ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ཚངས་དབྱངས་འདུ་ར། >> རིག་དཔྱད།
 རྩོམ་ཡིག་ཀློག་པ།

ཐང་ག་བྱ་བའི་མིང་བོད་སྐད་རྣལ་མ་ཡིན་པའི་སྐོར།

  རྩོམ་པ་པོ:ཚངས་དབང་དགེ་འདུན་བསྟན་པ།ཡོང་ཁུངས:ངེད་དྲ་བ།གཟིགས་གྲངས:20124ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2015/11/19 12:01:23ཚོགས་ཡར་སྤྲོད:admin

  

                                              ཐང་ག་བྱ་བའི་མིང་བོད་སྐད་རྣལ་མ་ཡིན་པའི་སྐོར།


                                                        ཚངས་དབང་དགེ་འདུན་བསྟན་པ།  



ད་ཆར་བལྟས་ཡོང་ན། རྒྱ་ཡིག་གི་དཔེ་དེབ་ཁག་ལས་བོད་ཀྱི་༼ཐང་ག༽་བྱ་བའི་ཐ་སྙད་དེ་རྒྱ་ནག་དང་འབྲེལ་བ་ཡོད་ཚུལ་གྱི་སྐད་ཆ་ཇེ་མང་ནས་ཇེ་མང་དུ་འགྲོ་གིན་འདུག ངས་དེ་སྔོན་༼བོད་ལྗོངས་ཞིབ་འཇུག༽་གི་དུས་དེབ་སྟེང་ཐང་ག་བྱ་བའི་མིང་གི་གོ་དོན་ཐད་རང་གི་ལྟ་ཚུལ་མདོར་བསྡུས་ཤིག་སྤེལ་ཡོད་པ་དེས་ཅུང་ཟད་རྔོ་ཐོགས་པ་རེད་སེམས། ད་བསམ་ན་དེ་ཙམ་གྱིས་ཅི་ཡང་གོ་མི་ཆོད་པ་ཞིག་ཡིན་པ་ཡིད་ཆེས་གཏིང་ནས་རྙེད་སོང་། ལར་བཤད་ན། ཐ་སྙད་འདི་ནི་རྩོད་གཞི་ཅན་དུ་འགྱུར་དགོས་པ་ཞིག་མི་འདུག་ཀྱང་། འོན་ཏེ་ལ་ལས་ཧམ་སེམས་བཅངས་ཤིང་མི་རིགས་རིང་ལུགས་ཀྱི་ལྟ་བ་ཐལ་དྲགས་པ་ཡིན་ནམ་གང་ཡིན་བཤད་དཀའ་ཡང་། དེང་སང་ཉིན་རེ་ནས་ཉིན་རེར་ཐང་ག་བྱ་བའི་མིང་གི་གོ་དོན་ལ་རྩོད་པ་ཇེ་མང་དུ་གྱུར་འདུག ཕྱོགས་གཞན་ཞིག་ནས་བཤད་ན་དེ་ནི། བོད་ཀྱི་ལྷ་བཟོ་ཚོས་ཐང་ག་འབྲི་རྒྱུ་གཙོ་བོར་བྱས་པ་ལས་ཞིབ་འཇུག་བྱ་རྒྱུར་སྣང་ཆུང་བྱས་པའི་འབྲས་བུ་ཞིག་ཀྱང་རེད་འདོད་ཀྱིན་ཡོད། ང་ཚོས་ནམ་རྒྱུན་གཞན་གྱིས་ཅི་བཤད་ནའང་བཤད་དུ་ཆུགས་སྙམ་གྱིན་ཡོད་པས། ད་ལྟ་ཁ་ཅིག་གིས་རང་རེའི་ཕ་མྱེས་ཡང་མྱེས་དང་། བུ་བརྒྱུད་ཚ་བོ་དང་བཅས་པ་དག་གིས་རྩོལ་བ་བྱས་པ་ཡོད་ཚད་གཞན་གྱིས་ཡིན་ཟེར་ན། རང་རེས་དེར་ལན་དུ་ཁོང་ཁྲོ་ལངས་པ་ལས། མིན་ན་མིན་པའི་ལན་དུ་རྒྱུ་མཚན་ཁུངས་ལུང་དང་། བདེན་པ་སྨྲ་བའི་སྤོབས་པ་ནི་མེད། ཡོད་པ་ནི་འཁང་ར་དང་ཞེ་སྡང་རེད། གནས་བབ་དེར་བརྟེན་ནས་རིག་གཞུང་ཁྲམ་པ་དག་གིས་དཀྲོག་གཏམ་སྣ་ཚོགས་བཟོས་ནས་གང་དྲན་དྲན་ཞིག་ལག་བསྟར་དང་། བདེན་ཅོག་ཅོག་ཅིག་ཁྱབ་བསྒྲགས་བྱས་དང་བྱེད་བཞིན་པ་དེ་རེད།
ཉེ་ཆར་རྒྱའི་ཤེས་ཡོན་པ་ཁ་ཅིག་གིས། ཐང་ག་བྱ་བ་ནི་རྒྱ་སྐད་ཡིན་ཞིང་། དེའི་དོན་ནི་ཐང་རྒྱལ་རབས་སྐབས་སུ་ཤིང་བྱང་ལྟ་བུའི་ངོས་སུ་རི་མོ་བྲིས་པ་(唐代卡片化) དེ་ལ་ཟེར་སྐད། དེ་ནི་རྒྱ་ཡིག་གི་(唐卡)བྱ་བ་དེ་ཐད་ཀར་གོ་བ་ལེན་བཞིན་པ་ཡིན་འདུག་སྙམ། ངོ་མ་བཤད་ན། དེ་འདྲའི་ལོ་རྒྱུས་བྱུང་ཚུལ་རྒྱ་ཡིག་གི་མཛེས་རྩལ་གྱི་གཞུང་ལུགས་ཁག་ཏུ་འཁོད་ཡོད་པ་ཞིག་གང་དུ་ཡང་མི་གདའ་བས། བཤད་ཚུལ་དེ་ནི་བསམ་གཟས་ནས་འཁྱོག་བཤད་བྱས་པ་ཞིག་ཡིན་པ་ཧ་ཅང་གསལ་ཡང་། བོད་ཀྱི་མཁས་པ་དག་ནི་སྒམ་བརླིང་ཁོག་ཡངས་ཅན་ཤ་སྟག་ཡིན་ཕྱིན། འདི་འདྲའི་དོན་ཆུང་གི་ལས་ལ་གསུང་ལན་འབྱོན་མཁན་ནི་མི་འདུག་གོ།།
ད་ནི་རྒྱ་ནག་གི་མཁས་པ་མ་ཟད་བོད་ཀྱི་མཁས་པ་དག་ཀྱང་བརྗོད་བྱ་འདིའི་ཐད་ལ། རྒྱ་ནག་དང་འབྲེལ་བ་ཡོད་པར་བསམ་གིན་ཡོད་ས་རེད། དཔེར་ན། ༼བཟོ་གནས་སྐྲ་རྩེའི་ཆུ་ཐིགས༽་ལས། ལོ་རྒྱུས་སྨྲ་བ་འགའ་ཞིག་གིས། ཐ་སྙད་དེ་རྒྱ་སྐད་ཀྱི་སྒྲ་ཐད་འགྱུར་ཡིན་ལ། དེའི་སྲོལ་ཡང་རྒྱ་ནག་ནས་བྱུང་བར་བཤད་མོད། ཁོ་བོས་དེ་སྔོན་ཡིད་རྟོན་རུང་བའི་ལོ་རྒྱུས་ཁུངས་བཙན་མ་མཐོང་བས་འདི་ནི་ འདིའོ་ཞེས་སྨྲ་བའི་སྤོབས་པ་ཞུམ་མོད། འོན་ཀྱང་དེ་ལ་བསམ་དགོས་པ་ཞིག་ཀྱང་སྣང་སྟེ། བོད་ཀྱི་ལོ་རྒྱུས་ཆེན་མོ་ཁག་ལས། རྒྱལ་པོ་སྲོང་བཙན་གྱི་དུས། བློན་པོ་མགར་གྱིས་རྒྱ་བཟའ་ཀོང་ཇོ་བོད་དུ་སྤྱན་འདྲེན་པའི་ལྷན་དུ། ཇོ་བོ་ཤཱཀྱ་མུ་ནེ་དང་བཟོ་སྣ་བཅོ་བརྒྱད་ཀྱི་དཔེ། སྨན་དཔྱད་ཆེན་མོ་དང་། རྩིས་ཀྱི་སྤོར་ཐང་བརྒྱད་ཅུ་རྣམས་ཀྱང་བོད་དུ་དྲངས། ཕན་ཚུན་སློབ་མ་དང་བཟོ་རྩལ་པ་མངགས་སོ་ཞེས་བྱུང་བ་དང་། ཁྲི་སྲོང་ལྡེ་བཙན་གྱིས་བསམ་ཡས་བཞེངས་སྐབས་དར་ཐང་ཆེན་མོ་གསུམ་བཞེངས་ཚུལ་བཤད་ཅིང་། དེ་ལ་ལོ་རྒྱུས་འགའ་ཞིག་ཏུ་སི་ཐང་ཞེས་བྲི་སྣང་མོད་སྒྲ་འགྱུར་ལ་སི་ཐང་དང་། དོན་འགྱུར་ལ་དར་ཐང་ཞེས་བརྗོད་པ་ཡིན་ནམ་སྙམ་དཔྱོད་དོ།། ༼1 ཞེས་ འཁོད་ཡོད། 
དེས་ན་ཁོང་གི་བཞེད་དགོངས་ལྟར་ན། ཐང་ག་བྱ་བ་ནི་སི་ཐང་ལས་སྒྲ་འགྱུར་བར་འདོད་ལ། དར་ཐང་ཞེས་པ་ནི་སི་ཐང་གི་དོན་འགྱུར་ཡིན་པར་བཞེད་འདུག མཐར་ཐུག་ན་བོད་ཀྱིས་བཤད་པའི་༼ཐང་ག༽་བྱ་བའི་མིང་དེ་ནི། རྒྱ་ནག་ནས་དར་བར་འདོད་ཀྱིན་ཡོད་པ་མངོན་གསལ་རེད། སྤྱིར་བཤད་ན། གནས་བབ་དེ་དངོས་གནས་དེ་འདྲ་ཡིན་ན་གང་ནས་དར་འོང་ཡང་ལོ་རྒྱུས་ནི་གསལ་བོར་བཤད་དགོས་པས། ཇི་ལྟར་ཡིན་ན་དེ་ལྟར་དུ་བཤད་པ་ནི་དྲང་བདེན་གྱི་རིག་གཞུང་འགྲོ་སྟངས་རེད། འོན་ཏེ། ངེད་ཀྱིས་ནི་གོང་དུ་བཤད་པ་དེ་དག་ནི་དེ་འདྲ་ཞིག་མ་རེད་འདོད་ཀིན་ཡོད་པ་མ་ཟད་ངས་བལྟས་ན། བཤད་ཚུལ་དེའི་རིགས་ལ་གནད་དོན་མང་པོ་ཞིག་འདུག གཤམ་དུ་གནད་དོན་དེའི་རིགས་ལས་གཅིག་གཉིས་ཤིག་ཟུར་དུ་ཁོལ་ནས་ང་ཚོས་དཔྱད་བསྡུར་བྱ་སྟེ། གོང་དུ་དར་ཐང་ཆེན་མོ་གསུམ་བཞེངས་ཞེས་ལོ་རྒྱུས་ཀྱི་ཡིག་ཚང་གང་དུ་གསལ་བ་མིང་ འཁོད་མེད་ཀྱང་། སྐུ་ཞབས་ཞེ་ཅིས་ཧྲིན་(谢继胜)གྱིས་བརྩམས་པའི་༼མི་ཉག་གི་བོད་བརྒྱུད་རི་མོ་-西夏藏传绘画༽་ལས། ཆེས་ཡིད་ཕངས་པ་ཞིག་ནི། རྩོམ་པ་པོས་དཀོན་མཆོག་བསྟན་འཛིན་དཔེ་ཆ་གང་ནས་ལུང་དྲངས་པ་དཔྱད་གཞི་ཙམ་ཡང་བཀོད་མེད་མོད། འོན་ཏེ། པིར་ཐོགས་པ་ངེད་ཀྱིས་བཤད་ཕྱོགས་འདི་བརྒྱུད་ནས་༼སྦ་བཞེད༽དུ་འཚོལ་ཀློག་བྱས་པ་ན། དེ་ནས་རྙེད་བྱུང་། བསམ་ཡས་གཙུག་ལག་ཁང་གི་ཉིས་ཐོག་ཏུ། དར་ཐང་ཆེན་པོ་གསུམ་(三幅丝缎 唐卡)བཞེངས་ཡོད་ཅེས་བོད་ཡིག་གིས་dar thang chen po gsumབྲིས་ཡོད་པར་མཐོང་། ཞེས་པ་དང་། ཡང་དེ་ཉིད་ལས། ད་དུང་ངེད་ཀྱིས་དར་ཐང་བྱ་བའི་དར་ནི་རྒྱ་སྐད་དུ་(丝绸)སི་ཀྲིག་གི་འབོད་ཚུལ་ དང་། དར་ཐང་དང་སི་ཐང་གང་ཡིན་ཡང་དེ་ནི་རྒྱ་སྐད་དུ་(丝质唐卡)བྱ་བའི་བོད་སྐད་ཀྱི་འབོད་སྟངས་ཤིག་སྟེ། དར་ཐང་ནི་གནའ་བོའི་དུས་ཀྱི་འབོད་ཚུལ་ཞིག་དང་། སི་ཐང་ནི་ཕྱིས་སུ་དར་བར་འདོད། ཅེས་པ་དང་། སི་ཐང་དང་བོད་ཀྱི་ཐང་གའི་འབྱུང་ཁུངས་ཐད་འབྲེལ་བ་ཤིན་ཏུ་ཟབ་ལ། 
༼སྦ་བཞེད༽་དུ་དྲངས་པའི་དར་ཐང་ཆེན་མོ་བྱ་བ་དེ་ཡོད་ངེས་པ་མ་ཟད། དེས་པཱ་ལི་དང་(巴勒)ཐའོ་ཆིས་ཅོ་ཧྲུག(杜齐)གཉིས་ཀྱིས། བོད་ཀྱི་ཐང་གའི་འབྱུང་ཁུངས་དེ་རྒྱ་གར་གྱི་རས་བྲིས་རི་མོ་ལ་ཁུངས་གཏུགས་པར་བཤད་པ་དེ་ལྟར་ཡང་མ་ཡིན་པར། བོད་ཀྱི་ཐང་ག་དེ་རྒྱ་ནག་གི་རི་མོ་ནས་འགྱུར་བར་ཡིན་པ་གལ་ཆེ་བའི་གསལ་བཤད་ར་སྤྲོད་གནང་ཡོད།  ༼ 2ཅེས་གསལ་ཞིང་། 
གོང་གི་ནང་དོན་ཁག་ལས་སྐུ་ཞབས་ཞེ་ཅིས་ཧྲིན་གྱིས། དཀོན་མཆོག་བསྟན་འཛིན་གྱིས་བཤད་པའི་དར་ཐང་ཆེན་པོ་གསུམ་ཞེས་པའི་ཐ་སྙད་དེ་༼སྦ་ བཞེད༽་དུ་བཀོད་འདུག་ཅེས་གསལ་བཤད་གནང་འདུག་པ་དང་། དར་ཐང་དང་སི་ཐང་གི་ནང་དོན་ཡང་དཀོན་མཆོག་བསྟན་འཛིན་གྱིས་བཤད་པ་ནང་བཞིན་འཐད་པ་བྱུང་ཡོད། དེས་ན་ཁོང་གཉིས་ཀྱི་ལྟ་བ་ཕུགས་སུ་གཏད་ན་ཐང་ག་ཟེར་བ་སི་ཐང་ལས་བྱུང་བར་འདོད་པ་ནི་གཅིག་མཚུངས་ཡིན་ནོ།། ལར་ཡིན་ན། དཀོན་མཆོག་བསྟན་འཛིན་ནི་ཉེ་ཆར་བོད་ཀྱི་རི་མོ་པའི་ནང་ནས་ལག་རྩལ་དང་གཞུང་ལུགས་གཉིས་འཛོམས་ཀྱི་མཁས་པ་ཞིག་དང་། ཁོང་གིས་མཛད་པའི་བོད་ཀྱི་བཟོ་རིག་གི་གཞུང་ཆེན་༼བཟོ་གནས་སྐྲ་རྩེའི་ཆུ་ཐིགས༽་ ནི། ད་ཕན་བདག་གིས་མཐོང་བའི་བོད་ཀྱི་བཟོ་རིག་གི་གཞུང་ལུགས་ཁག་ལས་ཕུལ་བྱུང་གི་གྲས་ཡིན་པས། བདག་གིས་ཀྱང་གདེང་འཇོག་མཐོན་པོ་བྱེད་བཞིན་ཡོད། སྐུ་ཞབས་ཞེ་ཅིས་ཧྲིན་གྱིས་བརྩམས་པའི་༼མི་ཉག་གི་བོད་བརྒྱུད་རི་མོ༽་བྱ་བ་ནི། ཞིབ་འཇུག་གི་ཐབས་ལམ་བཟང་ཞིང་ཁྱབ་ཁོངས་ཆེ་བ། དོན་གནད་གསལ་ཞིང་དཔྱད་སྟོབས་ཕྲ་བ་བཅས་ཕུན་སུམ་ཚོགས་པའི་བརྩམས་ཆོས་ཤིག་ཡིན་པས། དེང་སང་སྤྱི་ཚོགས་སྟེང་ཡིད་འཇོག་ཆེན་པོ་བྱེད་ཀྱི་ཡོད། དེ་ལྟ་བུ་ཆེད་ལས་མཁས་པ་གཉིས་ཀྱིས་དགོངས་པ་གཅིག་དང་དབྱངས་གཅིག་གིས་ཐང་ག་ནི་ སི་ཐང་ལས་བྱུང་ཞིང་། བསམ་ཡས་གཙུག་ལག་ཁང་དུ་དར་ཐང་ཆེན་པོ་གསུམ་བཞེངས་ཡོད་ཚུལ་སོགས་ཡོད་ཚད་ཀྱི་ཁུངས་གཏུགས་ས་ནི་༼སྦ་བཞེད༽་ལ་བཅོལ་ཡོད་པ་འདི་རེད། དེས་ན་ང་ཚོས་ཐང་གའི་ཐ་སྙད་སྐོར་བརྡར་ཤ་གཅོད་དགོས་ཚེ། ཐོག་མར་༼སྦ་བཞེད༽་ཀྱི་དཔེ་ཆར་བལྟ་དགོས་ཤིང་། དེར་གཟབ་ནན་གྱི་ཞིབ་དཔྱོད་བྱ་དགོས་པ་ནི་མངོན་སུམ་བདེན་པ་རེད། སྔོན་དུས་ཡིན་ན་༼སྦ་བཞེད༽་དཔེ་ཆ་ནི་ཧ་ཅང་དཀོན་པོ་ཞིག་ཡིན་པས། མ་ཕྱི་གསུམ་བཞི་ཙམ་ལས་མི་བཞུགས་པར་བཤད། ཉེ་ཆར་དཔར་དུ་བཏབ་པའི་ཐོག་མ་ནི་མི་རིགས་དཔེ་སྐྲུན་ཁང་གིས་མི་རིགས་རིག་གནས་ཕོ་བྲང་དང་། བོད་ལྗོངས་ཡིག་ཚགས་ལས་ཁུངས། བོད་ལྗོངས་དགེ་འོས་སློབ་གྲྭ་ཆེན་མོའི་བློ་མཐུན་ཕུན་ཚོགས་ཚེ་རིང་སོགས་སུ་ཉར་ཚགས་བྱས་ཡོད་པའི་བྲིས་མ་ཁག་ལ་དཔེ་བཤུ་བྱས་ཏེ། སྤྱི་ལོ་1980 ལོའི་ཟླ་ 6 པ་ལ་པར་གཞི་དང་པོ་བསྒྲིགས་ཤིང་། སྤྱི་ལོ་1982 ལོའི་ཟླ་9 པར་པེ་ཅིན་ལ་པར་ཐེངས་2 པ་བརྒྱབ་པ་དང་། ༼སྦ་བཞེད༽་དེའི་མགོ་ཤོག་ལི་སྐྱ་དང་ཁ་རིས་སྔོ་སྐྱ་ཅན། དགེ་མགོན་པོ་རྒྱལ་མཚན་གྱིས་རྩོམ་སྒྲིག་གི་འགན་འཁུར་གནང་བ་དེ་རེད། དཔེ་ཆ་དེའི་ཤོག་ལྡེབ་ 46 སྟེང་དུ། རྒྱུད་རིས་ཐམས་ཅད་མདོ་སྡེ་དང་བསྟུན། ལྡེར་ཚོ་ཐམས་ཅད་གསང་སྔགས་དང་བསྟུན། དེ་ལྟར་ན་ལྡེར་ཚོ་བདུན་ཅུ་དོན་བརྒྱད། མདོའི་རྒྱུད་རིས་བཅུ་བཞི། ཀ་བ་སྟོང་དང་རྩ་གཉིས། སྒོ་མོ་ཆེ་སུམ་ཅུ་སོ་དྲུག སྒོ་ཆུང་ཆུང་བཞི་བཅུ་ཞེ་གཉིས། གྲུ་སྐས་ཆེན་པོ་དྲུག ཅོང་ཆེན་པོ་བརྒྱད། དང་དང་དར་ཐང་ཆེན་པོ་གསུམ་ལ་སོགས་པ། ཞེས་པའི་གོང་གི་གུག་རྟགས་ནང་གི་དར་ཐང་དེ་ད་ལྟ་ཚང་མས་གཞི་འཛིན་སའམ་ཁུངས་གཏུགས་ས་དེ་རེད། དེས་ན་གུག་རྟགས་ནང་གི་དར་ཐང་ནི་རྩོམ་སྒྲིག་པས་མཆན་འགྲེལ་བྱས་པ་ཞིག་ལས་གཞུང་དངོས་ལས་བསྟན་པའི་ཚིག་མིན་པ་ཀུན་གྱིས་མཁྱེན་གསལ་ལྟར་ན། དང་དང་ནི་དར་ཐང་ཡིན་པའི་གདེང་ཚོད་སུ་ལ་ཡོད། རྩོམ་སྒྲིག་པས་བཅོས་པའི་དར་ཐང་ལ་རྒྱུ་མཚན་དང་ཡིད་རྟོན་ཅི། དོན་དངོས་རྩོམ་སྒྲིག་པས་དང་དང་བྱ་བའི་ཐ་སྙད་ཀྱི་་ནང་དོན་མ་གོ་ནས་དོགས་སློང་གི་ཚུལ་དུ། ༼དང་དང༽་དར་ཐང་དུ་བཅོས་པ་ཞིག་ཡིན་པ་གསལ་བོ་རེད། གལ་ཏེ། དར་ཐང་དུ་བཅོས་ཀྱང་མཚམས་འདིར་མི་འཚམ་སྟེ། དར་ཐང་ཡིན་ན་སྐུ་གསུང་ཐུགས་རྟེན་གྱི་གྲས་ཡིན་པས། ལྡེར་ཚོ་བདུན་ཅུ་དོན་བརྒྱད། མདོའི་རྒྱུད་རིས་བཅུ་བཞི་ཞེས་པའི་སྐབས་སུ་བཞག་ན་འགྲིག་པ་ལས་ཆེས་དཀྱུས་མའི་ཅ་ལག་གི་མཇུག་ཏུ་ག་ལ་འཇོག། དེ་ནི་སྐབས་དེའི་གནས་ཚུལ་ཞིག་ཡིན་པ་༼སྦ་བཞེད༽་ཀྱི་གཞུང་བྱིངས་རྣམས་ཀྱི་གོང་འོག་ཏུ་གཟིགས་དང་ཤིན་ཏུ་གསལ་ལོ།། གཞན་ད་ལྟ་ཡོད་པའི་༼སྦ་བཞེད་༽ཀྱི་བྲིས་མ་གནའ་ཡི་མ་ཕྱི་ངོ་མ་དག་ནི་སྲིད་གཞུང་རིམ་པའི་སྡེ་ཁག་རྣམས་སུ་ཉར་ཚགས་གནང་ཡོད་པས། ང་ལྟ་བུ་མི་སྒེར་ཞིག་གིས་ཡིག་ཚང་དེ་དག་མིག་ལམ་དུ་མཐོང་རྒྱུ་དེ་ཧ་ཅང་དཀའ་མོ་རེད། འོན་ཏེ། སྟབས་ལེགས་པ་ཞིག་ལ་བོད་ལྗོངས་རིག་དངོས་སྲུང་སྐྱོབ་ཁང་དུ་ཉར་ཚགས་བྱས་ཡོད་པའི་༼སྦ་བཞེད༽་ནང་དུ། དང་དང་བྱ་བ་ལས་དར་ཐང་གི་ཐ་སྙད་མི་འདུག་པས། དར་ཐང་ནི་ཕྱིས་སུ་རྩོམ་སྒྲིག་པས་གསེར་གྱི་ཀ་བ་ལ་ཤིང་གི་ལྷན་པ་བཏབ་པའི་གནས་ཚུལ་ཞིག་ཡིན་པ་གཞི་ནས་ཤེས། དེ་བཞིན་དུ་༼ཆོས་འབྱུང་མཁས་པའི་དགའ་སྟོན༽་དུ་ཡང་། ༼སྦ་བཞེད༽་ཀྱི་ནང་དོན་ལྟར་བཀོད་ཡོད་པ་འདི་ལྟ་སྟེ། ལྡེར་ཚོ་བདུན་ཅུ་དོན་བརྒྱད། མདོའི་རྒྱུད་རིས་བཅུ་བཞི། ཀ་བ་སྟོང་དང་རྩ་གཉིས། སྒོ་མོ་ཆེ་སུམ་ཅུ་སོ་དྲུག སྒེའུ་ཆུང་བཞི་བཅུ་རྩ་གཉིས། གྲུ་སྐས་ཆེན་པོ་དྲུག ཅོང་ཆེན་པོ་བརྒྱད། དང་དང་ཆེན་པོ་གསུམ་གྱིས་བརྒྱན་པ་བྱས་སོ། ། 3ཞེས་ གསལ་ཞིང་། ༼ ཆོས་འབྱུང་མཁས་པའི་དགའ་སྟོན༽་ནི་སྤྱི་ལོ་1546 ལོར་བརྩམས་འགོ་ཚུགས་ཏེ་ལོ་ཉི་ཤུར་བྲིས་ཟིན་པ་ལ་བརྟགས་ན་ཡིག་ཚང་འདི་བརྩམས་ནས་ད་ལྟའི་བར་མ་མཐར་ཡང་ལོ་ངོ་ལྔ་བརྒྱ་ལྷག་འདས་ཡོད་པ་ཤེས་ཐུབ། དེས་ན་ལོ་ངོ་ལྔ་བརྒྱའི་ཡར་སྔོན་ཞིག་ནས་༼སྦ་བཞེད༽ ་དུ་དང་དང་བྱ་བ་ལས་དར་ཐང་ ཞེས་བྲིས་མེད་པ་བདེན་དཔང་བྱེད་ནུས་སོ།། 

དེས་ན་ང་ཚོས་གོང་དུ་བཤད་པའི་ནང་དོན་ཁག་ལས་ཤེས་ཐུབ་པ་ཞིག་ནི། ༼སྦ་བཞེད༽་ཀྱི་དཔེ་ཆ་རྙིང་པ་རྣམས་སུ་དང་དང་ཞེས་མཆིས་པ་ལས་དར་ཐང་བྱ་བ་བྲིས་མེད་པ་གཞི་ནས་རྟོགས་ཐུབ་ཅིང་། རྩོམ་སྒྲིག་པའི་མཆན་འགྲེལ་དེས་མི་དུ་མ་ཞིག་ལ་མགོ་རྨོངས་སུ་བཅུག་པའང་རང་ཤུགས་ཀྱིས་གསལ་ཐག་ཆོད་ནུས་སོ།། འོ་ན་དང་དང་བྱ་བའི་ནང་དོན་ནི་ཅི་ཞིག་ཡིན་ནམ་ཟེར་ན། དེ་ནི་རོལ་ཆས་ཤིག་གི་མིང་སྟེ། དེང་སང་སྐུ་འབུམ་བྱམས་པ་གླིང་དུ་དུས་ཆེན་སྐབས་སུ་མེ་ལོང་དགུ་བརྡུང་མགུར་ གདུང་བྱ་བའི་རོལ་དབྱངས་དཀྲོལ་སྟངས་ཤིག་མཆིས་པ་དེ་དང་ཧ་ལམ་མཚུངས་ལ། འཁར་རྔ་ཕྲེང་བསྟར་མ་ཡང་ཟེར། རྒྱ་སྐད་དུ་ 云锣 ཟེར་ཞིང་། འཁར་རྔ་མི་འདྲ་བ་དགུ་བརྡུང་ན་སྒྲ་མི་འདྲ་བ་དགུ་ལྡན་པ་ཞིག་གོ། ཉེ་དུས་སུ་བསྒྲིགས་པའི་༼བོད་རྒྱ་ཚིག་མཛོད་ཆེན་མོ༽་དང་དག་ཡིག་རྣམས་སུ་དང་དང་བྱ་བའི་དོན་ཅི་ཞིག་ཡིན་པའི་འགྲེལ་བཤད་གནང་བ་ཞིག་མ་མཐོང་ཡང་། ཏཱ་མིང་རྒྱལ་རབས་སྐབས་སུ་བསྒྲིགས་པའི་༼ 西番馆译语 ཞེས་པའི་ ༼བོད་རྒྱ་ཤན་སྦྱར་གྱི་དག་ཡིག༽་ཅིག་ཡོད་པ་དེའི་ནང་དུ་དང་དང་བྱ་བ་ནི་རྒྱ་སྐད་ དུ་ 云锣 ཟེར་བ་དེ་ཡིན། ༼4༽ཞེས་ འཁོད་ཡོད་པ་དང་། ཚིག་མཛོད་དེར། ད་དུང་ཕྱི་རྒྱལ་གྱི་སྐད་རིགས་ཀྱང་མང་དུ་མཆིས་པ་དཔེར་ན། ཐེ་གོ་རྒྱལ་ཁབ་ཀྱི་སྐད་རིགས་དང་རྒྱ་སྐད་ཤན་སྦྱར་སྐབས་སུ་《罗馆译语》ཞེས་མིང་བྱང་འཁོད་ཡོད་པ་དང་། དེ་བཞིན་དུ་འཇར་པན་སོགས་ཀྱང་དེ་ལྟར་བསྒྲིགས་ཡོད་ལ། དཔེ་ཆ་འདི་རང་རྒྱལ་གྱི་དཔེ་མཛོད་ཁང་དུ་མ་ཞིག་ཏུ་མཆིས་ནའང་། ངེད་ཀྱིས་ནི་འཇར་པན་གྱི་ཏུང་ཅིན་སློབ་གྲྭ་ཆེན་མོའི་དཔེ་མཛོད་ཁང་དུ་ཉར་ཚགས་ ཡོད་པ་དེ་ལ་པབསྐྱར་པར་བརྒྱབ་པ་ཞིག་སློབ་གྲྭ་དེའི་སྐད་བརྡ་རིག་པའི་འབུམ་རམས་པ་(海老原志穗5 བྱ་བ་དང་། བོད་མིང་ལ་གཡུ་མཚོ་ཟེར་བ་ཁོ་མོ་ལགས་ནས་གཡར་ཏེ་བསྐྱར་པར་བཏབ་པ་ཡིན་ཞིང་། དཔེ་ཆ་དེ་ནང་གི་བོད་ཡིག་གི་ཐ་སྙད་ཁག་ལ་བརྟགས་ན། བོད་སྐད་དུ་སྒྱུར་བ་པོ་ནི་ཨ་མདོའི་བོད་པ་ཞིག་ཨེ་ཡིན་སྙམ་སྟེ། 起营ལ་སྒར་ལངས་ཟེར་བ་དང་། ཚོན་ 朱砂ལ་མཚལ་རྒོད་དང་། དཀར་ཡོལ་ཁྲུང་ཁྲུང་རྟགས་ཅན་ 仙鹤 ལ་ཚེ་རིང་དང་། 正月ལ་ཟླ་བ་དང་པོ་དང་། 河洲 ལ་ཀ་ཆུ་དང་། 临洮ལ་ཤིང་ཀུན་སོགས་ཨམ་སྐད་དང་ཨ་མདོའི་ལུང་པ་ཁ་ཤས་ཀྱི་མིང་མཆིས་པ་ལས་དབུས་ གཙང་སོགས་ཀྱི་ས་མིང་འཁོད་མི་འདུག་གོ། དེར་བལྟས་ན་བོད་ཡིག་འབྲི་མཁན་ཨ་མདོ་བ་ཞིག་རེད་བསམས་ཏེ་ཚོད་དཔག་བྱས་པ་ལས་ མཇུག་བྱང་དང་རྩོམ་པ་པོ་སུ་ཡིན་པ་སོགས་ཀྱི་གནས་ཚུལ་མི་གསལ་ལོ། 
གང་ལྟར་དང་དང་བྱ་བའི་རོལ་ཆས་དེ་མིང་རྒྱལ་རབས་ཀྱི་དུས་སུ་ཨ་མདོའི་ཡུལ་དུ་མིང་དེ་ ལྟར་བེད་སྤྱོད་གཏོང་བཞིན་པ་ཤེས་ནུས་ལ་། ཉེ་ཆར་༼སྦ་བཞེད༽་གསར་དུ་དཔར་སྐྲུན་བྱེད་སྐབས་རྩོམ་སྒྲིག་པས་རང་གི་བློ་ངོར་ མ་བདེ་བའི་ཐ་སྙད་དེ་གང་བྱུང་དུ་མཆན་ལོག་བརྒྱབ་པས། ཕྱིས་འབྱུང་གི་མཁས་པ་འགའ་མགོ་རྙོག་ཏུ་བཅུག་པ་རེད། ༼སྦ་བཞེད་ཞབས་བཏགས་མ༽་རུ། དར་ཐང་ཆེན་པོ་གསུམ། འཕན་ཆེན་པོ་བརྒྱད་ལ་སོགས་པ། ༼ 6ཞེས་ འཁོད་ཡོད་ཀྱང་། དཔེ་ཆ་དེ་ནི། སྤྱི་ལོ་1990ལོར་དཔར་ཏུ་བཏབ་ཅིང་། ༼སྦ་བཞེད༽་དངོས་ནི་སྤྱི་ལོ་1982 ལོར་དཔར་སྐྲུན་མཛད་པ་ཡིན་པས། ཞབས་དག་མའི་ཞུ་དག་པ་ཚོས་༼སྦ་བཞེད་༽ནང་གི་མཆན་འགྲེལ་དེ་མཐོང་ནས་༼ཞབས་བཏགས་མ༽ ་རུ། རྩ་བའི་མ་ཕྱི་གཡུགས་ཏེ་མཆན་ལོག་དེ་གཞིར་བཞག་བྱས་པ་ཞིག་ཡིན་པའང་ང་ཚོས་ཚོད་དཔོག་བྱས་ན་ཤེས་ཐུབ། དེ་བཞིན་དུ་༼སྐྲ་རྩེའི་ཆུ་ཐིགས༽ ་སུའང་། ཅོང་ཆེན་པོ་བརྒྱད། དར་ཐང་ཆེན་པོ་གསུམ་ཞེས་མ་ཕྱི་དངོས་ཀྱི་མིང་བརྡ་གཡུགས་ཏེ་མཆན་ལོག་དེ་ཚད་མར་བཟུང་ཡོད་པ་སོགས་ཀྱི་གནས་ཚུལ་བྱུང་བ་དང་། རྒྱའི་མཁས་པ་ཤེས་ཡོན་པ་ཞེ་ཅིས་ཧྲིན་སོགས་ཀྱིས་དེ་བས་ཀྱང་མགོ་མ་ཚོས་པའི་གནས་ཚུལ་མང་དུ་བཤད་འདུག་པ་དེ་རེད། གལ་ཏེ། ཕྱིས་ཀྱི་རི་མོ་པའམ། ཡང་ན་མཛེས་རྩལ་ཞིབ་འཇུག་པ་ཚོས་བོད་ཀྱི་ལོ་རྒྱུས་ ཡིག་ཚང་མང་པོར་ལྟ་ཁོམ་མ་བྱུང་བར་༼མི་ཉག་གི་བོད་བརྒྱུད་རི་མོ༽་དང་། ༼བཟོ་གནས་སྐྲ་རྩེའི་ཆུ་ཐིགས༽་དང་། ༼སྦ་བཞེད་ཞབས་བཏགས་མ༽་ལྟ་བུ་དཔེ་ཆ་རེ་གཉིས་ལས་བལྟ་མ་ཐུབ་པ་ཡིན་ཚེ། གོང་གི་བྲིས་ཉེས་དེ་རྒྱུན་འབྱམས་སུ་སོང་སྟེ། མཐར་གཏམ་དེ་ལ་ཡལ་ག་དང་ལོ་འདབ་རྒྱས་ནས་སྔོན་གྱི་ལོ་རྒྱུས་ཀྱི་ཞལ་རས་དེ་ཡོངས་སུ་ཉམས་པའི་ཉེན་ཁ་ཡོང་བ་ནི་བཤད་མ་དགོས་སོ།།
༼ཟུར་ཞུ། འདིར་དཔེ་མིང་ལས་གཞན་དཔེ་ཁུངས་དང་། ལྡེབ་མ། དཔར་སྐྲུན་ཁང་སོགས་ཀྱི་མཆན་འགྲེལ་གསལ་བོར་འཁོད་མེད། གཙོ་བོ་ཡི་གེ་མང་དྲགས་པ་ལ་འཇིགས་པ་ཡིན། འདིའི་རྗེས་སུ་༼ཐང་ག་བྱ་བའི་མིང་གི་གོ་དོན་སྐོར་བཤད་པ༽་བྱ་བ་དང་། ༼སི་ཐང་གི་སྐོར་བཤད་པ༽་ཞེས་པའི་ཐང་ག་དང་འབྲེལ་བའི་རྩོམ་ཐུང་འགའ་རེ་མུ་རུ་མུར་སྤེལ་རྩིས་ཡོད། རིག་གཞུང་གི་སྐོར་ནས་ཀློག་པ་པོ་ཚོས་ཐད་ཀར་དགོངས་འཆར་སྤེལ་བར་རེ་བ་ཡོད།༽
·རྩོམ་ཡིག་གོང་མ:བོད་ཀྱི་རིག་གནས་གསེར་གྱི་ཉི་མ་ཡིན་ནམ།
·རྩོམ་ཡིག་འོག་མ:གྲགས་ཅན་གསུང་ཚིག༥༡
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·སྒྱུ་རྩལ་དང་མི་གཤིས། 2011/3/24 20:08:55
·སྨན་བླ་སྐྱབས་ཀྱི་སྒྱུ་རྩལ་ཕྱོཊ་ཀྱི་བཅར་འདྲིའི་ལན། 2010/5/25 10:47:02
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:eqnqscyncw
qm9OVW  <a href="http://yeiyrsupjiwo.com/">yeiyrsupjiwo</a>, [url=http://gsifntkythqt.com/]gsifntkythqt[/url], [link=http://nxyxazhayyme.com/]nxyxazhayyme[/link], http://grqgcqpbqrhl.com/
发表时间:2017/5/23 12:42:49 [来自: 5.188.211.10]

 评论者:abplen
a2IW1J  <a href="http://ozfgptgmxsqe.com/">ozfgptgmxsqe</a>, [url=http://nwjvsiihbfcu.com/]nwjvsiihbfcu[/url], [link=http://caabhbbmqysa.com/]caabhbbmqysa[/link], http://lkfmrguxmwau.com/
发表时间:2017/5/23 10:30:54 [来自: 5.188.211.10]

 评论者:zunhfdzellz
GkLfae  <a href="http://rqltsietxqtj.com/">rqltsietxqtj</a>, [url=http://bzhxljahpaox.com/]bzhxljahpaox[/url], [link=http://hwlgrmwegyzl.com/]hwlgrmwegyzl[/link], http://yltsrqjonjqe.com/
发表时间:2017/5/23 8:20:49 [来自: 5.188.211.10]

འབྲེལ་ཡོད་དཔྱད་བརྗོད 9 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།46.88MS