རྒྱལ་ཀུན་བློ་གྲོས་ཡེ་ཤེས་མེ་ལོང་མཆོག།

ངུར་སྨྲིག་གར་རོལ་ཀུན་བཟང་སྤྱོད་པའི་དཔལ།། 

སྟོབས་སུ་རྫོགས་པའི་གྲགས་པ་ཕྱོགས་ཀྱི་མཐར།། 

ཁྱབ་པའི་ཞབས་སེན་སྤྱི་བོའི་རྒྱན་དུ་ལེན།། 

 

ཁྱེད་ཀྱི་མཁྱེན་པའི་དོ་རྭ་རུ།།

བཅུ་ཕྲག་རིག་པའི་སྐྱེད་ཚལ་ལས།། 

འོངས་པའི་གཞན་ཕན་དྲི་བསུང་ནི།། 

ཕྱོགས་ཀྱི་བུ་མོའི་མཐའ་ལས་བརྒལ།། 

གངས་ཅན་མཁས་མང་འདུས་པའི་གཙུག། 

རལ་པས་མཛེས་པའི་ཁྲི་འཕང་ལ།། 

ལུང་རིགས་འགྲོས་ཀྱིས་ཉེར་འཛེགས་ནས།། 

འཇིགས་མེད་སྨྲ་བ་ཁྱོད་མིན་སུ།། 

གང་གི་རྣམ་དཔྱོད་ལག་ཉལ་མཚོན།། 

གཅིག་གིས་ལོག་སྨྲ་རི་བོའི་ཚོགས།། 

ཀུན་བཅོམ་རྒྱུད་འཛིན་རྐང་འཐུང་ལྗོན།། 

འདི་ན་ཕན་ཚུན་འགྲན་བཞིན་འཕེལ།། 

ཁྱོད་ཀྱིས་ལོག་སྨྲ་འཇིགས་པའི་སྒྲ།། 

མཁའ་ལ་རྒྱུ་བའི་དབྱར་རྔ་ལས།། 

རབ་མཐོ་གཙུག་ལག་འཛིན་པའི་ཁྱུ།། 

ནོར་འཛིན་བུ་མོའི་རྒྱན་དུ་བསྐྲུན།། 

ཐུབ་པའི་ལེགས་གསུང་པདྨོའི་ཚལ།། 

ཞི་བའི་ཐབས་ཀྱི་མེ་ཏོག་རྩི།། 

དོར་ཏེ་ལོག་བཤད་མི་གཙང་དྲི།། 

འཚོལ་བ་དུས་ངན་སྐྱེ་བའི་ཆོས།། 

དེང་དུས་སྐྱེ་བོ་སྣ་ཚོགས་དབྱར་སྐྱེས་དབང༌།། 

ཐུབ་བསྟན་པདྨོར་སྡིག་སྤྱོད་མེ་ཡི་ཆར།། 

འབེབས་པ་ལས་གཞན་གསོས་གྱུར་གྲུ་ཆར་ནི།།        

འབེབས་པ་ཉིན་མོའི་སྐར་ལ་འགྲན་འདི་སྐྱོ།། 

གྲོགས་དག་གཤིན་པོའི་གྲལ་དུ་འཆི་བདག་བུས།། 

སྟན་བཤམས་དབང་མེད་མགྲོན་དུ་མ་བོས་བར།། 

དེ་སྲིད་གཉིས་ཕན་བྱ་བའི་ལས་བཟང་ལ།། 

མྱུར་བའི་ཚུལ་གྱིས་སྤྱོད་ལ་ཅིས་མི་བྲེལ། 

ཚེ་འདིར་རེ་བའི་འཁྲི་ཤིང་འཆིང་བའི་རྒྱ།། 

སྲིད་པའི་རང་མཚང་མཐོང་བའི་རལ་གྲི་ཡིས།། 

ཉེ་བར་བཅད་དེ་ཆོས་ལ་བརྩོན་པའི་བློ།། 

དཀར་ཕྱོགས་ཟླ་བའི་དཔལ་ལ་འགྲན་པར་མཛོད།།