིང་ཐོན་སླད་དུ། ཨ་རིའི་དཔུང་དམག་ཁ་སྣོན་དུ་མི་གཏོང་ཐབས་མེད་བྱུང་བ་མ་ཟད། ཨབ་རྒན་གཞུང་ལའང་༢༠༡༤ ལོ་མཇུག་གི་དུས་ཡུན་རྫོགས་རྗེས་སུ་ཡུལ་དེའི་ནང་ནེ་གྲོའི་དཔུང་དམག་ཁག་ཅིག་སྡོད་འཐུས་ཆོག་པའི་རེ་བ་མི་ཞུ་ཐབས་མེད་བྱུང་།

   ༢༠༠༩ ལོར་ཨོ་བྷ་མ་སྲིད་འཛིན་ལ་བསྡད་ནས་ཟླ་གསུམ་གྱི་རྗེས་སུ་འཛམ་གླིང་དུ་དུག་རླངས་མཚོན་ཆ་མེད་པ་བཟོ་རྒྱུ་ཆེ་ཁིའི་རྒྱལ་ས་ཕ་རལ་རྒི་རུ་གསལ་བསྒྲགས་བྱས་ཤིང་། དེ་ལྟར་ཡོང་ངེས་ཡིན་ཞིང་། ཡོང་ཡ་ཡོད་པ་ཁོང་གི་ཁྱིམ་ཚང་ལ་མཚོན་ན་ཁོང་སྲིད་འཛིན་ལ་ཆགས་པ་བཞིན་རེད་ཅེས་བརྗོད་ཡོད། དུག་མཚོན་ཉུང་དུ་གཏོང་ཐབས་སུ་ར་ཤི་ཡའི་སྲིད་འཛིན་པོ་དྲིན་དང་མཉམ་དུ་ཚོང་ཞིག་བརྒྱབས་ཡོད། ཚོང་དེའི་ནང་སྲིད་འཛིན་བྷོ་ཤི་ཡིས་ལོ་མང་དཀའ་ལས་བརྒྱབས་པའི་ཨུ་རུ་སུའི་དུག་རླངས་འཕུར་མདའ་འགོག་སྲུང་གི་མཚོན་ཆ་ཆེ་ཁིའི་རྒྱལ་ཁབ་ནང་འཛུགས་འཆར་བྱས་པ་རྩིས་མེད་བཏང་ཞིང་། ཨ་ཨུ་གཉིས་ཀྱིས་ཆེ་ཁིའི་རྒྱལ་ས་ཕ་རལ་རྒི་རུ་དུག་མཚོན་ཉུང་འཕྲི་ཡི་གན་རྒྱ་ཞིག་བཞག་ཡོད། སྐབས་དེ་དུས་ནུབ་མི་མང་པོས་ཨོ་བྷ་མས་དུག་མཚོན་མེད་པའི་འཇིག་རྟེན་ཞིག་བསྐྲུན་རྒྱུ་ཡི་སྣེ་ཁྲིད་བྱས་པར་རློམ་ནས་དགའ་བསུ་ཚད་མེད་བྱས་པ་མ་ཟད། ནོར་སྦེ་ཞི་བདེའི་གཟིངས་རྟགས་སྤྲད་པའི་རྒྱུ་རུ་ཆགས་ཡོད། འོན་ཀྱང་། ཉམས་ཞིབ་པ་མང་པོས་བྱ་དགའ་སྤྲད་པ་ནི་ཤྭ་བ་མ་བསད་པའི་སྔོན་དུ་བཙོང་ས་བཞག་པའི་དཔེ་མཚོན་དུ་བགྲང་ཡོད།

  དོན་དངོས་དེ་ནི་ཨོ་བྷ་མ་ཐབས་བྱུས་ཀྱི་ཐོག་ནས་སྲིད་འཛིན་པོ་དྲིན་གྱི་གཡོ་འོག་ཏུ་ཚུད་ཅིང་། དེ་ལྟར་ཡིན་པ་ད་ལྟ་ཡོས་ཁི་རན་གྱི་དམག་འཁྲུག་གི་རྐྱེན་གྱིས་གཞི་ནས་ནུབ་ཕྱོགས་མི་མང་གིས་ཧ་གོ་བཞིན་ཡོད། རྒྱུ་མཚན་ནི། མཚོན་ཆ་འགོག་སྲུང་དེ་ལ་ར་ཤི་ཡས་ངོ་རྒོལ་ཤུགས་ཆེན་བྱེད་ཀྱིན་ཡོད་པ་མ་ཟད། དེ་མི་འཇོག་ཆེད་དུ་པོ་དྲིན་གྱིས་ཐབས་ཤེས་ཡོད་དགུ་སྣ་ཚོགས་བཏང་བའི་བྱས་འབྲས་ཤིག་ལ་ངོས་འཛིན་བྱེད་ཀྱིན་ཡོད་ལ། ད་ལྟ་ར་ཤི་ཡ་དང་ནུབ་ཕྱོགས་བར་དམག་འཁྲུག་འདྲ་བྱུང་ཚེ་ཡོ་རོབ་ལ་མཚོན་ཆ་འགོག་སྲུང་བྱེད་པའི་རྟེན་གཞི་འདང་ངེས་མེད་པས་ར་ཤི་ཡ་ལ་ཞེད་སྣང་མི་བྱེད་གཏོལ་མེད་ཆགས་ཤིང་། གལ་སྲིད་ར་དམག་གིས་ཁི་རན་ལ་དཔུང་འཇུག་བྱས་ཀྱང་། ནུབ་ཕྱོགས་པས་དམག་རོགས་བྱེད་པའི་ནུས་པ་མེད་པར་བཏང་ཡོད། ད་ལྟ་དཔལ་འབྱོར་གྱི་ཉམས་རྒུད་འོག་ནུབ་ཕྱོགས་ཀྱི་རྒྱལ་ཁབ་མང་པོས་དམག་གྲོན་ཉུང་འཕྲི་བྱ་འཆར་ཡོད་པ་དག་ཀྱང་འགྱུར་བ་ཐེབས་སུ་འཇུག་བཞིན་ཡོད།

ཨོ་བྷ་མའི་སྟོང་བསམ་གྱི་སྲིད་བྱུས།

  ཐེངས་གཉིས་པར་ཨོ་བྷ་མ་སྲིད་འཛིན་ལ་ལངས་སྐབས་སུ་ཁོ་དང་ཁོའི་ཕྱི་སྲིད་དྲུང་ཆེ་རྗོན་ཁཱ་རེས་གཉིས་ཀྱིས་གཅིག་རྗེས་གཉིས་མཐུད་དུ། སྲིད་འཛིན་འོས་མི་མེ་ཁི་རོ་ནིས་ལ་དམག་རྒྱུད་རིང་ལུགས་པའི་རྙིང་ཞེན་གྱི་བསམ་བློ་ཡོད་ཚུལ་གྱི་སྐྱོན་བརྗོད་བྱས་ཡོད། བྱེད་དགོས་དོན་ཡང་། མེ་ཁི་རོ་ནིས་ཀྱིས་ཨ་རིའི་བདེ་འཇགས་དང་དཔལ་འབྱོར་ལ་ཕུགས་རྒྱང་རིང་པོའི་གནོད་སྐྱོན་གཏོང་མཁན་དང་། ཉེན་ཚབས་བྱེད་མཁན་ནི་རྒྱ་ནག་དང་ར་ཤི་ཡ་གཉིས་ཡིན་ཚུལ་བརྗོད་ཅིང་། ཨ་རིས་རྒྱ་ནག་དང་ཚོང་འབྲེལ་བྱེད་ཡ་ཉུང་དུ་བཏང་ཏེ། དེའི་ཚབ་ཏུ་ལ་དྲན་ཨ་རིའི་རྒྱལ་ཁབ་ཚོ་ལ་ཚོང་འབྲེལ་བྱེད་དགོས་ཚུལ་དང་། ར་ཤི་ཡ་ནི་བདེ་འཇགས་ཐོག་ཨ་རི་ལ་ཉེན་ཁ་ཆེ་ཤོས་དེ་ཡིན་པས་ཐབས་བྱུས་ཀྱི་ཐོག་ནས་གཟབ་དགོས་ཚུལ་བརྗོད་སྐབས། ཨོ་བྷ་མ་དང་ཁཱ་རས་གཉིས་ཀྱིས་རོ་ནིས་ལ་རྙིང་ཞེན་གྱི་བསམ་བློ་ཡོད་ཅིང་། ད་ནི་གྲང་དམག་གི་དུས་རབས་མིན་ཞིང་མཇུག་སྒྲིལ་ཚར་བ་རེད་ཅེས་བརྗོད་སྐབས། ཁོ་གཉིས་ཀྱི་རྗེས་འབྲང་བ་ཨ་རི་བ་མང་པོས་དགའ་བསུ་ཡི་ཐལ་མོ་བརྡེབ་ཅིང་སྐད་སྒྲ་འབྱིན་པ་མ་ཟད། སྐད་སྒྲ་དེ་ནི་སྤྱིར་བཏང་གི་སྐད་སྒྲ་ཞིག་མིན་པ། མེ་ཁི་རོ་ནིས་ནི་རྙིང་ཞེན་དང་གུ་དོག་ཅན་ཞིག་ཁར། དྲག་ཤུགས་ལ་དགའ་མཁན་ཞིག་ཏུ་ངོས་འཛིན་བྱས་པའི་མཐོང་ཆུང་གི་སྐད་སྒྲ་ཞིག་རེད། ད་ལྟ་དངོས་སུ་ར་ཤི་ཡ་ནི་ནུབ་ཕྱོགས་དང་ཨ་རི་ཡི་ཉེན་ཁ་རུ་མཐོང་སྐབས། གོང་གི་སྐད་སྒྲ་དེ་དག་ནི་ཆུ་ཡི་ལྦུ་བ་བཞིན་གར་སོང་ཆ་མེད་དུ་འགྱུར་བཞིན་ཡོད།

  ཉིས་སྟོང་ལོ་ཤར་བ་དང་མཉམ་དུ་ཞི་བདེ་དོན་གཉེར་བ་དང་། ཞི་བདེའི་ཚོང་དཔོན་མང་པོ་ཞིག་གིས་ད་ནི་འཇིག་རྟེན་འདིར་དམག་འཁྲུག་གི་དུས་ཡུན་རྫོགས་ཟིན་ཅིང་། ཞི་བ་དང་གྲོས་མོལ་གྱི་དུས་རབས་ཡིན་ཚུལ་གྱི་ཁ་གཡང་བསྒྲགས་ཀྱང་། དོན་དངོས་མི་འདི་མ་ཤི་ན་རྩོད་པར་འཛད་མཐའ་མེད་པ་བཞིན། སྟོང་ལོ་ཚེས་པ་དང་མཉམ་དུ་ཨེ་རག་ཨབ་རྒན་གྱི་དམག་འཁྲུག ལྷོ་ཨ་མི་རི་ཁའི་དུག་ཚོང་གི་དམག་འཐབ་དང་ཨ་ཧྥུ་ཡི་ཁའི་དྲག་སྤྱོད། དཀྱིལ་ཤར་ཁུལ་གྱི་དམག་འཁྲུག་དང་ལྷོ་རྒྱ་ནག་རྒྱ་མཚོའི་བདག་དབང་གི་རྩོད་རྙོག འབར་མའི་དྲག་པོའི་དོན་རྐྱེན་དང་སེང་ག་ལས་རྟ་མིན་མི་རིགས་སྡེབ་བསད་བཏང་བའི་བྱ་སྤྱོད། ཐེ་ལན་གྱིས་ཞི་རྒོལ་བར་མེ་མདའ་བརྒྱབ་པའི་གནད་དོན་དང་། ཨེ་སི་རལ་དང་པ་ལི་སི་ཐན་གྱི་དམག་འཁྲུག རྡུལ་ཕྲན་མཚོན་ཆའི་དཀའ་རྙོག་དང་ཡོས་ཁི་རན་གྱི་དམག་འཁྲུག་འདི་དག་གིས་འཇིག་རྟེན་འདིར་དམག་འཁྲུག་མེད་པ། ཁྱོད་བདེ་ང་བདེ་ཡིས་རང་གི་ཁེ་ཕན་གཞན་ལ་མི་སྤྲད་པ་གསལ་བོ་རེད།

  དེ་ལྟར་ཡོང་དགོས་ན། འཇིག་རྟེན་འདིར་མི་དང་རྒྱལ་ཁབ་ཀུན་གྱི་ཤེས་ཡོན་དང་དཔལ་འབྱོར། དྲག་ཤུགས་ཀྱི་གནས་ཚད་གསུམ་མཐོ་དམན་དེ་ཙམ་མེད་མཁན་ཞིག་ཡོང་དགོས་ཤིང་། དེ་ལྟར་ཡོང་ན་གཅིག་གིས་གཅིག་ལ་སེམས་གཏིང་གི་གུས་བཀུར་དང་རིན་ཐང་སྤྲད་པས། ཕན་ཚུན་གྱི་ཁེ་ཕན་ཆེད་དུ་གྲོས་མོལ་དང་བསམ་ཤེས་གཏོང་ངེས་རེད། དེ་ལྟར་མིན་པ་མཐོ་དམན་ཡོད་ཚད་མཐོ་པོ་ཚོས་དམའ་མོ་ཚོ་ལ་གཅིག་མཚུངས་ཀྱི་རིན་ཐང་སྤྲོད་མི་སྲིད་ཅིང་། དངོས་ཤུགས་བརྒྱུད་གསུམ་ནས་གནས་ཚད་དམའ་མོ་དེ་བེད་སྤྱོད་བཏང་བ་མ་ཟད། ཁོང་ཚོར་ཡོད་པའི་ཁེ་ཕན་དེ་དག་ལ་དམའ་མོ་ཚོར་བགོ་འགྲེམ་བྱེད་དཀའ་ཞིང་། ཁག་ཅིག་གིས་གོ་སྐབས་བྱུང་ན་དབང་ཡོད་དང་བཙན་འཛུལ་བྱེད་ངེས་རེད། ཡིན་ཏེ། དབང་ཡོད་དང་བཙན་འཛུལ་མ་བྱས་པ་ཡིན་ན་ཁོང་ཚོ་སྔར་བཞིན་སྟོབས་ཆེན་བྱས་ནས་འདུག་སྡོད་དཀའ་བ་མ་ཟད། ཁོང་ཚོས་དཀའ་ལས་ཀྱིས་བསྐྲུན་པའི་བདག་དབང་དང་མངའ་ཐང་། སྟོབས་འབྱོར་དང་ནུས་ཤུགས་དེ་དག་གང་བྱུང་གིས་སྦྱིན་པ་གཏོང་མི་སྲིད། མ་བཏང་བ་ཡིན་ན་སྐྱོ་བོ་ཚོས་ཕྲག་དོག་ཟ་ཁར། བརྙས་བཅོས་མྱོང་བས་འགྲན་སེམས་ཀྱིས་ངོ་རྒོལ་དང་འགོག་རྐྱེན་བཟོ་བས། འཇིག་རྟེན་འདིར་མི་མ་ཚར་བར་དུ་མང་ཉུང་ལ་མ་ལྟོས་པར་དམག་འཁྲུག་རྫོགས་ཡ་མེད་པ་གསལ་བོ་རེད།

  ཨོ་བྷ་མ་ཐེངས་གཉིས་པ་སྲིད་འཛིན་ལ་ལངས་སྐབས་སུ་ཨ་རིའི་སྒེར་སེམས་ཅན་དང་། རང་ཉིད་ཁོ་ནའི་དཔལ་འབྱོར་དོན་གཉེར་མཁན་གྱི་འབྱོར་མེད་མང་ཚོགས་ཀྱིས་གཙོ་བོར་རྒྱབ་སྐྱོར་བྱས་ཏེ། ཁོང་སྲིད་འཛིན་ཆགས་ཡོད། ཁོས་འབྱོར་ལྡན་གྲལ་རིམ་གྱི་དཔྱ་ཁྲལ་སྤར་ནས་མི་མང་དཀྱུས་མ་དང་འབྱོར་མེད་མང་ཚོགས་ཀྱི་འཕྲོད་བསྟེན་ལྟ་སྐྱོང་། འཚོ་བ་ཡར་རྒྱས་བྱེད་རྒྱུ་ཁས་ལེན་བྱས་ཡོད་ཀྱང་། དམག་གྲོན་གཅོད་རྒྱུ་དེ་ནོར་འཁྲུལ་ཅན་གྱི་བསམ་བློ་ཞིག་ཡིན་པ་སེ་རི་ཡའི་གནད་དོན་དང་། ལྷག་པར་དུ་ར་ཤི་ཡའི་བྱ་སྤྱོད་ཀྱིས་ནོར་འཁྲུལ་ཡིན་པ་ངོས་འཛིན་ཐོབ་སྟེ། ད་ལྟ་དེ་ལྟར་གནང་རྒྱུ་ཁག་པོ་ཆགས་བཞིན་ཡོད། འབྱོར་ལྡན་གྲལ་རིམ་གྱི་དཔྱ་ཁྲལ་སྤར་རྒྱུ་ཁོས་འཐབ་རྩོད་བྱེད་མུས་ཡིན་ཡང་རྒྱལ་ཁ་ཐོབ་མིན་དེ་ཙམ་མ་ངེས་ཤིང་། ཐོབ་པ་ཡིན་ན་དེས་མཇུག་འབྲས་ཅི་ཞིག་འདྲེན་རྒྱུ་ཡིན་པ་སྒུག་སྡོད་ཀྱི་གནས་སུ་གྱུར་ཡོད།

ཨོ་བྷ་མས་ཨུ་རྒྱ་གཉིས་ལ་བཟུང་བའི་ཕྱི་འབྲེལ་གྱི་སྲིད་བྱུས།

  ཨོ་བྷ་མས་རྒྱ་ནག་དང་ར་ཤི་ཡ་གཉིས་ལ་ཁ་གཏད་བཅག་པ་ལས་ཁེ་ཕན་མཉམ་སྤྱོད་དང་མཛའ་མཐུན་མཉམ་གནས་བྱས་ན། ཕྱོགས་གཉིས་ཀའི་བདེ་འཇགས་དང་དཔལ་འབྱོར་ལ་ཕན་པ་ངོས་འཛིན་བྱེད་ཀྱིན་ཡོད་ཀྱང་། ཨུ་རྒྱ་གཉིས་ཀྱིས་དེ་ནི་ཞི་བའི་ཐོག་ནས་ཁོང་ཚོ་འདུལ་བྱེད་ཀྱི་ཐབས་བྱུས་ཤིག་ཡིན་པ་ངོས་འཛིན་གྱིས་ཡིད་ཆེས་བྱེད་ཀྱིན་མེད་ཁར། རང་ཉིད་ཨ་རི་ལྟར་དཔལ་འབྱོར་དང་དམག་དོན་གཉིས་ཀྱི་ཐོག་ནས་སྟོབས་ཆེན་དུ་ཆགས་རྒྱུ་རྩོད་ལེན་བྱེད་ཀྱིན་ཡོད་པས། ཨོ་བྷ་མའི་སྲིད་བྱུས་དེ་ལམ་ལྷོང་ཡག་པོ་ཡོང་གི་མེད་ཅིང་། ར་ཤི་ཡའི་སྲིད་བྱུས་འཛིན་ཕྱོགས་ནས་མིག་མཐོང་ལག་ཟིན་གྱིས་ཕམ་ཁ་མྱོང་བཞིན་ཡོད།
  དེར་བརྟེན། ཨ་རི་བ་མང་པོས་ཨོ་བྷ་མ་ནི་ཀེ་རིམ་རྩེད་མཁན་དང་། པོ་དྲིན་ནི་ཆེ་སི་རྩེད་མཁན་ཡིན་པས་ཐབས་བྱུས་ཀྱི་ཐོག་ནས་ཨོ་བྷ་མས་པོ་དྲིན་ལ་གླགས་མི་ཁེལ་བར་འདོད་པ་མ་ཟད། ཨོ་བྷ་མ་ནི་དབུ་ཁྲིད་ཉམ་ཆུང་ཞིག་དང་། པོ་དྲིན་ནི་དབུ་ཁྲིད་རྒོད་པོ་ཞིག་ལ་ངོས་འཛིན་བྱེད་ཀྱིན་ཡོད། ཨོ་བྷ་མ་སྲིད་འཛིན་ལ་བསྡད་སྐབས་ཤེས་རབ་ཀྱི་དོ་བདག་ཡིན་ཞིང་ཨ་རི་པ་སྐྱོབ་པའི་ནུས་པ་ཡོད་པར་རློམས་ཤིང་། དཀོན་མཆོག་ལྟར་བཀུར་ཡང་ད་ལྟ་ཀེ་རིམ་རྩེད་མཁན་ཞིག་ཏུ་ཆགས་དོན་ནི་ཁོང་ཐེངས་མང་པོར་སྲིད་འཛིན་པོ་དྲིན་གྱི་ཐབས་བྱུས་འོག་ཏུ་ཚུད་ཅིང་། གཡོ་འོག་ནས་གཅིག་རྗེས་གཉིས་མཐུད་ཀྱིས་ཕམ་ཁ་མྱངས་པ་མ་ཟད། ཁོང་གི་ཕྱི་འབྲེལ་གྱི་སྲིད་བྱུས་ལ་དེ་ཙམ་ལམ་ལྷོངས་མ་བྱུང་བས་རེད།

ཨོ་བྷ་མ་པོ་དྲིན་གྱི་ཐབས་ཇུས་འོག་ནས་ཕམ་ཚུལ།

༡༽ དུག་རླངས་འཕུར་མདའ་ཉུང་འཕྲི་བྱེད་རྒྱུའི་གན་རྒྱ་བཞག་ཀྱང་དེ་དོན་ལ་མ་གནས་པར་ར་ཤི་ཡིས་བཟོ་སྐྲུན་བྱས་པར། ཨོ་བྷ་མས་སྐྱོན་བརྗོད་བྱེད་སྐབས། པོ་དྲིན་གྱིས་ཨ་རིས་དུག་རླངས་འགོག་སྲུང་གི་མཚོན་ཆ་བཟོ་སྐྲུན་བྱེད་ཀྱིན་ཡོད་པས། དེ་ལྟར་མི་བཟོ་ཐབས་མེད་ཡིན་ཚུལ་བརྗོད་ཡོད།

༢༽ ཨོ་བྷ་མས་དམག་འཁྲུག་གི་ཉེན་བརྡ་བཏང་མིན་ལ་མ་ལྟོས་པར་སེ་རི་ཡས་དུག་རླངས་འབར་རྫས་གཏོར་ཏེ་རང་གི་མི་སེར་མང་པོ་དམར་བསད་བཏང་སྐབས། ཨོ་བྷ་མ་ལ་དམག་མི་ཡིས་ཐེ་གཏོགས་བྱེད་རྒྱུའི་གོ་སྐབས་ཡག་པོ་རེག་ཀྱང་། ཐག་གཅོད་བྱེད་མ་ནུས་པར་ལྷག་སྐབས། པོ་དྲིན་གྱིས་ནོར་ཝེ་ཞི་བདེའི་བྱ་དགའ་ཐོབ་མཁན་གྱི་ཨོ་བྷ་མས་དམག་འཁྲུག་བྱེད་མི་འོས་ཚུལ་དང་། རྗོན་ཁཱ་རེས་ཀྱིས་གསར་གཏོད་པའི་སར་ཁ་ནོར་ཐེབས་པའི་གོ་སྐབས་བཟུང་ཏེ། དུག་རླངས་འབར་རྫས་རྩ་མེད་བཟོ་རྒྱུར་ལམ་སང་རྒྱབ་སྐྱོར་བྱས་ཏེ་ནུབ་དམག་སེ་རི་ཡར་གཏོང་རྒྱུ་བཀག་འགོག་བྱེད་ཐུབ་ཡོད།

༣༽ ཨུ་རི་སུའི་དམག་དཔུང་ཡོས་ཁི་རན་གྱི་ས་མཚམས་ནས་ཕྱིར་འཐེན་བྱེད་རྒྱུ་ཁས་ལེན་བྱས་ཡོད་ཀྱང་། གཅིག་ཀྱང་མ་འཐེན་པས་ནུབ་ཕྱོགས་པས་སྐྱོན་བརྗོད་བྱས་ཀྱང་། ཨུ་ཚུགས་མཐའ་སྐྱེལ་གྱིས་གནས་དེར་དམག་སྦྱོང་བྱེད་མཁན་ལས་ཕྱིར་འཐེན་བྱས་ཡོད་ཚུལ་བརྗོད་བཞིན་ཡོད།

༤༽ རྗེ་ནིས་ཝ་ཡི་གྲོས་ཆོད་སྟེང་ར་ཤི་ཡའི་རྒྱབ་སྐྱོར་བ་ཤར་ཡོས་ཁི་རན་གྱི་རང་དབང་འཐབ་རྩོད་པའི་གོ་ལག་ཀུན་དང་། ཁོང་ཚོས་བཙན་བཟུང་བྱས་པའི་གཞུང་གི་ལས་ཁུངས་ཡོད་ཚད་ཕྱིར་ཡོས་ཁི་རན་ལ་སྤྲད་རྒྱུ་ཁས་ལེན་བྱས་པ་མ་ཟད། ཕྱོགས་ཚང་མས་གནད་དོན་དེ་ཞི་བར་གནས་རྒྱུར་འབད་བརྩོན་བྱེད་རྒྱུ་གན་རྒྱ་བཞག་ཡོད་ཀྱང་། དེ་དོན་ལ་གཏན་ནས་གནས་མེད། འོན་ཀྱང་། ཨུ་རི་སུས་ཡོས་ཁི་རན་གྱི་ཤར་ཕྱོགས་པའི་རང་དབང་འཐབ་རྩོད་པས་ཁོང་ཚོའི་དགོས་འདུན་ལ་ཉན་གྱི་མི་འདུག་པས། བྱ་ཐབས་མེད་ཅིང་། ཡུལ་དེའི་མི་མང་གི་འདོད་འདུན་རང་དབང་དང་བདེན་པ་ཡིན་པས་པོ་དྲིན་གྱིས་བསམ་ཤེས་མི་གཏོང་ཐབས་མེད་ཡིན་ཚུལ་བརྗོད་བཞིན་ཡོད།

༥༽ ཟླ་ལྔ་བའི་ཚེས་༡༡ ཉིན་ར་ཤི་ཡའི་རང་གི་མཐུན་ཕྱོགས་ཤར་ཡོས་ཁི་རན་གྱི་རྡོ་ནིས་ཤིས་ཡ་ཡོས་ཁི་རན་ལོགས་སུ་ཐོན་ཏེ་རང་བཙན་ནམ་རང་སྐྱོང་བྱེད་རྒྱུའི་འོས་ཤོག་འཕེན་རྒྱུ། ཕྱིར་འགྱངས་བྱེད་རྒྱུར་སྐུལ་འདེད་བྱེད་ཀྱིན་ཡོད་ཅེས་སྨྲས་ཀྱང་། ཁ་ཙམ་ལས་དོན་དངོས་སུ་མཐུན་འགྱུར་མ་གནང་བ་མ་ཟད། དེ་ལས་ལྡོག་སྟེ་འོས་ཤོག་འཕངས་སྟངས་དང་། དམག་འཁྲུག་བྱེད་སྟངས། གོ་ལག་དང་བཟའ་བཏུང་གི་རོགས་སྐྱོར་བྱེད་ཀྱིན་ཡོད།

  མི་མང་པོ་ཞིག་གིས་ཨོ་བྷ་མ་ནི་སྤྱིའི་ཆ་ནས་བཤད་ན་མི་དྲང་མོ་དང་སྨྲ་ལྕེ་བདེ་བ། ཚད་ལྡན་གྱི་ཤེས་ཡོན་ཅན་ཞིག་ཏུ་འདོད་ཀྱང་། དྲང་མོ་ཡིན་པ་ཙམ་དང་ཤེས་ཡོན་ཡོད་པ་ཙམ་གྱིས་རྒྱལ་ཁབ་སྐྱོང་བའི་ནུས་པས་མི་འདང་ཞིང་། གཡོ་བྱུས་དང་ཐབས་ཇུས་ལ་བྱང་བའི་རྒྱལ་ཁབ་གཞན་གྱི་ཆབ་སྲིད་པའི་ལག་འོག་ནས་ཕམ་ཁ་མྱོང་བས། ཆབ་སྲིད་ཀྱི་སྣེ་ཁྲིད་པ་ཞིག་ཡིན་ན། ཐབས་ཇུས་དང་དཔའ་མཛངས་ལྡན་ཞིང་། མི་རིགས་དང་རྒྱལ་ཁབ་ཀྱི་ཁེ་ཕན་ཆེད་དུ་མི་ཁ་དང་རང་གི་མཚན་སྙན་ལ་མགོ་བོ་མི་སྒུར་བའི་ཤེས་རྒྱ་ཅན་ཞིག་ཡིན་དགོས་པ་སྟོན་གྱི་ཡོད།།
·གསར་འགྱུར་གོང་མ:བོད་ཡིག་དུས་དེབ་དཀར་ཆག་རྒྱས་པ།
·གསར་འགྱུར་འོག་མ:གླུ་པ་ཚེ་རིང་ཟླ་བ་དང་བཀྲ་ཤིས་དཔལ་མོའི་གླུ་གཞས་ཆེད་སྒྲིག་
འདྲ་ཕབ། 】 【 པར་འདེབས།
  འབྲེལ་ཡོད་གསར་འགྱུར།
·དགུ་པའི་བཅུ་གཅིག་གི་དོན་རྐྱེན། 2011/9/11 12:16:01
ཆེད་ཞུ།:དྲ་ཚིགས་འདིའི་ནང་གི་རྒྱུ་ཆ་ཚང་མ་ནི་ངེད་ཀུང་ཟིས་འཚོལ་བསྡུ་དང་ལེགས་བསྒྲིགས་བྱས་པ་ཡིན་པས། ངེད་ཀུང་ཟིས་དགོངས་འཁྲོལ་མེད་ཚེ་གང་དུ་པར་བཤུས་བརྒྱབ་མི་ཆོག གལ་སྲིད་སྐུ་ཉིད་ཀྱི་ཁེ་ཕན་ལ་གནག་པའི་ཆ་ཡོད་ཚེ། ཁྱེད་ཀྱིསའབྲེལ་གཏུགས་གནང་རོགས།
  འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 8:18:56 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 11:15:07 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 16:41:58 [来自: 112.5.248.229]

འབྲེལ་ཡོད་དཔྱད་བརྗོད 52 ཡོད། མིག་སྔར་གསར་འགྱུར当前显示最新的 3 འདུག   [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།23.44MS