ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> མི་སྣ།
 རྩོམ་ཡིག་ཀློག་པ།

ལྷ་རིས་སྒྱུ་རྩལ་བ་ཚེ་རྡོ་ལགས་ ཀྱི་སྒྱུ་རྩལ་ལམ་བུ།

  རྩོམ་པ་པོ:ལྷ་ཡོང་ཁུངས:བྲག་གཡབ།གཟིགས་གྲངས:17154ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2016/3/7 18:33:29ཚོགས་ཡར་སྤྲོད:admin

ལྷ་བྲིས་པ་བཟོ་རིག་སྒྱུ་རྩལ་བ་ཆེན་མོ་སྐུ་ཞབས་ཚེ་རྡོ་ལགས་ ཀྱི་སྒྱུ་རྩལ་དང་འབྲེལ་བའི་ལོ་རྒྱུས།།

སྲོལ་རྒྱུན་ལྷ་བྲིས་རི་མོ་སོགས་དེང་རབས་སྒྱུ་རྩལ་གྱི་འགྲོས་དང་བསྟུན་ཏེ་འཛིན་ སྐྱོང་སྤེལ་བ་ལ་རང་ཚུགས་དང་། རང་ལུགས་ཡོད་པའི་ལྷ་བྲིས་པ་བཟོ་རིག་སྒྱུ་རྩལ་བ་ཆེན་མོ་སྐུ་ཞབས་ཚེ་རྡོ་ལགས་ ཀྱི་སྒྱུ་རྩལ་དང་འབྲེལ་བའི་ལོ་རྒྱུས་གནད་བསྡུས་ཤིག་ངོ་སྤྲོད་ཚུལ་དུ་དགོད་ པར་བྱ།

དང་པོ། ལོ་ན་ཆུང་ངུ་དུས་ནས་སྒྱུ་རྩལ་ལ་དབྱིངས་ཡོད་པ།

ཁོང་ ནི་བོད་ཤར་ཕྱོགས་མདོ་ཁམས་བྲག་གཡབ་མ་དགོན་ཡེར་དགོན་པའི་ཁོངས། ག་གཟི་ཞེས་འབོད་པའི་ཡུལ་དེར་སྐྱེས།  ཆུང་དུས་ཁོང་གི་ཞང་ཚང་མདུན་ནས་ཡི་གེ་སྦྱོར་ཀློག་བྱེད་ཞོར་དང་། ཁྱིམ་གྱི་རྫི་བོ་སོགས་ལ་བསྐྱོད་སྐབས་དད་པ་དག་སྣང་ཤུགས་ཆེ་ཞིང་། ཡུལ་སྲོལ་འཛེམས་ཟོན་གོམས་ཆེ་བའི་རྒན་རབས་པ་ཚོས་ངག་གིས་གཤེ་བ་དང་། ལུས་ཀྱིས་བརྡེགས་པ་སོགས་གང་ཞིག་བྱས་མིན་ལ་མ་ལྟོས་པར། ལྷ་སྐུའི་རྒྱུ་ཆ་རུང་བའི་རང་བྱུང་འཇིམ་པའི་ཕུག་པ་ནང་སོང་སྟེ། བྱིས་པའི་མིག་ལམ་དུ་ཤར་མྱོང་བའི་ཞི་དྲག་གི་ལྷ་ཚོགས་དུ་མ་འཇིམ་པ་ལས་བཟོས་ ཤིང་།  དུས་དང་ཁོམ་པ་ཡོད་ཚད་ལ་ས་ཐོག་དང་། རྡོ་ལེབ་ངོས་འཇམ་སོགས་སུ་རྟོག་འཆར་དང་། དཔེ་ལེན་གྱིས་རི་མོ་མི་འདྲ་བ་མང་དུ་བྲིས་པས། ཆ་རྒྱུས་ཡོད་ལ་བྱེད་སྟངས་ཤེས་པའི་ཡུལ་མི་ཚོས་"ལྷ་བཟོ་"ཞེས་འབོད་ཀྱི་ཡོད། 

ཅུང་ ཟད་ནར་སོན་བཞིན་ཡོད་པའི་སྐབས་ཤིག་ལ་བུ་དགོན་དགེ་འགྱུར་མེད་ཆོས་དབྱིངས་ལགས་ ཡེར་དགོན་པའི་ནང་དུ་རབ་གནས་གནང་བ་ཕེབས། ཁོང་གི་མདུན་དུ་རང་ཉིད་ལྷ་བཟོ་དང་ལྷ་བྲིས་རི་མོ་སོགས་ལ་དབྱིངས་དང་སྦྱང་ འདོད་ཡོད་ལ། གོམས་པ་ཡང་ཅུང་ཟད་བསྟེན་ཡོད་ཚུལ་ཞུས་ཏེ། བྱམས་མདུན་ལ་ལྷ་བཟོ་སྦྱང་སར་འགྲོ་ཐུབ་ན་སྙམ་པའི་རེ་བ་དང་དྲན་པ་ཤིན་ཏུ་ཆེ་ རུང་། འབྲེལ་ཡོད་གཞན་ལ་སྐད་ཆ་དྲིས་ཤིང་གྲོས་འགོ་བཏོན་རུང་མོས་མཐུན་མ་བྱས། 

རྗེས་ སུ་བྲག་གཡབ་མ་དགོན་བཀྲ་ཤིས་གཡང་འཁྱིལ་དུ་ཆོས་ཞུགས་བྱས། སྐབས་དེར་ཁོང་གི་ན་མཉམ་ཆོས་གྲོགས་དང་། ངོ་ཤེས་རྒྱུས་ཡོད་ཚོས། མ་དགོན་ཚང་གི་བསྟན་པ་ཡང་དར་སྐབས་ཀ་བ་གཉིས་པ་ལྟ་བུ་རྒན་བློ་བཟང་མཆོག་ལ་ལྷ་ བཟོ་བསླབ་ན་ཡག་པོ་ཤེས་ས་ཡོད་ཚུལ་ཞུས་འདུག་པར། རྣམ་དཔྱོད་ཀྱི་གཏིང་ཟབ་ལ་སྙིང་སྟོབས་ཀྱི་དཔང་མཐོ་ཞིང་དུས་ཚོད་སྔ་ཕྱི་ཚང་མ་ ཁོང་དུ་འཆར་ཐུབ་པའི་རྒན་ཁོང་གིས།

 "བསླབ་ན་ལོབ་ཀྱི་རེད་"ཅེས་པའི་ཚིག་ཉུང་གནད་ཆེ་ཡི་ལེགས་བཤད་གདམས་ངག་དེ་བསྩལ་བས། སེམས་ལ་རེ་བ་དང་སྙིང་སྟོབས་སྤྲད། 

ལོ་ ཤས་ནས་གནའ་དང་དེང་གི་དུས་སུ་སྐད་གྲགས་ཡོད་པའི་དེ་མོ་དགུ་འཆམ་སྦྱངས་ཏེ་འཆམ་ དཔོན་གཞོན་པ་དང་། གཏོར་བཟོ་དཀར་རྒྱན་སོགས་ལ་འདྲིས་པར་བྱས་ཏེ་མཆོད་དཔོན་ཡང་བྱས། 

གཉིས་པ། སྒྱུ་རྩལ་གྱི་ལམ་བུ་ལ་ཐོག་མར་ཞུགས་ཚུལ།

བྲག་ གཡབ་མ་དགོན་གྱི་འདུ་ཁང་ཆེན་མོ་བསྐྱར་བཞེངས་གྲུབ་སྟེ། ཕྱི་ནང་གི་ཚོན་གཏོང་བ་དང་། རི་མོ་བྲིས་པ་སོགས་ལ་གནས་སྡེ་དགོན་པའི་དགེ་དཀའ་ཐུབ་ཤིང་གཤེགས་དང་། མིང་གྲགས་ཡོད་པའི་དཔལ་རི་ལྷ་བཟོ་སོགས་ཁ་ཞེ་གཉིས་མེད་དང་། ངོ་ལྐོག་མེད་པའི་ཐོག་ནས་ཚུལ་ལུགས་དང་མཐུན་པར་དགེ་རྒན་དུ་བསྟེན།  ད་དུང་ཆབ་མདོ་རིག་གནས་ཅུས་ཀྱི་དགེ་རྒན་ཆེན་མོ་བ་བློ་བཟང་ཤེས་རབ་མདུན་ནས་ ཟླ་བ་གསུམ་གྱི་རིང་རི་མོ་བཅས་སྦྱངས།  མདོར་ན་ཆུང་དུས་སུ་ཚོར་བ་དང་དབྱིངས་ཡོད་པའི་ཐོག་ནས་རི་མོ་སོགས་ལ་གོམས་ འདྲིས་དང་། ཅུང་ཟད་ནར་སོན་སྐབས་ཚོན་གཏོང་བ་དང་། རི་མོ་འབྲི་བ་སོགས་སྦྱོར་བ་དངོས་ལ་འཇུག་པ། དེ་ནས་ཡོངས་སུ་གྲགས་ལ་དོན་དངོས་ཡིན་པའི་ཚད་ལྡན་དགེ་རྒན་དུ་མ་གཙུག་ཏུ་བཀུར་ ཏེ་ཁྲལ་ཆོས་སླ་ཆོས་ཙམ་མ་ཡིན་པར་ལུས་ངག་ཡིད་གསུམ་ལྷ་བཟོ་དང་རི་མོའི་སྒྱུ་ རྩལ་ཐོག་ཏུ་བཞག་སྟེ་དཀའ་བསྐྱེད་ཁུར་འཁྱེར་དང་། ཞུམ་མེད་བློ་སྟོབས། རེ་འདུན་ཁྲི་ཕྲག་གི་ཀློང་ནས་མདུན་དུ་བསྐྱོད་པས། མཐར་རང་ཉིད་ལ་དབང་བའི་སྒྱུ་རྩལ་གྱི་སྡིངས་ཆ་ཞིག་དང་། རང་ཉིད་ཀྱིས་བསྐྲུན་པའི་སྒྱུ་རྩལ་གྱི་ཁོར་ཡུག་ཅིག་མངོན་དུ་གྱུར། 

གསུམ་པ།  སྒྱུ་རྩལ་གྱི་གར་སྟེགས་ཐོག་ནས་སྒྱུ་རྩལ་གྱི་བྱ་བ་དངོས་ལ་འཇུག་པ། 

བྲག་ གཡབ་དགོན་མ་དགོན་ནང་དུ་སངས་རྒྱས་བྱང་སེམས་དང་། ཡི་དམ་ཞི་ཁྲོ་ཆོས་སྲུང་བཀའ་སྡོད་སོགས་ཀྱི་ཚད་ལྡན་ཁུངས་ཐུབ་ཀྱི་ཐང་ཀ་མང་དུ་ བྲིས་ཤིང་། དཔལ་ལྡན་ཡེར་དགོན་པའི་འདུ་ཁང་གི་ཚོན་གྱི་འཆར་འགོད་དང་། ཚོན་གྱི་བྱ་བར་ཞུགས། ལྷག་པར་བྲག་གཡབ་༧སྐྱབས་མགོན་དགུ་པ་ཆེན་པོས་གསར་བཙུགས་གནང་བའི་"བྲག་གཡབ་བོད་ རིག་པའི་མཐོ་རིམ་སློབ་གཉེར་ཁང་"དབྱེན་འདུན་བཟོ་རིག་སྡེ་ཚན་གྱི་དགེ་རྒན་ཆེན་ མོ་བྱས་ཏེ། ཁོང་གི་ལག་འོག་དང་། ལམ་སྟོན་འོག་ནས་འཚར་ལོངས་བྱུང་བའི་རང་རྐྱ་འཕེར་ངེས་ཀྱི་ལྷ་བྲིས་སྒྱུ་རྩལ་པ་ མང་པོ་ཞིག་ས་ཕྱོགས་གང་སར་མཐོང་རྒྱུ་ཡོད། 

ཆབ་མདོ་མཁན་ ཆེན་རྗེ་བཙུན་བྱམས་པ་ཆོས་གྲགས་དང་།  མ་དགོན་མཁན་སྔགས་གཅིག་ཆོག་ཡང་དར་བསྟན་པའི་སྲོག་ཤིང་བླ་མ་འཇམ་དབྱངས་རྣམ་ གཉིས་ཀྱི་སྐུ་འདྲ་བཞེངས་པས། མཐོ་དམན་དྲག་ཞན་དུ་མས་མགྲིན་དབྱངས་གཅིག་གྱུར་གྱིས་བསྟོད་པའི་མཐེ་བོང་ བསྒྲེངས།  

ཆབ་མདོ་དགོན་ཆེན་བྱམས་པ་གླིང་དུ་ཆབ་མདོ་མཁན་ རིན་པོ་ཆེའི་རྩ་བའི་བླ་མར་གྱུར་པ་དགེ་རིན་ཆེན་རྡོ་རྗེ་ཞེས་བྱ་བའི་སྐུ་འདྲ་ དང་།  ཆབ་དགོན་ཡི་དམ་གྲྭ་ཚང་། བདེ་མཆོག་གྲྭ་ཚང་། དགྱེས་རྡོར་གྲྭ་ཚང་། གཡོ་མདའ་དགོན། སྤྲིན་ཆུ་མིག  །ལྷོམ་ལ་དགོན། སིབ་མདའ་དགོན་བཅས་ཀྱི་ནང་གི་ལྡེབ་རིས་བྲིས།  ཆབ་དགོན་སྒྲུབ་མཆོད་ཁག་གི་ཡི་དམ་གསང་བདེ་འཇིགས་གསུམ་གྱི་དཀྱིལ་འཁོར་བཞེངས་ སྐབས་ཐིག་དང་དཔེ་རིས་མང་དུ་བྲིས།  རྒྱ་ནག་ཁྲིན་འདུ་གྲོང་ཁྱེར་དུ་ཡོད་པའི་"གེ་སར་ཤམྦྷ་ལའི་"སྟོང་ཐང་གི་འཆར་ འགོད་དང་། བྲིས་ཆ་གཞན། གོས་ཆེན་སོགས་ཀྱི་འཆར་འགོད་ཕུན་སུམ་ཚོགས་པ་བྱས། 

བཞི་པ། རང་ཉིད་ལ་དབང་བའི་སྒྱུ་རྩལ་གྱི་བཟོ་རིག་ཁང་བཙུགས་པ། 

མི་ ཚེ་སྒྱུ་རྩལ་ལ་ཐིམ་བཞིན་ཡོད་པའི་ཤར་ནུབ་ཀྱི་མི་སྣ་ཕལ་ཆེ་བས་རང་ཉིད་སྒྱུ་ རྩལ་གྱི་མཁའ་དབྱིངས་སུ་ཅི་འདོད་དུ་འཕུར་བར། རང་ཉིད་ལ་དབང་ཞིང་། རང་ཉིད་ཀྱི་སྒྱུ་རྩལ་དང་འབྲེལ་བའི་ཚོགས་པ་དང་། སྡེ་ཚན་གལ་ཆེན་མཐོང་ཞིང་གསར་འཛུགས་གནང་སྟེ། སྒྱུ་རྩལ་ཐོག་ནས་མཐའ་ཡས་པའི་མི་སྣ་གང་མང་ཞིག་གི་རེ་བའི་འདུན་པ་བསྐངས་དང་ སྐོང་བཞིན་ཡོད་པ་ལྟར། ཁོང་གིས་ཀྱང་རྒྱ་ནག་ཁྲིན་ཏུ་གྲོང་ཁྱེར་དུ་རྒྱལ་ཕྱི་རྒྱལ་ནང་གི་ཁྲིམས་དང་ མཐུན་པའི་ཐོག་""བཙན་པོའི་བཟོ་རྩལ་""ཞེས་པའི་བཟོ་རིག་སྒྱུ་རྩལ་ཁང་ཞིག་གསར་ འཛུགས་བྱས་ཏེ། བོད་རང་གི་གནའ་བོའི་སྲོལ་རྒྱུན་གྱི་རྩ་བ་མ་བོར་ཞིང་། དེང་རབས་སྒྱུ་རྩལ་གྱི་ཉམས་དང་ལྡན་པའི་སྒང་པ་བོད་ཀྱི་ཁྱིམ་ཆས་དང་། ཡིད་དུ་འོང་བའི་ཁང་པའི་ཕྱི་ནང་གི་མཛེས་རྒྱན། དད་པའི་རྟེན་དུ་རུང་བའི་ཚད་ལྡན་གྱི་སྐུ་འདྲ་སྤུས་ལེགས། སྐྱ་ཐིག་དང་ཚོན་སྡེབ་ཚུལ་བཞིན་སོང་བའི་ས་དགེ་བཀའ་རྙིང་སོགས་རིས་མེད་ཆོས་ བརྒྱུད་ཁག་གི་ཐང་ཀ།  ཡི་དམ་སྣ་ཚོགས་པའི་དཀྱིལ་འཁོར་བྲིས་འབུར་ཅི་རིགས་སོགས། ཕྱོགས་ཀྱི་དགོན་སྡེ་ཁག་དང་། ཚོགས་པ་སྡེ་ཚན། མི་སྒེར་པ་སོ་སོར། རྒྱུ་འབྲས་ཀྱི་རྒྱ་མ་ལས་མི་བརྒལ་ཞིང་། ཁྲིམས་དང་ལུགས་ཀྱི་ཕྱི་རོལ་ཏུ་མ་གྱུར་པའི་ཐོག་ནས་ཁོང་རང་ཉིད་ཀྱི་སྒྱུ་རྩལ་ བརྩམས་ཆོས་སྔོན་མངགས་ཞབས་ཞུ་དང་། བླུ་ཚོང་གི་བྱ་བ་བཅས་གཉེར་བཞིན་པ་ལགས། 

   ལྔ་པ། མདོ་དབུས་ཁམས་གསུམ་ལ་སྒྱུ་རྩལ་གྱི་སྡིངས་ཆའི་ཐོག་ནས་ཞིབ་འཇུག་ལྟ་སྐོར་སོང་བ། 

བོད་དབུས་ཁུལ། ཕོ་བྲང་པོ་ཏ་ལ། ལྷ་ལྡན་གཙུག་ལག་ཁང་། ནོར་བུ་གླིང་ཀ། གདན་ས་སེ་འབྲས་དགེ་གསུམ་སོགས་དང་། 

བོད་ མདོ་སྨད་ཁུལ། རེབ་གོང་རོང་པོ་དགོན་ཆེན། གཉན་ཐོག  །སེངྒེ་གཤོང་། ཡར་མགོ་དགོན།  མར་མགོ་དགོན་དང་། རྗེ་སྐུ་འབུམ། བླ་བྲང་བཀྲ་ཤིས་འཁྱིལ།  བྱ་ཁྱུང་དགོན། 

བོད་མདོ་ཁམས་ཁུལ། སྡེ་དགེ་དགོན་ཆེན་དང་། སྡེ་དགེ་པར་ཁང་། འཇོ་མདའ་ཝ་ར་དགོན་སོགས་ཀྱི་ནང་དུ་གནའ་བྲིས་རི་མོ་དང་། དེང་རབས་འགྱུར་བ་སོགས་ལ་ཞིབ་འཇུག་བྱེད་དུ་སོང་། 

གང་ ལྟར་ཁོང་ནི། བོད་ཀྱི་གནའ་བོའི་ལམ་ལུགས་མ་བོར་ཞིང་། དེང་རབས་ཀྱི་རྗེས་སུ་མ་ལུས་པའི་ཐེག་པ་རིམ་འཛེགས་ཀྱི་ལྷ་བྲིས་པ་དང་ལྷ་བཟོ་ སྒྱུ་རྩལ་བ་ཞིག ། ཚོན་གྱི་སྡེབ་སྦྱོར་མཁས་པའི་ཚོན་གཏོང་བ་ཞིག་དང་།  ད་དུང་ཁྱིམ་ཆས་འཆར་འགོད་པ་ཞིག  །ལྷག་པར་བོད་ཀྱི་བཟོ་རིག་སྒྱུ་རྩལ་དགུང་དུ་འདེགས་པའི་བཟོ་རྩལ་བ་ཆེན་མོ་ ཞིག་སྟེ།  

སྐྱེ་བ་གཞན་དང་གཞན་ལ་ལྷ་བྲིས་རི་མོ་དང་། ལྷ་བཟོ་ཚོན་གཏོང་སོགས་ལ་གོམས་ཡོད་མེད་ཇི་ལྟར་ཡང་ཆུང་བྱིས་པའི་དུས་ནས་གོམས་ པ་སྔོན་དུ་སོང་ཞིང་། དེ་ལ་མཁས་པའི་མཁས་པ་དུ་མ་བསྟེན་ཏེ། རང་གི་རྣམ་པར་དཔྱོད་པའི་བློ་གྲོས་དང་། བླ་ན་འབར་བའི་ལག་རྩལ་བེད་སྤྱོད་ཀྱིས། ལྷ་བཟོའི་སྒྱུ་རྩལ་དང་འབྲེལ་བའི་བྱ་བ་ལ་མི་འཇིགས་པའི་སྤོབས་པ་དང་། མི་འགྱུར་བའི་གདེང་ཐོབ་བོ། དེ་ཡང་ཇི་སྐད་དུ། ས་པཎ་གྱིས། སྡེབ་སྦྱོར་སྣ་ཚོགས་མེ་ཏོག་ཆུན་པོ་ལས། 

 སྐྱེ་བ་གཞན་དུ་སྦྱངས་པ་དང་།།

མཁས་པ་དུ་མ་བསྟེན་པ་དང་།།

རྣམ་པར་དཔྱོད་པའི་བློ་གྲོས་ཀྱིས།།

ཤེས་བྱ་ཀུན་ལ་འཇིགས་མེད་ཐོབ།། 

ཅེས་གསུངས་པ་ལྟར་ལགས་སོ།  

ད་ དུང་དཀའ་སྡུག་སྟོང་ལ་གདོང་གཏད། བརྩོན་པ་ཁྲི་ཡིས་འབད་པ་བྱས། འགྱུར་བ་མེད་པའི་སྙིང་སྟོབས་བསྐྱེད་དེ། མདུན་དུ་བསྐྱོད་པའི་མི་སྣ་ཁོང་ལྟ་བུ་ལ་ནི། བྱ་གཞག་ཐད་གྲུབ་འབྲས་མི་ཐོབ་པ་མི་སྲིད་དེ།  ཨ་རིའི་སྲིད་འཛིན་རབས་སུམ་བཅུ་པ་ཁི་ལན་ཊོན་གྱིས། "དཀའ་བསྐྱེད་འབད་བརྩོན་དང་། གཏན་ནས་མི་བསྒུར་བའི་འཐབ་འཛིང་གི་སྙིང་སྟོབས་ལྡན་ན། སྐྱེ་བོ་ཞིག་ཕྱོགས་ལས་མི་རྒྱལ་བ་མི་སྲིད་དོ།" ཞེས་བཤད་པ་ལྟར་རོ། 

རྒྱ་ ནག་གི་སྐྱེས་མ་སློབ་གསོ་བ་སྐད་གྲགས་ཅན་"དབྱིས་ཅན་ལིས་"།  "ཨ་མ་མཛངས་མ་དགེ་བའི་བཤེས་གཉེན་འདྲ་"ཞེས་པའི་དཔེ་དེབ་ལས། འཚོ་བ་ནི་ཆེས་བཟང་བའི་སློབ་ཁྲིད་དེ། བརྒྱུད་མྱོང་བའི་ཉམས་མྱོང་རེ་རེ་ནི། རྩ་ཆེ་བའི་སློབ་ཁྲིད་རེ་རེ་ཡིན།" ཟེར་བ་ལྟར། ལྷ་བྲིས་སྒྱུ་རྩལ་བ་ཁོང་ནི་སྒྱུ་རྩལ་གྱི་འཚོ་བ་དངོས་ལ་ཞུགས་ཏེ། སྒྱུ་རྩལ་གྱི་བྲོ་བ་མངར་སྐྱུར་མཐའ་དག་རོ་མྱོང་ཐུབ་པ་ཞིག་ལས། དཔེ་ཐོག་བྲོ་རྡུང་དང་། གདན་ཐོག་ཆུ་རྐྱལ་གྱི་གནས་བབ་ལས་རྦད་དེ་བརྒལ་ཡོད་པས།  ངེས་པ་དོན་གྱི་ལྷ་རིས་སྒྱུ་རྩལ་བ་ཞིག་ལགས་སོ།  

ས་པཎ་གྱིས། རོལ་མོའི་བསྟན་བཅོས་ལས། 

འགའ་ཞིག་འགའ་ལ་མི་མཛེས་ཤིང་།།

ལ་ལ་གཞན་ལ་མཛེས་མ་ཡིན།།

མཁས་རྨོངས་སྐྱེས་པ་བུད་མེད་སོགས།།

ཀུན་ ལ་མཛེས་པ་རོལ་མོ་ཡིན།། ཞེས་གསུངས་པ་ལྟར། རོལ་མོའི་སྒྱུ་རྩལ་དང་འདྲ་བར། རི་མོ་དང་བཟོ་ཡི་སྒྱུ་རྩལ་འདི་ཡང་ཀུན་ལ་མཛེས་ཤིང་། ཀུན་ལ་མཁོ་བ། ཀུན་ལ་དགོས་ཤིང་། ཀུན་ལ་འཕྲོད་པ་ཞིག་ལགས་པས།  སྒྱུ་རྩལ་བ་ཁོང་དང་། སྒྱུ་རྩལ་བ་ཁོང་གི་བྱ་གཞག་གོང་ནས་གོང་དུ་འཕེལ་བའི་སྨོན་འདུན་དང་། རྒྱབ་སྐྱོར་ཞུ་དགོས།  

མེས་པོས་དཀའ་བ་བསྐྱེད་པའི་རིག་གཞུང་ལ།།

དེང་རབས་སྒྱུ་རྩལ་ཉམས་ཀྱིས་ཕྲ་བཏབ་པའི།།

"བཙན་པོའི་བཟོ་རྩལ་"གླིང་གི་མདུན་ལམ་དེ།།

སྣང་བྱེད་ཉི་མ་འབུམ་གྱིས་གསལ་བར་སྨོན།།

·རྩོམ་ཡིག་གོང་མ:སྐད་ཡིག་དང་ནང་ཆོས་གཅིག་ཏུ་འཁྲུལ་མི་ཉན།
·རྩོམ་ཡིག་འོག་མ:རུ་མང་ཀླུ་མཁར་རྒྱལ་གྱི་གཞས་ཚིག་ཕྱོགས་བསྒྲིགས།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·དབྱངས་ཅན་མའི་གཟིགས་སྣང་བསྟོད་པ་ཞེས་བྱ་བ། 2015/10/18 11:20:59
·གྲོགས་དྲན་གྱི་གདུང་དབྱངས། 2015/1/15 12:49:51
·གཡང་སྐྱིད་མ།༼དབྱངས་ཅན་མ། 2013/9/8 23:58:59
·ཀུན་དགའ་དོན་གྲུབ། རང་གཞན་ཀུན་ཕུང་། 2012/12/30 21:41:28
·བར་སྐོར་གླིང།། 2012/11/30 20:43:17
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:hpihfxgaszf
IHnzwK  <a href="http://oqnuyucxxstw.com/">oqnuyucxxstw</a>, [url=http://uvpcygfvfzuq.com/]uvpcygfvfzuq[/url], [link=http://vvutbvmwpcjx.com/]vvutbvmwpcjx[/link], http://cnkhyoalmnmo.com/
发表时间:2016/11/1 0:50:43 [来自: 46.161.9.32]

འབྲེལ་ཡོད་དཔྱད་བརྗོད 1 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།37.11MS