འཛམ་གླིང་དཀར་ཟས་ཉིན་མོ།།
སོག་མདའ།
ཀ་ར་བུ་རམ་དཀར་ཟས་དྭངས་གཙང་གི་ཚལ་རིགས།།
ཁུ་བ་ཞིམ་པོ་ཤིང་ཏོག་སྣ་མང་གི་བཅུད་བཟང་།།
གུར་གུམ་བཟང་དྲུག་སྨན་སོགས་འཚོ་བཅུད་ལ་རོལ་ནས།།
ངན་གསོད་ཤ་ཁྲག་ཟ་བའི་སྡིག་ལས་འདི་སྤོངས་ན།
ཅ་ལེ་ཅོ་ལེ་དམར་ཟས་གཞན་སྲོག་ལ་རྒོལ་བས།།
ཆོ་མེད་སྡིག་པ་བསགས་པའི་ཐབས་ཚུལ་འདི་དོར་ནས།།
ཇོ་བོ་ཡིད་བཞིན་ནོར་བུའི་བཀའ་གསུང་གི་བྱིན་རླབས།།
ཉ་སོགས་སེམས་ཅན་དུད་འགྲོ་ཚེ་ཐར་ལ་འབད་ན།།
ཏ་ཐཱ་ག་ཏའི་བསྟན་པ་འཇིག་རྟེན་ལ་དར་བས།།
ཐ་དད་འགྲོ་བ་ཀུན་གྱི་སེམས་རྒྱུད་དེ་འདུལ་ནས།།
ད་ནས་བཟུང་སྟེ་ཕྱི་མ་འགྲིམས་རག་གི་བར་ལ།།
ན་གེ་ནོག་གེ་བྱ་ངན་སྲོག་གཅོད་ལ་འཛེམས་རོགས།།
པ་ཕ་སྐྱེད་བྱེད་དམ་པ་དུང་དུང་གི་གཤིས་ཀྱིས།།
ཕ་ཝང་གནམ་ལ་འཕུར་བའི་གཤོག་ལྡན་གྱི་འདབས་ཆགས།
བ་གླང་རི་ནས་འཚོ་བའི་རྨིག་ལྡན་གྱི་དུད་འགྲོ།།
མཉམ་མཐུན་སེམས་ཀྱིས་བསྐྱངས་ནས་གཅེས་སྲོག་འདི་མ་གཅོད།།
ཙ་རི་གནས་བསྐོར་ལ་སོགས་དགེ་བ་ཡིས་དབེན་ཞིང་།།
ཚ་གསུར་བསང་གསོལ་མཆོད་པའི་རྣམས་གྲངས་ནི་མེད་ཀྱང།།
ཛ་དྲག་གཞན་སྲོག་སྐྱོབ་པའི་བྱང་ཆུབ་ཀྱི་སེམས་མཆོག །
ཝ་ཏི་འཕགས་པ་མཆེད་བཞིའི་ཆོས་ཚན་ལས་མཆོག་གོ།།
ཞ་ར་འོན་པ་མ་ཡིན་རྣམ་དཔྱོད་ཀྱིས་ཕྱུག་པས།
ཟ་མ་དཀར་ཟས་མཆོད་པའི་ཤེས་ལྡན་གྱི་མི་ལ།།
འ་ཅག་མི་བུ་ཀུན་གྱིས་བརྩི་བཀུར་རེ་བྱས་ན།།
ཡ་ཐོད་མིག་གཉིས་མངའ་བ་རིན་ཐང་ནི་ཆེའོ།།
རི་དྭགས་རི་ནས་ལྡིང་ན་རི་ཀླུང་གི་རྒྱན་ཡིན།།
ལུ་མ་སྤང་ནས་བརྡོལ་ན་སྤང་ཐང་གི་བཅུད་ཡིན།།
ཤ་ཁྲག་དམར་ཟས་སྤང་ན་འཚེ་མེད་ཀྱི་ཞིང་ཡིན།།
ས་ཐོག་བདེ་དགེའི་འཚོ་བ་འདི་ལས་ལྷག་མེད་དོ།།
ཧ་ན་ཧོན་ནེ་རྡོལ་བའི་ཁ་ནང་གི་ཚིག་མིན།།
ཨ་ཇོ་རང་གི་འཚོ་བ་དཀར་ཟས་འདི་ཡིན་པས།།
དཀར་དམར་ཟས་ལ་རོལ་བའི་རིགས་མཐུན་ཀྱི་ཚོགས་ལ།།
ཀ་ཕྲེང་མུ་ཏིག་ཕྲེང་བ་སུམ་ཅུ་འདི་འབུལ་ལོ།།
ཞེས་སྤྱི་ལོ་༢༠༡༥་ཟླ་༡༡ཚེས་༢༤ཉིན་དགོང་དྲོའི་ཆུ་ཚོད་༩ཐོག་རང་ཤག་ནས་སྦྱར་བ་དགེ་ལེགས་འཕེལ།
评论者：