ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> གླིང་སྒྲུང་།
 རྩོམ་ཡིག་ཀློག་པ།

གེ་སར་སྒྲུང་ལས༼བླ༽དང་བླ་འཛིན་གྱི་འདུ་ཤེས་ལ་རཊ་ཙམ་དཔྱད་པ།

  རྩོམ་པ་པོ:ཚེ་རིང་དཔལ་བཟང་།ཡོང་ཁུངས:ཀྲུང་གོའི་གླིང་སྒྲུང་ཞིབ་འཇུག་དྲ་བ།གཟིགས་གྲངས:8333ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2011/7/8 11:54:44ཚོགས་ཡར་སྤྲོད:admin

                 གེ་སར་སྒྲུང་ལསབླདང་བླ་འཛིན་གྱི་འདུ་ཤེས་ལ་རགས་ཙམ་དཔྱད་པ།

                                                                 རྩོམ་པ་པོ།  ཚེ་རིང་དཔལ་བཟང་།

           སྔོན་མདོ་ཁམས་ཕྱོགས་ལ་དར་ཆེ་བའི་འཛམ་གླིང་གེ་སར་རྒྱལ་པོའི་སྒྲུང་འདི་ཉིད་རིམ་བཞིན་སྔོན་བྱོན་མཁས་དབང་དག་གིས་འཚོལ་སྡུད་དང་བརྒྱུད་སྒྲོག    དཔྱད་གཏམ་གཞལ་མེད་སྤེལ་བའམ་མ་གཞི་སྒྲུང་རང་ཉིད་ལ་སྐྱེས་སྟོབས་ཀྱི་དཔའ་ཕྱུག་པོ་མངའ་བའི་རྐྱེན་གྱིས་རྒྱལ་ཁབ་ཕྱི་ནང་ཀུན་དུ་ས་ཁྱབ་རྡོ་ཁྱབ་ཏུ་གྱུར་བ་དང་བསྟུན།  སྙན་པའི་བ་དན་སྲིད་གསུམ་རྩེ་མོར་གཡོ་ཞིང་འཛམ་གླིང་རྩོམ་རིག་གི་བང་མཛོད་ནང་དུའང་བཀྲག་མདངས་རབ་ཏུ་འཚེར་བའི་མུ་ཏིག་ཆུན་གཅིག་སྟེ་གོ་གནས་ངེས་ཅན་ཞིག་བཟུང་ཡོད་པ་གཟུར་གནས་ཀུན་གྱིས་མཁྱེན་གསལ་ལྟར།  སྤྱིར་རྩོམ་རིག་གང་དང་གང་ཡིན་རུང་དངོས་ཡོད་འཚོ་བའི་རྨང་གཞིའི་སྟེང་གྲུབ་པ་ཞིག་ཡིན་ཏེ།  སྤྱི་ཚོགས་ཀྱི་འདུ་ཤེས་འཛིན་སྟངས་རིགས་ཤིག་གམ་སྤྱི་ཚོགས་ཀྱི་འཚོ་བ་ངེས་ཅན་ཞིག་མིའི་རིགས་ཀྱི་ཀླད་པའི་ནང་ཚུར་སྣང་བའི་ཐོན་དངོས་ཤིག་ཏུ་འདོད་པ་ལྟར།གེ་སར་རྒྱལ་པོའི་སྒྲུང་འདི་ཉིད་ཀྱང་དེ་ལས་མ་འདས་ཤིང་དུས་རབས་ངེས་ཅན་ཞིག་གི་བོད་མིའི་འདུ་ཤེས་འཛིན་སྟངས་དང་།  ཡུལ་སྲོལ་གོམས་འདྲིས།   མཛེས་སྤྱོད་ཀྱི་རིན་ཐང་།  ལོ་རྒྱུས་དོན་རྐྱེན་བཅས་ཚུར་སྣང་བྱས་ཡོད་པ་བཞིན།  གེ་སར་སྒྲུང་དུ་སྟོན་པའི་བླ་གནས་ཀྱི་ཞིབ་འབྲི་ཕུན་སུམ་ཚོགས་པ་དེས་བོད་མིའི་བླ་འཛིན་གྱི་འདུ་ཤེས་མེ་ལོང་ལྟར་མཚོན་ཡོད་པས་གཞུང་ངོས་སམ་འཕྲེད་ངོས་གང་རུང་ནས་ཞིབ་འཇུག་བྱས་ཀྱང་དཔྱད་གཞི་རིན་ཐང་བྲལ་བ་ཞིག་ཡིན་པར་སེམས།

 གཅིག   བླ་ཞེས་པ་གང་ལ་ངོས་འཛིན་དགོས།

        སློབ་དཔོན་གླུ་སྒྲུབ་ཀྱིས།ཐ་སྙད་ལ་ནི་མ་བརྟེན་པར།  །དམ་པའི་དོན་ནི་རྟོགས་ནུས།  །ཞེས་གསུངས་ཡོད་པ་ལྟར།  འདིར་བརྗོད་པར་བྱ་བའི་བོད་མིའི་བླ་འཛིན་གྱི་འདུ་ཤེས་དེ་མཐའ་དཔྱད་ལེགས་པོ་ཞིག་ཡོང་དགོས་ན་ཐོག་མར་བླ་ཞེས་པའི་ཐ་སྙད་འདིའི་གོ་དོན་དང་བྱུང་ཚུལ།དེ་དང་འབྲེལ་བའི་རིག་གནས་ཀྱི་རྒྱབ་ལྗོངས་ངེས་ཅན་ཞིག་རྟོགས་དགོས་ཤིང་དེ་ལྟར་མིན་ཚེ་རྩེ་མོ་བཟུང་ནས་རྩ་བ་དོར་བའི་དཔེ་རུ་འགྱུར་སྲིད།   དེ་ཡང་བོད་ཀྱི་མཁས་དབང་གྲགས་ཆེན་མཁར་རྨེའུ་བསམ་གཏན་གྱིས་བླ་བསླུ་སོགས་ཀྱི་ཆོ་ག་དེ་ནི་བོད་རང་གི་གདོད་མའི་དད་པ་ལས་བྱུང་བ་ཡིན་པ་དང་བླ་ཞེས་པའི་ཐ་སྙད་དེ་ནི་གནའ་སྔ་མོའི་དུས་ནས་བྱུང་བའི་བོད་རང་གི་ཐ་སྙད་ཅིག་ཡིན་པར་འདོད།  ཁོ་བོས་བོན་གྱི་ཡིག་རྙིང་རྩ་ཆེན་མང་པོ་ཞིག་དཔྱད་གཞི་རུ་བཟུང་ནས་བླ་དང་བླ་བསླུའི་ཆོ་ག་ལ་ཞིབ་མོའི་སྒོས་དཔྱད་པ་བཏང་ཡོད།  <<གཟི་བརྗིད>>ཞེས་པའི་བོན་གྱི་ཡིག་རྙིང་པོད་ག་བ།   ལེའུ༡༠<<སྲིད་ཤིང་ཐེག་པ>>ལས།བླ་ཞེས་པ་ནི་འགྲོ་བ་མིའི་ནང་སེམས་དང་ཤེས་པ་གནས་ས་ཞིག་ཏུ་ངོས་འཛིན་བྱེད་པ་ཡིན། བླ་ཉིད་མིའི་གཟུགས་ནས་བྲལ་རྗེས་གནས་ག་གེ་མོ་ཞིག་ཏུ་ཉེན་ཁ་དང་བྲལ་ནས་གནས་སྐབས་སུ་གནས་ཤིག་ཏུ་སྡོད་དོ་ཞེས་བརྗོད་ཚུལ་ཡོད་པས་དེ་དང་འབྲེལ་བའི་ཐ་སྙདབླ་གནསཞེས་པ་ཐོན།  ད་དུང་སྲོག་ཆགས་ཀྱིས་མཚོན་པར་བྱེད་པའིབླ་རྟགསཞེས་པའི་ཐ་སྙད་ཀྱང་ཡོད་པ་དང་།བླ་དང་ཕྱ་གཉིས་དོན་གཅིག་ཡིན་ཚུལ་སོགས་ང་ཚོས་གཙིགས་སུ་འཛིན་རུང་བའི་དཔྱད་གཏམ་རིན་ཐང་བྲལ་བ་སྤེལ་ཡོད།

   གསོ་བ་རིག་པའི་དགོངས་པ་ལྟར་ན།  སྲོག་བཅས་པ་ནི་མདངས་དང་བླ།  ཁྲག་དང་དྲོད་སོགས་སུ་བཤད་དེ།  བླ་ནི་སྲོག་གམ་ཚེ་གནས་པའི་རྟེན་ངོ་བོ་ཚེ་སྲོག་གི་དྲིས་བསྒོས་ཤིང་རྩའི་ནང་ནས་སྲིན་ལག་བརྒྱུད་དེ་ཕྱི་རོལ་དུ་འཁྱམས་པ་ལས་མི་དེའི་དབང་ཐང་ཞན་ན་བླ་འཁྱམས་པ་དང་།འཕྲོག་པ་དང་རྐུས་པ་སོགས་ཟེར་ཞིང་།རྟེན་བླ་ལ་གནོད་པ་བྱས་པས་བརྟེན་པ་ཚེ་སྲོག་ལའང་གནོད་པར་འགྱུར་བ་ལ།དེ་ཉིད་རྟེན་པའི་རྩ་ལ་བླ་རྩ་ཞེས་སོགས་བཤད་པ་མ་ཟད།དེ་སྔོན་རྒན་བཀྲ་བྷོ་ལགས་ཀྱི་ཆེད་རྩོམ་ཞིག་གི་ནང་བླ་ཞེས་པར་འགྲེལ་རྒྱག་སྐབས་ལུང་ཞིག་དྲངས་ཡོད་དེ།འཇུ་མི་ཕམ་གྱི<<གཙུག་ལག་རྩིས་ཀྱི་སྔོན་འགྲོ་རབ་གསལ་མེ་ལོང>>ལས།   བླ་ནི་སྲོག་གི་མ་རུ་བཞེད།  ཅེས་དང་།  སྡེ་སྲིད་སངས་རྒྱས་རྒྱ་མཚོའི<<བཻ་སྔོན>>ལས།  སྲོག་དང་ཚེ་དེ་གནས་པའི་རྟེན་ངོ་བོ་དེ་ལ་བླ་ཞེས་གྲགས།  ཞེས་སོགས་གསུངས་ཡོད་པ་ལས་བླ་དང་སྲོག་གཉིས་ཁ་ཁ་ཡིན་པ་མ་ཟད་རྟེན་དང་བརྟེན་པའི་འབྲེལ་བ་ཡིན་པ་ངང་ངམ་ཤུགས་ཀྱིས་རྟོགས་ཐུབ།

 གཉིས།  གེ་སར་སྒྲུང་ལས་སྟོན་པའི་བླ།

      གེ་སར་སྒྲུང་ལས་སྟོན་པའི་བླ་ནི་གོང་གི་བཞེད་པ་དང་མཐུན་པར་བླ་དེ་ཉིད་མིའི་གཟུགས་ལས་བྲལ་རྗེས་ཉེན་ཁ་དང་བྲལ་བའི་ངང་གནས་གཞན་ཞིག་ཏུ་སྡོད་པས་བླ་གནས་གྱི་ཚུལ་དུ་སྣང་བ་ཞིག་ཡིན་ཞིང་བླ་གནས་ཀྱི་དབྱེ་རིགས་སྣ་མང་ཞིང་ཕུན་སུམ་ཚོགས་པ་ཞིག་ཡིན་པ་སྔོན་བྱོན་ཆེད་ལས་མི་སྣ་དག་གིས་འཚོལ་སྡུད་བྱས་ཡོད་པ་ལས་མཐོང་ཐུབ།  དེ་ཡང་སྒྲུང་ལས་སྟོན་པའི་བླ་ལ་རང་བྱུང་བཀོད་པའི་རིགས་ཏེ།བླ་རི།བླ་མཚོ།བླ་རྡོ།སྲོག་ཆགས་སྣ་ཚོགས་ཀྱི་རིགས་ཏེ།  བླ་འབྲོང་།  བླ་སྟག   བླ་དྲེད།  འཕར་བ།  ཁྲུང་ཁྲུང་།  བྱིའི་ཆུང་།  གོ་རྒན།  བྱ་ཤང་ཤང་།ཕོ་རོག  ལྕུང་ཀ   རྒྱ་བྱ།  རྨ་བྱ།  ནེ་ཙོ།  ཁ་ཏ།  བླ་གཡག  བླ་ལུག   བླ་ཉ། བླ་སྦྲུལ།  སྲིན་འབུའི་རིགས།  རྩི་ཤིང་སྐྱེ་དངོས་ཀྱི་རིགས་ཏེ། བླ་ཤིང་སོགས།  གཞན་མི་དང་ཅ་ལགམཚོན་ཆ། བླ་གཡུ།  བླ་མཁར།  བླ་ལྕགས།   བླ་མདུད་བཅས་ཡོད་པ་དེའི་མཚན་མཚོན་འགའ་བཀོད་ན།<<མོན་གླིང་གཡུལ་འགྱེད>>ལས།  བླ་རི་སྟ་སྣ་ཁྲ་བོ་མཁྱེན། །དེ་རིང་ཨ་ཕོའི་སྡོངས་གྲོགས་མཛོད། །ཅེས་དང་།<<ཧོར་གླིང་གཡུལ་འགྱེད>> སྨད་ཆ་ལས།  གེ་སར་གཡག་ལ་སེར་པོའི་ཕར་རྒྱབ་ཀྱི་བྲག་དམར་དཀྱིལ་ན་ཧོར་གྱི་བླ་འབྲོང་ར་རིང་ཡོད་པ་དེས་ལྕེ་ཞགས་དམར་པོ་གློག་འོད་འཁྱུག་འཁྱུགརྔ་མ་ནག་པོ་ལྷོ་སྤྲིན་འཐིབ་འཐིབ།  རྐན་སྒྲ་དགྲ་བོ་ཆ་ལོང་རྡེབ་རྡེབ་ལྟར་བྱེད་པ།  ཞེས་དང་།  ཡང<<ཧོར་གླིང་གཡུལ་འགྱེད>>སྟོད་ཆ་ལས།  རྒྱ་བ་རྨ་བྱ་ནེ་ཙོ་གསུམ།  ཁ་ཏ་ང་དང་བཞི་བོ་འདི།  །ཁྱེད་ཀྱིས་གསོས་པའི་བླ་བྱ་ཡིན།  །མི་སྐད་གོ་བའི་བྱ་བཞི་ཡིན།  །ཞེས་དང་།<<བྷེ་གླིང་གཡུལ་འགྱེད་ལས>>ལས།  བླ་དྲེད་མི་གཟན་ནག་པོ་དེ་ཉི་ཟླའི་གོ་བར་ན་ཡོད་པ་གེ་སར་གྱི་མཐོང་སྟེ།ཆོས་སྐྱོང་སྲུང་མ་དང་རང་གི་ཏིང་ངེ་འཛིན་གྱི་མཐུ་སྟོབས་ཀྱིས་མདུན་དུ་དུ་བཀུགས་ཤིག   སྡུག་སྤངས་དགེ་སྒྲུབ་ཀྱི་ཁ་ཏ་བྱས་པ་དང་སྡིག་སྤྱོང་ཆོ་གའི་མན་ངག་གིས་བླ་དྲེད་ཀྱི་རྣམ་ཤེས་དག་པའི་ཞིང་ཁམས་སུ་དྲངས་པ་ཞེས་བཀོད་ཡོད་པ་དང་།  <<བདུད་ལེའུ>>ལས།  གེ་སར་གྱིས་བྱང་བདུད་ཀླུ་བཙན་རྒྱལ་པོའི་བླ་ལུག་ནག་པོ་ཐབས་ཀྱིས་བཏུལ་རྗེས།ཕོ་འདྲེ་ཀླུ་བཙན་རྒྱལ་པོ་དེ།  བདུད་རྟ་ནག་པོ་ཧོབ་ཆེན་དེ་ཞབས་ལ་བཅུགས།མི་ཆད་རྒྱུ་མའི་ཞགས་པ་དེ་ལག་ལ་བཟུང་།   བདུད་ཀྱི་རེ་གོས་ནག་པོ་དེ་རྒྱབ་ལ་གྱོན།  རྫ་རོང་ནག་ལ་ཆར་སྤྲིན་འཁྲིགས་འདྲ་ཞིག་བྱས་ནས་ལུག་རྫིའི་འགྲམ་དུ་སླེབས་བྱུང་ནས་ན་རེ།  ཡ་ཨ་རོག་ལུག་རྫི།   འདི་ནས་མེ་མི་ཆོ་དགུ་ཆོ་བྱེད་མཁན།   རྟ་རྐྱང་ཇོ་ཇོ་དེ་ཁྲིད་མཁན།   མདའ་གཞུ་སྤུ་ར་ར་ཞིག་འདོགས་མཁན།  མི་རྗེས་ལ་པདྨ།   རྟ་རྗེས་ལ་དུང་དཀར་དོད་མཁན་སུ་ཨེ་བྱུང་།   ང་དེ་རིང་ཕྱི་ཡི་པགས་པ།བར་གྱི་རུས་མ་གཏོགས་མ་ལྷག་པར་དྲན་པ་དང་ཁོག་ཁྲག་རྣམས་ཤུལ་མེད་དུ་སོང་བའི་བླ་རྐུས་སྲོག་བཅད།   ཚེ་བསྟུངས་པ་སོགས་ཀྱི་སྣང་བ་སྡུག་པོ་ཞིག་བྱུང་།  བླ་ལུག་ནག་པོ་ལྕགས་རྨིག་ཅན་དེ་ཁམས་བཟང་ཨེ་ཡིན་ཞེས་དྲིས་པའི་རྗེས་ཅུང་ཅུང་མ་འགོར་བར་གེ་སར་གྱི་མདའ་མོའི་འོག་ཏུ་གྲོངས།  ཡང<<ཧོར་གླིང་གཡུལ་འགྱེད>>སྨད་ཆ་ལས།  ཧོར་གུར་དཀར་ལ་བླ་རྟགས་བཅོ་བརྒྱད་ཡོད་པ་དེ་ཉིད་བཏུལ་ཆེད།  གེ་སར་གྱིས་ཨ་སྟག་ལྷ་མོ་དང་མགར་བཟའ་ཆོས་སྒྲོན་སོགས་རང་གི་གྲོགས་སུ་བཀུགས་ནས་དེ་རེ་རེ་བཞིན་བཏུལ་བའི་རྗེས་ད་གཟོད་ཧོར་གུར་དཀར་དམ་ལ་བཏགས་པ་ཞེས་སོགས་བཀོད་ཡོད་པ་དེ་ལས་ང་ཚོས་ངེས་ཐུབ་པ་ཞིག་ནི།   བླ་དེ་ཉིད་མིའི་ལུས་དང་བྲལ་ནས་སྲོག་ཆགས་དང་གཞན་རང་བྱུང་གི་བཀོད་པ་ལ་སོགས་པའི་ཐོག་ཏུ་བླ་གནས་ཀྱི་ཚུལ་དུ་གནས་ཐུབ་པ་མ་ཟད།  དེ་ཉིད་གནོད་པ་མ་བྱུང་ཚེ་མིའི་སྲོག་ལ་ཉེན་ཁ་མེད་པ།  དེ་ལས་ལྡོག་སྟེ་བླ་གནས་ལ་གནོད་པ་བྱུང་ཚེ་མི་དེ་ཡང་ཡུན་དུ་མི་གནས་པར་སྲོག་ཆད་འགྲོ་བ་ཞིག་ཡིན་པ་མ་ཟད་བླ་ཡིས་སྲོག་སྲུང་བ་བྱེད་པའི་ནུས་པ་ཡང་ལྡན་པས་གོང་གིབླ་ནི་སྲོག་གི་མ་རུ་བཞེདཅེས་པ་ཡང་བདེན་དཔང་བྱས་ཡོད་པ་འདྲ།  འདི་ལྟ་བུའི་བླ་གནས་སྐོར་གྱི་ཞིབ་འབྲི་སྒྲུང་གི་ཐོག་མཐའ་བར་གསུམ་དུ་མཐོང་རྒྱུ་ཡོད་ཅིང་འདིར་ཚིག་ཚོགས་མང་བའམ་བསྐྱར་ཟློས་ཀྱི་སྐྱོན་དུ་འགྱུར་སྲིད་པས་གོང་གི་རིགས་དབྱེ་ལྟར་རེ་རེ་བཞིན་དཔེ་མཚོན་མ་བཀོད་དོ།
གསུམ།   བོད་མིའི་བླ་འཛིན་གྱི་འདུ་ཤེས།

         གོང་དུ་བཤད་ཟིན་པ་ལྟར་གེ་སར་སྒྲུང་འདི་ཉིད་ཀྱང་རྩོམ་རིག་བརྩམས་ཆོས་ཤིག་ཡིན་པའི་ཆ་ནས་ནམ་ཡང་སྤྱི་ཚོགས་ཀྱི་སྣང་ཚུལ་ངོས་གཅིག་སྟོན་པ་གོར་མ་ཆགདེ་བས་ཕུན་སུམ་ཚོགས་པའི་བླ་གནས་ཀྱི་ཞིབ་འབྲི་དེས་ང་ཚོ་ལ་རྒྱུད་སྒྲོག་བྱེད་བཞིན་པ་ནི་བོད་མིའི་བླ་འཛིན་གྱི་འདུ་ཤེས་དེ་རང་ཡིན་ལ།འོ་ན་དེ་འདྲའི་འདུ་ཤེས་དེ་དུས་ག་ཤེད་དུ་བྱུང་བ་ཡིན་ཞེ་ན།  དེ་ཡང་ཏུན་ཧུང་ཡིག་རྙིང་དུ།ཡུལ་སྐྱི་རོ་ལྗང་སྔོན་ན།  རྗེ་སྐྱི་རྗེ་རྨང་པོ་ཞིག   སྐྱི་གཤིན་རྒྱན་ངར་ཞིག་རྒྱ་རྙིར་ཏེ་སྲིན་འོག་ཏུ་ནི་གླུད་བོར།  ལྷ་ལ་ཉན་བཙུགས་ན།  སྐྱི་བླ་བྱ་མངས་ལ་ཉན་བཙུགས།  སྲིན་ལ་གླུད་བོར་ན།  སྐྱི་སྲིན་ཚ་ལུང་ཞ་ལ་གླུད་བོར།  ཞེས་བཀོད་ཡོད་པས་བླ་འཛིན་གྱི་འདུ་ཤེས་ནི་གདོད་མའི་དུས་ནས་བཟུང་བོད་མིའི་འདུ་ཤེས་སུ་ཆགས་ཡོད་དེ་རིམ་བཞིན་འཕེལ་རྒྱས་སོང་བའི་བོད་ཀྱི་གདོད་མའི་ཤེས་རིག་དང་འབྲེལ་བའི་རིག་གནས་ཀྱི་སྣང་ཚུལ་ཞིག་ཡིན་པ་ཁ་ཚོན་བཅད་ཆོགདུས་སྐབས་དེ་ལ་ཆགས་འཇོག་ན་རང་རེའི་མེས་པོ་རྣམས་ནི་རང་བྱུང་ཁམས་ཆེན་པོའི་ཐོན་སྐྱེད་ངལ་རྩོལ་བྱེད་སྐབས་གློག་འཁྱུག་པ་དང་འབྲུག་གྲགས་གྲགས་པ།   ཐོག་རྒྱག་པ་སོགས་རང་བྱུང་ཁམས་ཀྱི་འཇིགས་སྐུལ་དང་གནོད་འཚེ་རྒྱུན་ཆད་མེད་པར་མྱོང་བས།  ཐོན་སྐྱེད་ཀྱི་ཆུ་ཚད་དང་བསམ་བློའི་གོ་རྟོགས་ཧ་ཅང་དམའ་བའི་དུས་སྐབས་དེ་ལ་མཚོན་ན་གོང་སྨྲས་རང་བྱུང་ཁམས་ཀྱི་སྣང་ཚུལ་ལ་འགྲེལ་མི་ཐུབ་པའམ་རང་བྱུང་ཁམས་ཀྱི་གནོད་འཚེ་དེ་དག་གིས་བཅིངས་བས་རང་ཉིད་ཀྱི་འདོད་དོན་བདེ་བླག་ངང་འགྲུབ་མི་ཐུབ་པས་རི་ཆུ་སྐྱེ་དངོས་བཅས་ལ་སྲོག་དང་ལྡན་པའི་ངང་སྐྱབས་བཅོལ་ནས་རང་བྱུང་ཁམས་ལས་རྒལ་ནུས་པའི་སྟོབས་ཤུགས་ཤིག་སྦྱིན་པ་ཕུགས་འདུན་དུ་སྐྱོང་པས་རང་བྱུང་ཁམས་ཀྱི་སྐྱེ་དངོས་ཡོད་དོ་ཅོག་ལ་བླ་འཛིན་གྱི་འདུ་ཤེས་ཆགས་པ་མ་ཟད།  བླ་རི་བླ་མཚོ་བླ་བྱ་བཅས་འཕྲོ་རིམ་འཕྲོར་བསྐྲུན་པ་དང་རྗེས་སུ་བླ་འཛིན་གྱི་འདུ་ཤེས་དེ་འཕེལ་རྒྱས་སོང་བ་དང་བསྟུན་སྒྲུང་དུ་སྟོན་པའི་བླ་གནས་བཞིན་ཕུན་སུམ་ཇེ་ཚོགས་སུ་གྱུར་བ་ཡིན།

      མདོར་ན།བླ་ཞེས་པ་ནི་མིའི་ལུས་ཐོག་ཏུ་གནས་ཤིང་མི་ཉིད་གྲུབ་པའི་རྒྱུ་གཙོ་བོ་ཞིག་ཏུ་ངོས་འཛིན་ལ།མིའི་ལུས་དང་ཚེ།  སྲོག   བླ་རྣམ་ཤེས་བཅས་ནི་གཅིག་ལ་གཅིག་བརྟེན་གྱི་ཚུལ་དུ་གནས་པ་ཞིག་ཡིན་པ་མ་ཟད་ངེས་པར་དུ་དེ་དག་སོ་སོར་ངོས་འཛིན་དགོས།  དེ་མ་ཚད་བླ་ཞེས་པ་ནི་བོད་རང་གི་གདོད་མའི་ཆོས་ལུགས་སམ་རིག་གནས་ལ་འབྲེལ་བའི་ཐ་སྙད་ཅིག་ཡིན་པས་གདོད་མའི་སྤྱི་ཚོགས་དང་རིག་གནས་ལ་ཞིབ་འཇུག་བྱེད་པར་དཔྱད་གཞི་བཟང་ཤོས་ཡིན་པར་འདོད་ལ་གེ་སར་སྒྲུང་དུ་སྟོན་པའི་བླ་གནས་སྣ་ཚོགས་ཀྱི་ཞིབ་འབྲི་དེ་ལས་བརྒལ་ཏེ་བོད་མིའི་བླ་འཛིན་གྱི་འདུ་ཤེས་གསལ་འདེབས་བྱེད་པ་དགོས་པ་ཤིན་ཏུ་ཆེའོ། 

    ཟུར་ལྟའི་ཡིག་ཆ།
  <<གླིང་གེ་སར་རྒྱལ་པོའི་སྒྲུང་ལ་དཔྱད་པ་ཀུན་གསལ་འཕྲུལ་གྱི་མེ་ལོང>>མཚོ་སྔོན་མི་རིགས་དཔེ་སྐྲུན་ཁང་།གཅོད་པ་དོན་འགྲུབ་དང་ཆབ་འགག་རྟ་མགྲིན་གཉིས་ཀྱིས་བརྩམས།
<<མདའ་དང་འཕང>>ཀྲུང་གོའི་བོད་རིག་པ་དཔེ་སྐྲུན་ཁང་།
མཁར་རྨེའུ་བསམ་གཏན་གྱིས་བརྩམས།
<<སངས་རྒྱས་ཆོས་ལུགས་ཀྱི་སྤྱི་དོན་གསར་དཔྱད་ཅེས་བྱ་བ་བཞུགས་སོ>>མིའི་རིགས་དཔེ་སྐྲུན་ཁང་།
ཁུ་བྱུག་གིས་བརྩམས།
<<བོད་ཀྱི་ཡིག་རྙིང་ཞིབ་འཇུག>>མི་རིགས་དཔེ་སྐྲུན་ཁང་།
ཁ་སྒང་བཀྲ་ཤིས་ཚེ་རིང་སོགས་ཀྱིས་བསྒྲིགས།
<<གེ་སར་སྒྲུང་གི་དཔྱད་རྩོམ་ཀུན་བསྡུས>>པོད་དང་པོ།ཀན་སུའུ་མི་རིགས་དཔེ་སྐྲུན་ཁང་།
བྱ་གཞུང་རྡོ་ལྷ་སོགས་ཀྱིས་བསྒྲིགས།
<<ཧོར་གླིང་གཡུལ་འགྱེད>>
མི་རིགས་དཔེ་སྐྲུན་ཁང་།
<<མོན་གླིངགཡུལ་འགྱེད>>
མཚོ་སྔོན་མི་རིགས་དཔེ་སྐྲུན་ཁང་།
<<འཇང་གླིང་གཡུལ་འགྱེད>>
མཚོ་སྔོན་མི་རིགས་དཔེ་སྐྲུན་ཁང་།
<<བདུད་ལེའུ>>
མཚོ་སྔོན་མི་རིགས་དཔེ་སྐྲུན་ཁང་།
<<བྷེ་གླིང་གཡུལ་འགྱེད>>མཚོ་སྔོན་མི་རིགས་དཔེ་སྐྲུན་ཁང་།

·རྩོམ་ཡིག་གོང་མ:༅།། གཙང་ཁུལ་གྱི་གཏམ་དཔེ་འགའ་ཞིག་ལ་དཔྱད་པ།
·རྩོམ་ཡིག་འོག་མ:བོད་ཀྱི་རྩོམ་རིག་ལམ་བུའི་ཐོག་གི་གནད་དོན་འགར་་དཔྱད་པ།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·བོད་ཀྱི་རྩོམ་རིག་ལམ་བུའི་ཐོག་གི་གནད་དོན་འགར་་དཔྱད་པ། 2011/7/8 12:05:40
·༅།། གཙང་ཁུལ་གྱི་གཏམ་དཔེ་འགའ་ཞིག་ལ་དཔྱད་པ། 2011/7/8 11:49:15
·མི་ཆོས་ལ་དུང་བའི་ཚངས་དབྱངས་རྒྱ་མཚོ། 2011/1/27 20:03:46
·དགེ་འདུན་ཆོས་འཕེལ་གྱི་མི་ཇུས་བསམ་བློར་རཊ་ཙམ་དཔྱད་པ། 2010/2/17 12:24:35
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:pYKX5zid
�Ƹ�������http://www.355551311.com/yunfuyaoqingren/
�Ƹ��Ƽ���http://www.355551311.com/yunfutuijianren/
http://www.355551311.com/taoxianapp/
http://www.355551311.com/wukazhifu/
http://www.355551311.com/zhifupingtai/
http://www.355551311.com/yuanbaibai/
发表时间:2017/5/7 17:57:20 [来自: 112.5.236.197]

 评论者:wusprdrae
sw8F4x  <a href="http://aezoprhjvjdr.com/">aezoprhjvjdr</a>, [url=http://dpmbybeiakcy.com/]dpmbybeiakcy[/url], [link=http://mumlwixaxnfo.com/]mumlwixaxnfo[/link], http://lzgazdtungqf.com/
发表时间:2017/1/13 5:59:48 [来自: 46.161.9.8]

 评论者:7SijLE0v
http://www.3145.com/list/18youxiang.htm
http://www.3456.cc/Dianzi_Youxiang/index.html
http://www.3456.cm/mail.htm
http://www.6296.com.cn/s/res.html
http://www.3721.cc/youxiang/
发表时间:2015/12/2 20:19:48 [来自: 111.144.226.138]

འབྲེལ་ཡོད་དཔྱད་བརྗོད 33 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།115.23MS