ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ཚངས་དབྱངས་འདུ་ར། >> དཔྱད་འགྲེལ།
 རྩོམ་ཡིག་ཀློག་པ།

གྲུབ་མཐའི་སྡོམ་ཚིག་ཤེས་རབ་སྒོ་འབྱེད་༣

  རྩོམ་པ་པོ:ཀླུ་སྨྱོན།ཡོང་ཁུངས:ངེད་གཟིགས་གྲངས:7312ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2013/7/15 14:10:59ཚོགས་ཡར་སྤྲོད:admin
གྲུབ་མཐའི་སྡོམ་ཚིག་ཤེས་རབ་སྒོ་འབྱེད་གསེར་གྱི་ལྡེ་མིག༣
ཀླུ་སྨྱོན།

༈ བཞི་པ་ངོ་བོ་ཉིད་མེད་སྨྲ་བའམ། །དབུ་མའི་གྲུབ་མཐའི་རྣམ་བཞག་འཆད་པར་བཞི། །མཚན་ཉིད་སྒྲ་བཤད་དབྱེ་བ་སོ་སོའི་དོན། །དང་པོ་བདེན་གྲུབ་ཆོས་ནི་རྡུལ་ཙམ་ཡང་། །མེད་པར་ཁས་ལེན་ནང་པའི་གྲུབ་མཐའ་སྨྲ། །གང་ཟག་དེ་ནི་དབུ་མ་པའི་མཚན་ཉིད། །གཉིས་པ་ཅིའི་ཕྱིར་དབུ་མ་པ་ཞེས་བྱ། །རྟག་ཆད་མཐའ་གཉིས་བྲལ་བའི་དབུས་ཁས་ལེན། །ཆོས་རྣམས་བདེན་གྲུབ་ངོ་བོ་མེད་པར་སྨྲ། །དེ་ཕྱིར་ངོ་བོ་ཉིད་མེད་སྨྲ་ཞེས་བྱ། །གསུམ་པར་རང་རྒྱུད་པ་དང་ཐལ་འགྱུར་བ། །བཞི་པར་རང་རྒྱུད་ཐལ་འགྱུར་ལུགས་བཤད་གཉིས། །དང་པོར་མཚན་ཉིད་སྒྲ་དབྱེ་འདོད་ཚུལ་བཞི། །རང་གི་མཚན་ཉིད་ཀྱིས་གྲུབ་ཐ་སྙད་དུ། །ཁས་ལེན་ངོ་བོ་ཉིད་སྨྲ་རང་རྒྱུད་མཚན། །ཚུལ་གསུམ་རང་ངོས་ནས་གྲུབ་རྟགས་ཡང་དག །ལ་བརྟེན་བདེན་དངོས་འགོག་པས་རང་རྒྱུད་པ། །དབྱེ་ན་རྣལ་འབྱོར་སྤྱོད་དང་མདོ་སྡེ་སྤྱོད། །ཕྱི་དོན་མི་འདོད་རང་རིག་ཁས་ལེན་པའི། །དབུ་མ་པ་དེ་རྣལ་འབྱོར་སྤྱོད་པ་དང་། །མཚན་གཞི་སློབ་དཔོན་ཞི་བ་འཚོ་ལྟ་བུ། །རང་རིག་མི་འདོད་ཕྱི་དོན་རང་མཚན་གྱིས། །གྲུབ་པར་ཁས་ལེན་དབུ་མ་མདོ་སྡེ་སྤྱོད། །མཚན་གཞི་སློབ་དཔོན་ལེགས་ལྡན་འབྱེད་ལྟ་བུ། །སྒྲ་བཤད་གཞི་ཡི་རྣམ་བཞག་སེམས་ཙམ་དང་། །མཐུན་པར་སྨྲ་བས་རྣལ་འབྱོར་སྤྱོད་རང་རྒྱུད། །མདོ་སྡེ་བ་ལྟར་ཕྲ་རབ་རྡུལ་བསགས་པའི། །ཕྱི་དོན་འདོད་པས་མདོ་སྡེ་སྤྱོད་རང་རྒྱུད། །
རྣལ་འབྱོར་སྤྱོད་པའི་དབུ་མ་རང་རྒྱུད་པར། །རྣམ་བདེན་རྣམ་རྫུན་དང་མཐུན་དབུ་མ་གཉིས། །དང་པོ་ཞི་མཚོ་ཀ་མ་ལ་ཤྰི་ལ། །འཕགས་པ་གྲོལ་སྡེ་ལ་སོགས་རྗེས་འབྲངས་དང་། །གཉིས་པ་སློབ་དཔོན་སེང་གེ་བཟང་པོ་དང་། །ཛེ་ཏྰ་རི་དང་ལྭ་བ་པ་ལྟ་བུ། །ཛེ་ཏྰ་རི་ནི་རྣམ་བརྫུན་དྲི་བཅས་དང་། །ལྭ་བ་པ་ནི་རྣམ་བརྫུན་དྲི་མེད་མཐུན། །
བཞི་པ་གྲུབ་མཐའི་འདོད་ཚུལ་བརྗོད་པ་ལ། །རྣལ་འབྱོར་སྤྱོད་པའི་དབུ་མ་རང་རྒྱུད་དང་། །མདོ་སྡེ་སྤྱོད་པའི་དབུ་མ་རང་རྒྱུད་གཉིས། །དང་པོར་གཞི་དང་ལམ་དང་འབྲས་བུ་གསུམ། །གཞི་ལ་དབྱེ་ན་ཡུལ་དང་ཡུལ་ཅན་གཉིས། །གཞི་གྲུབ་རང་གི་མཚན་ཉིད་ཀྱིས་གྲུབ་ཁྱབ། །ཆོས་ཀུན་བཏགས་དོན་བཙལ་ན་རྙེད་པར་འདོད། ། རང་བཞིན་རང་མཚན་རང་གི་སྡོད་ལུགས་ཀྱི། །ངོས་ནས་གྲུབ་དང་རང་ངོས་གྲུབ་དོན་གཅིག །ཤེས་བྱར་དབྱེ་ན་དོན་དམ་ཀུན་རྫོབ་གཉིས། །རང་ཉིད་མངོན་སུམ་རྟོགས་པའི་མངོན་སུམ་གྱི། །ཚད་མས་རང་ཉིད་གཉིས་སྣང་ནུབ་ཚུལ་གྱིས། །རྟོགས་བྱ་དོན་དམ་བདེན་པའི་མཚན་ཉིད་དང་། །བུམ་པ་བདེན་སྟོང་ལྟ་བུ་མཚན་གཞི་འོ། ། རང་ཉིད་མངོན་སུམ་རྟོགས་པའི་མངོན་སུམ་གྱི། །ཚད་མས་རང་ཉིད་གཉིས་སྣང་དང་བཅས་པར། །རྟོགས་བྱ་ཀུན་རྫོབ་བདེན་པའི་མཚན་ཉིད་དང་། །བུམ་པ་ལྟ་བུ་དེ་ཡི་མཚན་གཞི་འོ། །དོན་དམ་བདེན་པར་རྒྱས་པར་དབྱེ་བ་ན། །སྟོང་ཉིད་བཅུ་དྲུག་དང་ནི་བཞིར་ཡང་འདོད། །ཀུན་རྫོབ་བདེན་པར་ཡང་དག་ལོག་པ་གཉིས། །དང་པོ་ཆུ་དང་གཉིས་པ་སྨིག་རྒྱུའི་ཆུ། །ལུགས་འདིས་ཤེས་པར་ཡང་དག་ཀུན་རྫོབ་ཁྱབ། །
གཉིས་པ་ཡུལ་ཅན་འདོད་ཚུལ་བརྗོད་པ་ནི། །ཡིད་ཀྱི་རྣམ་ཤེས་གང་ཟག་མཚན་གཞི་དང་། །ཀུན་གཞི་དང་ནི་ཉོན་ཡིད་ཁས་མི་ལེན། །རྣམ་ཤེས་ཚོགས་དྲུག་རང་རྒྱུད་གཉིས་ཀ་མཐུན། །བློ་ལ་ཚད་མ་དང་ནི་ཚད་མིན་གཉིས། །ཚད་མ་ལ་ནི་མངོན་སུམ་རྗེས་དཔག་གཉིས། །མངོན་སུམ་དབང་ཡིད་རང་རིག་རྣལ་འབྱོར་བཞི། །ཕྱི་མ་གཉིས་ལ་མ་འཁྲུལ་ཤེས་པས་ཁྱབ། །ཕྱི་རོལ་དོན་དུ་གྲུབ་པ་མི་འདོད་པས། །སྔོན་དང་སྔོན་འཛིན་མངོན་སུམ་རྫས་གཅིག་འདོད། །
གཉིས་པ་ལམ་གྱི་རྣམ་བཞག་ལ་ནི་གསུམ། །༡དམིགས་པ་གང་ཟག་རྟག་གཅིག་རང་དབང་གིས། །སྟོང་པ་གང་ཟག་བདག་མེད་རགས་པ་དང་། །གང་ཟག་རང་རྐྱ་ཐུབ་པའི་རྫས་ཡོད་ཀྱིས། །སྟོང་པ་གང་ཟག་བདག་མེད་ཕྲ་མོར་འདོད། །གཟུགས་དང་གཟུགས་འཛིན་ཚད་མ་རྫས་གཞན་གྱིས། །སྟོང་པ་ཆོས་ཀྱི་བདག་མེད་རགས་པ་དང་། །ཆོས་ཀུན་བདེན་པར་གྲུབ་པས་སྟོང་པ་ནི། །ཆོས་ཀྱི་བདག་མེད་ཕྲ་མོར་བཞེད་པ་འོ། ། ༢ སྤང་བྱ་གང་ཟག་བདག་འཛིན་ཉོན་སྒྲིབ་དང་། །ཆོས་ཀྱི་བདག་འཛིན་ཤེས་བྱའི་སྒྲིབ་པར་འདོད། །ཤེས་སྒྲིབ་ལ་ཡང་གཟུང་འཛིན་རྫས་གཞན་དུ། །འཛིན་པ་ལྟ་བུ་ཤེས་སྒྲིབ་རགས་པ་དང་། །ཕུང་སོགས་ཆོས་ཀུན་བདེན་པར་གྲུབ་པ་རུ། །འཛིན་པ་ཤེས་སྒྲིབ་ཕྲ་མོར་འདོད་པ་འོ། ། ༣ རང་བཞིན་ལྔ་གསུམ་བཅོ་ལྔའི་ལམ་འདོད་ཅིང་། །ཁྱད་པར་རང་རྒྱལ་བར་ཆད་མེད་ལམ་དང་། །རྣམ་གྲོལ་ལམ་ལ་གཉིས་སྟོང་རྣམ་ཅན་བཞེད། །
གསུམ་པ་འབྲས་བུའི་རྣམ་བཞག་འཆད་པ་ལ། །རང་རྒྱལ་ཤེས་སྒྲིབ་རགས་པ་སྤང་བྱའི་གཙོར། །འདོད་ཕྱིར་ཞུགས་གནས་བརྒྱད་པོ་མི་རྩི་ཡང་། །ཉན་ཐོས་གང་ཟག་ཡ་བརྒྱད་ཡོད་པར་བཞེད། །ཉན་ཐོས་རིགས་ངེས་རྣམས་ཀྱི་བསྒོམ་བྱའི་གཙོ། །གང་ཟག་བདག་མེད་རྟོགས་པའི་ལྟ་བ་དང་། །མཐར་ནི་རྡོ་རྗེ་ལྟ་བུའི་ཏིང་འཛིན་གྱི། །སྒོམ་ལམ་ལ་བརྟེན་ཉོན་སྒྲིབ་མ་ལུས་པར། །སྤངས་དང་དུས་མཉམ་དགྲ་བཅོམ་འབྲས་བུ་འཐོབ། །རང་རྒྱལ་རིགས་ངེས་གཟུང་འཛིན་གཉིས་སྟོང་གི །ལྟ་བ་བསྒོམ་བྱའི་གཙོ་བོར་བྱས་པའི་མཐར་། །སྒོམ་ལམ་རྡོ་རྗེ་ལྟ་བུའི་ཏིང་འཛིན་གྱིས། །ཉོན་ཕྲ་ཤེས་རགས་མ་ལུས་སྤངས་པ་དང་། །མཉམ་དུ་རང་རྒྱལ་དགྲ་བཅོམ་འབྲས་བུ་ཐོབ། །ཐེག་དམན་མྱང་འདས་ལྷག་བཅས་ལྷག་མེད་གཉིས། །སྔ་མའི་ལས་ཉོན་གྱིས་འཕངས་སྡུག་བསྔལ་གྱི། ལྷག་མར་བཅས་པ་ལྷག་བཅས་མྱང་འདས་དང་། །སྡུག་བསྔལ་ཕུང་བོར་བྲལ་བ་ལྷག་མེད་དོ། །ཉན་རང་དགྲ་བཅོམ་ཐེག་ཆེན་ལམ་འཇུག་སྟེ། །མཐར་ཐུག་ཐེག་པ་གཅིག་ཏུ་གྲུབ་པར་འདོད། །ལུགས་འདིར་ཉན་རང་སྤང་བྱ་རྟོགས་རིགས་གཉིས། །འདྲ་མིན་འཐོབ་བྱའི་འབྲས་བུར་མཆོག་དམན་ཡོད། །ཐེག་ཆེན་རིགས་ངེས་བྱང་ཆུབ་སེམས་བསྐྱེད་དེ། །ཚོགས་ལམ་ཆེན་པོར་ཆོས་རྒྱུན་ཏིང་འཛིན་ལ། །བརྟེན་ནས་མཆོག་གི་སྤྲུལ་སྐུར་གདམས་ངག་ཉན། །དེ་དོན་ཉམས་བླངས་སྟོང་པ་ཉིད་དམིགས་པའི། །སྒོམ་བྱུང་ཤེས་རབ་སྐྱེས་ཚེ་སྦྱོར་ལམ་ཐོབ། །དྲོད་ཀྱི་སྐབས་སུ་མཐོང་སྤང་ཀུན་ཉོན་མོངས། །གཟུང་རྟོག་མངོན་གྱུར་ཉམས་སྨོད་བྱེད་པ་དང་། །རྩེ་མོར་རྣམ་བྱང་གཟུང་རྟོག་མངོན་གྱུར་དང་། །བཟོད་པར་རྫས་འཛིན་རྟོག་པ་མངོན་གྱུར་པ། །ཆོས་མཆོག་བཏགས་འཛིན་རྟོག་པ་མངོན་གྱུར་པ། །ཉམས་སྨོད་འདི་དག་མཐོང་སྤང་ཡིན་ནོ་ཤེས་ལྡན་དག །དྲོད་རྩེ་བཟོད་མཆོག་བཞི་ལ་རིམ་བཞིན་དུ། །སྣང་བ་ཐོབ་དང་མཆེད་པའི་ཏིང་འཛིན་དང་། །དེ་ཉིད་ཕྱོགས་གཅིག་ཞུགས་པའི་ཏིང་འཛིན་དང་། །བར་ཆད་མེད་པའི་ཏིང་འཛིན་ཞེས་ཟེར་རོ། །དེའི་མཇུག་མཐོང་ལམ་བར་ཆད་མེད་ལམ་གྱིས། །སྒྲིབ་གཉིས་ཀུན་བཏགས་ས་བོན་བཅས་སྤངས་ནས། །རྣམ་གྲོལ་ལམ་དང་འགོག་བདེན་མངོན་དུ་བྱེད། །སྒོམ་ལམ་སྐོར་དགུས་སྒོམ་སྤང་ཉོན་ཤེས་སྒྲིབ། །བཅུ་དྲུག་དང་ནི་བརྒྱ་དང་བརྒྱད་ཀྱི་གྲངས། །ས་བོན་དང་བཅས་རིམ་བཞིན་སྤོང་བར་གསུངས། །མཐར་ནི་རྒྱུན་མཐའི་བར་ཆད་མེད་ལམ་ལ། །བརྟེན་ནས་སྒྲིབ་གཉིས་ལྷན་སྐྱེས་ཅིག་ཆར་དུ། །སྤངས་ཏེ་སྐད་ཅིག་གཉིས་པར་འཚང་རྒྱ་སྟེ། །རིགས་ངེས་འབྲས་བུ་མངོན་དུ་བྱེད་ཚུལ་ལོ། །ཐེག་ཆེན་མྱང་འདས་མི་གནས་མྱང་འདས་གཉིས། །དོན་གཅིག་སངས་རྒྱས་སྐུ་ལ་བཞིར་གྲངས་ངེས། །འཕགས་སེང་གཉིས་ཀྱང་སྐུ་ཡི་བསྟན་ཚུལ་ལ། །རྩོད་ཀྱི་གྲངས་ངེས་ལ་ནི་མི་རྩོད་དོ། །སངས་རྒྱས་བཀའ་ལ་དྲང་ངེས་གཉིས་འདོད་དེ། །ཀུན་རྫོབ་བདེན་པ་དངོས་བསྟན་བསྟན་བྱ་ཡི། །གཙོ་བོར་བྱས་སྟོན་དྲང་དོན་མདོ་སྡེ་དང་། །དོན་དམ་དངོས་བསྟན་ངེས་དོན་མདོ་རུ་འདོད། །དགོངས་འགྲེལ་འཁོར་ལོ་དང་པོ་དྲང་དོན་དང་། །བར་ཐ་གཉིས་ལ་དྲང་ངེས་གཉིས་གཉིས་ཡོད། །
༈ གཉིས་པ་མདོ་སྡེ་སྤྱོད་པའི་དབུ་མ་པའི། །ལུགས་ལ་གཞི་ལམ་འབྲས་བུའི་རྣམ་བཞག་གསུམ། །དང་པོ་ལུགས་འདིས་ཕྱི་དོན་འདོད་པ་དང་། །རང་རིག་ཁས་མི་ལེན་པ་ཙམ་མ་གཏོགས། །གཞི་ཡི་རྣམ་བཞག་ཕལ་ཆེར་སྔ་མར་མཚུངས། །གཉིས་པ་ལམ་གྱི་ཁྱད་པར་འཆད་པ་ལ། །ཉན་རང་རིགས་ངེས་ཆོས་བདག་རྟོགས་པ་མེད། །གཟུང་འཛིན་རྫས་གཞན་རྟོགས་པའི་ཡེ་ཤེས་མེད། །ཕྱི་རོལ་དོན་འཛིན་རྟོག་པ་ཤེས་སྒྲིབ་མིན། །གསུམ་པ་འབྲས་བུའི་རྣམ་བཞག་འཆད་པ་སྟེ། །ཉན་རད་གཉིས་པོ་སྤང་བྱའི་སྒྲིབ་པ་དང་། །རྟོགས་བྱའི་བདག་མེད་ཕྲ་རགས་ཁྱད་མེད་འདོད། །ཞུགས་གནས་བརྒྱད་ཀྱི་རྣམ་གཞག་གཉིས་ཀར་བྱེད། །ཐེག་ཆེན་རིགས་ངེས་སྒྲིབ་གཉིས་རིམ་ཅན་སྤོང་། །ས་བརྒྱད་ཐོབ་ཚེ་ཉོན་མོངས་སྒྲིབ་པ་དག །ཟད་པར་སྤངས་ཞེས་རྟོག་གེ་འབར་བར་བཤད། །ཐལ་འགྱུར་བ་བཞིན་ཉོན་སྒྲིབ་མ་ཟད་བར། །ཤེས་སྒྲིབ་སྤོང་བའི་མགོ་མི་རྩོམ་པ་མིན། །ཁྱད་པར་དེ་ཙམ་གཏོགས་གཞི་ལམ་འབྲས། །ཕལ་ཆེར་རྣལ་འབྱོར་སྤྱོད་པའི་དབུ་མར་མཐུན། །
གཉིས་པ་གྲུབ་མཐའི་གཙུག་རྒྱན་ཐལ་འགྱུར་བའི། །ལུགས་ལ་མཚན་ཉིད་སྒྲ་བཤད་འདོད་ཚུལ་གསུམ། །རང་གི་མཚན་ཉིད་ཀྱིས་གྲུབ་ཐ་སྙད་ཙམ། །མི་བཞེད་ངོ་བོ་ཉིད་སྨྲ་མཚན་ཉིད་དང་། །སངས་རྒྱས་བསྐྱངས་དང་ཟླ་གྲགས་ཞི་བ་ལྷ། །མཚན་གཞིར་འཇོག་གོ་གཉིས་པ་སྒྲ་བཤད་ནི། །ཐལ་འགྱུར་ཙམ་གྱིས་ཕྱིར་རྒོལ་རྒྱུད་ལ་ནི། །བསྒྲུབ་བྱ་རྟོགས་པའི་རྗེས་དཔག་སྐྱེ་བར་འདོད། །གསུམ་པ་འདོད་ཚུལ་གཞི་ལམ་འབྲས་གསུམ་ལས། །དང་པོ་གཞི་གྲུབ་རང་གི་མཚན་ཉིད་ཀྱིས། །མ་གྲུབ་པས་ཁྱབ་ཁས་ལེན་རྒྱུ་མཚན་ནི། །གཞི་གྲུབ་ཡིན་ན་རྟོག་པས་བཏགས་ཙམ་ཁྱབ། །ཙམ་སྒྲས་རང་གི་མཚན་ཉིད་ཀྱིས་གྲུབ་གཅོད། །གཞི་གྲུབ་ཡུལ་དང་ཤེས་བྱ་རྣམས་དོན་གཅིག །དབྱེ་ན་མངོན་ལྐོག་གཉིས་དང་བདེན་པ་གཉིས། །དང་པོ་རྟགས་ལ་མ་བརྟེན་མྱོང་སྟོབས་ཀྱིས། །རྟོགས་ནུས་ཆོས་དེ་མངོན་གྱུར་མཚན་ཉིད་དང་། །མངོན་སུམ་མངོན་གྱུར་དབང་པོའི་ཡུལ་དང་ནི། །ལྐོག་ཏུ་མ་གྱུར་ཆོས་བཞི་དོན་གཅིག་གོ །མཚན་གཞི་གཟུགས་སྒྲ་དྲི་རོ་རེག་བྱ་ལྔ། །རྒྱུ་མཚན་ཡང་ན་རྟགས་ལ་བརྟེན་ནས་ནི། །རྟོགས་དགོས་ཆོས་དེ་ལྐོག་གྱུར་མཚན་ཉིད་དང་། །ལྐོག་གྱུར་མངོན་སུམ་མིན་པའི་ཆོས་དང་ནི། །རྗེས་དཔག་གཞལ་བྱ་དག་ནི་དོན་གཅིག་གོ །མཚན་གཞི་སྒྲ་མི་རྟག་དང་སྒྲ་གང་ཟག །བདག་ཏུ་མེད་པ་ལྟ་བུར་འདོད་པ་འོ། །དེའི་ཕྱིར་ལུགས་འདིར་མངོན་ལྐོག་གཉིས་དང་ནི། །གཞལ་བྱའི་གནས་གསུམ་འགལ་བར་བཞེད་པའོ། །ཐ་སྙད་དཔྱོད་བྱེད་ཚད་མའི་རྙེད་དོན་གང་། །ཐ་སྙད་དཔྱོད་བྱེད་ཚད་མ་རང་ཉིད་ལ། །ཐ་སྙད་དཔྱོད་བྱེད་ཚད་མར་སོང་བ་དེ། །རང་ཉིད་ཀུན་རྫོབ་བདེན་པའི་མཚན་ཉིད་དོ། །མཚན་གཞི་བུམ་སོགས་རིགས་འགྲེས་ཤེས་པར་བྱ། ། དབྱེ་བར་ཡང་དག་ལོག་པའི་ཀུན་རྫོབ་གཉིས། །མི་འབྱེད་ཡང་དག་ཀུན་རྫོབ་མེད་པའི་ཕྱིར། །ཀུན་རྫོབ་ཡིན་ན་ཡང་དག་མ་ཡིན་དགོས། །དེ་ལ་ལོག་པས་ཁྱབ་པ་ཁས་ལེན་ནོ། །འོན་ཀྱང་འཇིག་རྟེན་རང་དགའི་ཤེས་ངོ་ལ། །ལྟོས་ཏེ་ཀུན་རྫོབ་ཡང་ལོག་གཉིས་སུ་འབྱེད། །གཟུགས་དེ་འཇིག་རྟེན་ཤེས་ངོར་ཡང་དག་དང་། །མེ་ལོང་ནང་གི་གཟུགས་བརྙན་ལོག་པ་ཡིན། །འཇིག་རྟེན་ཤེས་ངོར་ཡང་དག་ཡོད་པ་ཡིས། །མ་ཁྱབ་གཟུགས་ཀྱི་བདེན་གྲུབ་ཅི་བཞིན་ནོ། །མཐར་ཐུག་དཔྱོད་བྱེད་ཚད་མའི་རྙེད་དོན་གང་། །མཐར་ཐུག་དཔྱོད་བྱེད་ཚད་མ་རང་ཉིད་ལ། །མཐར་ཐུག་དཔྱོད་བྱེད་ཚད་མར་སོང་བ་དེ། །རང་ཉིད་དོན་དམ་བདེན་པའི་མཚན་ཉིད་དོ། །མཚན་གཞིར་བུམ་པ་རང་བཞིན་གྱིས་མེད་འཇོག། །དབྱེ་བ་སྔར་བཞིན་འདས་དང་མ་འོངས་དང་། །ཞིག་པ་དངོས་པོར་ཁས་ལེན་ཕྱི་དོན་འདོད། །གཟུང་འཛིན་ངོ་བོ་ཐ་དད་གྲུབ་པར་བཞེད། །
ཡུལ་ཅན་འདོད་ཚུལ་རང་ཉིད་གདགས་པའི་གཞི། །ཕུང་པོ་བཞི་འམ་ལྔ་ལ་བརྟེན་ནས་ནི། །བཏགས་པའི་ང་ཙམ་གང་ཟག་མཚན་གཞིར་འདོད། །གང་ཟག་ལ་ནི་ལྡན་མིན་འདུ་བྱེད་ཁྱབ། །བློ་ལ་ཚད་མ་དང་ནི་ཚད་མིན་གཉིས། །ཚད་མར་མངོན་རྗེས་མངོན་སུམ་དབང་ཡིད་དང་། །རྣལ་འབྱོར་མངོན་སུམ་རང་རིག་མི་འདོད་དོ། །སེམས་ཅན་རྒྱུད་བསྡུས་དབང་ཤེས་འཁྲུལ་ཤེས་ཁྱབ། །རྣལ་འབྱོར་མངོན་སུམ་འཁྲུལ་དང་མ་འཁྲུལ་གཉིས། །མཉམ་བཞག་ཟག་མེད་ངོ་བོར་གྱུར་པ་ཡི། །རྣལ་འབྱོར་མངོན་སུམ་དེ་ནི་མ་འཁྲུལ་པ། །ཚུར་མཐོང་རྒྱུད་ཀྱི་ཕྲ་བའི་མི་རྟག་པ། །མངོན་སུམ་རྟོགས་པའི་རྣལ་མངོན་འཁྲུལ་ཤེས་ཏེ། །སོ་སྐྱེས་རྒྱུད་ཀྱི་ཤེས་པ་ཡིན་ཕྱིར་རོ། །བཅད་ཤེས་ལ་ནི་མངོན་སུམ་ཚད་ཁྱབ་སྟེ། །སྒྲ་མི་རྟག་པར་རྟོགས་པའི་རྗེས་དཔག་གི །སྐད་ཅིག་གཉིས་པ་རྟོག་གྱུར་མངོན་ཚད་དང་། །གཟུགས་འཛིན་དབང་མངོན་སྐད་ཅིག་གཉིས་པ་དེ། །རྟོག་མེད་མངོན་སུམ་ཚད་མ་ཡིན་པའི་ཕྱིར། །རྗེས་དཔག་དབྱེ་ན་དངོས་སྟོབས་གྲགས་པ་དང་། །དཔེ་ཉེར་འཇལ་དང་ཡིད་ཆེས་རྗེས་དཔག་བཞི། །ཡུལ་དེར་འཁྲུལ་དང་རྟོགས་པ་མི་འགལ་ཏེ། །སྒྲ་མི་རྟག་རྟོགས་རྗེས་དཔག་དེར་འཁྲུལ་རྟོགས། །གཉིས་སྣང་ཅན་གྱི་ཤེས་པ་རང་ཉིད་ཀྱི། །སྣང་བར་མངོན་སུམ་ཚད་མ་ཡིན་པས་ཁྱབ། །སྒྲ་རྟག་འཛིན་རྟོག་རང་སྣང་མངོན་ཚད་དོ། །ཤེས་པར་རང་གི་གཞལ་བྱ་རྟོགས་ཁྱབ་སྟེ། །རི་བོང་རྭ་ཡི་དོན་སྤྱི་དེ་འཛིན་གྱི། །རྟོག་པའི་གཞལ་བྱ་སྒྲ་རྟག་དོན་སྤྱི་དེ། །སྒྲ་རྟག་འཛིན་རྟོག་གཞལ་བྱ་ཡིན་པའི་ཕྱིར། །
གཉིས་པ་ལམ་གྱི་རྣམ་བཞག་ལ་ནི་གསུམ། །དམིགས་པ་སྤང་བྱ་རང་བཞིན་དང་པོ་ནི། །གང་ཟག་རང་རྐྱ་ཐུབ་པའི་རྫས་ཡོད་ཀྱིས། །སྟོང་པ་གང་ཟག་བདག་མེད་རགས་པ་དང་། །གང་ཟག་བདེན་སྟོང་དེ་བདག་ཕྲ་མོར་འདོད། །བདག་མེད་ཕྲ་མོ་གཉིས་ནི་སྟོང་གཞི་ཡི། །སྒོ་ནས་འབྱེད་ཀྱི་དགག་བྱའི་སྒོ་ནས་མིན། །གང་ཟག་སྟེང་དུ་དགག་བྱ་བདེན་པར་གྲུབ། །བཀག་པ་གང་ཟག་བདག་མེད་ཕྲ་མོ་དང་། །ཕུང་སོགས་སྟེང་དུ་དགག་བྱ་བདེན་གྲུབ་བཀག །ཆོས་ཀྱི་བདག་མེད་ཕྲ་མོ་ཡིན་པའི་ཕྱིར། །གང་ཟག་ཆོས་ཀྱི་བདག་མེད་ཕྲ་མོ་གཉིས། །ཕྲ་རགས་མེད་ཅིང་གནས་ལུགས་མཐར་ཐུག་འདོད། །
སྤང་བྱ་བདག་འཛིན་ཕྲ་རགས་ས་བོན་བཅས། །དེ་བྱུང་དུག་གསུམ་ས་བོན་ཉོན་སྒྲིབ་འདོད། །ཆོས་ཀུན་བདེན་འཛིན་ཉོན་མོངས་སྒྲིབ་པར་བཞེད། །བདེན་འཛིན་བག་ཆགས་དེ་བྱུང་གཉིས་སྣང་གི །འཁྲུལ་ཆ་བདེན་གཉིས་ངོ་བོ་ཐ་དད་དུ། །འཛིན་པའི་དྲི་མ་རྣམས་ནི་ཤེས་སྒྲིབ་འདོད། ། ལམ་གྱི་རང་བཞིན་ཐེག་གསུམ་རེ་རེར་ཡང་། །ལྔ་གསུམ་བཅོ་ལྔའི་ལམ་གྱི་རྣམ་བཞག་དང་། །ཐེག་ཆེན་ལ་ནི་ས་བཅུའི་རྣམ་བཞག་ཀྱང་། མདོ་སྡེ་ས་བཅུ་པ་ལ་བརྟེན་ནས་བཤད། །ཐེག་གསུམ་ཤེས་རབ་རྟོགས་རིགས་མཚུངས་པ་སྟེ། །འཕགས་པས་ཆོས་བདག་མངོན་སུམ་རྟོགས་པས་ཁྱབ། །
གསུམ་པ་འབྲས་བུ་མངོན་དུ་བྱེད་ཚུལ་ནི། །ཐེག་དམན་རིགས་ངེས་བདག་མེད་ལྟ་བ་དེ། །རིགས་པ་མདོར་བསྡུས་ཙམ་གྱིས་བསྒོམས་པར་བརྟེན། །སྒོམ་ལམ་རྡོ་རྗེ་ལྟ་བུའི་ཏིང་འཛིན་གྱིས། །བདེན་འཛིན་ས་བོན་དང་བཅས་སྤངས་པ་དང་། །དུས་མཉམ་རང་གི་བྱང་ཆུབ་མངོན་དུ་བྱེད། །རྣལ་འབྱོར་སྤྱོད་པའི་དབུ་མ་རང་རྒྱུད་པ། །མན་ཆད་ལྷག་མེད་མྱང་འདས་འཐོབ་པ་ལ། །དེའི་སྔོན་ལྷག་བཅས་མྱང་འདས་ཐོབ་དགོས་བཞེད། །ལུགས་འདིར་ལྷག་བཅས་སྔོན་དུ་ལྷག་མེད་དགོས། །ཉན་རང་གཉིས་ལ་ཞུགས་གནས་རྣམ་བཞག་དང་། །ཞུགས་གནས་བརྒྱད་པོར་འཕགས་པས་ཁྱབ་པར་འདོད། །
ཐེག་པ་ཆེན་པོའི་ལམ་གྱི་བགྲོད་ཚུལ་ནི། །བྱང་སེམས་རིགས་ངེས་བདག་མེད་ལྟ་བ་དེ། །རིགས་པ་མང་པོས་བསྒོམས་ཏེ་སྤོང་བར་བྱེད། །ཉོན་སྒྲིབ་མ་ཟད་ཤེས་སྒྲིབ་སྤོང་མི་རྩོམ། །ས་བརྒྱད་ཐོབ་ཚེ་ཉོན་སྒྲིབ་ཟད་པར་སྤོང་། །མཐར་ནི་རྒྱུན་མཐའི་བར་ཆད་མེད་ལམ་གྱིས། །ཤེས་སྒྲིབ་མ་ལུས་སྤངས་ཏེ་སྐུ་བཞི་འཐོབ། །མྱང་འདས་འགོག་བདེན་དོན་དམ་བདེན་པས་ཁྱབ། །དགོངས་འགྲེལ་ལས་བཤད་འཁོར་ལོ་ཐོག་མཐའ་གཉིས། །དྲང་དོན་ཡིན་ཏེ་སྟོང་ཉིད་དངོས་བསྟན་མིན། །དེ་ཡི་བར་བར་ངེས་དོན་མདོས་ཁྱབ་སྟེ། །ཤེས་རབ་སྙིང་པོ་ངེས་དོན་མདོ་ཡིན་ནོ། །ཐལ་འགྱུར་བ་ཡི་ཁྱད་ཆོས་གཙོ་བོ་ནི། །བརྟེན་ནས་བཏགས་པའི་གཏན་ཚིགས་ལ་བརྟེན་ནས། །ཆོས་ཀུན་རང་མཚན་གྲུབ་པ་ཁེགས་ན་ཡང་། །ཐ་སྙད་མིང་རྐྱང་བཏགས་ཡོད་ཙམ་ཞིག་ལ། །བཅིང་གྲོལ་རྒྱུ་འབྲས་གཞལ་བྱ་འཇལ་བྱེད་སོགས། །གཞན་ངོར་མིན་པར་རང་ལུགས་འཇོག་ཤེས་སོ། །དེང་སང་འགའ་ཞིག་ལྟ་བ་མཐོར་རློམས་ཏེ། །སྣང་ཕྱོགས་ཆོས་རྣམས་འཁྲུལ་སྣང་ཙམ་ཡིན་ཞེས། །གཏན་མེད་བཟུང་ནས་ཡིད་ངོར་ཅང་མེད་པ། །ཉམས་ལེན་མཆོག་འཛིན་ཐལ་འགྱུར་དྲི་མི་བྲོ། །དེས་ན་སྲིད་པའི་ཕུན་ཚོགས་མཐའ་དག་ནི། །མེ་འབར་སྦུབས་ལྟར་མཐོང་བའི་བློ་ལྡན་ཞིང་། །གྲོལ་བ་དོན་དུ་གཉེར་བའི་ཤེས་ལྡན་དག །ཆོས་ལྟར་བཅོས་པའི་ལྟ་ངན་མ་ལུས་པ། །སྤངས་ཏེ་གྲུབ་མཐའ་ཀུན་གྱི་ཡང་རྩེ་སྟེ། །དབུ་མ་ཐལ་འགྱུར་རིང་ལུགས་མཆོག་ཏུ་ཟུངས། །
༈ སྟོན་མཆོག་དྲང་སྲོང་མགྲིན་སྔོན་རལ་ཀློང་ལས། །ལེགས་འོངས་ཞི་བསིལ་གྲུབ་གཞུང་ལྷ་ཡི་ཆབ། །འཕགས་བོད་མཁས་བརྒྱའི་དབྱིག་འཛིན་ལེགས་བརྒྱུད་དེ། །འདི་ན་སྡུག་ཀུན་ཚ་གདུང་གཤེད་དུ་འབབ། །གྲུབ་མཐའི་ཕ་རོལ་སོན་པའི་མཁས་མང་ལས། །གྲུབ་མཐའི་རྣམ་བཞག་སྦྱངས་པའི་དྲིན་གཟོ་ཕྱིར། །གྲུབ་མཐའི་ཁྱད་པར་མ་འདྲེས་གསལ་སྟོན་པའི། །གྲུབ་མཐའི་སྡོམ་ཚིག་རང་མཉམ་སྐྱེས་སུ་བསྟབས། །འདི་སྣང་ཕྲག་དོག་ཚེར་མའི་མལ་སྟན་སྟེང་། །འདི་ལ་ངན་སྨྲོས་འགྲེ་ལྡོག་བྱེད་པ་དག །འདི་ཉིད་ཀློག་པའི་ཡུལ་དུ་གྱུར་པའི་མོད། །འདི་ཡིས་བློ་ཡིག་ནམ་མཁའི་མཐར་ཕྱེ་ཤོག །ཟླ་མེད་བཤེས་གཉེན་དག་གི་ཐུགས་དགོངས་རྫོགས། །མུ་མེད་སྲིད་མཚོར་བྱིངས་པའི་འགྲོ་ཀུན་སྒྲོལ། །ཐོགས་མེད་ཡེ་ཤེས་མེ་འོད་སྙིང་ལ་སྦར། །ཕྱོགས་མེད་རྒྱལ་ཁམས་ལྡོམ་པོའི་དམིགས་ཡུལ་ཡིན། །
   ཞེས་གྲུབ་མཐའ་རིན་པོ་ཆེའི་ཕྲེང་བའི་སྡོམ་ཚིག་ཤེས་རབ་སྒོ་འབྱེད་གསེར་གྱི་ལྡེ་མིག་ཅེས་བྱ་བ་འདི་ཡང་། འཕགས་བོད་ཀྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་པའི་མཁས་གྲུབ་ཀྱི་སྐྱེས་བུ་དུ་མའི་ཞབས་དྲུང་ནས། རང་གཞན་གྱི་གྲུབ་མཐའི་གཞུང་ལ་སྦྱངས་པ་ལོ་མང་བྱས་ཤིང་། རིས་སུ་མ་ཆད་པའི་གྲུབ་མཐའི་གཞུང་ལུགས་ལ་སྤྲོ་བ་ཅན་སྔགས་བཙུན་ཀླུ་སྨྱོན་ཁྲག་འཐུང་གླིང་པ་ཞེས་འབོད་པ་དེས། ཆུ་སྦྲུལ་བོད་ཟླ་ལྔ་པའི་ཚེས་ཉེར་བརྒྱད། སྤྱི་ལོ་༢༠༡༣ ལོའི་ཟླ་༧ ཚེས་༤ ཨ་རིའི་རྒྱལ་སྟོན་དུས་ཆེན་ཉིན། སའི་སྟེང་ན་གྲགས་པ་འབར་བའི་སྟོབས་ལྡན་ཨ་རི་སྡེ་མང་གཅིག་སྒྲིལ་རྒྱལ་ཁབ་ཀྱི་ནུབ་ཕྱོགས་སེ་ཡ་ཁྲལ་ཞེས་པའི་གྲོང་ཁྱེར། དུས་བཞིར་མེ་ཏོག་བཞད་པའི་ཡུལ་ལྗོངས་དྲི་ཟའི་འཇིག་རྟེན་ས་ལ་འཕོས་པ་ལྟ་བུའི་ཞིང་ཁམས་དེར་བཞུགས་པའི་ཨོ་རྒྱན་ཧེ་རུ་ཀའི་ཕོ་བྲང་གི་རང་ཤག་ཨེ་ཝཾ་བསྣོལ་བའི་གུར་ཁང་དུ་མཇུག་གྲུབ་པར་བྱས་པའི་དགེ་བས། འགྲོ་ཀུན་གྲུབ་མཐའ་རྒྱ་མཚོའི་ཕ་རོལ་ཏུ་སོན་ཏེ་སྐུ་བཞི་ཡེ་ཤེས་ལྔ་ལྡན་གྱི་གོ་འཕང་མཆོག་ལ་ཚེ་འདིར་སོན་པར་གྱུར་ཅིག ། ། །
 
·རྩོམ་ཡིག་གོང་མ:མདོ་སྡེ་སྤྱིའི་རྣམ་གཞག་ལས་སངས་རྒྱས་ཕལ་པོ་ཆེའི་མདོའི་སྐབས་༢
·རྩོམ་ཡིག་འོག་མ:བོད་ཕྱི་ནང་གི་དྲ་འབུ་རྣམས་ལ་གདམས་པ་གསེར་རི་མ།
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
·གྲུབ་མཐའི་སྡོམ་ཚིག་ཤེས་རབ་སྒོ་འབྱེད་གསེར་གྱི་ལྡེ་མིག༡ 2013/7/7 16:48:23
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/6 2:41:48 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/23 4:25:09 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 6:52:51 [来自: 112.5.248.229]

འབྲེལ་ཡོད་དཔྱད་བརྗོད 60 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།32.96MS