འཛམ་གླིང་ས་གཞི་ཀུན་ལ་དབང་བསྒྱུར་བ། །
སྔོན་བསགས་བསོད་ནམས་སྟོབས་ལས་ལེགས་བསྐྲུན་པའི། །
གཟུགས་སྐུ་ཉི་མ་ལྟ་བུའི་གཟི་བརྗིད་ཅན། །
ལྷ་སྲས་གཞོན་ནུའི་མཛེས་སྡུག་དཔལ་གྱིས་ནི། །
གངས་རིའི་མདངས་འཕྲོག་རབ་དཀར་སེང་གེ་འདྲ། །
སེང་གེས་གངས་རི་འགྲིམས་ལྟར་བརྟན་པར་བཞུགས། །
ཁྲི་སྟན་མི་འགྱུར་འཛམ་བུའི་གསེར་ལས་གྲུབ། །
གཡས་གཡོན་སེང་གེས་བཏེགས་པའི་ཁྲི་ཡི་སྟེང་། །
ཟ་འོག་རྒྱན་བཞི་དམར་སེར་སྔོ་ལྗང་དཀར། །
བཞུགས་འབོལ་ལྔ་ཚན་རིམ་པར་བརྩེགས་པའི་སྟེང་། །
འཛམ་གླིང་བོད་ཡུལ་ཁྲི་སྐོར་བཅུ་གསུམ་གྱིས། །
འབྲུ་མཆོག་འདོད་རྒུ་ལོངས་སྤྱོད་འཁྱིལ་བའི་དབུས། །
ཇ་ཆང་དཔལ་ཡོན་འཛོམས་པའི་བདེ་སྐྱིད་ཀྱིས། །
རྟག་ཏུ་རྩེ་གར་རོལ་བའི་ཉམས་ལྡན་ནི། །
སྟེང་ཕྱོགས་ལྷ་ཡི་ཡུལ་ནའང་མེད་དོ་ཞེས། །
འདིར་ཚོགས་བཞུགས་གྲལ་རྣམས་ཀྱིས་ཡང་ཡང་གླེང་། །
དེ་རིང་ཕུན་སུམ་ཚོགས་པའི་དུས་ཀྱི་ཆར། །
མི་ནོར་ཟས་གོས་ཐམས་ཅད་དབང་དུ་འདུས། །
རྒྱལ་སྲིད་རིན་ཆེན་སྣ་བདུན་དཔལ་གྱིས་བརྒྱན། །
བཀྲ་ཤིས་རྟག་བརྒྱད་ཀྱིས་མཚན་དར་དཀར་འདི། །
ལྷ་སྲས་དབང་སྡུད་ཁྱོད་ཀྱི་རྒྱན་དུ་འབུལ། །
评论者：