ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> ལྗོངས་རྒྱུ།
 རྩོམ་ཡིག་ཀློག་པ།

བུམ་ཐང་ལྷའི་སྦས་ཡུལ་གྱི་བཀོད་པ་མེ་ཏོག་སྐྱེད་ཚལ།

  རྩོམ་པ་པོ:ཀུན་མཁྱེན་ཀློང་ཆེན་པ།ཡོང་ཁུངས:ངེད་དྲ་བགཟིགས་གྲངས:11664ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2011/6/12 11:17:39ཚོགས་ཡར་སྤྲོད:admin
༄༅། །བུམ་ཐང་ལྷའི་སྦས་ཡུལ་གྱི་བཀོད་པ་མེ་ཏོག་སྐྱེད་ཚལ་
ཞེས་བྱ་བ་བཞུགས་སོ།།
 

  ༈ ༀ་སྭ་སྟི་སིདྡྷི། བུམ་ཐང་ལྷའི་སྦས་ཡུལ་གྱི་བཀོད་པ་གསལ་བར་བྱེད་པ་མེ་ཏོག་གི་སྐྱེད་མོས་ཚལ་ཞེས་བྱ་བ། ངོ་མཚར་རྨད་དུ་བྱུང་བ་ཐམས་ཅད་ལ་ཕྱག་འཚལ་ལོ།། ༈ ལྷ་ཡི་མཆོག་དང་ཀླུ་དང་གནོད་སྦྱིན་དང་། །དྲང་སྲོང་གྲུབ་པ་རིག་སྔཊ་འཆང་རྣམས་ཀྱི། །ཐོར་ཚུགས་གཡོ་བས་གང་གི་ཞབས་བཏུད་པ། །རང་བྱུང་པདྨ་དད་བརྒྱའི་གཙུག་གིས་མཆོད། །སྔོན་གྱི་རྒྱལ་བློན་མཆོག་རྣམས་བྱོན་པའི་ཡུལ། །ངོ་མཚར་གཙུག་ལག་ཁང་རྣམས་བཞུགས་པའི་ཡུལ། །མཁས་གྲུབ་དུ་མ་བརྒྱུད་པར་བྱོན་པའི་ཡུལ། །བུམ་ཐང་ལྷ་ཡི་སྦས་ཡུལ་བཀོད་པ་གསོན། དབུས་དང་ཕྱོགས་བཞི་ཡངས་པའི་རང་བཞིན་ཡུལ། །ཀུན་ནས་ཟླུམ་པ་བུམ་པའི་འཁོར་ལོ་དང་། །པདྨ་ཁ་བྱེ་ལྟ་བུར་མཛེས་པ་ལ། །མི་ཡུལ་མི་འདྲ་ལྷ་ཡུལ་འཕོས་པ་བཞིན། །རི་རྣམས་ཉམས་དགའ་སྔོ་ཞིང་སྣུམ་པ་ལ། །རྩེ་མོ་དཀར་གསལ་གངས་རིའི་ཕྲེང་ཚོགས་ཅན། །མཐོ་ཁྱད་མཉམ་ཞིང་ཕྱོགས་རྣམས་འཁོར་བ་ནི། །རིན་ཆེན་ར་བས་ཀུན་ནས་བསྐོར་བ་བཞིན། །ལུང་རྣམས་ཐང་ཡངས་མེ་ཏོག་འབྲས་མང་ལ། །གྲོང་རྣམས་ཡིད་འོང་པདྨ་མང་པོ་གང་། །ཕྱོགས་རྣམས་མདངས་གསལ་དཔལ་གྱིས་མཛེས་པ་ནི། །ལྷ་རྣམས་ཡུལ་ལ་འགྲན་པ་ལགས་སམ་སྙམ། །ཡུལ་འདི་བུམ་པའི་ཐང་ཞེས་གྲགས་པ་ཡང་། །རབ་སྣའི་དབུས་རི་བུམ་པ་ལྟ་བུའི་འདབས། །བྱང་ངོས་ཐང་ལ་ཐོག་མར་ཡུལ་བཏབ་པས། །ཉེ་བའི་སྒྲ་ཡིས་དེ་སྐད་བཏགས་སོ་ཀྱེ། །འདི་ཡི་རང་བཞིན་ཀུན་ནས་མཛེས་པ་ལ། །ཕྱོགས་ཀྱི་ཡུལ་ཕྲན་མང་པོས་བསྐོར་བ་ནི། །ལྷུན་པོ་གསེར་རི་མང་པོས་བསྐོར་བ་ལ། །གླིང་བཞི་གླིང་ཕྲན་མང་པོས་བསྐོར་བ་བཞིན། །དེ་ལྟའི་ཡུལ་དབུས་ཡངས་པའི་ལྟེ་བ་ལ། །རབ་སྣའི་ལུང་པ་ཀུན་ནས་མཛེས་པ་ནི། །པད་སྡོང་རྩེ་ན་བྱམས་པ་བཞུགས་པ་འདྲ། །དངས་པའི་ཆུང་ཀླུང་དག་ཀྱང་ཤར་དུ་འབབ། །ལུང་བཟང་སྲོལ་ནི་པདྨའི་རྩ་བ་ལ། །རྩེ་མོ་བང་རིམ་འདབ་སྟོང་རྒྱས་འདྲའི་སྟེང་། །བྱང་རི་བྱམས་པ་རྒྱལ་པོ་གདན་བཞུགས་ལ། །ཐར་པ་གླིང་གིས་ཉེ་བར་མཛེས་པ་ལགས། །ས་རྣམས་འདབ་བརྒྱད་པདྨ་ལྟ་བུ་ལ། །གནམ་ཡང་འཁོར་ལོ་རྩིབས་སྟོང་བཀོད་པ་བཞིན། །མདངས་བཀྲ་ཉི་ཟླའི་འོད་ཀྱང་རྒྱང་རིང་ལ། །ཕྱོགས་ཀྱི་རི་དང་ཡུལ་རྣམས་འདུད་པ་བཞིན། །ས་མཁན་རིན་ཆེན་བསྔགས་པའི་གཞི། །རྒྱལ་བའི་ས་སྟེ་བཀྲ་ཤིས་ཕུན་ཚོགས་ཤོག །གྲུབ་རི་རིན་ཆེན་འབྱུང་བའི་སྟི་གནས་ཏེ། །རང་འབྱུང་པདྨ་རྒྱལ་པོའི་མགོན་དང་བཅས། །འདི་ཡིས་ཕྱོགས་བཞི་པདྨ་འདབ་མ་ལ། །ཡུལ་ཁམས་བཞི་དང་གཞུང་ཆུ་འབབ་པའི་ཚུལ། །སོ་སོའི་ཡ་མཚན་དུ་མས་བརྒྱན་པ་ནི། །སྔོན་མེད་སྒྱུ་མའི་རྩེད་མཚོ་བཀོད་པ་བཞིན། །རང་བཞིན་བུམ་ཐང་སྡེ་བཞིར་གྲགས་པ་ནི། །རབ་སྣ་མོ་རེ་སྟེང་ཆུ་མང་སྡེའི་ཡུལ། །བཞི་པོ་སྔོན་ནས་ཡོད་ཕྱིར་སྡེ་བཞི་ལ། །ཨུ་ར་ཕྱི་ནས་བོད་ཀྱིས་བཏགས་པར་འདོད། །དེ་ནས་ཤར་ཕྱོགས་རྟ་ཆུའི་ལུང་པ་ནི། །རིན་ཆེན་ཤིང་རྟའི་དབྱིབས་ལྟར་མཛེས་པ་ལ། །ཡུལ་རྣམས་དར་ཞིང་མི་རྣམས་བདེ་སྐྱིད་འཕེལ། །རིན་ཆེན་ཆུ་བོ་ཤར་ནས་ནུབ་ཏུ་འབབ། །ཡུལ་འདིའི་ཕུ་ན་སྦས་ཡུལ་སྒོ་ཡོད་ལ། །བར་ན་དཔལ་ཕུག་བྲག་ལ་ཞབས་རྗེས་དང་། །མདའ་ན་ཆོས་ཀྱི་གཏེར་མཚན་དུ་མ་ཡོད། །དེས་སང་རི་མོ་ཅན་ཞེས་གྲགས་པ་ཡིན། །སྨན་ཤིང་མེ་ཏོག་འབྲས་བུའི་ཚོགས་མང་ལ། །ཡུལ་ཁམས་ཡངས་ཤིང་ལོ་ཐོག་སྣ་དགུ་འཁྲུངས། །ཕྱོགས་ཀྱི་ཚོང་ཟོང་དག་ཀྱང་གྲངས་མང་ལ། །ཡུལ་ལྷའི་མཆོག་ཀྱང་གཞན་ལས་འཕགས་པ་ལགས། །ཤར་ལྷོ་རིན་ཆེན་ཨུ་རའི་ལུང་པ་ནི། །འཁོར་ལོའི་དབྱིབས་ལྟར་ཟླུམ་ཞིང་མཛེས་པ་ལ། །གྲོང་རྣམས་དར་ཞིང་ཡུལ་འཁོར་ཤིན་ཏུ་མང་། །རིན་ཆེན་ཆུ་བོ་ལྷོ་ནུབ་དལ་གྱིས་འབབ། །འདི་ཡི་ཕུ་ལ་དངོས་གྲུབ་གནས་ཡོད་ལ།།བར་གྱི་ཕྱོགས་མཚམས་དགོན་པའི་གནས་ཀྱིས་བསྐོར། །མདའ་ན་རབ་འཇིགས་བདུད་མཚོ་མེར་བ་ལས།།དྲག་པོའི་སྒྲ་སྐད་སྣ་ཚོགས་འབྱུང་བ་ཡོད། །རྩྭ་རྣམས་བཅུད་ཆེ་རྐང་འགྲོས་གཞན་ལས་འཕེལ། །ཤིང་རྣམས་འབྲས་བཟང་ནགས་ཚལ་ཕུན་སུམ་ཚོགས། །སྨན་རྣམས་མཐུ་ཆེ་ནད་ཀྱི་རིགས་ཉུང་ལ། །ཡུལ་རྣམས་ཉམས་དགའ་ཡོན་ཏན་དཔག་ཏུ་མེད། །ཡུལ་འདི་བོད་ཡུལ་དབུས་དང་འདྲ་བ་སྟེ། །བསིལ་དྲོད་མཉམ་ལ་སྟོན་དུས་ལན་གཅིག་འབྱུང་། །ཆོས་རྒྱལ་རྗེ་ཡི་གདུང་རབས་བཞུགས་པ་དང་། །གཙང་མའི་བོད་རྣམས་གནས་པས་ཁྱད་པར་འཕགས། །ལྷོ་ཕྱོགས་ལུང་སྲོལ་རབ་ཏུ་བཟང་པོ་ལ། །བུམ་ཐང་ཡུལ་གྱི་གཞུང་ཆུ་འབབ་པ་ནི། །ཐོག་མར་ལྷོར་འབབ་དེ་ནས་ལྷོ་ནུབ་ཏུ། །གངྒཱའི་ཆུ་དང་འདྲེས་ཏེ་སོང་བ་ལས། །བ་ཚྭ་ཅན་གྱི་རྒྱ་མཚོ་ཆེན་པོར་འབབ། །ཡང་ཡང་གངས་རིའི་མགུལ་ནས་འོངས་པའི་ཆུ། །ཆིལ་ཆིལ་རླབས་ཀྱིས་གཉེར་བའི་རྒྱུན་བབས་པ།།ལྷུང་ལྷུང་ཆབ་སྒྲ་སྙན་པའི་གླུ་ལེན་ཅིང་། །འདེང་འདེང་ཞེས་སྒྲོགས་ལྷོ་ཕྱོགས་སྙེགས་ལ་གཟིགས། །བརྒྱད་ལྡན་ཆུ་འབབ་རིན་ཆེན་ཆུ་བོ་ཡང་། །དད་བརྒྱའི་རྦ་རླབས་གཡོ་བས་རབ་བསྐྱོད་དེ། །རྡོ་རྗེ་གདན་སོགས་འཕགས་པའི་ཡུལ་རྣམས་སུ། །ཡོན་ཆབ་ཕུལ་ཕྱིར་ཆས་པ་ཡིན་ནམ་སྙམ། །དངས་པའི་ཆུ་གཙང་ཝུ་འཕྲེང་འཛིན་པ་ནི། །རིན་ཆེན་བཻཌཱུར་བཞུ་བའི་ཁུ་བའམ། །ཨནྡ་རྙིལ་དང་སྟོན་ཀའི་ནམ་མཁའ་བཞིན། །ཡང་ན་གཡུ་ཐག་ལེགས་པར་བརྐྱངས་པ་འདྲ། །འདི་ནི་གངས་དང་སྨན་དྲིའི་སྡིང་རྣམས་དང་། །སྨན་ཤིང་མེ་ཏོག་ཅན་ནས་ལེགས་འབབ་པའི། །འཐུང་དང་ཁྲུས་བྱས་ཡོན་ཏན་དཔག་ཏུ་མེད། །ཆུ་ངོགས་གཞན་ལས་མཆོག་ཏུ་འཕགས་པ་ལགས། །ནུབ་ཕྱོགས་མང་སྡེའི་ཡུལ་ཁམས་བཟང་པོ་ནི། །ཡིད་འོང་གཞུ་ཡི་དབྱིབས་ལྟར་མཛེས་པ་ལ། །གྲོང་རྣམས་མྱུར་ཞིང་ཕྱོགས་ཀྱི་སྐྱེ་བོ་འདུ། །ཆུ་བོའི་རྒྱུན་ཡང་ནུབ་ནས་ཤར་ལྷོར་འབབ། །འདི་ཡི་ཕུ་ན་ནགས་རིའི་ཚོགས་མང་ཞིང་། །བར་དུ་འབྲུ་མང་སྨན་ཤིང་ལོ་འབྲས་འཕེལ། །མདའ་ན་འབྲས་དང་ཁྲེ་དང་ཡོན་ལ་སོགས། །འབྲུ་སྣ་མང་ལ་ཇ་ཤིང་བཟང་པོ་སྐྱེ། ། སྦྲང་དང་བཙོད་དང་ཡ་མཚན་ལ་སོགས་པ། །ཚོང་ཟོང་གྲངས་མང་དར་དང་རས་བལ་སོགས། །ཤིང་དང་ས་ལས་འཁྲུངས་པའི་བཟའ་བ་ཡང་། །རོ་མཆོག་བརྒྱད་ལྡན་དཀར་དམར་ལྡན་པ་དང་། །བུ་རམ་ཤིང་དང་ཁ་ཟས་རྣམ་པ་མང་། །མང་སྡེའི་ཡུལ་ཞེས་མིང་དོན་མཐུན་པར་གྲགས། །བྱང་ཕྱོགས་མེ་རིའི་ལུང་པ་བཟང་པོ་ནི། །དཔག་བསམ་ལྗོན་ཤིང་རྒྱས་པ་ལྟ་བུ་ལ།།ཡུལ་ཁམས་དར་ཞིང་ས་ཕྱོགས་གཟི་བརྗིད་ཆེ། །དྭངས་པའི་ཆུ་བོ་བྱང་ནས་ལྷོ་ཕྱོགས་འབབ། །འདི་ཡི་ཕུ་ན་བོད་ཀྱི་སྒོ་ཡོད་ལ། །གངས་རིའི་ཕྲེང་བ་དར་དཀར་ཡོལ་བ་བཞིན། །སྔོན་ཚེ་པདྨས་དཀྱིལ་འཁོར་བཞེངས་པའི་ཐང་། །སྲིན་པོ་བཏུལ་བའི་རྡོ་དང་བཅས་པ་ཡོད། །བར་ན་ཐང་ཡངས་ཆུ་བོའི་ཤར་ཕྱོགས་ལ། །བསམ་ཡས་མེ་བཙའ་ཆོས་འཁོར་ལྷ་ཁང་དང་། །ནུབ་ན་བྱམས་པ་སྒྲོལ་མའི་ལྷང་ཁང་གཉིས། །ལྷ་ས་འུ་ཤང་རྡོ་ཡི་ལྷ་ཁང་བཞེངས། །དེ་དང་ཉེ་བའི་བྱང་རིའི་བྲག་ལོགས་ལ། །རང་འབྱུང་པདྨ་རྒྱལ་པོའི་སྐུ་རྗེས་ཡོད། །དེ་ནི་ལན་གཅིག་མཐོང་བ་ཙམ་གྱིས་ཀྱང་། །ངན་སོང་སྒོ་བཅད་མཐོ་རིས་ཐར་ལམ་བགྲོད། །མདའ་ན་སྔོན་གྱི་རྒྱལ་པོའི་ཡུལ་མཁར་དང་། །བློན་པོའི་གྲོང་ཡོད་རྒྱལ་བློན་ས་ཞེས་གྲགས། །འདི་ཡི་མི་རྣམས་མཆོག་ཏུ་རིགས་བཟང་ལ། །གཟུགས་ཀྱང་གཞན་ལས་མཆོག་ཏུ་འཕགས་པ་ལགས། །བུམ་ཐང་རིན་ཆེན་ལྷ་ཡི་སྦས་ཡུལ་གྱི། །རི་རྣམས་ལྷུན་སྟུག་ས་རལ་གྲོག་པ་མེད། །ཡུལ་རྣམས་ཉམས་དགའ་སྟོན་དུས་འཁོར་མར་འབྱུང་། །མི་རྣམས་སྤྱོད་བཟང་སྔོན་གྱི་ཁྲིམས་ལ་གནས། །ཡིད་འོང་གྲོང་རྣམས་འཕྱོང་ཁ་ཕྱེད་ཕིབས་ཅན། །སྙུག་མའི་སྦ་ཁང་དག་ཀྱང་གྲངས་མང་ལ། །མཁར་དང་ཁང་བཟང་ཤིང་གི་རྒྱ་ཕིབས་ཅན། །རྒྱང་ནས་ལྷ་ཡི་ཁང་བཟང་མཐོང་བ་འདྲ། །འདི་ནི་མི་རྣམས་རང་བཞིན་དགེ་བ་སྟེ། །རི་དྭགས་མི་རྔོན་ལམ་སྲང་ཆོམ་པོ་མེད། །རྐུན་པོ་ཉུང་ཞིང་གཞན་གནོད་འཚེ་བ་ཆུང་། །རང་གིས་རྒྱུད་འཇམ་འགྲོཊ་ན་བདེ་བ་ལགས། །ཡུལ་འདིའི་མི་རྣམས་བརྙེས་སུ་མི་རུང་སྟེ། །ཁ་ཅིག་དཔའ་བོ་མཁའ་འགྲོའི་རིགས་ཡིན་ལ། །ལ་ལ་ཕྲིན་ལས་གཉན་ས་གནོན་ལ་མཁས། །ཕལ་རྣམས་མཆོག་ཏུ་ངོ་མཚར་ཆེ་བ་ལགས། །འདི་ན་ལུཊ་བཟང་གློ་བུར་ལྷགས་ལ་བྱམས། །གང་དུ་འགྲོ་ཡང་ལམ་རྒྱགས་མི་དགོས་ལ། །ཉེ་དུའི་ཁྱིམ་ལས་ལྷག་པའི་སྣ་ལེན་དང་། །བྱ་དགའ་ཆེ་བས་བསྐལ་པ་བཟང་པོ་བཞིན། ། ཡུལ་འདིའི་རང་བཞིན་ཞིབ་མོར་བསམ་པ་ན། །དབུས་གཙང་དག་པའི་ཞིང་ལས་ལྷག་པ་བཞིན། །འཚེ་བ་མེད་པས་དམ་ཆོས་སྒྲུབ་པའི་གནས། །ཡུལ་ཁམས་གཞན་ལས་ཁྱད་པར་འཕགས་སོ་ཀྱེ། །དེ་འདྲའི་ཡུལ་དབུས་པདྨའི་ལྟེ་བ་ལ།།རབ་སྣའི་རི་རྒྱལ་ཀུན་ནས་བསྐོར་བ་བཞིན། །ཕྱོགས་ཀྱི་རི་རྣམས་དེ་ལ་འཁོར་བར་འདུད། །རིན་ཆེན་འཛིན་མའི་ལྷུན་པོ་ཆེན་པོ་ཡང་། །སྣ་ཚོགས་བཀོད་པའི་འོད་ཟེར་སྟོང་འཕྲོ་ཞིང་། །གྲུབ་པའི་བསྟི་བཟང་པོས་བརྒྱན་པ་ནི། །ཤར་རི་ལག་ན་པདྨོའི་བཞུགས་གནས་བཞིན། །དབྱར་དུས་ཨནྡ་རྙིལ་གྱི་ས་འཛིན་ལ། །ནོར་བུ་ཉི་ཟླའི་འོད་ཀྱི་མདངས་འཚེར་བ། །སྔོན་མེད་ལྷ་ཡི་རིན་ཆེན་ལྷུན་པོ་ཡང་།།ཕྱོགས་འདིར་འཕོས་ན་དེ་དང་མཚུངས་པ་སྙམ། །ཞི་བའི་སྤྲིན་ཚོགས་བཟང་པོ་དེ་དག་ཀྱང་། །རབ་བཟང་དད་པའི་གློག་ཕྲེང་གར་བྱེད་ཅིང་། །སྙན་པའི་འབྲུག་སྒྲ་ཟབ་མོར་སྒྲོགས་པ་ནི། །གནས་ཀྱི་ཡོན་ཏན་བསྔགས་པར་ཞུགས་པ་བཞིན། །སྟོན་དུས་མདངས་བཟང་མཛེས་པའི་རི་ངོགས་ལ། །སྨན་ཤིང་མེ་ཏོག་འབྲས་བུའི་ཚོགས་སྨིན་པ། །ལྷ་ཡི་སྐྱེད་ཚལ་དར་བ་འཕོས་པ་བཞིན། །ཀུན་ནས་མཛེས་པའི་རང་བཞིན་འདི་ལ་གཟིགས། །དགུན་དུས་ལྷུན་པོ་གངས་རིའི་ཅོད་པན་ཅན། །ཁ་བའི་གོས་དཀར་བཟང་པོས་གཡོགས་པ་ནི། །ཤེལ་རི་འོད་ཀྱི་དྲ་བས་མཛེས་པའམ། །ཀུ་མུད་ཚལ་དུ་སྟོན་ཟླ་ཤར་བ་བཞིན། །རེས་འགའ་ཤིང་རྣམས་དུང་གི་ལྗོན་པ་ལ།།པདྨ་དཀར་པོའི་མེ་ཏོག་རྒྱས་པ་བཞིན། །ས་གཞི་རིན་ཆེན་དངུལ་གྱིས་ཡོགས་འདྲ་ལ། །རབ་དཀར་ངང་པ་མང་པོ་ལྷགས་པ་བཞིན། །དཔྱིད་དུས་ས་མཆོག་ཡོན་ཏན་མང་པོའི་རི། །རྒྱར་ཡང་ལྷུན་སྟུགས་ནགས་ཚལ་དྲ་བས་གཡོགས། །རྩི་ཤིང་སྨན་དང་མེ་ཏོག་ཁ་འབུས་ཤིང་། །དྲི་ཞིམ་སྤོས་ངད་ལྡན་པས་ཕྱོགས་ཀུན་ཁྱབ། །འདི་ནི་སྔོན་མེད་རིན་ཆེན་ལྷུན་པོ་ཞིག །གྲུབ་པའི་གནས་འདི་གསལ་བས་མཛེས་ལས་སམ། །རྣམ་པར་འཕྲུལ་ལ་ཡོན་ཏན་བསམ་མི་ཁྱབ། །སྣ་ཚོགས་བཀོད་པའི་འོད་ཟེར་འགྱེད་ལ་ལྟོས། །དེ་འདྲའི་ལྷུན་པོ་རིན་ཆེན་མཆོག་ཚོགས་ཅན། །བྱམས་པ་གདན་བཞུགས་འདྲ་བའི་ཐུགས་ཀ་ལ། །ཐར་པ་གླིང་གི་སྒྲུབ་གནས་མཛེས་པ་ནི། །དཔལ་རི་པདྨ་འོད་ཀྱི་གཞལ་ཡས་བཞིན། །འདི་ནི་རི་རྒྱལ་རབ་ཏུ་ལྷུན་མཐོ་ལ། །ནགས་ཚལ་སྨན་ཤིང་མེ་ཏོག་ཆུ་གཙང་དང་། །ནེ་གསིང་སྨན་ལྗོངས་དུ་མས་རབ་བརྒྱན་ཞིང་། ། དགོན་པའི་ས་གཞི་དག་ཀྱང་རབ་ཏུ་མཛེས། །ས་དང་གནམ་ཡང་ཉི་འོད་རྒྱུན་རིང་ལ། །དབྱར་བསིལ་དགུན་དྲོ་དུས་བཞི་བསིལ་དྲོད་མཉམ། །ཆུ་དང་ཤིང་བཟང་ངང་གིས་སྡོད་སྙིང་འདོད། །གྲོང་ལས་རྒྱང་རིང་དབེན་པའི་ནགས་ཁྲོད་ལཊ། །འདི་ན་རང་བཞིན་འཚེ་བ་མེད་པ་དང་། །མཐུན་རྐྱེན་སྒྲུབ་སླ་བསམ་གཏན་ངང་གིས་འཕེལ། ། བཅུད་ལེན་རྫས་ཀྱང་རྣམ་པ་གྲངས་མང་ལ། །ཤིང་ཏོག་སྔོ་ངད་མང་པོའི་ཁ་ཟས་ལྡན། ། མཐོང་བས་ཆགས་ཤིང་བསྟེན་པས་ཡིད་སྤྲོ་ལ། །ངང་གིས་ཆོས་འཕེལ་སེམས་གཙང་རིག་པ་འཛིན། །རྒྱུན་དུ་ཡིད་དགའ་དག་པའི་ཞིང་ཁམས་བཞིན། །ཞི་བ་རབ་བཟང་ཐར་པའི་གླིང་མཆོག་ལགས། །འདི་ནི་སྔོན་ཚེ་རང་བྱུང་པདྨ་ཡིས། །ལུང་བསྟན་ཟབ་གཏེར་བྱིན་རླབས་འབྱོར་པས་བརྒྱན། །མཁའ་འགྲོ་དམ་ཅན་རྒྱ་མཚོའི་ཚོགས་འདུ་བ། །བར་ཆད་མེད་ཅིང་དངོས་གྲུབ་ཉེ་བ་ལགས། །དེ་འདྲའི་གནས་འདིར་པདྨའི་བྱིན་རླབས་ལས། །རྒྱལ་སྲས་དྲི་མེད་འོད་ཟེར་ལེཊ་འོངས་ཏེ། །སྨོན་ལམ་ལུང་བསྟན་བཞིན་དུ་སྒྲུབ་པའི་ཕྱིར། །བསྟི་གནས་བཅས་ཏེ་བསམ་སྒོམ་པ་ལེགས། །དེང་སང་དུས་ན་སྐྱེ་བོ་མི་བསྲུན་པས།།དབུས་གཙང་རྒྱལ་བའི་བསྟན་པ་ནུབ་ཏུ་ཉེ། །མཐའ་དམག་འབྱུང་པོས་ཡུལ་གྱི་དབུས་དཀྲུགས་པས། །འདི་འདྲའི་གནས་སུ་བྱང་ཆུབ་སྒྲུབ་པར་རིགས། །ཕྱོགས་ཀྱི་སྦས་ཡུལ་རིན་ཆེན་སྒོ་རྣམས་ཀྱང་། །རིང་པོར་མི་ཐོགས་མྱུར་དུ་འབྱེད་འགྱུར་ལ། །སོག་པོའི་མཐའ་དམག་རྣམས་ཀྱང་འབྱུང་དུ་ཉེ། །འདི་འདྲའི་རྒྱུ་མཚན་བསམ་ཞིང་སྐྱོ་བ་འཕེལ། །དེ་བས་དད་ལྡན ་ཐར་པ་འདོད་རྣམས་ཀྱིས། །རང་གི་ཡུལ་ལ་ཞེན་པ་རབ་སྤངས་ལ། །ཚེ་གང་ཟབ་མོའི་དེ་ཉིད་བསྒྲུབ་པའི་ཕྱིར། །ཕྱོགས་ཀྱི་སྦས་ཡུལ་བགྲོད་པའི་དུས་ལ་བབ། །སྦས་པའི་ཡུལ་དང་ཡུལ་འདྲ་ཐམས་ཅད་ན། །ལས་མཐུན་དགེ་བ་ཅན་རྣམས་གནས་པ་དང་། །མཁའ་འགྲོ་དམ་ཅན་རྒྱ་མཚོས་ལེགས་སྐྱོང་པས། །འཚེ་བ་མེད་ཅིང་ཆོས་དང་མཐུན་པ་ལགས། །མོན་ཡུལ་བུམ་ཐང་དགེ་བའི་གནས་མཆོག་འདི། །མོན་དུ་བཏགས་ཀྱང་བོད་ཡུལ་དབུས་དང་མཚུངས། །སྦས་ཡུལ་མིན་ཡང་ཡུལ་འདྲའི་བྱེ་བྲག་སྟེ། །དེ་ཕྱིར་མཁས་རྣམས་དགའ་བ་བསྐྱེད་པར་རིགས། ། ཡུལ་འདིར་བགྲོད་ནས་ཐར་པ་སྒྲུབ་པ་གང་། །དཔག་མེད་བསྐལ་བ་རྒྱ་མཚོའི་རྡུལ་སྙེད་ནས། །ལས་དང་སྨོན་ལམ་མཆོག་ཏུ་དག་པས་ན། །ཚེ་འདིས་སྲིད་པའི་རྒྱ་མཚོ་བརྒལ་བ་ལ། །གནས་འདིར་རང་བྱུང་པདྨས་སྐྱབས་མཛད་པས། །འཚེ་བ་མེད་ཅིན་དམ་ཆོས་འཕེལ་བ་ཆེ། །མཁའ་འགྲོ་རྣམས་དང་སྐལ་པ་མཐུན་པས་ན། །ཨུ་རྒྱན་ལ་སོགས་དག་པའི་གནས་མཆོག་བཞིན་། །ཚུལ་འདི་བུམ་ཐང་ཡུལ་གྱི་བཀོད་པ་སྟེ། །དད་ལྡན་ཐར་པ་འདོད་རྣམས་བསྐུལ་བ་དང་། །ཕྱོགས་ཀྱི་སྐྱེ་བོ་རྣམས་ལ་བསྒྲག་པ་དང་། །བློ་གསལ་རྣམས་ལ་མགྲིན་པའི་རྒྱན་དུ་འབུལ། །དགེ་བ་འདི་ཡིས་བདག་དང་འགྲོ་བ་ཀུན། །སྲིད་པའི་རྒྱ་མཚོ་མ་ལུས་རབ་བརྒལ་ནས། །ཞི་བ་རབ་བཟང་ཐར་པའི་སྐྱེད་ཚལ་དུ། །སྐུ་གསུམ་ལྷུན་གྲུབ་ཆོས་ཀྱི་རྒྱལ་པོར་ཤོག །དེང་ནས་བདག་བློ་སྲིད་ལ་རབ་སྐྱོ་བས། །ཚེ་འདིའི་རྣམ་གཡེང་འདུ་འཛི་ཀུན་སྤངས་ཏེ། །ནགས་ཚལ་ཞི་བ་ཆོས་ཀྱི་དགོན་པའི་གནས། ། ཐར་པའི་གླིང་དུ་སྒྲུབ་པ་འཕེལ་བར་ཤོག །བློ་གྲོས་ལྷུན་པོ་སྙན་ངག་ནཊ་འཁྲིགས་ཤིང་། །སྡེབ་སྦྱོར་ཆུ་ཀླུང་ལེགས་པར་འབབ་པའི་གནས། །མངོན་བརྗོད་པདྨའི་ཚལ་གྱིས་བཀྲ་བ་འདིས། །དད་ལྡན་སྐྱེ་བོའི་ཚོགས་རྣམས་དགའ་བར་མཛོད། །བུམ་ཐང་ལྷའི་སྦས་ཡུལ་གྱི་བཀོད་པ་གསལ་བར་བྱེད་པ་མེ་ཏོག་གི་སྐྱེད་མོས་ཚལ་ཞེས་བྱ་བ། བདེ་བར་གཤེགས་པའི་གསུང་རབ་ལ་མང་དུ་ཐོས་པའི་ནོར་གྱིས་ཕྱུག་ཅིང་། སྙན་དངགས་དང་། སྡེབ་སྦྱོར་དང་། །མངོན་བརྗོད་ཀྱི་གནས་ལ་མཁས་པ་ཐེག་པ་མཆོག་གི་རྣལ་འབྱོར་པ་དྲི་མེད་འོད་ཟེར་གྱིས་ཤིང་མོ་ལུག་གི་ལོ་ལ་བུམ་ཐང་ཐར་པའི་གླིང་དུ་ལེགས་པར་སྦྱར་བ་རྫོགས་སོ།། །།མངྒ་ལཾ།།    དཔའ་དགྱེས་པ་རྡོ་རྗེས་མཁོ་འདོན་གནང་བའོ། 
·རྩོམ་ཡིག་གོང་མ:ཚངས་དབྱངས་གླུ་ཁང་ལ་ཕུལ་བའི་སྐྱིད་གླུ་ཤར་གྲོལ་མ།
·རྩོམ་ཡིག་འོག་མ:གཞས་ཚིག རེ་ཞུ།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·ཡུལ་གནམ་ལུང་དུ་སྐྱོད་པའི་མཐོང་ཐོས། 2011/3/1 22:05:32
·ཟངས་མདོག་དཔལ་རིའི་ཕོ་བྲང་གི་སྐོར་ཚད་དང་ཕན་ཡོན། 2011/2/17 15:37:54
·དབེན་གནས་གངས་རི་ཐོད་དཀར་དང་ཤུག་གསེབ་དགོན། 2010/9/5 13:34:08
·གནས་མཆོག་རྒྱ་ནག་མ་ཎིའི་དཀར་ཆག 2010/4/28 16:46:42
·གནས་མཆོག་ཁ་བ་དཀར་པོ། 2010/2/7 16:22:30
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:pYKX5zid
�Ƹ�������http://www.355551311.com/yunfuyaoqingren/
�Ƹ��Ƽ���http://www.355551311.com/yunfutuijianren/
http://www.355551311.com/taoxianapp/
http://www.355551311.com/wukazhifu/
http://www.355551311.com/zhifupingtai/
http://www.355551311.com/yuanbaibai/
发表时间:2017/5/7 18:26:14 [来自: 112.5.236.197]

 评论者:wfjnljmvpdo
CbkmcN  <a href="http://ssdxiqtawssx.com/">ssdxiqtawssx</a>, [url=http://jnrvwwfwrcrx.com/]jnrvwwfwrcrx[/url], [link=http://ttdokaksudjx.com/]ttdokaksudjx[/link], http://hxdtgewcsihk.com/
发表时间:2017/4/3 9:00:08 [来自: 5.188.211.62]

 评论者:rclqebvnj
YuTiXG  <a href="http://apgzyiyqnsiq.com/">apgzyiyqnsiq</a>, [url=http://bbmzcipxbvml.com/]bbmzcipxbvml[/url], [link=http://xkvibgswqgha.com/]xkvibgswqgha[/link], http://sitgvafjeaos.com/
发表时间:2017/4/3 0:55:31 [来自: 5.188.211.62]

འབྲེལ་ཡོད་དཔྱད་བརྗོད 43 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།111.33MS