ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ཚངས་དབྱངས་འདུ་ར། >> དཔྱད་འགྲེལ།
 རྩོམ་ཡིག་ཀློག་པ།

འཛམ་གླིང་ཞི་ཞིང་བདེ་བའི་མན་ངག་འདྲ་མཉམ་གྱི་འཚོ་གནས་བརྗོད་པ།

  རྩོམ་པ་པོ:མཁན་པོ་ཚུལ་ཁྲིམས་བློ་གྲོས།ཡོང་ཁུངས:དྲ་ཐོགགཟིགས་གྲངས:1486ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2015/8/21 18:47:47ཚོགས་ཡར་སྤྲོད:admin
 

༄༅། །འཛམ་གླིང་ཞི་ཞིང་བདེ་བའི་མན་ངག་འདྲ་མཉམ་གྱི་འཚོ་གནས་བརྗོད་པ།

 

མཁན་པོ་ཚུལ་ཁྲིམས་བློ་གྲོས།

 

     དམིགས་མེད་བརྩེ་བའི་མངའ་བདག་འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། །

ཟླ་བའི་གོ་ལའི་ཐོག་གམ་ཕྱི་རོལ་གྱི་བར་སྣང་སྟོང་པ་ནས་ཚུར་བལྟས་ན། ཕ་མཐའ་མི་མངོན་པའི་མཁའ་དབྱིངས་ནག་ངམ་མེ་བ་ཞིག་གི་ནང་ན་གཡོ་བ་དང་མི་གཡོ་བའི་སྐར་ཚོགས་བགྲང་བའི་ཡུལ་ལས་རབ་ཏུ་འདས་པ་ཞིག་བཀྲ་ལམ་གྱིས་གསལ་བ་ནི་བདག་ཅག་གི་སྟོན་པ་བདེ་བར་གཤེགས་པས་གསུངས་པའི་འཇིག་རྟེན་གྱི་ཁམས་ཞེས་བྱ་བ་དེ་ཡིན། དེའི་ཁྲོད་ན་རྒྱ་མཚོའི་ནང་གི་ཆུ་ཐིགས་བཞིན་དུ་སྐར་མ་སྔོ་རིལ་ལེ་བ་ཞིག་ཡོད་པ་ནི་ང་ཚོའི་ཕ་ཡུལ་རི་གླིང་རྒྱ་མཚོ་དང་བཅས་པའི་ས་ལྒང་ངམ་འཛམ་བུ་གླིང་ཞེས་ཡོངས་སུ་གྲགས་པ་དེ་རེད། སྐར་མ་གཞན་གྱི་ཐོག་ན་ཕལ་བའི་མིག་གིས་མཐོང་དུ་རུང་བའི་སྲོག་ཆགས་འཚོ་ཞིང་གནས་པའི་གཏན་ཚིགས་འགའ་རེ་རྙེད་པ་ལས་གཞན་མངོན་སུམ་དུ་མཐོང་བ་ནི་ད་དུང་མ་བྱུང་། ཕལ་བའི་མིག་གི་ཡུལ་ལས་འདས་པའི་སེམས་ཅན་ནི་བགྲང་གིས་མི་ལང་བ་ཞིག་འཚོ་ཞིང་གནས་པ་སྨོས་མ་དགོས། དེས་ན་ས་ལྒང་འདི་སེམས་ཅན་གྱི་རིགས་བསམ་གྱིས་མི་ཁྱབ་པ་ཞིག་གི་ཕ་ཡུལ་ཉིད་དུ་མངོན་སུམ་དུ་གྲུབ་ཟིན་པ་གཅིག་པུ་སྟེ། སེམས་ཅན་གྱི་རིགས་དེ་རྣམས་ཀྱི་སྐྱེ་བའི་ཡུལ་དང་། འཚོ་བའི་གནས་དང་། ཐ་མ་ཚེ་སྲོག་གིས་བཏང་བའི་ཕུང་པོ་འདོར་བའི་ས་དང་བཅས་པར་ཡང་རང་བཞིན་ཤུགས་ཀྱིས་གྲུབ་པ་ཡིན། དེས་ན་ས་ལྒང་འདིའི་བདག་པོ་ནི་འདིའི་ངོས་སུ་འཚོ་གནས་བྱེད་པའི་སྲོག་ཆགས་ཡོངས་རྫོགས་ཡིན་གྱི་མིའི་རིགས་ཁོ་ན་མ་ཡིན་ཏེ། མིའི་རིགས་ནི་སྲོག་ཆགས་ཀྱི་རིགས་དེ་རྣམས་ཀྱི་བྱེ་བྲག་གཅིག་ཙམ་ཞིག་ཡིན་པས་ས་ལྒང་གི་ངོས་སུ་འཚོ་བའི་རང་དབང་ཡོད་ཀྱི། ས་ལྒང་དང་ས་ལྒང་གི་ངོས་སུ་ཡོད་པ་ཐམས་ཅད་བདག་གིར་བྱེད་པའི་ཁྲིམས་མཐུན་ལུགས་མཐུན་གྱི་དབང་ཆ་ཞིག་ནི་རྩ་བ་ནས་མེད་དེ། ས་ལྒང་འདི་མིའི་རིགས་ཀྱིས་བསྐྲུན་པ་མ་ཡིན་ལ། མིའི་རིགས་ལ་སུས་ཀྱང་བྱིན་པའང་མ་ཡིན་པའི་ཕྱིར་རོ། །ཁྱད་པར་དུ་ས་ལྒང་འདིའི་ངོས་སུ་ཁྲིམས་མཐུན་ཉེས་མེད་ཀྱིས་འཚོ་བའི་སྲོག་ཆགས་རྣམས་ཀྱི་ལུས་དང་སྲོག་ལ་བཙན་དབང་བྱེད་པའི་དབང་ཆ་ནི་དེ་བས་ཀྱང་མེད་དེ། སྲོག་ཆགས་འདི་རྣམས་མིའི་རིགས་ཀྱི་ལོངས་སྤྱོད་ཀྱི་ཆེད་དུ་སུས་ཀྱང་བསྐྲུན་པ་དང་བྱིན་པ་མ་ཡིན་པའི་ཕྱིར་རོ། །དེས་ན་སྲོག་ཆགས་སོ་སོ་ལ་འཚོ་གནས་ཀྱི་ཐོབ་ཐང་ཡོད་དགོས་པར་མ་ཟད་སོ་སོར་རང་དབང་གི་ཐོབ་ཐང་ཡང་ཆ་ཚང་རེ་ངེས་པར་དུ་ཡོད་དགོས་པས་དབང་ཆ་འདི་མིའི་རིགས་ཀྱིས་བཙན་འཕྲོག་བྱེད་པ་ནི་ཚུལ་མིན་གྱི་ཉེས་པ་ཤིན་ཏུ་ཚབས་ཆེན་ཡིན་ནོ། །སྲོག་ཆགས་གཞན་རྣམས་ས་སྟེང་འདིར་འོང་ནས་ཇི་སྲིད་འཚོ་བའི་བར་དུ་རི་ཆུ་རྩྭ་ཤིང་གང་ལའང་གནོད་པ་མེད་པར་གནས་ཏེ་མཐར་འཇམ་ཐིང་ངེར་ཕ་རོལ་ཏུ་འགྲོ་སྟེ། བུང་བས་མེ་ཏོག་གི་བཅུད་འཐུང་སྟེ་མེ་ཏོག་ལ་གནོད་པ་མེད་པར་འགྲོ་བ་ལྟ་བུ་ཡིན། མིའི་རིགས་རྣམས་ས་སྟེང་འདིར་འོངས་ནས་ཇི་སྲིད་འཚོ་བའི་བར་དུ་རི་ཆུ་རྩྭ་ཤིང་ཐམས་ཅད་ལ་གཏོར་བཤིག་བྱས། ཉེས་མེད་ཁྲིམས་མཐུན་གྱིས་འཚོ་བའི་སྲོག་ཆགས་རྣམས་མནར་གཅོད་དང་དམར་གསོད་ནུས་པས་ཐེག་ཚད་ཅིག་བྱས་ཏེ། སྣོད་བཅུད་གཉིས་ཀ་ལ་རྨ་སྲོལ་མཐོང་རྒྱུ་ཡོད་པ་རེ་བྱས་ཏེ་འདོད་པས་མ་ཚིམ་བཞིན་དུ་ཕ་རོལ་ཏུ་འགྲོའོ། །དུད་འགྲོ་རྣམས་ཀྱང་གཅིག་གིས་གཅིག་ཟ་བ་ཡོད་མོད། བཀྲེས་པས་ཉེན་ཏེ་བྱ་ཐབས་བྲལ་བ་དང་། དེ་ལས་གཞན་པའི་ཁ་ཟས་མེད་པ་དང་། བླང་དོར་གྱི་གནས་མི་ཤེས་པ་ཡིན་གྱི། མིའི་རིགས་བཞིན་དུ་འདོད་པ་ཆེ་ཞིང་ཆོག་མི་ཤེས་པ་དང་། ཁ་ཟས་གཞན་ཡོད་བཞིན་དུ་དེས་མི་ཚིམ་པ་དང་། ཤེས་བཞིན་དུ་གཞན་གྱི་བདེ་ཚོར་ལ་སྣང་མེད་བྱེད་པ་ནི་མ་ཡིན་ནོ། །ལར་སྲོག་ཆགས་རྣམས་ཀྱི་ནང་ན་རིགས་མཐུན་གྱིས་རིགས་མཐུན་བསད་དེ་ཟ་བ་ནི་ཉུང་ཙམ་ཡིན། དེས་ན་མི་ལྟ་བུའི་འདོད་རྔམ་ཧམ་སེམས་ཅན་མེད་དེ། རང་གི་ཁེ་ཕན་གྱི་ཆེད་དུ་རིགས་མཐུན་པ་ནང་ཕན་ཚུན་ཀྱང་གསོད་གཅོད་ཅི་ཙམ་བྱ་དགོས་ཀྱང་ཡིད་གཉིས་སྤུ་ཙམ་མི་བྱེད་དེ། དུས་རབས་ཉི་ཤུ་པ་ལ་མཚོན་ན་མིའི་རིགས་ཀྱི་ལོ་རྒྱུས་མགོ་ཚུགས་པ་ནས་བཟུང་ཆག་སྒོ་ཆེས་ཆེ་བའི་དུས་རབས་ཤིག་ཡིན་ཏེ། དུས་རབས་འདིའི་སྟོད་དུ་མི་རྣམས་ཀྱིས་སོ་སོའི་དབང་ཤུགས་ཀྱི་ཁྱབ་རྒྱ་དང་། ཚོང་ར་དང་ཚོང་རྫས་འཕྲོག་རྩོད་ཀྱི་ཆེད་དུ་འཛམ་གླིང་འཁྲུག་ཆེན་དང་པོ་ལོ་བཞི་དང་ཟླ་བ་གསུམ་གྱི་བར་དུ་བྱས། འཛམ་བུ་གླིང་འདིའི་ཡོ་རོབ་དང་། ཨ་ཤེ་ཡ། ཨ་ཧྥེ་རི་ཁ་སྟེ་གླིང་ཆེན་གསུམ་ལ་འཁྲུག་རྩོད་ཀྱི་མེ་ལྕེ་དྲག་པོས་ཁྱབ་པར་བྱས། རྒྱལ་ཁབ་སུམ་ཅུ་སོ་གསུམ་གཡུལ་དུ་ཞུགས། དམག་མི་བྱེ་བ་གཅིག་དང་ས་ཡ་ལྔས་ཕན་ཚུན་དམར་འཛིང་བྱས། མཐར་མི་བྱེ་བ་གཅིག་གཡུལ་དུ་ཤི་བ་དང་བྱེ་བ་གཉིས་རྨས་པར་གྱུར། ཁྱོན་མི་དུང་ཕྱུར་བཅོ་ལྔ་ཡན་ཆད་ཅིག་གཡུལ་འགྱེད་ཀྱི་རླུང་འཚུབ་ཆེན་པོའི་ནང་དུ་ཚུད་དོ། །དེ་རྗེས་འཛམ་གླིང་འཁྲུག་ཆེན་གཉིས་པ་ལོ་དྲུག་གི་རིང་ལ་བྱས། རྒྱལ་ཁབ་དང་ས་གནས་དྲུག་ཅུ་རེ་གཅིག་སྔ་ཕྱིར་གཡུལ་དུ་ཞུགས། དམག་དུང་ཕྱུར་གཅིག་དང་བྱེ་བ་གཅིག་ཙམ་གཡུལ་དུ་ཞུགས་ཏེ་དམར་འཛིང་བྱས། གཡུལ་དེའི་རྐྱེན་གྱིས་ཤི་བའི་དམག་དང་མི་སེར་ཕལ་བ་བྱེ་བ་ལྔ་དང་ས་ཡ་ལྔ་བརྒལ་བར་གྱུར། ཁྱོན་མི་དུང་ཕྱུར་ཉི་ཤུ་ཐམ་པ་ལ་གནོད་སྐྱོན་ཐེབས། གྲངས་དེས་དེ་སྐབས་ཀྱི་འཛམ་གླིང་མི་གྲངས་ཀྱི་བརྒྱ་ཆ་བརྒྱད་ཅུ་ཟིན། དམག་གི་གྲོན་དུ་ཐད་ཀར་བཏང་བའི་དངོས་རྫས་ཨ་སྒོར་དུང་ཕྱུར་ཁྲི་ཕྲག་གཅིག་དང་སྟོང་གསུམ་སོང་སྟེ། གཡུལ་དུ་ཞུགས་པའི་རྒྱལ་ཁབ་དེ་རྣམས་ཀྱི་རྒྱལ་དམངས་དཔལ་འབྱོར་གྱི་སྤྱིའི་ཡོང་འབབ་ཀྱི་བརྒྱ་ཆ་དྲུག་ཅུ་བདུན་ཅུ་རེ་ཟིན་ནོ། །

དེ་ལྟར་རིན་ཐང་དང་བྲལ་བའི་སྐྱེ་བོའི་སྲོག་དང་དངོས་རྫས་དེ་ཙམ་ཞིག་འཕྲོ་བརླག་ཏུ་བཏང་སྟེ། འཛམ་གླིང་ཤར་ནུབ་གཉིས་པོ་ཁྲག་དང་མཆི་མའི་རྒྱ་མཚོ་ཆེན་པོས་ཡོངས་སུ་བཀང་སྟེ་མཐར་ཕྱི་ལོ ༡༩༤༥ ལོ་རེ་ཞིག་མཇུག་རྫོགས་ཙམ་བྱུང་། འདི་ནི་མི་རྣམས་ཀྱི་འདོད་རྔམ་དང་ཚན་རིག་ལག་རྩལ་ཚུལ་མིན་དུ་བེད་སྤྱོད་བྱས་པའི་རྗེས་འབྲས་གསལ་བར་མཚོན་པའི་སྔོན་བརྡ་ནམ་ཡང་བརྗེད་དུ་མི་རུང་བ་ཞིག་ཡིན་ནོ། །དེ་ལྟར་གཡུལ་འགྱེད་ཀྱིས་དངོས་སམ་བརྒྱུད་ནས་བྱས་པའི་སྡུག་བསྔལ་དཔག་ཏུ་མེད་པ་ཞིག་བསྟུད་མར་བྱུང་བའི་དབང་གིས་ད་ལྟ་འཛམ་གླིང་གི་མི་དམངས་ནི་ཚུལ་དེ་དག་ལ་ཡི་རབ་ཏུ་ཆད་དེ་ཞི་བདེ་ལ་ཤིན་ཏུ་འདུན་པར་གྱུར་ནས་རེ་སྨོན་གྱི་འབོད་སྒྲས་གང་སར་ཁྱབ་བོ། །

དེ་ལྟ་ནའང་ཡི་ཆད་པའི་གནས་སུ་གྱུར་པ་ཞིག་ནི། ཞི་བདེ་དགོས་སའི་ཡུལ་དེ་མི་ཁོ་ནར་འཛིན་གྱི། དུད་འགྲོ་ལ་ཞི་བདེ་དགོས་ཞེས་པའི་འབོད་སྒྲ་ནི་ཨུ་དཱམ་ཝ་རའི་མེ་ཏོག་བཞིན་དུ་དཀོན། ཅུང་ཟད་རེ་ཡོད་ཀྱང་མི་རྣམས་ཀྱིས་དེ་ལ་ཡིད་འཇོག་ཅི་ཡང་མི་བྱེད་པས་ཕན་ཐོགས་པ་ཉུང་། དེའི་དབང་གིས་དུད་འགྲོ་རྣམས་ཀྱི་སྟེང་དུ་སྔོན་མི་རྣམས་ཀྱི་ཐོག་ཏུ་བྱུང་བའི་འཛམ་གླིང་གཡུལ་ཆེན་དང་པོ་དང་གཉིས་པ་དེ་ཉིད་ཉི་མ་རེ་རེ་བཞིན་དུ་འོང་བཞིན་པ་ཁོ་ན་ཡིན། དེས་ན་མི་ལ་ཞི་བདེ་དགོས་ན་སྲོག་ཆགས་གཞན་རྣམས་ལའང་མི་དགོས་པའི་རྒྱུ་མཚན་མེད་དེ། སྡུག་བསྔལ་མྱོང་བར་མི་འདོད་པའང་མཚུངས་ལ། བདེ་བ་མྱོང་བར་འདོད་པར་ཡང་མཚུངས། སོ་སོ་ལ་འཚོ་གནས་ཀྱི་རང་དབང་ཡོད་དགོས་པར་ཡང་མཚུངས་ཏེ་གཅིག་པ་ཁོ་ན་ཡིན་པའི་ཕྱིར་དང་། ས་ལྒང་འདི་མི་ཁོ་ནའི་སྤྱོད་ཡུལ་མ་ཡིན་པས་རང་འབའ་ཞིག་གིས་བདག་གིར་བཟུང་ནས་སྲོག་ལྡན་དང་སྲོག་མེད་ཀྱི་དངོས་པོ་ཐམས་ཅད་ལ་འཛེམ་མེད་དུ་གཏོར་བརླག་བྱེད་པ་འདི་ནི་གཏི་མུག་དང་དམུ་རྒོད་དང་མ་རུངས་པའི་སྤྱོད་པ་ཁོ་ན་ཡིན་པ་འདི་མི་རྣམས་ཀྱིས་རང་སྐྱོན་རང་གིས་གསལ་བར་ཤེས་དགོས། ས་འདིའི་ཐོག་ཏུ་མིའི་འགྲོ་བ་མ་བྱུང་བའི་སྔ་རོལ་ནས་ཀྱང་སྲོག་ཆགས་གཞན་རྣམས་གནས་པ་ཡིན་ལ། མིའི་རིགས་ནི་ཕྱིས་བྱུང་བའི་གློ་བུར་དུ་ལྷག་པའི་མགྲོན་པོ་ལྟ་བུ་ཞིག་ཡིན་པས་སྲོག་ཆགས་དེ་རྣམས་ཀྱི་འཚོ་གནས་དང་ཐོབ་ཐང་ལ་བརྩི་བསྲུང་བྱ་དགོས་ཀྱི། སེམས་ཅན་དེ་རྣམས་ཀྱི་བདེ་བ་དང་འཚོ་གནས་ལ་རང་དགར་རྡོག་བརྫིས་བྱེད་ཆོག་པའི་ཁྲིམས་མཐུན་ལུགས་མཐུན་གྱི་ཐོབ་ཐང་ཞིག་ནི་རྩ་བ་ནས་མེད་པ་འདི་ལ་ངོས་ཟིན་གསལ་པོ་ཡོད་དགོས། ས་ཆེན་པོ་འདི་ཉིད་འདིའི་ངོས་སུ་འཚོ་ཞིང་གནས་པའི་སྲོག་ཆགས་ཐམས་ཅད་ཀྱི་རང་གནས་རང་ཁྱིམ་ཡིན། དེས་ན་རང་ཁྱིམ་དུ་རང་ཉིད་བདེ་བར་གནས་ཆོག་པའི་རང་དབང་ཆ་ཚང་ཡོད་དགོས་པ་ནི་མ་མཐའི་བབ་ཐང་ཡིན་ལ ། སྲོག་ཆགས་འདི་དག་ཕལ་མོ་ཆེ་ཞིག་གིས་མི་རྣམས་དང་ཅི་ཡང་རྩོད་པར་མི་བྱེད། ཅི་ཡང་གནོད་པར་མི་བྱེད་དེ། རང་དབང་བའི་ས་ཆུ་ལ་ལོངས་སྤྱོད་དེ་གནས་པ་ཙམ་ཡིན། འོན་ཀྱང་མི་རྣམས་ཀྱིས་སྲོག་ཆགས་དེ་རྣམས་ཀྱི་རང་གི་ལུས་ལ་སྐྱེས་པའི་ཤ་དང་རུས་པ་དང་པགས་པ་ཙམ་རང་དབང་དུ་བདག་གིར་བྱེད་པའི་དབང་ཆའང་འཕྲོག་པ་ནི་ཆེས་མི་རིགས་པའི་བཙན་དབང་གི་བརྙས་ཐབས་དཔེ་མི་སྲིད་པ་ཞིག་མ་ཡིན་ནམ། མི་རྣམས་ཀྱིས་ནམ་རྒྱུན་མི་ཆོས་དང་ཁྲིམས་ལུགས་དང་རང་དབང་དང་ཞི་བདེ་སོགས་འཆད་པར་བྱེད། འོན་ཀྱང་དོན་དེ་དག་རང་ཉིད་འབའ་ཞིག་གི་སྟེང་དུ་འོང་ཐབས་བྱེད་པ་ལས་གཞན་པའི་སྲོག་ཆགས་རྣམས་ལའང་ཁྱབ་པར་བྱེད་དགོས་པར་མི་ཤེས་ཤིང་མི་སེམས་པ་ནི་ཤིན་ཏུ་ཡིད་ཕམ་པའི་གནས་ཡིན་ཏེ། རང་རེ་མི་རྣམས་ནི་སྲོག་ཆགས་གཞན་དང་མི་འདྲ་བའི་ཤེས་རབ་ཅན་པར་རློམ་ཞིང་སྒྲོག་པའི་ཕྱིར་རོ། །

དེ་ལྟར་སྲོག་ཆགས་ཉམ་ཆུང་རྣམས་ཀྱི་ཚེ་སྲོག་ལ་ཇི་མི་སྙམ་དུ་བཙན་དབང་བྱེད་པ་འདི་ཁྲིམས་མཐུན་ལུགས་མཐུན་ཡིན་ན། གལ་ཏེ་བརྟག་པ་མཐའ་བཟུང་གི་དབང་དུ་བྱས་ཏེ། ནམ་ཞིག་ན་ས་ལྒང་འདིའི་ངོས་སུ་མིའི་རིགས་ལས་ཆེས་སྟོབས་དང་ཤེས་རབ་ཆེ་བའི་སྲོག་ཆགས་ཀྱི་རིགས་ཤིག་གསར་དུ་བྱུང་ནས་མིའི་རིགས་ལ། ད་ལྟ་མི་རྣམས་ཀྱི་དུད་འགྲོ་ལ་བྱེད་པ་བཞིན་དུ་མནར་གཅོད་སྣ་ཚོགས་པ་བྱས་ན། དེ་ཁྲིམས་མཐུན་དང་ལུགས་མཐུན་ཨེ་ཡིན། གལ་ཏེ་མིན་ནོ་ཞེ་ན། དེ་སུའི་ཁྲིམས་དང་མི་མཐུན་པ་ཡིན། མིའི་རིགས་ཀྱི་ཁྲིམས་དང་མི་མཐུན་ནོ་ཞེ་ན། མིའི་རིགས་ཀྱི་ཁྲིམས་ནི་རང་རིགས་ཀྱི་ཁེ་དབང་སྲུང་སྐྱོབ་བྱེད་པ་ཙམ་ཞིག་ཡིན་པས་དེ་དང་མ་མཐུན་ཡང་། སྲོག་ཆགས་གསར་བྱུང་དེ་རྣམས་ཀྱིས་ཁོང་ཅག་གི་ཁྲིམས་དང་མཐུན་པ་ཡིན་ཞེས་འདོད་ན་ཅི་བྱེད། དེའི་ཚེ་མི་རྣམས་ཀྱིས་སྔར་རང་གིས་དུད་འགྲོ་རྣམས་ཀྱི་ཚེ་སྲོག་དང་རང་དབང་ལ་ཁྱད་གསོད་བྱས་པ་དེ་ཁྲིམས་དང་ལུགས་ལ་མི་མཐུན་པའི་གདོལ་སྤྱོད་ཡ་ང་བ་ཞིག་ཡིན་པར་གནོང་འགྱོད་དང་བཅས་པའི་སྒོ་ནས་ངོས་ལེན་མི་བྱེད་ཀ་མེད་ཡིན། འོན་ཀྱང་དེའི་ཚེ་ཐམས་ཅད་འཕྱིས་ཟིན་པ་རེད། དེས་ན་མིའི་རིགས་ཀྱི་ཁྲིམས་ཀྱིས་ད་ལྟ་ནས་སྲོག་ཆགས་ཐམས་ཅད་ལ་སྲུང་སྐྱོབ་བྱེད་དགོས། དེའི་རྒྱུ་མཚན་དུ་ཚེ་སྲོག་ཡིན་པའི་ཕྱིར་དང་། སྲོག་ཆགས་ཡིན་པའི་ཕྱིར་ཞེས་སྤྱིར་ཚེ་སྲོག་ཡིན་ན་རིན་ཐང་དང་བྲལ་བ་ཡིན་ཞེས་བརྗོད་དགོས་སོ། །གལ་ཏེ་དུད་འགྲོའི་སྲོག་ནི་རིན་ཐང་དང་བྲལ་བ་མ་ཡིན་ནོ་སྙམ་ན། དུད་འགྲོ་རྣམས་ལ་རིན་ཐང་དང་བྲལ་བ་ཡིན་ནོ། །ཁོང་ཚོ་ལ་ལྟོས་ན་རིན་ཐང་དང་བྲལ་བ་ཡིན་ཡང་མིའི་རིགས་ལ་ལྟོས་ན་རིགས་དམན་པ་ཡིན་པས་དེའི་སྲོག་ལ་སྲུང་སྐྱོབ་བྱ་བའི་རིན་ཐང་མེད་དོ་ཞེ་ན། དེ་ལྟར་རིགས་ཀྱི་སྒོ་ནས་དབྱེ་བ་བྱས་ཏེ། མིའི་རིགས་ཀྱི་སྲོག་ཡིན་པའི་ཕྱིར་ཞེས་སྲུང་སྐྱོབ་བྱེད་དགོས་པ་དང་། དུད་འགྲོའི་རིགས་ཀྱི་སྲོག་ཡིན་པའི་ཕྱིར་ཞེས་སྲུང་སྐྱོབ་བྱེད་མི་དགོས་པར་འཛིན་པ་ནི་ཕོངས་རྒུད་ཐམས་ཅད་ཀྱི་རྩ་བ་ཡིན་ཏེ། འཛམ་བུ་གླིང་གི་ལོ་རྒྱུས་ཐོག་ཏུ་བྱུང་བའི་གཡུལ་འགྱེད་དང་མནར་གཅོད་ཡ་ང་བ་ཐམས་ཅད་སྤྱིར་ཚེ་སྲོག་གི་རིན་ཐང་ལ་མི་བསམས་པར་རིགས་རུས་ཀྱི་དབྱེ་བས་ཚེ་སྲོག་གི་རིན་ཐང་མཐོ་དམན་འབྱེད་པའི་ཕྱོགས་ལྷུང་གི་བསམ་པ་ངན་པ་འདིའི་དབང་གིས་བྱུང་བ་ཤ་སྟག་ཡིན་ཏེ། གོམས་གཤིས་ངན་པ་འདི་རིམ་གྱིས་མཐུ་བརྟས་ནས་ཁོ་བོ་ཅག་རིགས་མཐོན་པོའམ་དཔའ་བོའམ་ལྷའི་རིགས་སོགས་ག་གེ་མོ་ཞིག་ཡིན་པས་གཞན་རྣམས་ལ་དབང་སྒྱུར་བ་པོ་ཡིན་ཞེས་མི་རྣམས་ནང་ཕན་ཚུན་དུའང་བཙན་པོ་རྣམས་ཀྱིས་ཉམ་ཆུང་ཚོའི་འཚོ་གནས་དང་རང་དབང་གི་ཐོབ་ཐང་ལ་ཅི་མི་སྙམ་དུ་བཙན་དབང་བྱེད་ཅིང་དེའང་ཁྲིམས་མཐུན་ལུགས་མཐུན་ཡིན་པར་བཟུང་སྟེ། རང་ལ་ཁེ་ཕན་ཅུང་ཟད་ཡོད་པ་མཐོང་ཚེ་རང་གིས་ཐུབ་པའི་མི་རྣམས་ཀྱི་ཚེ་སྲོག་ལའང་དུད་འགྲོ་རྣམས་ཀྱི་ཚེ་སྲོག་བཞིན་དུ་བརྩི་བསྲུང་དང་གཅེས་འཛིན་མེད་པར་སྣང་མེད་དུ་རྡོག་བརྫིས་བྱས་ཏེ། ས་སྟེང་ཐམས་ཅད་འཁྲུག་ཟིང་དང་སྡུག་བསྔལ་གྱིས་ཁྱབ་པ་ནི་བཟློག་ཏུ་མེད་དེ། དཔེར་ན། མི་རིང་བའི་སྔོན་དུ་ཨ་ཧྥེ་རི་ཁའི་མི་ནག་རྣམས་ཡོ་རོབ་སོགས་ཀྱིས་བྲན་དུ་བཀོལ་ཏེ་སྒོ་ཕྱུགས་ཁོ་ན་བཞིན་དུ་མནར་གཅོད་བྱས་པ་ལྟ་བུ་ཡིན་ཏེ། དེ་ཡང་སྤྱི་ལོ ༡༤༥༡ ལོ་ནས ༡༨༧༠ ལོའི་བར་དུ་ལོ་བཞི་བརྒྱ་ལྷག་ཅིག་གི་རིང་ལ་ཡོ་རོབ་སོགས་ནུབ་ཕྱོགས་པ་རྣམས་ཀྱིས་ཨ་ཧྥེ་རི་ཁའི་མི་ས་ཡ་མང་པོ་བཙན་ཤུགས་ལ་བརྟེན་ནས་བྲན་གཡོག་གི་ཕྱིར་དུ་ཁྱེར་ཏེ། དེ་ཡང་སྤྱི་ལོ ༡༩༧༨ ལོར་མཉམ་འབྲེལ་རྒྱལ་ཚོགས་ཀྱིས་ནུབ་རྒྱ་མཚོ་ཆེན་པོའི་ཐོག་གི་མི་ནག་བྲན་གཡོག་ཉོ་ཚོང་གི་སྐོར་ལ་བགྲོ་གླེང་ཚོགས་པ་འཚོགས་པའི་སྐབས་མཁས་པ་འགའ་རེས་ཨ་ཧྥེ་རི་ཁའི་གླིང་ནས་མི་ནག་རྣམས་བཟུང་སྟེ་ཕྱོགས་སོ་སོར་ཁྱེར་བ་བསྡོམས་ན་མི་བྱེ་བ་གཅིག་དང་ས་ཡ་ལྔ་ནས་བྱེ་བ་གསུམ་གྱི་བར་ཡོད་ཟེར། ལོ་བཞི་བརྒྱ་དེའི་རིང་ལ་ཧྥེ་གླིང་གི་སྐམ་ས་ནས་མི་ནག་རྣམས་བཟུང་ནས་རྒྱ་མཚོ་ཆེན་པོའི་འགྲམ་གྱི་གྲུ་ཁ་རྣམས་སུ་དེད་ནས་འོང་བའི་ལམ་བར་དང་། ནུབ་རྒྱ་མཚོ་ཆེན་པོའི་ཐོག་ཏུ་གྲུ་གཟིངས་ནང་ནས་མེ་གླིང་དང་ཡོ་རོབ་རྣམས་སུ་སྐྱེལ་བའི་ལམ་བར་དག་ནས་ཤི་བ་སོགས་ཐམས་ཅད་བགྲངས་ན་ཨ་ཧྥེ་རི་ཁའི་མི་དུང་ཕྱུར་གཉིས་དང་བྱེ་བ་གཅིག་ཤི་བར་གྱུར་ཅེས་ཟེར་ཏེ། མཁས་པ་འགའ་རེས་དུང་ཕྱུར་གཅིག་དང་། ལ་ལས་དུང་ཕྱུར་གཅིག་དང་བྱེ་བ་ལྔ་ཙམ་ཤི་བར་གྱུར་ཅེས་ཀྱང་ཟེར་རོ། །

དང་པོ་མི་ནག་རྣམས་འཛིན་པའི་ཚེ་ན་ས་ཆ་དེ་གའི་རྒྱལ་པོ་དང་ཚོ་དཔོན་སོགས་ལ་མེ་མདའ་དང་མངར་ཆང་སོགས་ཚོང་རྫས་ཕྲན་བུ་རེ་བྱིན་ནས་མི་ཉམ་ཆུང་རྣམས་བྲན་གཡོག་ཉོ་ཚོང་བྱེད་པའི་ཚོང་པ་རྣམས་ཀྱི་ལག་ཏུ་སྤྲོད་བཅུག་པ་དང་། ཚོ་བ་ཕན་ཚུན་ནང་དུ་འཁྲུག་པ་བསླངས་ནས་ཕར་ཕྱོགས་བཟུང་བ་རྣམས་བྲན་ཚོང་པ་ལ་སྤྲོད་པ་དང་། གཞན་ཡང་ཡོ་རོབ་པ་རང་ཉིད་ཐད་ཀར་སོང་སྟེ་གྲོང་ཚོ་བཅོམ་ནས་མི་རྣམས་བཟུང་སྟེ་འགྲོ་བ་ཅི་རིགས་པ་བྱེད། སྐམ་སའི་ཕྱོགས་སོ་སོ་ནས་མཚོ་འགྲམ་བར་ཁྲིད་ནས་འགྲོ་སྐབས་སུའང་མནར་གཅོད་དཔེ་མེད་པ་བྱེད་དེ། མི་ནག་རྣམས་མི་འབྲོས་བའི་ཕྱིར་དུ་རྐང་ལྕགས་ལྗིད་པོ་རྒྱག་པ་དང་། མི་གཉིས་རེ་མཉམ་དུ་ལྕགས་ཐག་གིས་སྦྲེལ་བ་དང་། ཕྲག་པ་ཕུག་ནས་དེའི་ནང་ལྕགས་སྐུད་དྲངས་ནས་མཉམ་དུ་སྦྲེལ་བ་དང་། གླང་ཆེན་མཆེ་བ་དང་། གཅན་གཟན་པགས་པ་དང་། སྦྲང་རྩི་སོགས་དངོས་རྫས་ལྕི་མོ་ཁུར་དུ་འཇུག་པ་དང་། འཁྱེར་འོས་པའི་ཚོང་རྫས་མ་རྙེད་པའི་ཚེ་ན་རྡོ་ཆེན་པོའམ་བྱེ་སྒྱེ་ཆེན་པོ་ཁུར་དུ་བཅུག་སྟེ། ཉིན་རེ་བཞིན་མུ་གེས་མི་ཤི་ཙམ་གྱི་ཟས་ཅུང་ཟད་རེ་བྱིན་ནས་དེད་དེ་འགྲོ། གལ་ཏེ་བྲན་ཚོང་པ་ཚོའི་ངག་ལ་མི་བརྩི་བའི་རྣམ་པ་ཅུང་ཟད་མཐོང་ཚེ་རྡུང་རྡེག་ཚད་མེད་བྱེད་པ་དང་གསོད་པར་ཡང་བྱེད་དོ། །འགྲོ་མི་ཐུབ་པ་རྣམས་ལམ་བར་ནས་མཚོན་དང་དབྱུག་པས་བརྡེགས་ནས་འཕྲལ་དུ་གསོད། ནུབ་རྒྱ་མཚོ་ཆེན་པོའི་འགྲམ་གྱི་གྲུ་ཁར་འབྱོར་པའི་ཚེ་ན། དེ་ན་ཡོ་རོབ་པ་རྣམས་ཀྱིས་ནག་བྲན་ཉོ་ཚོང་བྱ་བའི་ཚོང་ར་དང་མཁར་རྫོང་སོགས་མང་པོ་བསྐྲུན་ཅིང་དམག་དཔུང་གི་སྲུང་སྐྱོབ་པའང་ཡོད་པས་དང་པོ་བཙོན་དུ་བཅུག འཚོང་བའི་ཚེ་ན་གོས་ཐམས་ཅད་ཕུད་ནས་ཡོ་རོབ་གྱི་ཡུལ་སོ་སོར་འཁྱེར་མཁན་གྱི་བྲན་ཚོང་པ་གཞན་རྣམས་ལ་གཟུགས་པོ་བརྟག་དཔྱད་བྱས་ནས་འདེམ་དུ་འཇུག གཟུགས་པོ་ལ་སྐྱོན་མེད་པ་རྣམས་བྲན་ཚོང་པ་དེ་རྣམས་ཀྱིས་ཉོ་བར་བྱེད། དེ་འཕྲོས་ཐམས་ཅད་གསོད་པ་སོགས་ཀྱིས་རང་དགར་མེད་པ་བྱེད། བྲན་ཚོང་པས་ཉོས་པའི་མི་ནག་རྣམས་ཀྱི་བྲང་ངམ་དཔུང་པའི་ཤའི་ཐོག་ཏུ་མི་ནོར་བའི་ཕྱིར་ལྕགས་བསྲེགས་ཀྱི་ཐམ་ཀ་བརྒྱབས་ནས་གྲུ་གཟིངས་ཀྱི་ཁ་མ་གང་བར་དུ་བཙོན་དུ་བཅུག་ནས་འཇོག  གཟིངས་ཀྱི་ཁ་གང་བར་གསོགས་པ་ན་གཟིངས་རེའི་ནང་དུ་མི་ནག་ཤིན་ཏུ་མང་པོ་བརྫངས་ནས་འཁྱེར། ཧྥེ་གླིང་ནས་མེ་གླིང་དུ་འགྲོ་བ་ལ་མགྱོགས་ནའང་གཟའ་འཁོར་བདུན་བརྒྱད་ཙམ་རེ་འགོར། གྲུ་ནང་དུ་ཧ་ཅང་དོག་ལ་གཙང་སྦྲ་མེད་པས་ལམ་བར་དུ་འགོས་ནད་སྣ་ཚོགས་པ་མཆེད། དེ་ཚེ་མི་ནག་སུ་ཞིག་ལ་ནད་ཕོག་པ་མཐོང་ཡང་གཞན་དག་ལ་ནད་མི་འགོས་པའི་ཕྱིར་དུ་གསོན་པོར་རྒྱ་མཚོའི་ནང་དུ་འཕེན། དཔེར་ན། ༡༨༧༤ ལོར་ནག་བྲན་འཁྱེར་བའི་གྲུ་གཟིངས་ཤིག་གི་ནང་ནས་ནད་པ ༡༣༢ གསོན་པོར་རྒྱ་མཚོའི་ནང་དུ་འཕངས་པ་ལྟ་བུ་ཡིན། གཞན་ཡང་ལུས་སྟོབས་ཞན་པ་ངལ་རྩོལ་མི་ཐུབ་པར་གྱུར་པ་དག་ཀྱང་རྒྱ་མཚོར་འདོར། དེའི་ཕྱིར་ནག་བྲན་འཁྱེར་བའི་གྲུ་གཟིངས་དག་གི་རྗེས་སུ་རྒྱུན་དུ་ཉ་མི་གཟན་རྣམས་ཀྱིས་དེད་ནས་འགྲོ། གལ་ཏེ་ལམ་བར་དུ་ནག་བྲན་དག་གིས་བྲན་ཚོང་པའི་ངག་ལ་མི་ཉན་པ་བྱུང་བ་རྣམས་ལ་ལྕག་གིས་གཞུ་བ་དང་། མིག་འབྲུ་བ་དང་། སྙིང་འབྱིན་པ་དང་། རྐང་ལག་གཅོད་པ་སོགས་མནར་གཅོད་དཔེ་མེད་པ་བྱེད། དེའི་དབང་གིས་ནག་བྲན་མང་པོ་མཚོ་ནང་དུ་ལྕེབས་ནས་རང་སྲོག་གཅོད། དེའི་ཕྱིར་ནག་བྲན་གཅིག་མེ་གླིང་དུ་འབྱོར་པ་ལ་སྐམ་ས་དང་མཚོ་ཐོག་ནས་ནག་བྲན་ལྔ་རེ་ཤི་བར་འགྱུར། མེ་གླིང་སོགས་སུ་འབྱོར་པ་ན་བྲན་ཚོང་པ་རྣམས་ཀྱིས་སླར་ཡང་མི་ནག་དག་མ་བུ་དང་ཁྱོ་ཤུག་སོགས་ཁ་ཕྲལ་ནས་བྲན་གཡོག་བདག་པོ་དག་ལ་བྲན་གཡོག་གི་ཕྱིར་དུ་བཙོངས་ནས་ཁེ་ཤིན་ཏུ་ཆེན་པོ་རྙེད། དེ་ཡང་དཔེར་ན་མ་བུ་གཉིས་མཉམ་དུ་ཚོང་སྟེགས་ཐོག་ཕུད་དེ་ཉོ་མཁན་ལ་འདེམ་དུ་བཅུག་པས་བདག་པོ་ཐ་དད་པ་དག་གིས་ཕྱུགས་ཉོ་བ་བཞིན་དུ་སོ་སོར་ཉོས་ཏེ་ཁྲིད་ནས་འགྲོ་བས་མ་བུ་དང་ཁྱོ་ཤུག་མཉམ་གནས་བྱ་ཐབས་མེད། བྲན་གཡོག་བདག་པོ་དག་གིས་ནག་བྲན་རྣམས་ལ་དུད་འགྲོ་ལས་ཀྱང་སྡུག་པའི་དཀའ་སྡུག་མྱང་དུ་འཇུག་སྟེ། ཉིན་རེ་ལ་དུས་ཚོད་བཅོ་བརྒྱད་དམ་བཅུ་དགུ་ཙམ་རེའི་རིང་ལ་ངལ་རྩོལ་བྱེད་དགོས། ཁ་ཟས་ཐེངས་གཉིས་རེ་ལས་བཟའ་རྒྱུ་མེད། དེ་ཡང་དུས་ཚོད་སྐར་མ་བཅུ་ནས་བཅོ་ལྔ་ཙམ་གྱི་ཡུན་ལ་ཚར་དགོས། རྟག་པར་བྲན་གཡོག་བདག་པོའི་ལས་ཀ་ལ་ལྟ་རྟོག་བྱེད་པ་དག་རྗེས་སུ་འབྲངས་ནས་ལས་ཀ་ཅུང་ཟད་རེ་མ་གྲུབ་ཀྱང་ལྕག་གིས་གཞུས་པ་སོགས་ཀྱི་སྡུག་བསྔལ་ཧ་ཅང་ཆེ་བས་ནག་བྲན་སུམ་ཆ་གཅིག་ཐོག་མའི་ལོ་གསུམ་གྱི་ནང་དུ་འཆི་བར་འགྱུར། ཕལ་མོ་ཆེ་ཞིག་མྱུར་བ་རྣམས་ལོ་བདུན་དང་དལ་བ་རྣམས་ལོ་བཅུ་ཙམ་གྱིས་འཆི་བར་འགྱུར། བུད་མེད་རྣམས་ལ་ཕྲུ་གུ་བཙས་པ་ན་ཁྱི་ཕྲུག་དང་ཕག་ཕྲུག་འཚོང་བ་བཞིན་དུ་བླངས་ནས་འཚོང་བར་བྱེད་པས་བུད་མེད་མང་པོ་སེམས་སྡུག་གིས་ཉིན་འགའ་རེའི་རྗེས་ནས་འཆི་བ་དང་། འགའ་རེས་སྡུག་དྲགས་ནས་ལྕེབས་ཏེ་ཤི་བར་གྱུར། ཕྲུ་གུ་དག་བྲན་བདག་གིས་ཉོས་ནས་ཁྱེར་བ་ན་མ་རྣམས་ཀྱིས་ང་དང་ཕྲུ་གུ་མཉམ་དུ་ཉོ་རོགས་གྱིས་ཞེས་རྗེས་སུ་རྒྱུག་པ་ན་རྡུང་རྡེག་ཚབས་ཆེན་གཏོང་། བུད་མེད་རྣམས་ལ་ཕྲུ་གུ་ཇི་ལྟར་མང་པོ་བཙས་པ་དེ་ལྟར་བྲན་གཡོག་བདག་པོ་དག་དགའ་སྟེ། ཕྲུ་གུ་གཞན་ལ་བཙོངས་ནས་ཁེ་ཟུར་བ་རྙེད་པའི་ཕྱིར་རོ། །མ་རྣམས་ཀྱིས་རང་གི་ཕྲུ་གུ་གཞན་གྱི་བྲན་གཡོག་ཏུ་གྱུར་ནས་ཚེ་གང་པོར་སྡུག་བསྔལ་དྲག་པོ་མྱོང་བ་ལས་ཆུང་ངུ་ནས་ཤི་ན་དགའ་སྙམ་སྟེ། སྡུག་ཐུག་ནས་རང་གི་བུ་རང་གིས་གསོད་པ་དང་། མ་བུ་མཉམ་དུ་ལྕེབས་ནས་འཆི་བར་བྱེད། མི་དཀར་པོའི་རིགས་དེ་རྣམས་ཀྱིས་ནག་བྲན་འདི་རྣམས་ལ་ནོར་རྫས་ཀྱི་འདུ་ཤེས་ཁོ་ན་མ་གཏོགས་མིའི་འདུ་ཤེས་ཡེ་ནས་མི་འཇོག  ཅུང་ཟད་མ་དགའ་ཚེ་རང་དགར་རྡུང་རྡེག་དང་གསོད་པར་བྱེད། ནག་བྲན་རྣམས་ཀྱི་མི་ཚེའི་བདེ་འཇགས་ལ་ཁྲིམས་ཀྱིས་སྲུང་སྐྱོབ་རྩ་བ་ནས་མི་བྱེད་པར་མ་ཟད། སྤྱི་ལོ ༡༦༦༡ ལོར་ཝེར་ཅི་ཉི་ཡའི་མི་སེར་སྤེལ་ཡུལ་གྱི་གྲོས་ཚོགས་ཀྱིས་ནག་བྲན་རྣམས་ཇི་སྲིད་འཚོའི་བར་དུ་བྲན་གཡོག་ཡིན་པར་ཁྲིམས་སུ་བཅས། དེའི་སྟེང་དུ་ཧི་ལན་གྱི་སྨན་རམས་པ་འགའ་རེས་མི་ནག་གི་རིགས་རྣམས་སྤྲ་དང་ཉེ་བ་ལས་མི་དང་མི་ཉེ་ཞིང་ལུས་པོ་དང་ཤེས་རབ་གཉིས་ཀའི་ཆ་ནས་ཡོ་རོབ་པ་ལས་དམན་ཞེས་མི་ནག་ཐམས་ཅད་རིགས་དམན་པའི་གྲས་སུ་བཞག་སྟེ། རང་བཞིན་གྱིས་ཁོང་ཚོ་ལ་བྲན་གཡོག་བྱེད་དགོས་པའི་རིགས་ཡིན་པར་བྱེད་དེ། མི་ཉམ་ཆུང་རྣམས་ལ་བཙན་དབང་དེ་ཙམ་ཞིག་བྱས་ནས་ད་དུང་དེ་ལ་ཁྲིམས་དང་རིགས་པས་རྒྱབ་སྐྱོར་བྱེད་པ་ནི་ཆེས་ཡིད་ཕམ་པའི་གནས་སོ། །

དེ་ལྟར་ལོ་བཞི་བརྒྱ་ཙམ་ཞིག་གི་རིང་ལ་ཨ་ཧྥེ་རི་ཁའི་མི་མང་གི་མི་ཚེའི་རང་དབང་ལ་བཙན་ཤུགས་བརྗོད་མི་ཤེས་པ་ཙམ་ཞིག་བྱས་པས་དུས་རབས་ཉི་ཤུ་པར་མ་བསླེབས་བར་དུ་ཧྥེ་གླིང་གི་མི་གྲངས་ཇེ་མང་དུ་ཡེ་ནས་མ་སོང་བར་མ་ཟད་མི་རིགས་ཉུང་ངུ་མང་པོ་རྒྱུན་ཆད་པར་གྱུར། དཔལ་འབྱོར་དང་སྤྱི་ཚོགས་ལ་གཏོར་བརླག་ཚད་ལས་འདས་པ་ཞིག་ཐེབས་པར་གྱུར་ཏོ། །དེ་ལྟ་བུའི་མུན་ནག་གི་དུས་སྐབས་རྒྱ་ཆེ་ལ་ཡུན་རིང་བ་འདི་མཇུག་རྫོགས་ནས་ད་ལྟ་ཡན་ལོ་བརྒྱ་ལྷག་ཅིག་སོང་མོད། མི་རྣམས་ཀྱིས་རང་གི་རིགས་ལས་གཞན་པ་རྣམས་ལ་དེ་ལས་ཀྱང་བརྒྱ་འགྱུར་གྱིས་ལྷག་པའི་མནར་གཅོད་བྱེད་པ་ནི་ད་དུང་དུའང་མ་བཏང་ཞིང་གཏོང་བར་ཡང་མི་འདོད་ལ། དེ་ལ་གོང་བཞིན་ཁྲིམས་དང་རིགས་པས་རྒྱབ་སྐྱོར་བྱེད་པ་ནི་ཤིན་ཏུ་མི་འོས་ཏེ། དུད་འགྲོ་ཉམ་ཆུང་རྣམས་ལ་རང་དབང་གི་འཐབ་རྩོད་བྱེད་ཐུབ་མཁན་མེད་ཀྱང་། ཉམ་ཆུང་ལ་བཙན་དབང་བྱེད་པའི་ངན་གོམས་དེའི་དབང་གིས་མཐར་མིའི་རིགས་རང་ཉིད་སྔར་ཡང་ཕུང་བར་གྱུར་ལ་ཕྱིས་ཀྱང་གདོན་མི་ཟ་བར་ཕུང་བར་འགྱུར་རོ། །

དེ་ལྟ་བས་ན་འགྲོ་བ་ཆེ་ཕྲ་དང་རིགས་གང་ཞིག་ཡིན་ཡང་རུང་སྟེ། མདོར་ན་སྲོག་གམ་ཚོར་བ་ཡོད་པ་ཞིག་ཡིན་ཕྱིན་ཆད་དེའི་ཚེ་སྲོག་དང་འཚོ་གནས་ལ་ལྷག་པར་དུ་བརྩི་བསྲུང་དང་གཅེས་འཛིན་དང་ལྷག་བསམ་རྣམ་དག་བྱེད་པའི་ཡ་རབས་ཀྱི་གོམས་གཤིས་བཟང་པོ་ཞིག་ཆགས་སུ་འཇུག་པ་ནི་ཤིན་ཏུ་གལ་ཆེ་སྟེ། འདི་ནི་མིའི་རིགས་རང་ཉིད་དང་ས་སྟེང་ཐམས་ཅད་ཞི་བདེ་འོང་བའི་རྩ་བའི་མན་ངག་མེད་ཐབས་མེད་པ་ཡིན། འགྲོ་བ་ཐམས་ཅད་ཀྱི་སྲོག་ལ་གཅེས་སྲུང་བྱེད་པ་ནི་དོན་ལ་མིའི་རིགས་རང་ཉིད་ཀྱི་སྲོག་བསྲུང་བའི་ཐབས་རྨད་དུ་བྱུང་བའང་ཡིན་པས་ན་འཛམ་གླིང་ཞི་ཞིང་བདེ་བ་ཞིག་བསྐྲུན་པར་འདོད་ན་ཐོག་མ་ཁོ་ནར་རང་ལས་ཁས་དམན་པའི་ཉམ་ཆུང་དུད་འགྲོ་རྣམས་ལ་བྱམས་དང་སྙིང་རྗེའི་སྒོ་ནས་དེ་དག་གི་ལུས་སྲོག་ལ་གཅེས་སྐྱོང་བྱ་བ་ནས་གཞི་འཛུགས་དགོས། གོམས་གཤིས་དེ་ལེགས་པོ་ཞིག་ཆགས་ཐུབ་ན། མཐར་རང་གི་ཁེ་ཕན་གྱི་ཆེད་དུ་དུད་འགྲོའི་སྲོག་ལའང་སྣང་མེད་མི་བྱེད་ན། མིའི་སྲོག་ལ་སྨོས་ཅི་དགོས། དེས་ན་མི་གཅིག་པུ་མ་ཡིན་པར་ས་སྟེང་གི་སྲོག་ཆགས་ཡོངས་རྫོགས་ལ་ཞི་བདེ་དང་། འདྲ་མཉམ་དང་། རང་དབང་དགོས་པ་འདི་ལ་རྒྱལ་སྤྱི་དང་རྒྱལ་ནང་དུ་ཁྲིམས་གསར་འཛུགས་དང་། འདིའི་སྐོར་གྱི་སློབ་གསོ་དང་དྲིལ་སྒྲོག་སོགས་ནི་མེད་ཐབས་རྩ་བ་ནས་མེད་པའི་བྱ་བ་དག་ཡིན་ནོ། ། ཁ་ཅིག་གིས་ང་ཚོས་ད་དུང་མིའི་འཚོ་གནས་ལའང་དོ་དམ་ནན་པོ་ཞིག་བྱ་རྒྱུ་མ་བྱུང་ན་དུད་འགྲོའི་འཚོ་གནས་ལ་ག་ལ་འོང་ཞེས་སྙམ་ཡང་། དེ་ནི་སྲོག་ཆགས་ལ་རིགས་རུས་ཀྱི་དབྱེ་བ་ཕྱེས་ནས་ཚེ་སྲོག་ལ་མཐོང་ཆུང་དང་བརྙས་བཅོས་བྱེད་པའི་གདུག་སེམས་ཤིན་ཏུ་མ་རུངས་པ་དེས་ཀུན་ནས་བསླངས་པའི་སྤྱོད་པ་ཡིན་པས་འདི་ལྟ་བུའི་བསམ་སྤྱོད་ལ་ཤིན་ཏུ་གཟབ་དགོས་སོ། །

དེ་ལས་གཞན་དུ་དེང་སང་ཚན་རིག་ལག་རྩལ་ལ་བརྟེན་ནས་རྫས་ངན་གྱི་སྦྱོར་བས་མཚོན་ཆའི་རིགས་ཡ་ང་བ་དག་བཟོ་བསྐྲུན་བྱས། རང་ལ་ཁེ་ཕན་ཅུང་ཟད་བྱུང་ཚེ་གཞན་གྱི་འཚོ་བ་དང་ཚེ་སྲོག་གང་ལའང་བསམ་བློ་སྤུ་ཙམ་ཡང་མི་གཏོང་བའི་བསམ་ངན་དང་སྤྱོད་ངན་འདིས་མཐར་རང་གཞན་གཉིས་ཀ་ཕུང་ཁྲོལ་མི་བཟད་པ་ལ་གདོན་མི་ཟ་བར་སྦྱོར་བར་འགྱུར་རོ། ། མདོར་ན། མི་རྣམས་ཀྱིས་སྲོག་ཆགས་གཞན་དག་ངན་གསོད་སྣ་ཚོགས་པ་བྱས་ཏེ། ཇི་ལྟར་འདོད་པ་བཞིན་དུ་བཟའ་ཆོག་སྙམ་པའི་ཚུལ་མིན་གྱི་འདུ་ཤེས་མ་རུངས་པ་འདི་ལ་གཏིང་ནས་བསྒྱུར་བཅོས་ཡང་དག་པ་ཞིག་མ་བྱུང་གི་བར་དུ་མི་རྣམས་ལ་ཞི་ཞིང་བདེ་བ་ཞིག་འོང་བའི་དུས་མེད་པས་འདི་ལ་ཆོས་ལུགས་ཀྱི་འདུས་སྡེ། སྤྱི་ཚོགས་ཀྱི་ཚོགས་པ། ལྷག་བསམ་རྣམ་པར་དག་པ་དང་ལྡན་པའི་སྐྱེ་བོ་རྣམས་ཀྱིས་རང་དང་། གཞན་དང་། སྐྱེ་འགྲོ་ཐམས་ཅད་ལ་བདེ་སྐྱིད་ཀྱི་ལོངས་སྤྱོད་བསྐྲུན་པའི་ཕྱིར་དུ་ཐུགས་ཁུར་གཟབ་བཞེས་དང་། འབད་འབུངས་ཅི་རིགས་པ་རེ་ལེགས་སྐྱེས་སུ་དབུལ་བར་བྱ་དགོས་སོ། །

  ཞེས་པ་འདི་ཡང་བོད་རབ་རྒྱན་ཤིང་སྤྲེལ་ལོའི་དབྱར་ཟླ་ར་བའི་ཚེས་སུམ་ཅུ་ཉིན་གསེར་ལྗོངས་བླ་མ་རུང་དུ་ཚུལ་ཁྲིམས་བློ་གྲོས་སུ་འབོད་པས་བྲིས་པ་དགེ་བར་གྱུར་ཅིག། །།

·རྩོམ་ཡིག་གོང་མ:གླུ་མ་བསྟན་པ་དབང་མོའི་རང་མདངས་གླེང་བ།
·རྩོམ་ཡིག་འོག་མ:བདག་གིས་མཐོང་བའི་དུང་དཀར་ཚང་།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·འགོ་ཁྲིད་དང་དཔོན་པོ་མ་ནོར་ཅིག 2016/9/30 16:16:26
·ཀུན་མཁྱེན་ཇོ་ནང་པ་ཆེན་པོའི་བསྟན་པ་རྒྱས་པའི་སྨོན་ལམ། 2016/9/30 16:11:32
·སྐད་ཡིག་དང་ནང་ཆོས་གཅིག་ཏུ་འཁྲུལ་མི་ཉན། 2016/3/7 18:08:42
·རླབས་ཆེན་གྱི་བཞུད་ལམ། 2016/3/7 18:03:51
·སྙིང་གཏམ་བཅོ་ལྔ་པ། 2016/3/7 17:51:57
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:ojibujlxizc
q5nxQa  <a href="http://dyphxdhamfnr.com/">dyphxdhamfnr</a>, [url=http://axzctkzcwdcu.com/]axzctkzcwdcu[/url], [link=http://osqplukgrcvx.com/]osqplukgrcvx[/link], http://rpqgxmuntssj.com/
发表时间:2017/4/3 5:42:29 [来自: 5.188.211.62]

 评论者:wkcdpqisq
kceG2z  <a href="http://fixpqvijrqsw.com/">fixpqvijrqsw</a>, [url=http://updqesiqbbsb.com/]updqesiqbbsb[/url], [link=http://yjwjhrhhqylo.com/]yjwjhrhhqylo[/link], http://eximewsosaax.com/
发表时间:2017/4/2 21:39:08 [来自: 5.188.211.62]

 评论者:ergcbsghiu
C8CmIE  <a href="http://uqvfpbcvkxkq.com/">uqvfpbcvkxkq</a>, [url=http://wvbclmvhxich.com/]wvbclmvhxich[/url], [link=http://favyqszoabrl.com/]favyqszoabrl[/link], http://xaqrtervocll.com/
发表时间:2017/2/21 9:31:25 [来自: 5.188.211.14]

འབྲེལ་ཡོད་དཔྱད་བརྗོད 44 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།30.03MS