ཧྲཱིཿ རྒྱལ་བ་རྒྱ་མཚོའི་ཡུམ་གྱུར་ཤེར་ཕྱིན་མ།  །

རྒྱལ་སྲས་རྒྱ་མཚོའི་གྲོགས་གྱུར་རྗེ་བཙུན་མ།  །

འགྲོ་ཁམས་རྒྱ་མཚོའི་མགོན་གྱུར་བཅོམ་ལྡན་མ།  །

ཡོན་ཏན་རྒྱ་མཚོའི་མཆོག་མངའ་ཁྱོད་ལ་འདུད།  །

ངག་ཚིག་རྒྱ་མཚོའི་འབྱུང་གནས་ངག་གི་ལྷ།  །

བློ་གྲོས་རྒྱ་མཚོའི་དཔལ་སྟེར་བློ་ཡི་ལྷ།  །

ལྷ་མཆོག་རྒྱ་མཚོས་མངོན་མཆོད་ལྷ་ཡི་ལྷ།  །

རྒྱ་མཚོའི་ལྷ་མོ་དབྱངས་ཅན་ཁྱོད་ཕྱག་འཚལ།  །

མཛེས་སྡུག་རྒྱ་མཚོའི་སྐུ་མཆོག་ཅི་ཡང་སྟོན།  །

སྒྲ་དབྱངས་རྒྱ་མཚོས་དམ་ཆོས་སྒོ་བརྒྱ་འབྱེད།  །

ཡེ་ཤེས་རྒྱ་མཚོའི་རང་བཞིན་ཕ་མཐའ་ཡས།  །

སེམས་ཅན་རྒྱ་མཚོ་སྨིན་མཛད་ཁྱོད་ལ་འདུད།  །

འཇིག་རྟེན་རྒྱ་མཚོ་རྣམ་རོལ་མཐའ་ཡས་པའི།  །

ངོ་མཚར་རྒྱ་མཚོའི་མཛད་པ་སྣ་ཚོགས་སྟོན།  །

ཕན་བདེ་རྒྱ་མཚོས་འགྲོ་ཀུན་རྟག་ཏུ་སྐྱོང་།  །

རྣམ་ཐར་རྒྱ་མཚོའི་དཔལ་མོ་ཁྱོད་ལ་འདུད།  །

མཁྱེན་བརྩེ་རྒྱ་མཚོའི་རྡོ་རྗེ་དབྱངས་ཅན་མ།  །

དད་པ་རྒྱ་མཚོས་རྟག་ཏུ་ཕྱག་འཚལ་ཏེ།  །

མཆོད་པ་རྒྱ་མཚོས་ཀུན་ནས་མཆོད་བགྱིད་ཅིང་།  །

བསྟོད་པ་བརྒྱ་མཚོས་རབ་ཏུ་བསྟོད་བགྱིད་ན།  །

ཐུགས་བསྐྱེད་སྨོན་ལམ་རྒྱ་མཚོས་རྗེས་དགོངས་ནས།  །

བྱིན་རླབས་ཡེ་ཤེས་རྒྱ་མཚོའི་སྤྲིན་ཆེན་ལས།  །

དངོས་གྲུབ་རྒྱ་མཚོའི་གྲུ་ཆར་དེང་ཕབ་ནས།  །    

རེ་འདོད་རྒྱ་མཚོ་ཡིད་བཞིན་སྐོང་བར་མཛོད།  །

གཟུངས་སྤོབས་བློ་གྲོས་རྒྱ་མཚོ་མཆོག་སྩོལ་ཞིང་།  །

ངག་ཚིག་རྒྱ་མཚོ་སྨྲ་ལ་རང་དབང་ཐོབ།  །

དཔལ་ཡོན་རྒྱ་མཚོའི་གཏེར་དུ་བདག་གྱུར་ཏེ།  །

ནུས་སྟོབས་རྒྱ་མཚོས་རྒྱལ་བསྟན་སྤེལ་གྱུར་ཅིག  །

སྐྱེ་བ་རྒྱ་མཚོར་ཁྱེད་ཀྱིས་རྗེས་བཟུང་སྟེ།  །

ལུང་རྟོགས་རྒྱ་མཚོའི་མཛོད་ལ་མངའ་དབང་བསྒྱུར།  །

རྫོགས་སྨིན་སྦྱངས་པ་རྒྱ་མཚོ་མཐར་ཕྱིན་ཏེ།  །   

བདེ་གཤེགས་རྒྱ་མཚོ་མཉམ་ཉིད་སྐུ་འཐོབ་ཤོག  །

འདི་བྲིས་དགེ་བས་འབྲེལ་ཐོགས་ཀུན།  །

སྒྲ་དབྱངས་ལྷ་མོས་རྗེས་བཟུང་སྟེ།  །

སྙན་ཚིག་བདུད་རྩིའི་དགའ་སྟོན་གྱིས།  །

ནོར་འཛིན་ཁྱོན་ཀུན་འགེངས་གྱུར་ཅིག  །