ཁྱེད་ཀྱི་གནས་ཡུལ: ཚངས་དབྱངས་དྲ་ཚིགས >> རྩོམ་ཡིག་ལྟེ་གནས། >> ངག་རིག་འདོད་འཇོ། >> ལྗོངས་རྒྱུ།
 རྩོམ་ཡིག་ཀློག་པ།

དབྱིན་ཡུལ་ཀུན་བཟང་ཆོས་གླིང་གི་བཀོད་པ་༢

  རྩོམ་པ་པོ:ཨེ་མ་ཧོ།ཡོང་ཁུངས:ངེད་དྲ་བ།གཟིགས་གྲངས:8650ཡིག་གཟུགས:ཡིག་གཟུགས་ཀྱི་མདོག
 ཀློག་དབང་།:འགྲུལ་པའི་ཐོབ་ཐང་།ཚོགས་མའི་གྲོན་དངུལ:0ཞུགས་དུས:2012/6/2 8:21:32ཚོགས་ཡར་སྤྲོད:admin
༅། ། དབྱིན་ཡུལ་ཀུན་བཟང་ཆོས་གླིང་གི་བཀོད་པ་འོག་མིན་གཉིས་པའི་དགའ་ཚལ་ཞེས་བྱ་བ།
གོང་གི་འཕྲོས།
 
ཕ་རྒྱུད་གསེར་རིའི་ཕྲེང་བ་ལྷུན་ཆགས་ཤིང་། །
མ་རྒྱུད་ཆུ་ཀླུང་བདུད་རྩིའི་གཞུང་མ་ཆད། །
བུ་རྒྱུད་ཆོས་རིག་ནོར་བུའི་དཔལ་འབར་བས། །
གསང་གསུམ་དགའ་བདེ་ཆོས་གླིང་ཞེས་སུ་གྲགས། །

ཆུང་ནས་ཤེས་རིག་སྒྱུ་རྩལ་ལེགས་སྦྱང་བས། །
ཆེ་ནས་འཁོར་འདས་བླང་དོར་ལེགས་མཁྱེན་པའི། །
དབུ་སྐྲ་གསེར་མདོག་རྒྱན་པའི་མཆེད་ལྕམ་རིགས། །
དགའ་བའི་འཛུམ་དང་གཅེས་པའི་གྲོགས་སུ་འགྲོགས། །

འཁོར་བ་ཞེན་པ་ལོག་པའི་བྱ་བཏང་དང་། །
མྱང་འདས་བཙན་ས་ཟིན་པའི་རྒྱལ་བའི་སྲས། །
རང་བཞིན་གནས་ལུགས་རྟོགས་པའི་རྣལ་འབྱོར་རིགས། །
རང་རིག་བླ་མའི་དེ་ཉིད་བསྒོམ་ལ་བྲེལ། །

རྩ་བརྒྱུད་བླ་མའི་བྱིན་རླབས་སྤྲིན་བཞིན་འཁྲིགས། །
ཡི་དམ་ལྷ་ཡི་དངོས་གྲུབ་ཆར་བཞིན་འཇོ། །
མཁའ་འགྲོ་དམ་ཅན་ལུས་དང་གྲིབ་བཞིན་འགྲོག །
གསང་གསུམ་ཀུན་བཟང་ཆོས་གླིང་ཨེ་མ་ཧོ། །

བློ་ལྡོག་རྣམ་བཞི་སྒོམ་པའི་སྐལ་བཟང་དང་། །
བདེན་བཞིའི་བླང་དོར་ནུས་པའི་ཉན་རང་དང་། །
ཚད་མེད་རྣམ་བཞི་སྤྱོད་པའི་སེམས་དཔའ་ཆེ། །
རིག་འཛིན་རྣམ་བཞི་བགྲོད་པའི་རྣལ་འབྱོར་མང་། །

དོན་གཉེར་དམ་པའི་ཆོས་ལམ་སྒྲུབ་པ་ནི། །
མེ་ཏོག་སྦྲང་རྩིར་སྦྲང་མ་བཞིན་དུ་འཁོར། །
ཐོས་བསམ་སྒོམ་པས་མི་ངོམས་བརྩོན་འགྲུས་ཅན། །
ཉིན་མཚན་ཀུན་ཏུ་ལུང་རྟོགས་ཆོས་ལ་བྲེལ། །

སྣོད་བཅུད་འཁོར་ཡུག་ལེགས་པའི་ཞིང་ཁམས་ཆེ། །
བདེ་འཇམ་ཞི་དུལ་འཕགས་པའི་གདན་ས་ཆེ། །
ཀུན་བཟང་ཆོས་བརྒྱུད་འཛིན་པའི་སེམས་དཔའ་ཆེ། །
ཆེ་ཆོས་ཀུན་འཛོམས་ཝྰ་ཡེལ་རི་ཁྲོད་ལགས། །

འདུ་འཛི་གཡོ་སྒྱུའི་ཚོང་ལས་རྒྱུ་འགྲིམ་དབེན། །
ཆགས་སྡང་རྨོངས་པའི་ཆོས་བརྒྱད་ཇག་རྐུན་དབེན། །
ནད་མུག་དམག་འཁྲུག་འབྱུང་བཞིའི་དགྲ་བགེགས་དབེན། །
གསང་ཆེན་དམ་པའི་ཕ་ཁྱིམ་ཨེ་མ་ཧོ། །

ཀུན་བཟང་དགའ་ཚལ་བཞེད་པའི་དོ་ར་རུ། །
སྦྲང་བུའི་གཤོག་དབྱངས་མཁའ་འགྲོའི་བརྡ་གླུ་འགྲན། །
ཕྱེ་ལེབ་འཕུར་ལྡིང་ལྷ་ཀླུའི་སྤྲུལ་པར་འཕྲུལ། །
ལྗོན་དྲི་བསིལ་བས་ཞི་བདེའི་ཏིང་འཛིན་འདྲེན། །

བྱ་བྱིའུའི་སྐད་སྒྲས་ཨ་དོན་སྐྱེ་མེད་སྟོན། །
རྩྭ་ཤིང་ལྡེམ་ཕྱོགས་སྐུ་མགྲོན་བསུ་བར་བཞིན། །
དགའ་དད་གུས་པའི་དག་སྣང་རྒྱན་དུ་འཛོམས། །
གཡུ་ལྗོན་མཛེས་པའི་ཁྲོད་ན་སྒོམ་ཁང་མངོན། །

དྲིལ་ཆུང་སྒྲ་དབྱངས་སིང་སིང་སྙན་པར་སྒྲོག །
དཀར་དམར་མེ་ཏོག་འཛུམ་པའི་བཞིན་རིས་ངོམ། །
ནགས་ཀློང་ངོ་མཚར་རྨད་བྱུང་འབུམ་གྱིས་གཏམས། །
ཞི་གནས་ཀུན་ཏུ་བཟང་པོའི་བདེ་ཆེན་སྟེར། །

ནངས་མོར་བསེར་བུས་བསྐུལ་བར་ཁམས་སངས་ཚེ། །
རླུང་སྒྱུ་འཕྲུལ་དགྱེས་པའི་དགའ་བདེའི་ཐབས། །
ཟོ་བཟང་སྟོབས་ཤུགས་འཕེལ་བའི་ཤེས་རབ་རྩལ། །
ཡར་ངོའི་ཟླ་བཞིན་གོང་ནས་གོང་དུ་འཕེལ། །

ཉིན་ཚོད་བཅོ་བརྒྱད་མཚན་མོ་དུས་དྲུག་ལས། །
ཉི་འོད་མི་ཉམས་སྣང་མཛོད་དགའ་བའི་གཏེར། །
མི་ཟད་རིག་དཔལ་ཆོས་ལམ་མཇལ་ནུས་པའི། །
གོ་ལའི་ཡངས་སྟེང་ཀུན་བཟང་དག་པའི་ཞིང་། །

ཤ་ཁྲག་མཆོད་པར་མི་གྲལ་མི་འཇོག་ཅིང་། །
ཆོས་མིན་སྤྱོད་པ་ཚོགས་གྲལ་མི་ཚུད་པར། །
ཀ་དག་སྡོམ་གཙང་རིག་འཛིན་འདུས་པའི་སྡེ། །
གངས་ལྗོངས་གཉིས་པའི་བསྟི་གནས་ཕུལ་དུ་བྱུང་། །

རྩེ་མོ་དཀར་གསལ་གངས་རིའི་ཕྲེང་བས་མཛེས། །
མཐོ་ཁྱད་མཉམ་ཞིང་ཕྱོགས་ཀུན་འཁོར་ལོའི་དབྱིབས། །
དུང་དཀར་རིན་ཆེན་ར་བས་ཀུན་ནས་བསྐོར། །
རི་གྲོང་ཡིད་འོང་ཡངས་ཞིང་དགོན་པའི་གནས། །

གངས་དཀར་རི་བོའི་སྐེད་པར་འཇའ་རིས་སྤྲིན། །
ལྷ་བཟོ་མཁས་པས་ཕྱག་བྲིས་བགྱིས་དང་མཚུངས། །
དུས་བཞི་ཁྱད་མེད་སྔོ་ལྗང་གཡུ་ལོས་བརྒྱན། །
ཞི་བདེའི་རྒྱ་མཚོ་ཆེན་པོས་མཐའ་ནས་བསྐོར། །

རྒྱང་རིང་རྒྱ་མཚོའི་རླབས་ཕྲེང་མཁའ་ལ་འཕྱོ། །
མཚམས་མཚམས་ན་བུན་སྦྲང་ཆར་སིལ་མ་ཡིས། །
ཚ་བའི་ངད་སེལ་ལྗོན་ཚོགས་བཀྲ་མདངས་བཞད། །
ནོར་འཛིན་གཡུ་ཐང་འཇའ་གུར་དྲ་བས་བསྐོར། །

གནས་འདིར་གཏེར་རིགས་རིན་ཆེན་ས་རྡོ་རིགས། །
རྒྱལ་ཁབ་གཞན་གྱིས་འགྲམ་ཆུ་འཆོར་བ་ཡོད། །
ཝ་ཡེལ་རྒྱལ་མོའི་དཀོར་གཉེར་སྲུང་སྐྱོབ་པས། །
ཉིན་མཚན་ཀུན་ཏུ་འཁོར་ཡུག་སྲུང་ཞིང་བདག །

རི་ཀློང་གཙང་མ་ཕྱི་དོར་བཟང་བགྱིས་པས། །
ལྟ་བས་མི་ངོམས་མཛེས་ལྗོངས་འོད་སྣང་འཛུམ། །
བསམ་པ་བདེ་གསལ་མི་རྟོག་ངང་གིས་བལྟམས། །
ཆོས་བཞིན་སྤྱོད་པའི་ཞིང་ཁམས་ཁྱད་དུ་འཕགས། །

ཐོས་པས་མི་ཚིམས་ཆུ་ཕྲན་ཏིང་ཤང་སྒྲ། །
ཉན་པས་སྤྲོ་དགའ་བརྟས་པའི་རང་བྱུང་གྲགས། །
དེ་བཞིན་ཁུ་བྱུག་བྱ་བྱིའུའི་སྙན་དག །
ཅི་དགར་འཇོ་བའི་མཆོད་པའི་སྒྲ་སྙན་སྒྲོག །

མཛེས་ལྡན་མེ་ཏོག་ཚང་ཚིང་འཛུམ་པའི་ཀློང་། །
ན་ཆུང་དགའ་བའི་རོལ་རྩེད་རྒྱུགས་འཆོང་དང་། །
རྒན་གཞོན་དར་མས་བག་ཡངས་ངལ་གསོ་བཅས། །
ལྗོངས་རྒྱུ་རིག་པའི་གྲོང་ཁྱེར་ངོ་མཚར་རྨད
 
སྔོ་སངས་དྭངས་མའི་རྒྱ་མཐོང་ཕྱེས་པའི་མཚམས། །
རྟ་བདུན་དབང་པོ་དལ་འགྲོས་ཆུ་འཛིན་ལས། །
བྱིན་རླབས་འོད་དཀར་དར་ཐག་གནང་བ་བཞིན། །
སྙིང་མཚོར་ཟུག་པའི་རྟེན་འབྲེལ་བརྡ་དོན་འཆར། །

གྲུབ་བརྒྱའི་གཙུག་རྒྱན་པདྨ་འབྱུང་གནས་ལ། །
དད་གུས་མཆི་མ་མུ་ཏིག་ཕྲེང་བཞིན་བགྲང་། །
མི་ཕྱེད་འདུན་པའི་གསང་ཆེན་རྣལ་འབྱོར་དག །
ཐོར་ཚུགས་གཡོ་ཞིང་གང་གི་ཞབས་སུ་བཏུད། །

ངོ་མཚར་རྨད་བྱུང་གཙུག་ལག་ཁང་ཆེན་ནི། །
རང་བྱུང་སྒྱུ་འཕྲུལ་དཀྱིལ་འཁོར་རྒྱ་ཆེ་ཞིང་། །
དབུས་དང་ཕྱོགས་བཞི་ཡངས་པའི་རང་བཞིན་ཅན། །
ཀུན་ནས་ཟླུམ་པ་བུམ་པའི་གཞལ་ཡས་ཁང་། །

རྡོ་རྗེ་འཁོར་ལོ་པདྨ་རྒྱ་གྲམ་དང་། །
རལ་གྲི་བཀྲ་ཤིས་རྫས་རྟགས་སྣ་ཚོགས་རིགས། །
རབ་མཛེས་བསམ་ཡས་ལྷ་ཡིས་དཀྱིལ་འཁོར་བཞིན། །
རྟེན་དང་བརྟེན་པའི་རང་བཞིན་ཨ་ཧོ་རྨད། །

མི་ཡུལ་དག་གཙང་ལྷ་ཡུལ་འཕོས་པ་བཞིན། །
བརྗིད་ཉམས་ཡིད་འོང་དགའ་སྤྲོ་ཁེངས་པའི་གནས། །
ཕྱི་ནང་གསང་བའི་བདེ་སྐྱིད་ཀུན་འཛོམས་པའི། །
ཀུན་བཟང་ཆོས་ཀྱི་དགའ་ཚལ་ཨེ་མ་ཧོ། །

གཡུ་ལྗོངས་སྣུམ་པའི་ནོར་འཛིན་ཆེན་པོ་རུ། །
ཕྱོགས་རྣམས་མདངས་གསལ་དཔལ་གྱིས་རབ་ཏུ་མཛེས། །
ཡུལ་གྲོང་གླིང་བཞི་གླིང་ཕྲན་མཐའ་ནས་བསྐོར། །
རི་རྒྱལ་ལྷུན་པོར་གསེར་རིས་བསྐོར་བ་བཞིན། །

དབུས་སུ་ཀུན་བཟང་རྒྱལ་བའི་སྒྱུ་འཕྲུལ་གླིང་། །
ཤར་དུ་སྒྲིབ་བྲལ་རྡོར་སེམས་ཐར་པ་གླིང་། །
ལྷོ་རུ་གང་འདོད་དཔལ་ཡོན་ཀུན་དགའ་གླིང་། །
ནུབ་ཏུ་གར་དབང་བདེ་ཆེན་ཡེ་ཤེས་གླིང་། །

བྱང་དུ་ཕྱོགས་ལས་རྣམ་རྒྱལ་ལྷུན་གྲུབ་གླིང་། །
དེ་བཞིན་ཌྰཀྐིའི་ཡེ་ཤེས་མཚོ་རྒྱལ་གླིང་། །
སངས་རྒྱས་ཡེ་ཤེས་སྒྲ་སྒྱུར་ལོ་ཙྰ་གླིང་། །
མདོ་སྔགས་ཕྱིན་དྲུག་ཨེ་ཝྃ་ཆོས་སྨན་གླིང་། །

གླིང་རྣམས་གཙང་ཞིང་འཁོར་ཡུག་དྲི་བཟང་ཁྱབ། །
དངས་པའི་ཆུ་ཀླུང་དག་ཀྱང་རྒྱ་མཚོར་འབབ། །
བཀྲག་མདངས་རབ་འབར་ཀུན་བཟང་ཆོས་ཀྱི་གནས། །
ཉི་ཟླའི་འོད་སྣང་མི་འབྲལ་འགྲོག་ཡུན་རིང་། །

ཆོས་དཔལ་རིག་གཞུང་མི་ཉམས་དར་རྒྱས་ཤིང་། །
ཟས་གོས་ལོངས་སྤྱོད་མི་ངལ་འཚོ་རྟེན་བཟང་། །
ཆོས་སྲིད་རིན་ཆེན་འབྱུང་བའི་བསྟི་གནས་སོ། །
ཅི་འདོད་ཚོང་ཟོང་དག་ཀྱང་གྲངས་མང་བས། །

ཡུལ་རྣམས་དར་ཞིང་མི་རྣམས་བདེ་སྐྱིད་འཕེལ། །
དྲན་བདེན་བྱམས་བརྩེ་ཞི་བདེའི་གྲོང་ཁྱེར་ཞེས། །
ཕན་བདེའི་རིན་ཆེན་ཕྱོགས་བཞི་ཀུན་ཏུ་གྲགས། །
གསེར་ཀླུང་ཆུ་བོ་ཤར་ནས་ནུབ་ཏུ་འབབ། །

ཕུ་ན་སྦས་ཡུལ་བཙན་སྒོ་དམར་པོ་ཡོད། །
ར་ན་སྤང་ཐང་མེ་ལོང་བཤམས་འདྲ་དང་། །
མདའ་ན་གཡང་དཀར་གླང་གི་ཕྱུགས་རས་རྒྱན། །
སྨན་ཤིང་མེ་ཏོག་འབྲས་བུའི་སྣ་ཚོགས་མོད། །

ས་ཆུ་མེ་རླུང་འབྱུང་བཞིའི་གནོད་པ་ཉུང་། །
ཡུལ་ཁམས་ཡངས་ཤིང་ལོ་ཐོག་སྣ་དགུ་འཁྲུངས། །
ཀུན་བཟང་མཆོད་རྟེན་ཕྱོགས་མཚམས་གཞི་བདག་རིགས། །
ཡུལ་ལྷའི་མཆོག་ཀྱང་གཞན་ལས་འཕགས་པ་ལགས། །

ཝྰ་ཡེལ་གླང་ཆེན་འགྱིང་རིའི་ལུང་པ་ནི། །
ཨེ་ཝྃ་ཕྱག་རྒྱའི་དབྱིབས་ལྟར་ཟླུམ་ཞིང་མཛེས། །
གྲོང་རྣམས་དར་ཞིང་ཡུལ་འཁོར་ཤིན་ཏུ་མང་། །
སང་གྷ་རཀྵ་ཏ་ཡི་སྒྲུབ་གྲྭ་ཡོད། །

ཕུ་ལ་ཨེ་ཝྃ་ཕྱག་ཆེན་དངོས་གྲུབ་གནས། །
ར་མཚམས་དགོན་པའི་གནས་ཀྱིས་ར་བ་བསྐོར། །
མདའ་ན་བྲག་རྫོང་འཇིགས་སུ་རུང་བ་དང་། །
ཆུ་བྲག་འཐབ་པའི་སྒྲ་ཆེན་གནམ་ས་འགེངས། །

བསིལ་དྲོད་མཉམ་པའི་ཝ་ཡེལ་རྒྱལ་ཁབ་འདིར། །
རྩྭ་སྨན་བཅུད་ཆེ་རྐང་འགྲོས་གཞན་ལས་འཕེལ། །
ཤིང་རྣམས་འབྲས་བཟང་ནགས་ཚལ་ཕུན་སུམ་ཚོགས། །
ནད་རིགས་ཉུང་ཞིང་ཡུལ་རྣམས་ཉམས་དགས་འཚོ། །

འགལ་རྐྱེན་མི་མཐུན་རྐྱེན་ངན་བྱུང་བའི་ཚེ། །
དགུ་དགུ་དགུ་ལ་ཨང་རྟགས་གཏོང་བ་ན། །
སྨན་པའི་རླངས་འཁོར་ཀི་སྒྲ་སྒྲོགས་བཞིན་དུ། །
སྐད་ཅིག་མི་འགྱིང་དེ་མ་ཐག་ཏུ་སླེབས། །

སྨན་དང་ནད་གཡོག་བྲེལ་བའི་བྱམས་བརྩེ་ཅན། །
རང་ལས་གཞན་གཅེས་གནང་བའི་ཉེན་སྐྱོབ་པས། །
ལུས་སྲོག་ཕོངས་མེད་སྲུང་བའི་ར་མདའ་མཛད། །
འཆི་བདག་དུས་བབས་མ་གཏོགས་འཇིགས་ལས་སྐྱོབ། །

དབྱིན་ཡུལ་ཝ་ཡེལ་འཐབ་སའི་རྒྱལ་ཁང་དང་། །
རྒྱལ་རྗེ་གདུང་རབས་ཆད་པའི་ལོ་རྒྱུས་དག །
རྒྱ་བོད་འདས་ད་མ་འོངས་འདི་བཞིན་ན། །
བོད་ལ་སྐྱིད་པའི་ཉི་མ་འཆར་བར་ངེས། །

རྒྱལ་དར་ཁྱུང་འབྲུག་དམར་པོའི་བ་དན་ཆེ། །
ཕྱོགས་མཚམས་ཀུན་ཏུ་གཡོ་བ་མཐོང་བའི་ཚེ། །
མི་མཐུན་གཡུལ་རྒྱལ་མཐུན་རྐྱེན་ལེགས་འགྲུབ་པའི། །
རྟེན་འབྲེལ་ཞི་རྒྱས་དབང་དྲག་ཕྲིན་ལས་དར། །

ཕུལ་བྱུང་གསེར་ཀླུང་ཤར་གྱི་ཕྱོགས་སུ་བབས། །
ཀུན་བཟང་ཆོས་གླིང་དད་བརྒྱས་ཕྱག་བསྐོར་དང་། །
ལྷུང་ལྷུང་ཆུ་སྒྲ་སྙན་པའི་གླུ་དབྱངས་བཅས། །
ཞི་བདེ་རྒྱ་མཚོ་ཆེན་པོའི་ཀློང་དུ་འདྲེས། །

རྨད་བྱུང་གངས་རིའི་མགུལ་ནས་འོངས་པའི་ཆུ། །
ཆིལ་ཆིལ་རླབས་ཀྱིས་གཉེར་བའི་རྒྱུན་བཟང་ལ། །
ཡང་ཡང་དགའ་བའི་ཉ་སྲིན་ཀླུ་རིགས་ཚོགས། །
མ་ལུས་དུང་བའི་བསུ་མགྲོན་སླེབས་དང་མཚུངས། །

དེ་ན་གཉུག་མར་གནས་པའི་ཞིང་འབྲོག་རིགས། །
རང་དབང་ཅི་དགའ་གཅེར་བུ་རོལ་རྩེད་དང་། །
འོ་འཁྱུད་གང་དགར་སྤྱོད་པའི་རྒྱང་རྒྱུ་རྣམས། །
ཉིན་པར་རྒྱ་མཚོའི་ཚ་གྲང་དཔལ་ལ་རོལ། །

མཆོད་པའི་ཡོན་ཆབ་ཕུལ་ལྟར་མཚེའུ་དང་། །
དྭངས་བསིལ་ཆུ་ཕྲན་གཙང་མའི་ཁྲུས་ཁང་དུ། །
ཝུ་འཕྲེང་འཛིན་པ་རིན་ཆེན་བཻཌཱུར་འམ། །
ཨནྡ་རྙིལ་དང་སྟོན་ཀའི་མཁའ་བཞིན་མཛེས། །

གངས་དང་སྨན་དྲིའི་ཞིམ་པའི་སྐྱེད་ཚལ་དུ། །
སྨན་ཤིང་མེ་ཏོག་ཅན་ནས་ལེགས་འབབ་པའི། །
འཐུང་དང་ཁྲུས་བྱས་ཡོན་ཏན་དཔག་མེད་པ། །
ཆུ་ངོགས་གཞན་ལས་མཆོག་ཏུ་འཕགས་པ་བཤད། །

ནུབ་ཕྱོགས་སི་ཀིའི་ལན་ཞེས་ཡུལ་ཁམས་ནི། །
ཡིད་འོང་མདའ་གཞུའི་དབྱིབས་ལྟར་མཛེས་པ་ལ། །
གྲོང་རྣམས་བདེ་ཞིང་ཕྱོགས་ཀྱི་སྐྱེ་བོ་འདུ། །
ཆུ་བོའི་རྒྱུན་ཡང་ནུབ་ནས་ཤར་ལྷོར་འབབ། །

ཕུ་ན་རྫ་དང་ནགས་རིའི་ཚོགས་མང་ཞིང་། །
བར་དུ་འབྲུ་མང་སྨན་ཤིང་ལོ་འབྲས་འཕེལ། །
མདའ་ན་འབྲུ་ཞིང་བ་གླང་རྟ་ལུག་སོགས། །
ཞིང་འབྲོག་སི་ཀིན་རིགས་རྣམས་དཔའ་མཛངས་ལྡན། །

འབྲུ་སྣ་ཕུན་ཚོགས་ཇ་ཤིང་བཟང་སྣ་ཚོགས་སྐྱེ། །
ཆང་རིགས་བཟོ་འཕྲུལ་འབྱུང་བའི་བསྟི་གནས་ཞིག །
ལོ་ཟླ་ཞག་ཆང་རིན་ཐང་ཅི་དགོས་དག །
དབུལ་ཕྱུག་དགོས་མཁོ་དང་བསྟུན་ཡོད་པར་གྲགས། །

ཚོང་ཟོང་གྲངས་མང་དར་དང་རས་བལ་དང་། །
ཤིང་དང་ས་ལས་འཁྲུངས་པའི་བཟའ་བཅའ་རིགས། །
རོ་མཆོག་བརྒྱད་ལྡན་དཀར་དམར་ལྡན་པ་དང་། །
བུ་རམ་ཤིང་དང་ཞལ་ཟས་རྣམ་པ་མང་།
 
བྱང་ཕྱོགས་ཡོ་གླིང་རྒྱལ་ཁག་བཅུ་གསུམ་ནི། །
དཔག་བསམ་ལྗོན་ཤིང་ཡལ་འདབ་རྒྱས་པ་ལྟར། །
ཡུལ་ཁམས་དར་རྒྱས་ས་ཕྱོགས་གཟི་བརྗིད་ཆེ། །
དྭངས་པའི་ཆུ་བོ་བྱང་ནས་ལྷོ་ཕྱོགས་འབབ། །


སྟོད་ན་གསེར་ལྡན་ནོའུ་ཝེ་ཨེས་གཏེར་ཡ། །
གངས་རིའི་ཕྲེང་བ་དར་དཀར་ཡོལ་བཞིན་གཏམས། །
མཛེས་པའི་རང་བྱུང་གངས་ཅན་ལྗོངས་ལས་ལྷག །
ཡར་རྒྱས་འཁོར་ཡུག་ལྷ་ཡི་དཀྱིལ་ཐང་བཞིན། །

བར་ན་གྷར་མན་སི་ལོ་ཝ་ཀི་ཡ། །
རི་བྲག་ནགས་ཚལ་ཐང་ཆེན་ཡུལ་གྲོང་སོགས། །
བཟོ་རྒྱལ་མཁས་པས་བཟོས་བཀོད་བཤམས་པ་འདྲ། །
རི་མཐོ་ཐང་ཡངས་ཆུ་བོ་ཤར་དུ་བབས། །

འོག་ཏུ་གྷུ་རིས་སི་པེ་དུར་ཀེ་སོགས། །
ཞི་བདེའི་རོལ་རྩེད་མཁས་པ་གྲགས་པའི་ལྗོངས། །
ཡུལ་མི་མཆོག་ཏུ་རིགས་བཟང་དགའ་འོས་པའི། །
ཚ་བའི་རྩི་ཤིང་རྒྱས་པའི་རི་གྲོང་ལེགས། །

ཆོས་རྒྱུད་ཡེ་ཤུའི་ལྷ་ཁང་གྲངས་མང་བ། །
མཚམས་རེར་དངུལ་དང་གཞུང་གི་ལས་ཁང་བྱས། །
ཆོས་རིག་འཛིན་སྐྱོང་སྤེལ་བའི་བཞིན་བཟང་དག །
མཐོང་ན་དགའ་བའི་འཛུམ་དང་དྭངས་པ་འདྲེན། །

ཁྱི་དང་བྱི་ལ་སྲོག་ཆགས་བྱམས་སྐྱོང་དང་། །
རི་རྒྱ་རྔོན་ཁྲིམས་དགྲ་ཇག་ཆོམ་པོ་མེད། །
སྤྲང་པོ་རྐུན་མའི་གནོད་འཚེ་ཤིན་ཏུ་ཆུང་། །
རྒྱུད་འཇམ་འགྲོག་ན་བདེ་བའི་མཁས་པ་མང་། །

འཚེ་མེད་ཞི་བདེའི་ལུང་བ་ངོ་མཚར་གནས། །
ལྷ་མིའི་ཆོས་ལ་གུས་བཀུར་མཆོད་པའི་གྲོང་། །
ཚེ་འདིར་སྡེ་བཞིའི་ཕུན་ཚོགས་དཔལ་འབར་བའི། །
ཡོ་གླིང་སྲིད་པའི་གྲོང་ཁྱེར་བླ་མ་མེད། །

སྙིང་རྗེར་རྨོངས་པར་གནོད་འཚེའི་སྡུག་བསྔལ་དབེན། །
དབུལ་ཆེའི་སྤྲང་པོར་ལྟོགས་སྐོམ་སྡུག་བསྔལ་དབེན། །
དབང་མེད་བཙོན་རར་གནར་གཅོད་སྡུག་བསྔལ་དབེན། །
དབེན་པ་གསུམ་ལྡན་ཞི་བདེའི་ཞིང་ཁམས་ལགས། །

ཉེ་འཁོར་དབྱིན་ཇིའི་རྒྱལ་མོའི་ཡུལ་གླིང་ཆེ། །
གསེར་དངུལ་རྡོ་རྗེ་ཕ་ལམ་ལས་གྲུབ་པའི། །
ཕྱི་ནང་བཀོད་པའི་འོད་ཟེར་སྟོང་འཕྲོ་ཞིང་། །
མིག་འཕྲུལ་སྒྱུ་མའི་བལྟད་མོ་མཚར་དུ་དངར། །

དབྱར་དུས་ཞི་བའི་སྤྲིན་ཚོགས་ཟློས་གར་འཇོ། །
ཆར་བཟང་དུས་སུ་བབས་པའི་ལོངས་སྤྱོད་དང་། །
འབྲུ་དྲུག་ལེགས་སུ་སྨིན་པའི་འབྲས་བུ་ལས། །
དགའ་བའི་གློག་ཕྲེང་སྙན་པའི་འབྲུག་སྒྲ་སྒྲོགས། །

སྟོན་དུས་མདངས་བཟང་མཛེས་པའི་རི་ངོགས་སུ། །
སྨན་ཤིང་མེ་ཏོག་འབྲས་བུའི་ཚོགས་སྨིན་པས། །
ལྷ་ཡི་སྐྱེད་ཚལ་མི་ཡུལ་འཕོས་པ་བཞིན། །
ཀུན་ནས་མཛེས་པའི་རང་བཞིན་འདི་ལ་གཟིགས། །

དགུན་དུས་ལྷུན་པོ་གངས་རིའི་ན་གཟའ་ཅན། །
ཁ་བའི་གོས་དཀར་བཟང་པོས་གཡོགས་པ་ནི། །
ཤེལ་དཀར་འོད་ཀྱི་རི་བོས་མཛེས་པའམ། །
ཀུ་མུད་ཚལ་དུ་སྟོན་ཟླ་ཤར་དང་མཚུངས། །

མཚམས་རེ་རི་ལུང་དུང་གི་ཅོད་པན་ནམ། །
པདྨ་དཀར་པོའི་ཐོད་ཕྲེང་རྒྱན་པ་བཞིན། །
ས་གཞི་རི་ཀླུང་དངུལ་གྱི་སྐེད་རགས་ཅན། །
རབ་དཀར་ངང་ཚོགས་ལྷོ་རུ་བསྐྱོད་དང་མཚུངས། །

དཔྱིད་དུས་རྩི་ཤིང་ས་དྲོད་རྒྱས་པའི་ཚེ། །
ལྷུན་སྟུགས་ནགས་ཚལ་མེ་ཏོག་དྲ་བས་གཡོགས། །
རྩི་སྨན་མེ་ཏོག་སྡོང་པོ་ཁ་འབུས་ཤིང་། །
དྲི་ཞིམ་སྤོས་ངད་ལྡན་པས་ཕྱོགས་ཀུན་ཁྱབ། །

ལྷན་སྐྱེས་ནོར་འཛིན་རིན་ཆེན་ལྷུན་པོ་ལ། །
རིག་འཕྲུལ་རྩལ་གྱིས་བདག་སྐྱོང་ལེགས་གནང་བས། །
ས་ཆུ་རི་ཀླུང་རྩ་ཐང་བཀྲག་མདངས་འབར། །
དུག་རྡུལ་དང་བྲལ་མཁའ་རླུང་གཙང་མ་རྒྱུ། །

ནགས་ཚལ་སྨན་ཤིང་མེ་ཏོག་ཆུ་གཙང་དང་། །
ནེ་གསིང་སྨན་ལྗོངས་དུ་མས་རབ་བརྒྱན་ཞིང་། །
གྲོང་དགོན་ས་གཞི་དག་ཀྱང་རབ་ཏུ་མཛེས། །
གནམ་ས་བར་དུ་ཉི་འོད་རྒྱུན་རིང་གནས། །

ཁྱད་པར་ཀུན་བཟང་ཆོས་ཀྱི་དགའ་ཚལ་འདིར། །
དབྱར་དགུན་སྟོན་དཔྱིད་ཚ་གྲང་ཕལ་ཆེར་མཉམ། །
འགལ་རྐྱེན་དབེན་ཞིང་མཐུན་རྐྱེན་སྒྲུབ་སླ་བས། །
ཏིང་འཛིན་ཤེས་རབ་ངང་གིས་འཕེལ་བར་འགྱུར། །

རིག་འཛིན་ཆེན་པོ་དྲག་སྔགས་གླིང་པས་ཀྱང་། །
ནུབ་ཕྱོགས་ཀུན་བཟང་ཆོས་ཀྱི་དབེན་རིར་བསྟེན། །
གྲོལ་བ་བྱེ་མའི་གྲངས་དང་མཉམ་པ་དང་། །
རིག་འཛིན་འདུས་སྡེས་ནོར་འཛིན་འགེངས་འགྱུར་གསུངས། །

ཏིང་འཛིན་ངང་གིས་དམ་ཆོས་གོང་འཕེལ་ཞིང་། །
དམ་གཙང་རིག་པ་འཛིན་པའི་གྲོང་ཁྱེར་འདི། །
མཆེད་ལྕམ་ཡིད་དགའ་དག་པའི་ཞིང་ཁམས་བཞིན། །
ཐོས་བསམ་སྒོམ་པའི་བཤད་སྒྲུབ་ཕྲིན་ལས་དར། །

བླ་མས་ལུང་བསྟན་ཟབ་གཏེར་བྱིན་རླབས་འབྱོར། །
ཡི་དམ་ཞལ་གཟིགས་སྒྲུབ་པའི་རྟགས་མཚན་མཐོང་། །
མཁའ་འགྲོ་དམ་ཅན་རྒྱ་མཚོའི་ཚོགས་འདུ་ལས། །
བར་ཆད་ཀུན་སེལ་དངོས་གྲུབ་ཐོབ་པའི་གནས། །

ཕྱོགས་མཚམས་རིན་ཆེན་གཏེར་གྱི་བུམ་བཟང་སྦས། །
རྒྱལ་བསྟན་བཤད་སྒྲུབ་འཛིན་སྐྱོང་སྤེལ་བའི་ཕྱིར། །
སྨོན་ལམ་གསོལ་འདེབས་ཚུལ་བཞིན་བགྱིས་པའི་མཐུས། །
བཀའ་གཏེར་གདམས་པའི་བསྟན་པ་རྒྱས་གྱུར་ཅིག
དེང་སང་དུས་ངན་སྐྱེ་བོ་མི་བསྲུན་པས། །
ཆོས་བརྒྱད་ཆགས་སྡང་རྨོངས་པའི་བསྟན་པ་ཡིས། །
རྒྱལ་བསྟན་རིན་ཆེན་ནང་ནས་དཀྲུགས་པའི་ཚེ། །
བྱང་ཆུབ་འདོད་རྣམས་སྒྲུབ་པའི་གནས་འདིར་ཕེབས། །


དཀོན་མཆོག་དད་ལྡན་ཐར་པ་འདོད་རྣམས་ཀྱིས། །
རང་ཡུལ་ཞེན་ཆགས་རབ་སྤངས་འདིར་བྱོན་ནས། །
ཚེ་གང་ཟབ་མོའི་དེ་ཉིད་བསྒྲུབ་པའི་ཕྱིར། །
ཆོས་བཞིན་མཛད་རྣམས་ས་སྤྱོད་ཞིང་འདིར་ཤོག །

ཉན་རང་དགྲ་བཅོམ་འདོད་པའི་ཐར་པ་དང་། །
བྱང་ཆུབ་སེམས་མཆོག་ལྡན་པའི་སེམས་ཆེ། །
གསང་ཆེན་དེ་ཉིད་མཐོང་བའི་རིག་འཛིན་དག །
ཐུགས་དམ་མ་གཡེལ་ཀུན་བཟང་ཞིང་འདིར་བྱོན། །

གྲངས་མེད་བསྐལ་བ་གོམས་པའི་བསོད་ནམས་དང་། །
དཔག་མེད་བསྐལ་བ་རྒྱ་མཚོའི་ཡེ་ཤེས་ཚོགས། །
མཚུངས་མེད་རྟེན་འབྲེལ་བཟང་པོའི་བདེན་སྨོན་མཐུས། །
འཚེ་མེད་ཀུན་བཟང་ཞིང་དུ་མྱུར་ཕེབས་ཤིག །

སྐལ་བཟང་དད་ལྡན་ཐར་པ་འདོད་པ་ཅན། །
འོད་གསལ་མཐའ་ཡས་རྡོ་རྗེས་བསྐུལ་བའི་ངོར། །
འཛམ་གླིང་སྐྱེ་འགྲོ་ཀུན་གྱིས་ཤེས་པའི་ཕྱིར། །
དོན་གཉེར་སྙིང་གྲོགས་ཐུགས་ཀྱི་རྒྱན་དུ་འབུལ། །

འདིར་སྨྲས་དགེ་བས་བདག་གཞན་འགྲོ་བ་ཀུན། །
ཀུན་བཟང་ཆོས་ཀྱི་དགའ་ཚལ་ལེགས་མཐོང་ཞིང་། །
རིག་འཛིན་རྣམ་བཞིའི་གོམས་པ་མཐར་ཕྱིན་ནས། །
ཀུན་བཟང་རྫོགས་ཆེན་བསྟན་པ་སྤེལ་གྱུར་ཅིག །

ཅེས་པ་རབ་རྒྱན་ཆུ་འབྲུག་ས་ག་ཟླ་བའི་མཁའ་འགྲོ་འདུ་བའི་དུས་ཆེན་དུ་དབྱིན་ཡུལ་ཀུན་བཟང་ཆོས་འཁོར་གླིང་གི་གནས་མཆོག་ཁྱད་པར་ཅན་གྱི་ཉེ་རིང་ཚང་མའི་སྣང་བརྙན་གསལ་བའི་ཞིང་ཁམས་ཀུན་བཟང་ཆོས་གླིང་གི་བཀོད་པ་འོག་མིན་གཉིས་པའི་དགའ་ཚལ་ཞེས་བྱ་བ་འདི་ནི་མདོ་སྔགས་རིག་གནས་ཀུན་ལ་མང་དུ་ཐོས་པའི་མཁན་ཆེན་བླ་མ་འམ་རིག་འཛིན་དཔལ་དགྱེས་པ་རྡོ་རྗེས་དབྱིན་ཡུལ ་བོད་བརྒྱུད་རྣལ་འབྱོར་ཆོས་ཚོགས་ཁང་དུ་གང་ཤར་སུག་ལས་སུ་བགྱིས་པ་དགེའོ། །
ཤྲྰིཿསརྦ་ལོ་ཀ་མངྒ་ལཾ་བི་ཛ་ཡནྟུ།།
·རྩོམ་ཡིག་གོང་མ:བྱང་སེམས་སྤྱོད་འཇུག་ལས་སྡིག་པ་བཤཊ་པའི་ལེའུ།༢
·རྩོམ་ཡིག་འོག་མ:སྤྱོད་འཇུག་ལས་བྱང་ཆུབ་ཀྱི་སེམས་ཡོངས་སུ་བཟུང་བའི་ལེའུ།༣
འདྲ་ཕབ། 】 【 པར་འདེབས།
 འབྲེལ་ཡོད་རྩོམ་ཡིག
འབྲེལ་ཡོད་རྩོམ་ཡིག་མི་འདུག
གསལ་བསྒྲགས།:དོ་དམ་པའི་དགོངས་འཁྲོལ་མེད་ཚེ། གང་འདོད་ལྟར་བསྐྱར་བཤུ་རྒྱག་པའམ་བརྒྱུད་འགོད་སོགས་བྱེད་མི་རུང་། གལ་སྲིད་དྲ་ངོས་སུ་ནོར་སྐྱོན་ཡོད་ན་སྐུ་ཉིད་ཀྱིས་འབྲེལ་གཏུགས་གནང་རོགས། ང་ཚོས་མྱུར་དུ་བཟོ་བཅོས་རྒྱག་ངེས།
 འབྲེལ་ཡོད་དཔྱད་བརྗོད།
 评论者:uFTTnEa0
<a href="https://www.bj-arts.com/">�ۻ���</a>
<a href="https://www.hxxx.net/">��˿������</a>
<a href="https://www.xinhushi.com/">�����ع�</a>
<a href="https://www.job114.net.cn/">����������</a>
<a href="https://www.qqhru.net/">����������</a>
发表时间:2018/12/5 22:44:16 [来自: 112.5.248.254]

 评论者:m.bj-arts.com
�ۻ���https://m.bj-arts.com
��˿������https://www.hxxx.net
ȯ֮��https://www.daxiangjiao1234.com
发表时间:2018/11/22 23:52:57 [来自: 112.5.248.152]

 评论者:9GrMysGs
https://www.hxxx.net/
https://www.qqhru.net/
https://www.bj-arts.com/index/cate/cid/12.html
https://www.bj-arts.com/index/cate/cid/13.html
https://www.bj-arts.com/index/cate/cid/14.html
https://www.xinhushi.com/
https://www.fs118.com/
发表时间:2018/11/16 0:24:04 [来自: 112.5.248.229]

འབྲེལ་ཡོད་དཔྱད་བརྗོད 102 འདུག,མིག་སྔར་རྩོམ་ཡིག་གསར་པ 3 འདུག    [དཔྱད་བརྗོད་མང་པོར་བལྟ་བ།] [དཔྱད་བརྗོད་སྤེལ་བ།]  
འབྲེལ་གཏུག་བྱ་ཡུལ། | ཐོ་འགོད་གསལ་བཤད། | མཛའ་འབྲེལ། | འགྲུལ་པའི་ཆེམས།
པར་དབང་། Copyright © 2007-2008 ཚངས་དབྱངས་དྲ་ཚིགས All Rights Reserved.
བོདICPཨང་།    ལག་བསྟར་དུས་ཚོད།226.56MS