སློབ་དཔོན་ཐུགས་རྗེ་ཅན་གྱི་ཐུགས་དམ་གནད་དུ་བསྐུལ་བའི་གདུང་དབྱངས་གསོལ་འདེབས་བཞུགས་སོ། །
༄༅། །མཐའ་བྲལ་དོན་དམ་འོད་གསལ་གཉུག་མའི་གཤིས། །ལྷུན་གྲུབ་མཚན་དཔེའི་གཟིག་འབར་ལོངས་སྤྱོད་རྫོགས། །འགྲོ་ཁམས་ཇི་བཞིན་སྣ་ཚོགས་སྤྲུལ་པའི་སྐུ། །ཐུབ་དབང་ཐུགས་རྗེ་རྒྱ་མཚོས་དུས་ཀུན་སྐྱོངས། །རྒྱལ་ཀུན་མཁྱེན་བརྩེ་ནུས་པའི་སྒྱུ་འཕྲུལ་གར། །པུར་རྒྱལ་བོད་ཀྱི་འགྲོ་བའི་དཔལ་ཤར་བ། །གྲུབ་མཆོག་མཚོ་སྐྱེས་རྡོ་རྗེ་དྲིན་པོ་ཆེ། ། དེང་འདིར་གདུང་བས་བསྐུལ་ལོ་ཐུགས་རྗེས་ཟུངས། །སྤངས་རྟོགས་མཐར་ཕྱིན་སྐུ་ལྔའི་བདག་ཉིད་ཀུན། །མཉམ་ཉིད་ཉེ་རིང་གཟིགས་པ་མི་མངའ་ཡང་། །གདུལ་བྱའི་ཁམས་སོགས་རྟེན་འབྲེལ་མཐུ་བཙན་པས། ། ཁྱོད་ནི་གངས་ལྗོངས་འགྲོ་བའི་མགོན་དཔུང་ཉིད། ། ལྷག་པར་ཁྲི་སྲོང་ལྡེ་བཙན་ཡབ་སྲས་ཀྱིས། །བོད་ཁམས་ཐུགས་རྗེས་འཛིན་པར་བསྐུལ་བའི་ཚེ། །འགྱུར་མེད་ཞལ་བཞེས་མཚད་པ་དོན་གནས་ན། །དུས་འདིར་ཁྱོད་ཀྱིས་ཐུགས་རྗེས་སྐྱོང་བར་གསོལ། །ཕོངས་ཤིང་དོན་མེད་བཀོལ་སྤྱོད་གདུང་བས་མནར། ། སྙད་སྡང་སྲོག་ལ་འཇིགས་པའི་དངངས་སྐྲག་གིས། ། གཤིན་རྗེའི་གྲོང་ཁྱེར་ལྟ་བུར་གྱུར་པ་ཡི། །ཆོས་ལྡན་གངས་ཅན་པ་རྣམས་ཅི་ཡིས་ནོངས། ། འོན་ཏེ་སྔོན་བསགས་དཀར་མིན་ལས་ཀྱི་འབྲས། ། བརྣག་དཀའི་དུཿཁ་བཅུ་ཕྲག་ཟུང་ལྷག་ལོར། ། མྱངས་པའི་ཉམ་ཐག་ངང་ཚུལ་འདི་བས་ན། ། ལྷག་པར་དགོངས་ཤིག་བརྩེ་ཆེན་ཐུགས་རྗེའི་གཏེར། ། ཨེ་མ་དཀར་མིན་ལས་ཀྱི་མཐུ་བཙན་མོད། ། དད་དང་འདུན་སྟོབས་ལྷག་བསམ་བྱིན་མཐུ་ཡང་། ། སྟོབས་དང་ལྡན་ཕྱིར་དགེ་འབྲས་འདོད་རྒུའི་ཚོགས། ། མྱུར་དུ་སྨིན་པའི་རྟེན་འབྲེལ་མཐུ་འགྲུབ་མཛོད། ། བླ་མ་མཆོག་གསུམ་བོད་སྐྱོང་དམ་ཅན་དང་། ། གངས་ཅན་སྐྱེ་རྒུའི་དད་དམ་བྱིན་མཐུའི་སྟོབས། ། སྣང་སྟོང་རྒྱུ་འབྲས་མི་བསླུའི་བདེན་སྟོབས་ཀྱིས། ། སྨོན་པའི་དོན་རྣམས་མྱུར་དུ་འགྲུབ་པར་ཤོག ༼རབ་རྒྱལ་ལྕགས་སྤྲེལ་ཟླ་༡༠ཚེས་༡༥ ཕྱི་ལོ་༡༩༨༠ ༽
༄༅། །ཨེ་མ་ཧོ། །ཀ་དག་སྐྱེ་མེད་རྡོ་རྗེའི་ཕོ་བྲང་ནས། །ལྷུན་གྲུབ་བདེ་བའི་སྐུ་ཅན་པདྨ་འབྱུང་། །རྩ་གསུམ་ཆོས་སྐྱོང་རྒྱ་མཚོའི་སྤྱི་དཔལ་ཆེ། །གངས་ཅན་བསྟན་འགྲོའི་མགོན་པོ་ད་བཞེངས་ཤིག །མཐའ་དམག་དམ་སྲིའི་རུ་མཚོན་བསྒྲེངས་བའི་ཚེ། །རིག་འཛིན་མཁའ་འགྲོའི་གཙོ་མཆོག་པདྨ་འབྱུང་། །ཐུགས་རྗེའི་ཐུགས་དམ་མ་གཡེལ་དུས་ལ་བབ། །བདུད་འདུལ་གར་དགུའི་མཐུ་བྱིན་ད་བསྐྱེད་ཅིག །བསྟན་ཞབས་ཀླ་ཀློས་སྡུད་ལ་རིངས་པའི་ཚེ། །བདེ་མཆོག་གྲུབ་པའི་དཔའ་བོ་པདྨ་འབྱུང་། །མངོན་སྤྱོད་ལས་ལ་དགྱེས་པའི་དུས་ཡིན་གྱི། །དཔའ་གཏུམ་རྡོ་རྗེའི་གཟུགས་སྐུར་ད་བཞེངས་ཤིག །བོད་ཁམས་མཐའ་འཁོབ་སྐྱེ་བོས་འཇིགས་པའི་ཚེ། །འཇིགས་མེད་བརྟུལ་ཞུགས་མཆོག་གྲུབ་པདྨ་འབྱུང་། །ཕས་རྒོལ་ལྷག་མར་མཛད་པའི་དུས་ལ་བབ། །དྲག་ཤུལ་རལ་གྲིའི་རྣོ་དབལ་ད་ཕྱུངས་ཤིག །དུས་འཁྲུག་མཚོན་ཆའི་རུ་འཛིངས་རྔམ་པའི་ཚེ། །འཇིགས་མཛད་ཧེ་རུ་ཀ་དཔལ་པདྨ་འབྱུང་། ། ཁམས་གསུམ་སྟོབས་ཀྱིས་གནོན་པའི་དུས་ལ་བབ། །བདེ་ཆེན་རྡོ་རྗེའི་མཐུ་ནུས་ད་སྤོར་ཅིག །དབྱིངས་ནས་དག་ཆེན་མཉམ་པའི་ཡེ་ཤེས་ཆེ། །གཏུམ་རྔམ་ཨ་ལ་ཧ་ལའི་གད་རྒྱང་དང་། །ལྷན་ཅིག་ཁྲོ་ལ་ཁྲོས་པའི་སྐུར་སྟོན་ཞིང་། །བདུད་སྲིན་དམ་སྲིའི་སྙིང་ཁྲག་ད་རོལ་ཅིག །མཉམ་ཉིད་ཞི་བ་ཆེན་པོ་ཆོས་སྐུའི་ཐུགས། །ཁྲག་འཐུང་ཁྲོས་པའི་གཟུགས་སྐུར་མངོན་བཞེངས་ལ། །མཐའ་དམག་དུས་ཀྱི་འཁྲུག་རྩོད་ཞི་བ་དང་། །བོད་ཁམས་བདེ་ལ་འགོད་པའི་འཕྲིན་ལས་མཛོད། །ཅེས་པའང་མཐའ་དམག་དུ་རུ་ཀ་འོངས་པའི་རྟགས་ནམ་མཁའ་ཁྲག་མཚོའི་བཞིན་རས་སུ་བྱུགས་པའི་ཚེ་སྤྲང་སྨྱོན་འཇིགས་མེད་གླིང་པས་བགྱིས་པ་ཀླ་ཀློའི་འདུན་གྲོས་འཇིག་པའི་ཐུ་ལུམ་དུ་གྱུར་ཅིག དགེའོ། བླ་མ་ཡི་དམ་སྲུང་མའི་ཚོགས་རྣམས་ཀྱིས། །ཐུགས་རྗེའི་མཐུ་དཔུང་དྲག་ཏུ་བསྐྱེད་མཛོད་ལ། །བསྟན་འགྲོའི་གཤེད་དུ་གྱུར་པའི་མཐའ་དམག་རྣམས། ། ད་ལྟ་ཉིད་དུ་བཟློག་པའི་འཕྲིན་ལས་མཛོད། །
评论者：